Old/New Testament

9 Cashnapishmi nirca:

–Caipi cajcunamanta maijancunaca, Taita Dios Pai tucuita rurai tucushcahuan mandaj shamungacama manaraj huañungacunachu. Paicunami quiquin ñahuihuan ricungacuna, chaica chashnatajmi– nircapishmi.

² Chaimanta sujta punlla q'uipami Jesusca, Pedrota, Jacobota, Juantapish paicunallata ch'icanchishpa, shuj jatun urcuman pushashpa rirca. Chaipica, paicunapaj ñaupajpimi shujtajyarishpa ricurirca. ³ Pai churashcacunapish, rasu shina yurajlla lamyacujmi tucurca. Chashnataj yurajllataca, cai pachapi pi tajshajpish, manataj yurajyachi tucunchu. ⁴ Chaita ricucujpica, ñapish Eliaspish, Moisespish Jesushuan parlanacucuj ricurircallami. ⁵ Chaimantami Pedroca, Jesustaca:

–¡Yachachij, allitaj caipi canchij! Cambaj shuj, Moisespaj shuj, Eliaspaj shuj, quimsa chugllacunata rurashunllamari– nircami.

⁶ Caishujcunandijllataj manchaihuan huañucushcamanta, imata rimacushcatapish mana yuyashpami, Pedroca chashna nirca. ⁷ Chaimantaca, shuj p'uyu shamushpami llandurca. Chai p'uyumantaca: «Caica, Ñuca c'uyashca Churimi, Paillata uyaichij» nishpa rimashcami uyarirca. ⁸ Chaita paicuna ricucujllapitaj, ñapish caishujcunaca mana ricurircachu. Jesusllatami, Pailla chaipi cajta ricurcacuna.

⁹ Jesús chai urcumanta ña uriyamucushpaca, paicuna ricushcataca, Runa Aichayuj huañushcacunapaj chaupimanta causaringacama, amaraj piman huillachunmi mandarca. ¹⁰ Chaimantaca chashna mandashcataca, paicunapurallami yacharcacuna. Shina cashpapish, «Huañushcacunapaj chaupimanta causaringacama» nishcatami, paicunapuralla parlanacurcacuna. ¹¹ Paicunami Jesustaca:

–¿Ima nishpataj Mandashcata yachachijcunaca, ‘Eliasrajmi puntaca shamuna can’ nincuna?– nishpami tapurcacuna.

¹² Jesusca, cashna nishpami cutichirca:

–Eliastajmari puntaca shamunga. Paimi, tucui imatapish allichinga. ¿Manachu Quillcashcapica, ‘Runa Aichayujca achca llaquita apangami, mana ricunachingacunachu’ nishca tiyacun? ¹³ Ashtahuanpish caita huillanimi: Eliasca, ñamari shamurca. Paitaca, Dios Quillcachishcapi nishca shinallatajmi, tucui paicuna munashcata rurarcacuna– nircami.

Supai japishca huambratami Jesús alliyachishca

¹⁴ Jesusca, caishuj yachacujcuna shuyacushcaman chayamushpaca, paicunapaj muyundijpi, achca gentecunatapish, mandashcacunata yachachijcuna paicunahuan rimanacucujtapishmi ricurca. ¹⁵ Pai ricurijpica, gentecunaca mancharishpami, tucuicuna Paipajman callpashpa, ‘¿Allillachu cangui?’ nircacuna. ¹⁶ Jesusca:

–¿Imatataj paicunahuanca rimanacucunguichij?– nishpami tapurca.

¹⁷ Chai tucuicunapaj chaupimantami, ñapish shuj runaca, cashna nishpa cutichirca:

–Yachachij, ñuca churitamari upayachij supai japishca. Paitamari Quiquinpajman apamurcani. ¹⁸ Chai espirituca, maipipish japishcahuan, ñapish manchanayajta chaspinllamari. Shimiman puscuta shitashpa, quirucunapish canirishpa singurinllamari. Chashna jatunta llaquichijpimari, huambraca tucui chaquirishpa catimun. Ñamari Cambaj yachacujcunataca, supaita llujshichishpa cachachun ricuchircani. Paicunaca manamari imata rurai tucunchu– nircami.

¹⁹ Shina nijpi Jesusca:

–¡Mana crij millai runacuna! ¿Maicamataj cancunahuan puricuchunlla ninguichij? ¿Maicamataj chashnalla catishpa, Ñucata llaquichinguichij? Chai huambrata caiman pushamuichij– nishpami rimarca.

²⁰ Jesuspajman chai huambrata c'uchuyachijpi Paita ricujpimi, chai espirituca huambrata chaspishpa pambaman shitarca. Shimimanpish puscuta shitachishpami singuchirca.

²¹ Yayata:

–¿Cashna tucushcaca ñachu unai?– nishpa Jesús tapujpica, cashnami nirca:

–Huahuamantapachami cashna tucun. ²² Achca cutinmi huañuchisha nishpa ninapi, yacupi shitanlla. Cunan quiquin imallatapish rurai tucushpaca, ñucanchijta llaquishpa alliyachipaiari– nircami.

²³ Shina nijpimi Jesusca:

–¿Maitataj, rurai tucushpaca ninguiari? Pipish crijpajca, tucui imapish rurarinallamari– nircami.

²⁴ Chashna nincami, huambrapaj yayaca:

–Ari crinimari, ashtahuan alli crina yuyaita cuhuai– nishpa caparirca.

²⁵ Gentecuna yallitaj jundarimujta ricushpami, Jesusca chai mapa espiritutaca:

–Ñucami mandani: Upayachij, mana uyajta ruraj espíritu, paimanta llujshi, pajta cutin paipi yaicunguiman– nircami.

²⁶ Chaimantami espirituca caparichishpa, mana jahuallata chaspishpa pambapi shitashpa llujshirca. Huambraca huañushca shina saquirijpimi, achcacuna: «Huañunmari» nircacuna.

²⁷ Ashtahuanpish Jesús maquimanta japishpa jatarichijpica, huambraca shayarircallami. ²⁸ Jesús huasiman yaicujpimi, yachacujcunaca paillata ch'ican:

–¿Ima nishpataj ñucanchijca mana llujshichishpa cachai tucurcanchij?– nishpa tapurcacuna.

²⁹ Jesusca:

–Cashna supaica imahuan mana llujshinchu, ashtahuanpish ayunashpa Diosta mañajllapimi llujshin– nircami.