Old/New Testament

Jesustaca Pilatopaj maquipimi churashcacuna

27 Tutamanta ñalla pacaricujpimi, curacunata mandajcunapish, israelcunata cunaj yuyajcunapish Jesusta huañuchishun ninacushpa, shuj yuyailla tucurcacuna. ² Chaimantaca, mandaj Poncio Pilatopajmanmi, Jesustaca huatashcata pusharcacuna.

³ Jesusta japichij Judasca, Jesusta huañuchina tucujta ricushpami anchata llaquirirca. Chaimantami, Jesusta japichingapaj chasquishca quimsa chunga cullquitaca, curacunata pushaj curacunaman, cunaj yuyajcunaman tigrachigrirca. ⁴ Paicunataca:

–Ima millaita mana ruraj, alli Runata huañuchichun japichishpaca, mana allitamari rurashcani– nircami.

Shina nijpica:

–¿Ñucanchijca, imatataj nishunpish? Cunanca, cantajchari imapish tucungui– nircacunami.

⁵ Chashna nijpi Judasca, chai cullquita Diospaj huasi ucupi shitashcahuan llujshishpami, sipi tucugrirca.

⁶ Curacunata pushaj curacunaca, chai shitashca cullquita pallashpami, cashna nircacuna:

–Cai cullquitaca, chai Runata huañuchingapaj japichichunmari curcanchij. Mandashcapi nishca shinaca, Diosman cushca cullquita tandanapica, mana churanachu canchij– nircacunami.

⁷ Paicunapura yuyarinacushpaca, shujtaj llajtamanta cajcuna huañujpi pambangapajmi chai cullquihuanca, mangata rurajpaj allpata randircacuna. ⁸ Chaimanta chai allpaca, cunan punllacama Yahuar Allpa shutimi. ⁹ Chashna rurajpimi, Dios ima nishcata huillaj Jeremías cashna nishca pajtarca: «Israel runacunami, Paitaca quimsa chunga cullquillapi randircacuna. Chai cullquitami pallarcacuna. ¹⁰ Mandaj Dios ñucaman huillashca shinallatajmi chai cullquihuanca, mangata rurajpaj allpata randircacuna» nishcami.

Jesustaca Pilatopajman pushashpami juchachishcacuna

¹¹ Mandaj Pilatopaj ñaupajpi Jesús shayacujpi chai mandajca:

–Canca, ¿israelcunata Jatun Mandajchu cangui?– nishpa tapujpimi, Jesusca:

–Cambaj quiquin shimihuanmi ningui– nirca.

¹² Curacunata mandajcunapish, cunaj yuyajcunapish juchachicujpica, Jesusca imata mana rimarcachu. ¹³ Chaimantami, Pilatoca:

–Canta cai tucuita juchachishpa rimacujtaca, ¿manachu uyangui?– nirca.

¹⁴ Chashna nijpipish Jesús imata mana rimajpimi, chai mandajca achcata mancharirca.

¹⁵ Mandaj Pilatoca, Pascua fiesta punllapica, gentecuna maijanta ‘Cachari’ nishca shuj preźutami cacharij carca. ¹⁶ Chai punllacunaca, tucuicuna yachashca Barrabás shuti runatami, chaipi preźu charicurcacuna. ¹⁷ Chaipi tandanacushcacunatami, Pilatoca:

–¿Barrabastachu, mana cashpaca Quishpichij Cristo nishca Jesustachu cacharichun ninguichij?– nishpa tapurca.

¹⁸ Jesustaca, imatapish allita ruraj cajpi p'iñashpa japichishcataca, Pilatoca yacharcami.

¹⁹ Mandanapaj tiyarinapi Pilato tiyacujpimi, paipaj huarmica: «Chai alli Runataca, imata ama rurangui. Cunan tuta muscuipica, Paimantaca achca llaquitami aparcani» nishpami, huillaj cacharca.

²⁰ Curacunata mandajcunapish, cunaj yuyajcunapishmi chaipi tucui cajcunataca, “Barrabasta cachari, Jesustaca huañuchilla” nichun yachachicurcacuna. ²¹ Chai mandajca, chaipi cajcunata cutinllatajmi:

–Cai ishquimantaca, ¿maijantataj cacharichun ninguichij?– nirca.

Shina nijpica, tucuicuna:

–Barrabastami cachari ninchij– nishpami caparircacuna.

²² Chashna caparijpi, Pilatoca:

–Shinashpaca, Cristo nishca Jesustaca, ¿imatataj rurasha?– nishpami tapurca. Shina tucuicunami:

–¡Chacatachun ninchijmi!– nishpa caparircacuna.

²³ Shina nijpi chai mandajca:

–¿Ima mana allitataj Paica rurashca?– nircami.

Shina nijpipish:

–¡Chacatachun ninchijmi!– nishpami, ashtahuan sinchita caparircacuna.

²⁴ Tucuicuna mana uyashun nishpa ashtahuan caparijpimi, Pilatoca yacuta japishpaca:

–Cai alli Runapaj yahuarca, cancunapaj jahuami canga. Ñucaca ima ricunata mana charinichu– nircami. Chashna nishpami alli ricuringapajca, tucuicunapaj ñaupajpi maquita jahuarca.

²⁵ Pilato chashna nijpica, tucui gentecunami:

–Ari, Paipaj yahuarca ñucanchij jahuapipish, ñucanchij huahuacunapaj jahuapipish urmachunlla– nishpa caparircacuna.

²⁶ Chashna nicujllapimi Pilatoca, Barrabasta cacharishpa, Jesustaca achcata macachishpa, chacatachun soldadocunaman cushpa cacharca.