Revised Common Lectionary (Semicontinuous)

11 Niknekiskia ma shikselikan achi nutzuntekayu. Shinechselikan! ² Nimetzinhishpelwia ken se Teut taishpelwia, ika nimetzinnamiktij iwan se anmushulejyu ma nimetzinhishpanu ipal ne Mawaltijtuk ken se chipawak siwapil. ³ Nimajmawi ika ken ne kuat kishijshikuj Jawa iwan se itajpewal, weli muishpulua ne anmutamatilis pal ankiajkawat ne kanawakayu wan ne chipawakayu ipal ne Mawaltijtuk. ⁴ Ika kwak se witz wan tanawatia ukse Yeshu ne te titanawatijket, su ankikwit ukse iijiu ne te ankikwijtuyat wan ukse yeknawatilis ne te ankiululujket, ankiseliat yek.

⁵ Nina ka uni tijtitanijtuk tetekia te mas wey inpatiw que naja: ⁶ melka nimele tik ne nupalabraj, tesu tik ne nutamatilis, wan tik muchi tay weli, timetzinneshtilijtiwita.

⁷ Anka nikchijki tay teyek kwak nimutemultij pal anmejemet muajkukiat, wan nimetzinmakak ne yeknawatilis ipal ne Teut wan te antashtawket tatka? ⁸ Nikinhishtilij tumin uksejse sennemit kwak nechmakaket nupatiw pal nitekiti anmupal. ⁹ Wan kwak ninemituya anmutech wan nimunekik, te nimetzinkakasuj pal tatka; ika tay ne nimuneki, ne nukniwan ne walajket Macedonia kalwikaket wan te nimetzintakimiltij ika nimetzintajpia, wan nusan te niaw nimetzintakimiltia ashan. ¹⁰ Ken nemi ne tejkia ipal ne Mawaltijtuk ijtik naja, te niaw nimukawa nimuweymati tik ne tajtal ipal Akaia. ¹¹ Taika? Ika te nimetzintasujta? Ne Teut kimati.

¹² Nikchiwa ijkiuni wan ijkiuni nikchiwas pal te welit kichiwat tatka yejemet ká muweymatit wan kinekit muitat kenhat ken tejemet, ¹³ wan yejemet sema sajsankatitanijtuk; melka tekitit, yejemet tashijshikuanit wan inat ka tijtitanijtuk ipal ne Mawaltijtuk, ¹⁴ wan uni te se pal tishpuyawit, ika nusan ne Tenewani muneshtia ken se tanawatiani ipal tawil; ¹⁵ kiane tel, te tatka su ne itejtekitini nusan muneshtiat ken su tekitinimet ipal tamelakchiwalis. Su ne intekiw teyek, nusan yawi teyek ne intamilis.