Revised Common Lectionary (Semicontinuous)

Dee 41 Psalm

To dän Haupt Musikaunt; en Psalm fonn Doft.

¹ Jesäajent es dee, dee weis haundelt to dee Oame; dee Herr Gott woat am rade enn dän beesa Dach.

² Dee Herr Gott woat wajchte äwa am un am aum Laewe hoole; hee saul jesäajent senne oppe Ead; un du woascht am nijch aun siene Fiend äwejäwe.

³ Dee Herr Gott woat am stoakj moake opp sien Krankebad, du woascht am moot too spräakje enn siene Krankheit.

⁴ Ekj saed: "O Herr Gott, sie mie jnädijch; heel miene Seel, dan ekj ha jesindijcht jäajen die."

⁵ Miene Fiend räde Beeset jäajen mie, un saje: "Waneeha woat hee stoawe, un sien Nome feschwinje."

⁶ En wan hee kjemt mie to seene, dan rät hee nutslooset; sien Hoat saumelt Gottloosijchkjeit to sikj selfst; hee jeit rut un rät.

⁷ Aul dee, dee mie hause, fuschle toop jäajen mie; see plone Beeset jäajen mie.

⁸ See saje: "Waut Beeset es opp am utjegote, un dee sikj dol lajcht woat nijch wada oppstone."

⁹ Soogoa mien Frint, enn däm ekj Toofetruehe haud, dee fonn mien Broot aut, haft siene Hack jäajen mie oppjehowe.

¹⁰ Oba du, O Herr Gott, sie mie jnädijch, un häw mie opp un ekj woa dän trigj tole.

¹¹ Derjch dit weet ekj daut du en Fejnjeaje hast enn mie, wiels mien Fient deit sikj nijch freihe äwa mie.

¹² Un enn miene Follstendijchkjeit deist du mie opprajcht hoole, un du deist mie opp emma fer dien Jesejcht hanstale.

¹³ Jesäajent es Iesrael äa Herr Gott fonn Eewijchkjeit bott Eewijchkjeit. Amen un Amen!

³⁸ En hee jinkj ut dee Sienagoog erut en jinkj enn Siemoon sien Hus enenn. En Siemoon siene Schweamutta haud huaget Feeba jekraeaje, en see fruage am waeajen aea.

³⁹ Hee stunnt aewa aea en befool daut Feeba, en daut Feeba feleet aea.

⁴⁰ Aus de Sonn unjajinkj brochte de Mesche aul dee, dee feschiedenste Krankheite haude no Jesus, en hee laed siene Henj opp an en heeld an.

⁴¹ Uk Diewels kjeeme ut fael Mensche rut, schreaje en saede: "Du best Gott sien Saen!" Oba hee bedrood an en leet an nich raede, wiel see wiste daut hee de Christus wea.