Old/New Testament

11 Ñucaca, Cristo imalla rurashcatami caticuni, shinallataj cancunapish ñuca imalla rurashcata catichij.

Cultopi ima laya canatami yachachishca

² Huauqui, panicuna, ñucataca tucuipimari yuyaricushcanguichij. Ñuca huillashpa yachachishcatapish, tucuitamari chashnataj caticushcanguichij. Chaimantami cancunataca, allimari canguichij nini.

³ Chashna nishpapish, cancunataca caicunata yachachuntaj ninimi: Cristoca, tucui c'aricunata Mandaj Umami. C'arica, quiquin huarmita mandaj umami. Taita Diosca, Cristota Mandaj Umami. ⁴ Maijan c'aripish, Diosta mañacushpa, mana cashpaca Diosmanta huillacushpa umata ch'ungullirishpaca, paita Mandaj Umatami pingachin. ⁵ Cutin maijan huarmipish Diosta mañacushpa, mana cashpaca Diosmanta huillacushpa mana umata ch'ungullirishpaca, paita mandaj umatami pingachin. Umata mana ch'ungullirishpaca, ajchata p'itichishcamanmi rijchan. ⁶ Maijan huarmi, umata mana ch'ungullirisha nishpaca, ajchatapish rutuchichunlla. Ajchata rutuchishpa, lluchu uma purinata pinganachishpaca, umata ch'ungullirichun. ⁷ C'aritaca, Taita Diosmi Paiman rijchajta rurashca. Chashna cashpami, Pai sumaj cashcata ricuchin. Chaimanta, paipaj umataca, ama ch'ungullirichun. Ashtahuanpish huarmica, cusa mandaj cashcatami ricuchin. ⁸ Diosca c'aritaca, mana huarmimanta surcushpa rurarcachu. Ashtahuanpish huarmitamari, c'arimanta surcushpa rurarca. ⁹ Diosca, mana huarmi pailla cajpi c'arita rurarcachu, ashtahuanpish c'ari pailla cajpimi huarmita rurarca. ¹⁰ Chaimanta huarmica, angelcuna chaipi cashcamantami, mandaj cusayuj cashcata ricuchingapaj, umata ch'ungullirina.

¹¹ Chashna cajpipish Apunchij Jesuspaj cajcunaca, c'aripish huarmi illajca ima mana canchu, huarmipish c'ari illajca ima mana canchu. ¹² Huarmica c'arimantami tiyan, c'aripish, huarmimantami tiyan. Taita Diosmari tucuita rurashca.

¹³ Cancunallataj alli yuyarichij: ¿Huarmipajca, umata mana ch'ungullishpa, Taita Diosta mañanaca, allichu? ¹⁴ Cutin c'aripajca, paipaj ajchata sunita huiñachinaca mana allichu. C'arica suni ajchahuanca, pai ima shina cana cashca shina mana ricurishpaca, pingaimari. ¹⁵ Ashtahuanpish huarmica, suni ajchayuj cashpamari, sumaj ricurin. Umata taparichunmi, Diosca chashna suni ajchata curca. ¹⁶ Maijanpish cai yachachishca mana alli yuyachijpi, imata nisha nishpaca, caita yachachun: Ñucanchijpurapipish, Diospajlla tucui crij tandanacushcacunapurapipish, huarmicunaca mana ajchata rutuchinchu.