Old/New Testament

Dugang mga Pahimangno

6 Anak, kon moako ka nga mobayad sa utang sa ubang tawo, ² masulod ka sa kompromiso, ³ ug manubag ka ngadto sa imong gisaaran. Apan mao kini ang himoa aron makalingkawas ka sa imong obligasyon: Adtoa ang imong gisaaran ug pagpakilooy nga ipalingkawas ka niya sa maong obligasyon. ⁴ Ayaw gayod tulog-tulogi o unya-unyaa ⁵ hangtod nga makalingkawas ka niini, nga daw sa usa o sa langgam nga nakaikyas gikan sa mangangayam.

⁶ Kamong mga tapolan, obserbahi ug kat-oni ang pagkinabuhi sa mga lamigas, aron magmaalamon kamo. ⁷ Bisan walay pangulo o tigdumala nga nagsugo kanila, ⁸ nagatigom silag pagkaon sa panahon sa ting-init ug ting-ani, aron may pagkaon sila sa ting-ulan. ⁹ Kamong mga tapolan, magsige ra ba gayod mog katulog? Kanus-a man mo magmata? ¹⁰ Sige ramog tulog-tulog, hayang-hayang, ug panguyogpos, ¹¹ unya sa kalit lang moabot kaninyo ang kawad-on nga daw sa armadong tulisan.

¹² Ang mga walay pulos ug daotang mga tawo manugilon ug bakak. ¹³ Pinaagi sa ilang kidhat-kidhat ug sinyas-sinyas sa ilang mga kamot ug tiil manglimbong sila sa uban. ¹⁴ Sa ilang pagka-mangingilad, kanunay silang nagaplano sa paghimo ug daotan, ug tigpasiugda silag kagubot. ¹⁵ Busa sa kalit lang laglagon sila, ug wala gayoy makatabang kanila.

¹⁶ May pito^[a] ka matang sa tawo nga gikapungtan ug gikangil-aran sa Ginoo:

²⁰ Anak, sunda ang mga sugo ug gipanudlo sa imong ginikanan. ²¹ Itanom kini sa imong hunahuna aron dili mo gayod malimtan. ²² Maggiya kini, magtipig, ug magpahinumdom kanimo sa bisan unsay imong buhaton.^{[b] 23} Kay ang ilang mga sugo sama sa suga nga mohatag kanimog kahayag. Ug ang pagbadlong ug pagtul-id nila sa imong pamatasan makaayo ug makapataas sa imong kinabuhi. ²⁴ Ilikay ka usab niini gikan sa babayeng daotan nga makadaning manulti. ²⁵ Ayaw pagpatintal sa iyang katahom. Ayaw pagpadala sa iyang mga kidhat.^{[c] 26} Ang pagpakighilawas sa babayeng nagabaligya sa iyang dungog mabayran rag pilak, apan ang pagpakighilawas sa asawa sa uban bayran mo sa imong kinabuhi.

²⁷ Kon ipaduol mo ang kalayo sa imong dughan masunog ang imong bisti. ²⁸ Kon maglakaw ka sa baga mapaso ang imong tiil. ²⁹ Mao kana nga kon makighilawas ka sa asawa sa uban, silotan ka!

³⁰ Mahimong palabyon ang gihimo sa kawatan nga nangawat tungod kay gigutom siya, ³¹ apan kon madakpan siya, pabayron siyag pito ka pilo sa kantidad nga iyang gikawat, bisan pag mahurot ang tanan niyang butang.

³² Ang tawong nakigrelasyon sa asawa sa uban walay hustong panabot. Gidaot lang niya ang iyang kaugalingon. ³³ Sakiton siya ug maulawan hangtod sa kahangtoran. ³⁴ Ang bana nga nangabugho masuko pag-ayo, ug mobalos siya nga walay kalooy. ³⁵ Dili siya modawat ug bayad, bisan pag unsa kini kadako.

7 Anak, tumana ug tipigi sa imong kasingkasing ang akong mga gipanudlo ug mga sugo. ² Tipigi ang akong mga sugo aron motaas ang imong kinabuhi. Ampingi ang gipanudlo ko kanimo sama sa pag-amping mo sa imong mga mata. ³ Itanom kini sa imong hunahuna aron dili mo gayod malimtan. ⁴ Isipa ang kaalam ingon nga imong igsoong babaye ug ang maayong pagsabot ingon nga imong suod nga higala. ⁵ Kay ilikay ka niini gikan sa babayeng daotan nga makadaning manulti.

Ang Babayeng Daotan

⁶ Usa ka adlaw, namintana ako sa akong balay, ⁷ ug nakita ko ang mga batan-ong lalaki nga walay alamag sa kinabuhi. Ang usa kanila walay buot. ⁸ Misubay siya sa dalan paingon sa kanto diin atua ang balay sa usa ka babayeng daotan. ⁹ Kilomkilom na kadto ug paingon na mongitngit. ¹⁰ Unya gisugat siya sa usa ka babaye nga nagsul-ob ug bisti sa babayeng nagabaligyag dungog, nga may plano nang daan sa unsay iyang himuon sa maong lalaki. ¹¹ Kining babayhana sabaan ug gahig ulo. Dili makapuyo sa balay. ¹² Anaa siya kanunay sa dalan o sa mga eskinita, ug usahay sa mga plasa. ¹³ Inigkakita niyag lalaki, gakson niya kinig hagkan. Ug dili gayod maulaw moingon: ¹⁴ “Gituman ko karon ang akong saad nga maghalad, ug may mga karne didto sa balay gikan sa mananap nga akong gihalad. ¹⁵ Busa gipangita ko ikaw, ug maayo kay nakita ko ikaw. ¹⁶ Gihapinan ko na ang akong higdaanan ug dekolor nga panapton nga gikan pa sa Ehipto. ¹⁷ Gibutangan ko kini sa mga mira, aloe, ug cinamon. ¹⁸ Busa dali, magdulog kita; tagbawon ta ang atong kaugalingon hangtod magbuntag, ¹⁹ kay wala dinhi ang akong bana. Atua siya sa layo. ²⁰ Nagdala siyag daghang kuwarta ug mga duha pa ka semana ayha siya mobalik.”

²¹ Busa nahaylo niya ang lalaki pinaagi sa iyang tam-is ug makadani nga mga pulong. ²² Diha-diha misunod ang lalaki kaniya nga daw sa baka nga giguyod paingon sa ihawanan o sa lagsaw^[d] nga nagpadulong sa lit-ag ²³ diin mamatay siya pinaagi sa pana. Sama usab siya sa usa ka langgam nga nagdali-dali ug paingon sa lit-ag, nga walay kalibotan nga kamatayon diay ang iyang padulngan.

²⁴ Busa, mga anak, pamatia ninyo pag-ayo ang akong ginasulti. ²⁵ Ayaw kamo pagpadala niining matanga sa babaye; ayaw kamo pagpahisalaag kaniya. ²⁶ Daghan nang mga lalaki ang nalaglag tungod kaniya. ²⁷ Kon moadto kamo sa iyang balay, sama rag nagpaingon kamo sa dapit sa mga patay.

2 Busa naghunahuna ako nga dili na lang ako moanha diha kaninyo kon masakit ko lang pag-usab ang inyong pagbati. ² Kay kon masakit ko kamo, kinsa na man lang unya ang makalipay kanako? Wala na! ³ Mao kana ang hinungdan kon nganong nagsulat una ako kaninyo, aron nga kon moanha ako diha, dili ako mapaguol sa mga tawo nga mao unta ang makalipay kanako. Kay nagatuo ako nga kon malipay ako, malipay usab kamo. ⁴ Niadtong una ko nga pagsulat kaninyo nahasol ug nasubo gayod ako ug naghilak pa gani. Dili nako tuyo nga sakiton ang inyong pagbati, kondili gusto ko lang nga masayran ninyo nga gimahal ko gayod kamo.

Pasayloa Ninyo ang Nakasala

⁵ Karon, kon mahitungod sa tawo diha nga nakasala, dili lang ako ang iyang gihatagan ug kaguol kondili may kaguol usab nga iyang gihatag kaninyong tanan. Nagaingon ako nga “may” kaguol usab kay dili ko gustong palabihan. ⁶ Apan igo na ang silot nga inyong gihatag kaniya. ⁷ Busa pasayloa na ninyo siya ug dasiga usab, kay basin ug dag-on siya sa hilabihan nga kaguol. ⁸ Ug nanghangyo usab ako kaninyo nga ipakita ninyo kaniya nga gimahal pa ninyo siya. ⁹ Mao gani kini ang hinungdan nga nagsulat ako kaninyo, kay gusto kong masayran kon kasaligan ba kamo sa pagtuman sa tanan nga akong gisulti kaninyo. ¹⁰ Kon pasayloon ninyo ang nakasala, pasayloon ko usab siya. Kay kon may nakasala kanako gipasaylo ko na siya sa atubangan ni Cristo alang kaninyo. ¹¹ Angay nato kining buhaton aron dili kita madaog ni Satanas, kay nasayran nato kon unsa ang iyang mga pamaagi.

Si Pablo didto sa Troas

¹² Pag-abot ko didto sa Troas aron magwali sa Maayong Balita mahitungod kang Cristo, nakita ko nga giandam nang daan sa Ginoo ang ilang mga kasingkasing sa pagpaminaw kanako. ¹³ Apan wala ako mahimutang kay wala didto si Tito nga atong igsoon kang Cristo. Busa nanamilit ako sa mga tumutuo ug miadto sa Macedonia.

Ang Pahumot ni Cristo

¹⁴ Salamat sa Dios kay kanunay siya nga nagauna kanato sa parada sa pagdaog.^[a] Gibuhat niya kini tungod kay anaa na kita kang Cristo. Sama sa pahumot gigamit niya kami sa pagpaila kaniya sa bisan asang lugar. ¹⁵ Kay sama kami sa mahumot nga halad ni Cristo ngadto sa Dios nga mapanimahoan sa mga tawo nga nangaluwas ug bisan sa mga nangawala. ¹⁶ Sa mga tawo nga nangawala, ang among gipakaylap nga kamatuoran sama sa baho sa patay nga nagadala ug kamatayon; apan sa mga tawo nga nangaluwas, sama kini sa pahumot sa mga buhi nga nagadala ug kinabuhi. Kinsa man kaha ang makahimo niini nga buluhaton? ¹⁷ Apan gipadala kami sa Dios. Ug tungod kay siya nagtan-aw kanamo ug kami anaa kang Cristo, matinud-anon kami sa pagsangyaw sa mensahe sa Dios. Dili kami sama sa uban nga gihimo lang nila nga panapi ang pagwali sa mensahe sa Dios.