Revised Common Lectionary (Complementary)

¹³ Junelic nakabantioxi chiru li Dios nak quepa̱b li ra̱tin li Dios li xkachˈolob che̱ru. Moco ra̱tin cui̱nk ta quepa̱b. Ra̱tin li Dios ban quepa̱b. Ut ya̱l ajcuiˈ nak aˈan ra̱tin li Dios. Ut aˈan li yo̱ chi jaloc re le̱ yuˈam la̱ex aj pa̱banel. ¹⁴ Ut la̱ex herma̱n xecˈul ajcuiˈ li raylal joˈ queˈxcˈul li ralal xcˈajol li Dios li nequeˈpa̱ban saˈ xcˈabaˈ li Jesucristo li cuanqueb Judea. Xexrahobtesi̱c xban le̱ rech tenamitil joˈ queˈxcˈul eb aˈan xbaneb laj judío, li rech tenamitil. ¹⁵ Eb laj judío queˈxcamsi li Ka̱cuaˈ Jesucristo ut queˈxcamsi ajcuiˈ eb li profeta ut coeˈxyo̱lesi la̱o. Incˈaˈ nequeˈxba̱nu li nacuulac chiru li Dios ut kˈaxal xicˈ nequeˈril li ras ri̱tzˈineb. ¹⁶ Xicˈ nequeˈrecˈa nak nakachˈolob xya̱lal chiruheb li ma̱cuaˈeb aj judío re nak teˈcolekˈ. Ut riqˈuin li ma̱usilal nequeˈxba̱nu rajlal, kˈaxal cuiˈchic nanumta lix ma̱queb. Abanan yal jun nak quichal xjoskˈil li Dios saˈ xbe̱neb.

Laj Pablo ta̱raj cuiˈchic xic chirilbaleb laj pa̱banel li cuanqueb Tesalónica

¹⁷ Ex herma̱n, usta ma̱ aniho saˈ e̱ya̱nk, abanan junelic nequexkacˈoxla. Tojeˈ ajcuiˈ xo‑el e̱riqˈuin nak ac takaj cuiˈchic rilbal e̱ru. ¹⁸ Xkaj raj xic e̱riqˈuin. La̱in laj Pablo. Cuib oxib sut xinyal xic che̱rilbal. Abanan laj tza quiramoc chiku. Joˈcan nak incˈaˈ co̱o. ¹⁹ ¿Cˈaˈru nakoybeni ut cˈaˈru lix saylal li kachˈo̱l? ¿Ut cˈaˈru li tokˈajca̱mu̱k cuiˈ nak tol‑e̱lk cuiˈchic li Ka̱cuaˈ Jesucristo? ¿Ma incˈaˈ ta biˈ saˈ e̱cˈabaˈ la̱ex takacˈul li kakˈajca̱munquil? ²⁰ La̱ex li kalokˈal ut lix saylal li kachˈo̱l.