Revised Common Lectionary (Semicontinuous)

Dee 125 Psalm

En leet fonn nehejcht gone.

¹ Soone dee enn däm Herr Gott fetrühe selle soo senne aus dee Boajch Zion; daut saul nijch jescheddat woare; daut blift fa emma.

² Dee Boaj sent runt omm Jerusalem, un dee Herr Gott es runt omm sien Folkj fonn nu aun un fa emma.

³ Dan dee Beese äa Tsepta saul nijch opp dee Jerajchte äare Städ senne, soo daut dee Jerajchte nijch woare äare Henj opp Gottlooset laje.

⁴ Doo Goot, O Herr Gott, to dee Goode, un to dän dee Opprejcht sent enn äa Hoat.

⁵ Un soone dee auntsied dreihe no äare kromme Wäaj, dän woat dee Herr Gott wajch leide met soone dee Beeset aungone. Mucht Fräd opp Iesrael senne.

1 Dee Sprejchwead fonn Salamo, Doft sien Sän, Kjeenijch enn Iesrael.

² Weisheit un Unjarejchte to kjane; dee Wead fonn Festentnis to festone;

³ Unjarejchte to kjriehe enn Fäabedocht, Jerajcht, Jerejcht un Opprajchtijchkjeit;

⁴ En Senn to jäwe to dee Jugent, Wissenschoft un Fäasejcht to däm junja Maun.

⁵ – dee Weisa heat un nemt too enn Leare; un soone dee festone woare aunjeseene aus Weis –

⁶ En Sprejchwuat to festone un en onkloaret Weadabilt; dee Weise äare Wead, un dän äa Rotsel.

⁷ Däm Herr to ferjchte es dee Aunfank fonn Weisheit; Noare feachte Weisheit un Unjarejchte.

⁸ Mien Sän, horjch no dien Foda sien Unjarejchte; un doo nijch diene Mutta äa Ennleare felote;

⁹ dan dee woare en Utputsdinkj fonn Jnod senne romm dien Kopp, un Kjäde romm dien Jnekj.

¹⁰ Mien Sän, wan Sinda die locke, sie nijch wellijch.

¹¹ Wan dee saje: "Komm met onns met, well wie heemlijch luare no Bloot; well wie heemlijch luare dee Onschuldje to jriepe oone Uasoak;

¹² Well wie dän läwendijch oppschlucke soo aus daut Grauf, un dän dee rauf gone enne Kul,

¹³ Wie woare aulahaunt fa weatfolle Sache finje; wie woare onnse Hiesa felle met Raup;

¹⁴ Komm met onns met; wie woare aula toop eene Jeltausch ha."

¹⁵ Mien Sän, go nijch met an met enn äa Wajch! Hool dien Foot wajch fonn äa Stijch;

¹⁶ dan äare Feet ranne Beeset hinjaraun, un dee spoode sikj Bloot to fejeete.

¹⁷ Dan daut Nat woat emm sonnst utjespreet wan jieda Foagel daut seene kaun.

¹⁸ Un dee luare emm Jeheeme fa äa eajnet Bloot; dee schlikje sikj romm jeheemlijch fa äare eajne Seele.

¹⁹ Soo sent aul dän äare Wäaj dee beeset Loon kjriehe; daut nemt däm Eajendeema siene Seel wajch.

2 Doaromm ha jie kjeene Entschuldjunk, jie Mensche, wan jie aundre rechte, wiel jie doone de naemlije Dinje dee jie enn aundre rechte, en fedaume junt selfst doamet.

² Wie weeta oba daut Gott sien Uadeel enn Woarheit es aun soone dee soont aungone.

³ En denkst du, du Mensch, daut wan du aundre rechte deist dee soont doone, oba daut naemlijet deist, daut du Gott sien Uadeel woascht febie jlepe?

⁴ Oda fe-achst du Gott siene rikje Leeftolichkjeit, en daut hee so goot to die es, uk siene groote Jedult, weetst oba nich daut hee die doaderch no de Buesse leide deit?

⁵ Oba doano aus dien hoadet en onnbuessfoadjet Hoat es, saumelst du fa die selfst Oaja jaejen daen Dag wan Gott sien Oaja woat jeoppenboat woare enn Gott sien jerachte Jerechtsdag,

⁶ dee en jiedrem woat doano fejelte aus siene Woakje sent;

⁷ daut eewjet Laewe fa dee, dee emm goodet doone aunhoole, en Harlichkjet, Ea, en daut waut nich fejenklich es, seake;

⁸ oba dee, dee no aeare eajne Ea seakje en de Woarheit nich jehuarsaum sent, en leewa de Onnjerachtichkjet jehuarsaum sent, - kjeene Jnod, en sien Oaja.

⁹ En jieda dee Beeset hinjaraun jeit, woat Triebsaul en Oaja habe, easchtens de Jude en uk de Grieche

¹⁰ Oba Ea, Harlichkjet, en Fraed fa aul daen, dee goodet doone, easchtens de Jude en uk de Grieche;

¹¹ wiels bie Gott es kjeen aunseene de Person.;