Revised Common Lectionary (Complementary)

²¹ Nak ac xnumeˈ chixjunil aˈin, laj Pablo quixcˈoxla xic toj Jerusalén, nak acak xbeni chak Macedonia ut Acaya. Quixye: ―Nak acak xinnumeˈ aran, tento ajcuiˈ tinxic Roma chirilbaleb laj pa̱banel li cuanqueb aran, chan. ²² Joˈcan nak quixtaklaheb Macedonia laj Timoteo ut laj Erasto, li nequeˈtenkˈan re. Ut laj Pablo toj quicana aran Asia.

Laj tenol chˈi̱chˈ xicˈ queˈrabi li cˈaˈru quixye laj Pablo

²³ Ut saˈ eb li cutan aˈan quiticla jun nimla chˈaˈajquilal xban nak nabaleb yo̱queb chixpa̱banquil li Dios. ²⁴ Jun li cui̱nk aj tenol plata, aj Demetrio xcˈabaˈ. Aˈan naxyi̱b riqˈuin plata li cocˈ ochoch re lix Diana lix dioseb. Ut nabal li tumin nequeˈxcˈul li nequeˈtrabajic rochben. ²⁵ Quixchˈutubeb chixjunileb li nequeˈcˈanjelac chiru joˈqueb ajcuiˈ chixjunileb laj tenol plata ut quixye reheb: ―La̱ex nequenau nak riqˈuin li cˈanjel aˈin nakaba̱nu, nakacˈul nabal li katumin. ²⁶ Ac e̱rabiom resil nak laj Pablo ac xtacchiˈi nabaleb li cuanqueb aran Efeso joˈ ajcuiˈ saˈ chixjunil li tenamit xcue̱nt Asia. Ac nequenau nak yo̱ chixyebal reheb nak moco dioseb ta li yal yi̱banbil xban cui̱nk. ²⁷ Ma̱re anchal ta̱sachk li kacˈanjel xban aˈan. Ut ma̱re anchal ta̱tzˈekta̱na̱k ajcuiˈ xlokˈal li rochoch lix Diana li kalokˈlaj dios. Ma̱re ta̱sachk lix cuanquilal li kadios li nequeˈxlokˈoni chixjunileb aran Asia, joˈ ajcuiˈ li cuanqueb saˈ chixjunil li ruchichˈochˈ, chan laj Demetrio.