Revised Common Lectionary (Semicontinuous)

Dee 83 Psalm

En Leet. En Psalm von Asaf.

¹ O Gott, hool daut stellet nijch to die selfst; sie nijch oone Räd; sie nijch stel, O Gott..

² Dan see, diene Fiend doone brelle, un soone dee Die hause ha äa Kopp oppjehaeft.

³ Dee ha Rot jenomen jäajen dien Folk; dee ha jeplont jäajen diene festoakne.

⁴ Dee ha jesajcht: "Komt, wel wie dän aufschniede fonn ne Natsjoon to senne, soo daut dee Nome Iesrael niemols wada jebruckt woat."

⁵ Dan dee ha toop met een Hoat jeplont; dee ha en Bunt jemoakt jäajen Die;

⁶ dee Tselte fonn dee Edomiete un dee Iesmaeliete; Moab un Hagareen;

⁷ Gebal, un Ammon un Amalekj; Filiste met dee Tiarus Ennwone.

⁸ Assieria haft sikj uk met an ennjeschlote, dee weare däm Lot siene Säns soo aus en Oarm. Selah.

⁹ Doo to am soo aus to Midian, soo aus to Sisera, soo aus to Jabin bie dän Stroom Kischon.

¹⁰ Dee worde fenijcht bie Endor; dee worde soo aus Mest fa dee Ead.

¹¹ Moak äare Ferschte soo aus Oreb en Zeeb, un soo aus Zeba un Zalmmuna un aul äare Ferschte

¹² dee säde: "Wel wie Gott siene Weid besette fa onns selfst."

¹³ O mien Gott, moak dän soo aus kjriselstoff, soo aus Stoppel fer dän Wint.

¹⁴ Soo aus daut Fia en Woolt dol brennt, un dee Flaum dee Boaj aunstekjt,

¹⁵ Soo joag dän hinjaraun met dien groota Wint, un engst dän met dien Storm.

¹⁶ Fel äa Jesejcht met Schaund, un dee woare dien Nome seakje, O Herr Gott.

¹⁷ Lot an sikj schäme un fa emma Angst ha; jo, lot dän fewert senne, un omkome.

¹⁸ Un lot an weete – Dien Nome es Dee Herr Gott – daut Du auleen dee Aulahejchsta es äwa dee gaunse Ead.

3 Jie onnfestendje Galata, waea haft junt betsaubat? fer june Uage es Jesus Christus faeajemolt worde aus dee Jekjrietsichta.

² Dit wel ekj jearen fonn junt weete: Ha jie daen Jeist jekraeaje derch dee Jesatseswoakje, oda derch dee Praedicht fomm Gloowe?

³ Se jie noch soo domm? Em Jeist funj jie aun, woa jie nu dan derch daut Fleesch follkome woare?

⁴ Ha jie soo fael fejaefs jelaede? Wanet werklich fejaefs es!

⁵ Dee, dee junt daen Jeist hanreakjt, en kjraftje Wunnda mank junt deit, deit hee daut derch de Jesatses Woakje? oda derch dee Praedicht fomm Gloowe?

⁶ So aus Obraum Gott jleewd, en am wea daut too jeraeakjent aus Jerachtichkjeit.

⁷ Weet dan, daut dee, dee fomm Gloowe sent, sent Obraum siene Kjinja.

⁸ Dee Schreft sach ferut daut Gott dee Heide derch daem Gloowe jeracht moake wudd, en praedjd to Obraum dee goode Norecht daut: "Enn die woare aule Heide jesaeajent woare".

⁹ Aulso dee, dee jleewe, sent met Obraum jesaeajent, dee Gloowe haud.