Revised Common Lectionary (Semicontinuous)
Ang Hiwaga ng ating Pananampalataya
14 Umaasa akong makapupunta ako sa iyo sa lalong madaling panahon, ngunit isinulat ko sa iyo ang mga ito 15 upang kung hindi man ako makarating agad ay malaman mo kung paano ang dapat maging ugali ng bawat kaanib sa sambahayan ng Diyos, na siyang iglesya ng buháy na Diyos, haligi at sandigan ng katotohanan. 16 Sadyang dakila ang hiwaga ng ating sinasampalatayanan:
Siya'y inihayag bilang[a] tao,
pinatunayang matuwid ng Espiritu,[b] nakita ng mga anghel.
Ipinangaral sa mga bansa,
sinampalatayanan sa sanlibutan, at iniakyat sa kaluwalhatian.
Babala tungkol sa Pagtalikod
4 Maliwanag na sinasabi ng Espiritu na sa mga huling araw ay iiwan ng iba ang pananampalataya at susunod sa mga mapanlinlang na espiritu at mga turo ng mga demonyo. 2 Ang mga katuruang ito ay pinalalaganap ng mga taong mapagkunwari, sinungaling at may manhid na budhi. 3 Ipinagbabawal nila ang pag-aasawa, gayundin ang ilang uri ng pagkain, mga pagkaing nilikha ng Diyos upang tanggaping may pasasalamat ng mga sumasampalataya at nakauunawa ng katotohanan. 4 Lahat ng nilikha ng Diyos ay mabuti at walang dapat tanggihan, sa halip ay dapat tanggapin na may pasasalamat, 5 dahil ito ay nagiging malinis sa pamamagitan ng salita ng Diyos at ng panalangin.
Ang Bagong Tipan: Filipino Standard Version, Copyright © Philippine Bible Society 2009.