Revised Common Lectionary (Semicontinuous)
3 Anka tipewat titaneshtiat senpa ka tiyejyek? Anka timunekit, ken sejseuk, ajamat ne metzinhilwiat ka tiyejyek, o ma anmejemet shikijkwilukan sejse ijkiuni tupal? 2 Anmejemetsan ne tuamaw, ne muijkwilujtuk ijtik ne tuyujyulu pal muchi kishmatit wan kitat; 3 anmuneshtijtiwit ken iamaw ne Mawaltijtuk iwan ne tutekitilis, ijkwilujtuk tesu tik tintaj sute tik ne Iijiutzin ne Teut yultuk, wan tesu ijpak pajpatznaj tet sute ijpak ne tejtepatznaj ipal nakat tik ne tuyujyulu.
4 Tikpiat tayulmatilis ijkiuni ipanpa ne Mawaltijtuk iishpan ne Teut, 5 tesu ika tikpiat tupatiw tusel pal tiyultaketzat tatka ken su tupal, sute ne tupatiw ne Teut techmaka, 6 wan nusan yajaya ne techmakatuk tupatiw pal titekitit ipal ne yankwik sentaketzat: tesu tik amat sute tik Ijiutzin, ika ne amat tamiktia, ne Ijiutzin tayulkwepa.
Ichan Lewi
13 Yaja kiski ukseujti pashalua iten ne at, wan muchi ajsiket itech wan kinmachtij. 14 Wan kwak panuk, kitak Lewi ikunew Halpay tik ne tasentepewayan, wan kilwia:
—Shiwi nuwan.
Wan muketzki wan yajki iwan.
15 Wan seujti mutalij takwa tik ne ikal, wan miak tumintepewani wan tateyekchiwat musentalijket takwat iwan Yeshu wan imujmumachtiani, ika yejemet mijmiak wan yawit katka nujme iwan. 16 Wan kwak ne tajkwiluanimet ipal ne Parishayujmet kitaket takwa inawak ne tateyekchiwat wan ne tumintepewanimet, kilwijket ne mumachtianimet:
—Taika takwa wan ati inawak ne tumintepewanimet wan tateyekchiwanimet?
17 Wan Yeshu kinkakik wan kinhilwij:
—Ne kipiat yek inweyka te munekit tapajtiani, sema munekit ne kukuyat. Inte niwalaj nikinnutza ne kichiwat tay yek asunte ne tateyekchiwat.
18 Ne inmujmumachtiani pal Yojan wan ne Parishayujmet kisejseliat katka mayan; wan walajket kitajtaniliat:
—Taika kisejseliat mayan ne inmujmumachtiani Yojan wan ne Parishayujmet, wan ne mumujmumachtiani inte?
19 Wan Yeshu kinhilwij:
—Ne ikunpalejwan welit kisejseliat mayan kwak ne yawi munamiktia nemiuk intech? 20 Walasket ne tujtunal kwak yajkia ne munti wan kisejselisket mayan tik uni tunal.
21 Te aka kitzuma se takutun kwachti yankwik ijpak ikwajkwach palikman, asu te, ne talilijtuk kishtiliskia ne palikman wan ne tzayantuk mutzayana ukchiupi.
22 Wan te aka kitalia kushushaj yankwik ijtik tajtaijtik palikman pal kwetashti, asu te, ne kushushaj kikelunaskia ne tajtaijtik wan puliwit ne kushushaj wan ne tajtaijtik. Kushushaj yankwik ijtik tajtaijtik yankwik!
Ne Bibliaj Tik Nawat · © 2008, 2012 Jan Morrow