Revised Common Lectionary (Semicontinuous)

Dee 116 Psalm

¹ Ekj ha däm Herr Gott leef wiels Hee miene Stem un Jebäd jeheat haft.

² Wiels Hee sien Ua dol jebeajcht haft no mie, woa ekj uk aunroope enn miene Doag.

¹² Waut saul ekj däm Herr Gott trigj jäwe fa aul siene Jenotte to mie?

¹³ Ekj woa daut Radunks Kuffel nehejcht häwe, un ekj woa däm Herr Gott sien Nome aunroope.

¹⁴ Ekj woa mien Fespräakje to däm Herr Gott nu betole enn dee Jäajenwoat fonn sien Folkj.

¹⁵ Siene Heilje äa Doot es Weatfoll enn däm Herr Gott siene Uage.

¹⁶ O Herr Gott, nu sie ekj werkjlijch dien Deena, diene Deenarin äa Sän; du hast miene Baunde loos jemoakt.

¹⁷ Ekj woa to die opfre met daut Dank Opfa, un woa däm Herr Gott aunroope.

¹⁸ Ekj woa mien Fespräakje to däm Herr Gott nu betole enn dee Jäajenwoat fonn sien Folkj,

¹⁹ enn dän Fäahoff fonn däm Herr Gott sien Hus; enn diene Med. O Jerusalem. Preist däm Herr Gott.

7 Donn fesaumelde dee Farisaea, en walkje fonn dee Schreftjeleade fonn Jerusalem sikj omm am.

² En aus see sage daut walkje fonn dee Jinja Broot aute met onnreine Henj, daut heet, see haude sikj nich eascht de Henj jewosche,

³ - dan dee Farisaea en aul dee Jude aete nich wan see nich eascht aeare Henj foaken wausche, en hoole faust aun dee Ellteste aeare Faeaschrefte.

⁴ En wan see fom Moakjtplauts kome, bespretse see sikj eascht ferem aete, en soo ha see fael feschiedne Dinje dee see jekraeaje ha to hoole, soo aus Kuffels, en Jefaesse, en Messinj Kjaetels utwausche; -

⁵ en dee Farisaea en Schreftjeleade fruage am: "Wuaromm waundle diene Jinja nich no dee Ellteste aeare Faeaschrefte, en aete Broot oone aeare Henj to wausche?"

⁶ En hee saed to an: "Enn Woarheit haft dee Profeet Jesaja aewa junt Heichla jeprofitseit, soo auset jeschraewe steit: 'Dise Mensche eare mie met aeare Leppe, oba aea Hoat es wiet auf fonn mie;

⁷ fejaefs baede see mie aun, en leare bloos Menschefaeaschrefte'.

⁸ Jie ha Gott siene Jeboote felote, en hoole Mensche aeare Faeaschrefte."

⁹ En hee saed to an: "Seeha fein ha jie Gott sien Jeboot auntsied jesat, soo daut jie june Faeaschrefte hoole kjenne.

¹⁰ Dan Mooses saed: 'Du saust dien Foda en diene Mutta eare', en, 'waea bees raet fonn sien Foda oda siene Mutta saul dootjemoakt woare'.

¹¹ Oba jie saje: 'Wan en Maun to sien Foda oda to siene Mutta sajcht: 'Korban', daut heet, daut es no Gow, woont jie aundasch wudde fonn mie kjriee',

¹² dan lot jie am wieda nusscht fa sien Foda oda siene Mutta doone,

¹³ en doaderch moak jie Gott sien Wuat to nusscht derch dee Faeaschrefte dee jie jekjraeaje ha; en soo doo jie met fael aenlijet."