Revised Common Lectionary (Semicontinuous)

^9 (A)Onsaasire, Ayi Mukama, kubanga ndi mu nnaku nnyingi;
    amaaso gange gakooye olw’ennaku;
    omwoyo gwange n’omubiri gwange nabyo binafuye olw’obuyinike.
^10 (B)Obulamu bwange buweddewo olw’obunaku n’emyaka gyange
    ne giggwaawo olw’okusinda.
Amaanyi gampweddemu olw’okwonoona kwange,
    n’amagumba ganafuye.
^11 (C)Abalabe bange bonna bansekerera,
    banneetamiddwa.
Nfuuse ekyenyinyalwa mu mikwano gyange,
    n’abandaba mu kkubo banziruka.
^12 (D)Nneerabiddwa ng’eyafa edda;
    nfuuse ng’ekibumbe ekyatifu.
^13 (E)Buli ludda mpulirayo obwama
    nga bangeya;
bye banteesaako
    nga basala olukwe okunzita.

^14 (F)Naye nneesiga ggwe, Ayi Mukama;
    nga njogera nti, “Oli Katonda wange.”
^15 (G)Entuuko zange ziri mu mikono gyo;
    ondokole mu mikono gy’abalabe bange
    n’abangigganya.
^16 (H)Amaaso go ogatunuulize omuweereza wo;
    ondokole n’okwagala kwo okutaggwaawo.

^55 (A)“Nakoowoola erinnya lyo, Ayi Mukama,
    nga ndi mu bunnya wansi ennyo;
^56 (B)wawulira okwegayirira kwange: toziba matu go
    eri okukaaba kwange.”
^57 (C)Bwe nakukoowoola wansemberera
    n’oyogera nti, “Totya!”

^58 (D)Mukama watunula mu nsonga yange,
    era n’onunula obulamu bwange.
^59 (E)Ayi Mukama, walaba ebibi bye bankola,
    obasalire omusango nga bwe kibagwanira.
^60 (F)Walaba bwe bampalana,
    n’enkwe zaabwe zonna ze bansalira.

⁶¹ Wawulira bye banvuma, Ayi Mukama Katonda,
    n’enkwe zaabwe zonna ze bansalira,
^62 (G)obwama n’ebirowoozo eby’abalabe bange
    bye bantesaako obudde okuziba.
⁶³ Batunuulire mu kutuula kwabwe ne mu kuyimirira kwabwe;
    bannyooma nga bwe bannyimbirira.

^64 (H)Obasasule nga bwe kibagwanira Ayi Mukama Katonda,
    olw’ebikolwa eby’emikono gyabwe.
^65 (I)Osseeko ekibikka ku mitima gyabwe,
    n’ekikolimo kyo kibabeereko.
⁶⁶ Obayigganye mu busungu bwo obazikirize
    ng’osinziira mu ggulu lya Mukama Katonda.