Revised Common Lectionary (Semicontinuous)

⁶ Seman tel, walmukweptuk Timoteo ka nikan wan techneshtilijtuk ipanpa ne anmutayulmatilis wan anmutetasujtalis, wan techilwijtuk ka senpa antechelnamikit yek, wan ankielewiat techitat, ken tejemet nusan tikelewiat. ⁷ Yajika timumatit yek anmupanpa, nukniwan, melka techpachuat wan techpitziniat, ipanpa ne anmutayulmatilis, ⁸ ika ashan kenhayuk tiyujyultuk asu anmejemet nakat iwan ne Tajtzin.

⁹ Ken tiweliskiat tiktashtawiat ne Teut, ken tiwelit tikilwiat padiush ka anmumaku ipanpa muchi ne tupakilis kwak tipajpakit anmupanpa iishpan ne Teut? ¹⁰ Ka tayua wan ka tunal, sujsul nimutajtawelia iwan ne Teut ma weli nimetzinhita wan ma weli tami nitamachtia tay kinekiuk ipal ne anmutayulmatilis. ¹¹ Ma kichiwa ne Teut, wan Tuteku, wan ne tutajtzin Yeshu, ma techwika ne tuuj anmutech. ¹² Ma kichiwa ne Tajtzin ma tepewi wan samawa ne anmutetasujtalis sejse iwan sejse wan iwan muchi, ken ne tutetasujtalis anmuwan, ¹³ pal kichiwa ma chikawayakan ne anmuyujyulu, wan ma te kipiakan tatka tay teyek ipal ne Teut, tuteku, kwak ajsi ne tutajtzin Yeshu iwan muchi ne yejyek. Amen.