M’Cheyne Bible Reading Plan

Peter An John Go In Front Da Main Leadas

4 Peter an John was still yet talking wit da peopo, wen da priest guys, da captain fo da security guards fo da temple, an da Sadducee guys wen come by dem. ² Dey stay real huhu cuz da guys wen teach da peopo, an wen tell dem dat cuz Jesus wen come back alive from mahke, dat show, dat da mahke guys goin come back alive again. ³ So dey wen bus Peter an John. Da sun jus wen go down, so dey wen put dem in jail till da nex day. ⁴ But plenny peopo dat wen hear dem wen trus wat dey wen say. Had bout five tousand guys dat wen trus Jesus.

⁵ Da nex day da main leadas, da older leadas, an da teacha guys dat teach Godʼs Rules wen come togedda inside Jerusalem. ⁶ Annas, da Head Priest guy, wen come, an Kaiafas, John, Alexander, an da odda guys from da Head Priest ohana. ⁷ Dey wen tell some guys fo bring Peter an John in front dem, an dey wen aks dem, “Eh, wat kine power you guys get fo do all dis stuff? Wat name you wen use?”

⁸ Den Godʼs Spesho Spirit wen take charge a Peter. He wen tell dem, “You leada guys, an da older leada guys fo da peopo, ⁹ you guys wen bring us hea dis day. Was cuz we wen help one guy dat no can walk, o wat? You guys like know how he wen come good? ¹⁰ Kay den. You guys an all da odda peopo from Israel, good you know dis: Jesus from Nazaret, da Spesho Guy God Wen Send, we his guys. You guys wen kill him on top one cross, but God wen make him come back alive again. Dass why dis guy wen come good, cuz he stay tight wit Jesus. An now dis guy can stand hea in front you guys. ¹¹ Jesus, he da One da Bible talk bout:

¹² No mo odda guy dat can take da peopo outa da bad kine stuff dey doing. Neva have nobody in da whole world dat we gotta stick wit fo take us outa da bad kine stuff we doing. God ony wen give us Jesus fo do dat.”

¹³ Da leadas wen see dat Peter an John wen talk wit power an dey not scared. An da leadas wen know dat Peter an John jus regula guys dat neva go school fo learn, an dat wen blow dea minds. An dey know dat dis guys, dey wen stay wit Jesus. ¹⁴ But da leadas can see da guy dat Peter dem wen make come good, stay standing dea wit dem, so dey no can say notting. ¹⁵ So da leada guys tell Peter an John fo go outside, an da leada guys wen talk togedda. ¹⁶ Dey say, “Wat we goin do wit dem? Everybody dat stay inside Jerusalem know dat dey wen do one awesome ting dat show wat kine dem. An us guys no can say dass not true. ¹⁷ We gotta tell dese guys, ‘You guys betta not talk bout dis guy Jesus to nobody no moa! No use his name fo do stuff!’ No good all da odda peopo all ova da place hear bout dis ting!”

¹⁸ Den da leada guys wen tell Peter an John fo come inside one mo time. An dey tell dem, “No talk o teach nobody bout da guy Jesus no moa, an no use his name fo do stuff!” ¹⁹ But Peter an John wen say, “You guys figga fo yoaself wat God tink: Mo betta fo do wat you guys say, o fo do wat God say? ²⁰ Cuz us guys, we no can stop talking bout da stuff we wen see an hear.” ²¹ So dey tell um one mo time dey betta not talk bout Jesus no moa, an den dey wen let um go. Dey no can figga how fo punish dem, cuz all da peopo wen stay telling dat God awesome, cuz a everyting dat happen. ²² Cuz da guy dey wen make come good in dis awesome way, he stay mo den forty years old awready.

Da Guys Dat Trus God Pray Fo Talk An No Come Scared Wen Dey Talk

²³ Afta da leada guys let Peter an John go, dey go home by dea own peopo, an tell dem everyting da main priest guys an da older leada guys wen say to dem. ²⁴ Wen dea own peopo wen hear dat, dey wen pray togedda lidis: “Boss, you da King. You wen make da sky, da earth, an da sea, an everyting dat stay inside dem. ²⁵ Yoa Spesho Spirit wen talk fo you wen yoa worka guy, our ancesta David, wen say,

²⁷ “An dass wat wen happen! Had King Herod an da governa Pontius Pilate, an da peopo dat not Jews, an da Israel peopo. Dey all wen come togedda inside dis town fo plan how dey can kill Jesus. He yoa Good An Spesho Worka Guy, da One You Wen Send. ²⁸ Dey do wat you wen know long time befo gotta happen. An you wen let dem do um. ²⁹ Now, Boss, listen wat dey say agains us, an give us da kine power wen we talk fo no come scared. ³⁰ We like you make da sick guys come good an show awesome tings wit yoa power wen us guys use yoa name, cuz a wat yoa Good An Spesho Worka Guy Jesus wen do.”

³¹ Wen dey pau pray, da place wea dey stay togedda wen shake. An Godʼs Spesho Spirit wen take charge a all dem. An dey wen tell da tings God say wit power, an dey neva come scared.

Da Peopo Dat Trus God Give Dea Stuffs To Each Odda

³² All da peopo dat wen trus God wen come jalike one inside dea hearts an come jalike one how dey tink. Nobody say dat his stuffs stay his own, but dey stay share everyting dey get wit each odda. ³³ Da guys Jesus wen send all ova, dey stay telling dat Jesus wen come back alive. Dey talk wit plenny power, an da way dem guys stay, can see dat God stay do choke plenny good stuff fo all dem. ³⁴ Neva have nobody wit dem dat wen need anyting. Eh, even da peopo dat wen own land o houses wen sell um, ³⁵ an give da money to da guys Jesus wen send all ova. An den dey give da money to da peopo dat need um, litto bit o plenny.

³⁶ Had one guy name Joseph, from da Levi ohana. He from Cyprus Island. Da guys Jesus wen send wen give um da nickname Barnabas, cuz dat mean “Da guy dat give us good kine words.” ³⁷ He wen sell one field he wen own, an den give da money to da guys Jesus wen send.

Jesus In Front Da Governa

27 Early morning time, all da main priest guys an da older leadas fo da peopo wen go figga out how dey goin kill Jesus. ² Dey tie him up, take him away, an wen give him to Pilate, da governa.

Judas Mahke

³ Now Judas, da guy dat wen set up Jesus, wen see wat wen happen. Afta he find out dat dey really goin kill Jesus fo real kine, he come sorry an start fo tink diffren. So, he take back all da thirty silva coins fo give um to da main priest guys an da older leadas dat wen give um to him befo. ⁴ He tell um, “Eh, I wen do someting wrong! I wen set up one guy dat neva do notting!”

But dey tell him, “Eh, no bodda us wit dat! Dass yoa problem!” ⁵ So Judas throw down da thirty silva coins right dea inside da temple, an wen go hang himself.

⁶ Den da main priest guys take da thirty silva coins. Dey say, “No good we put dis money inside da place wea da peopo give money fo da temple, cuz dis wen pay fo somebodyʼs blood.”

⁷ So dey figga dis: “We go buy da land from da guy dat make clay pots, yeah? Den if somebody come from far away, an mahke, an nobody know who him, we can bury um ova dea inside dat field.” ⁸ Dass why, dat field, dey call um “Da Blood Field” even till now.

⁹ Dis wen happen jalike Jeremiah wen say befo time. He da guy dat wen talk fo God, an he wen say, “Had some Israel peopo dat wen say, ‘We give thirty silva coins fo dis guy.’ ¹⁰ Dey talk wit da guy who make clay pots, an dey give him da coins fo his field, jalike da Boss wen tell me fo do.” Dass wat Jeremiah wen say.

Pilate Aks Jesus Plenny Stuff

¹¹ Same time Jesus was standing in front Pilate, da governa. Pilate aks him, “Eh, you da King fo da Jews, o wat?”

Jesus tell him, “You da one wen say dat.” ¹² Da main priest guys an da older leadas wen poin finga plenny at Jesus. But he still neva say notting.

¹³ Pilate aks him, “You no hear all da stuff dey saying bout you?” ¹⁴ An still yet Jesus neva say notting. So Pilate start fo try figga dis guy.

Dey Say Jesus Gotta Mahke

¹⁵ Now, Governa Pilate, he let one prisona guy go every year, Passova time. Any guy da peopo pick, Pilate let um go. ¹⁶ Had one guy name Barabbas dat stay inside da prison. All da peopo know bout him. ¹⁷ So wen all da peopo come togedda, Pilate aks um, “Who you guys like me let go fo you? Barabbas, o Jesus da guy dey call da Christ guy, dat dey say God wen send um?” ¹⁸ Now, Pilate know dat da leada guys wen give Jesus to him cuz dey so mad at Jesus, cuz everybody listen to him, not dem.

¹⁹ Pilate was still sitting on top da judge chair, an his wife wen send somebody by him fo say, “No bodda wit dat Jesus guy, cuz he neva do notting. I wen suffa plenny inside one dream cuz a him!”

²⁰ But da main priest guys an da older leadas wen presha da peopo fo say dis: “Kill Jesus awready! We like Barabbas!”

²¹ Governa Pilate wen aks one mo time, “Get two guys ova hea. Which one you like me let go?”

Dey say, “Barabbas!”

²² So Pilate aks um, “Den wat I goin do wit Jesus, da Christ guy, dat dey say God wen send?”

Dey all say, “Kill him on top one cross!”

²³ But Pilate say, “How come? Wat kine bad ting he wen do?”

But dey yell mo loud, “Kill him on top one cross!”

²⁴ Den Pilate know he no can make dem change dea minds, cuz da peopo was bussing up da place awready. So he take da water an wash his hands in front da peopo. He say, “You guys no can blame me fo wateva you guys do to dis guy! Dass you guys problem!”

²⁵ An all da peopo say, “Yeah, us guys an our kids goin be da one fo take da blame fo make um mahke!”

²⁶ Den Pilate tell da army guys fo let Barabbas go, an go whip Jesus, an den kill him on top one cross.

Da Army Guys Play Any Kine Stuff On Jesus

²⁷ Den da army guys dat work fo da governa wen take Jesus inside da palace, an dey tell all da odda army guys fo come by dem. ²⁸ Dey take off Jesus clotheses an put one long red king kine robe on top him. ²⁹ Dey make one crown from thorns, an put um on top his head. An dey put one stick in his right hand. An dey go down in front him an make fun a him. Dey say, “Ho! Check um out! Da King fo da Jews!” ³⁰ An dey spit on top him, an take da stick an wack him on top his head plenny times. ³¹ Wen dey was pau play wit him, dey take off da red robe an put his own clotheses back on top him. Den dey wen take him outside fo kill him on top one cross.

Dey Hang Jesus On Top One Cross Fo Mahke

³² Wen dey going out from Jerusalem, dey meet one guy name Simon from Cyrene town. Dey tell um he gotta carry Jesus cross. ³³ Dey come by da place dey call “Golgota,” dat mean “Da Skull Place.” ³⁴ Dey try give Jesus wine wit bitta stuff inside, but wen he taste da wine, he no like.

³⁵ Dey hang him on top da cross, an den dey throw dice, fo see wat guy goin get which clotheses from Jesus. ³⁶ Den dey sit down an guard him. ³⁷ Dey make one sign an put um ova his head, fo tell everybody wat he wen do wrong. Da sign say,

³⁸ Dey hang two prisona guys on top two crosses near him, one on da right side an da odda one on da left side. ³⁹ Had some guys walking ova dea dat shake dea fingas at him an say, “Oh, fo shame! ⁴⁰ You wen say dat you goin broke down da temple an goin build um up again befo three days pau! So, we like see you get yoaself outa dis! If you Godʼs Boy, come down from da cross now!”

⁴¹ Da main priest guys, da guys dat teach Godʼs Rules, an da older leadas wen make fun too, jalike da odda guys. Dey tell, ⁴² “He wen get da odda guys outa da stuff dey stay in, but he no can get himself outa dis! If he da King fo da Israel peopo, kay den, let him come down from da cross now! Den we goin trus him! ⁴³ He stay trussing God. So, let God get him outa dis stuff now, if God like him! Cuz he wen say, ‘I Godʼs Boy.’ ” ⁴⁴ An da prisona guys dat stay hanging dea near him, dey making fun a him too, jalike da odda guys.

Jesus Mahke

⁴⁵ Noon time, wen get real dark all ova da place, fo three hours. ⁴⁶ Three clock Jesus wen yell real loud an say, “Eli, eli, lema sabaktani!” Aramaic language, dat mean, “My God, my God, how come you go way an leave me ova hea?”

⁴⁷ Some odda guys dat stay ova dea wen hear him, an tell, “Dis guy stay yelling fo Elijah fo come!” ⁴⁸ One guy wen run an put one sponge inside da sour wine, an put um on top one bamboo, an try give um to Jesus fo drink.

⁴⁹ But da odda guys say, “Try wait! We go see if Elijah goin come fo get him outa dis.” ⁵⁰ Den Jesus yell again real loud, an den he let go his spirit.

⁵¹ Right den an dea da big curtain inside da temple broke in two from da top to da bottom. An da groun wen shake, an da rocks wen split up, an da graves wen open. (An you know wat? Plenny mahke guys who was all out fo God long time ago, dea bodies wen come alive again, afta Jesus wen come back alive from mahke. Dey wen come outa dea graves, an dey go inside Jerusalem, da town dat stay spesho fo God, an plenny peopo wen spock um, you know.)

⁵⁴ So da captain fo da army guys an da odda guys dat was guarding Jesus too, dey wen see da groun shaking, an everyting dat stay happening, an dey come real scared, an dey say, “Fo real kine, dis was Godʼs Boy!”

⁵⁵ Had plenny wahines standing far, watching everyting. Befo time, dey wen go wit Jesus from Galilee side, fo take care him. ⁵⁶ Had Mary from Magdala, an one nodda Mary dat get two boys, James an Joseph, an Zebedeeʼs wife dat get two boys, an had odda wahines.

Dey Go Bury Jesus

⁵⁷ Had one rich guy from Arimatea, name Joseph. He wen stick wit Jesus. ⁵⁸ He go in front Pilate befo da sun go down, an aks Pilate if he can take Jesus body. So Pilate tell his guys fo give him da body. ⁵⁹ Joseph take down da body from da cross, an wrap um up inside one clean cloth, ⁶⁰ an put um inside his own new tomb, da one dat was awready cut inside da rock. Dey push one big rock in front da hole fo close um. An dey go way. ⁶¹ Mary from Magdala an da odda Mary stay sitting ova dea on da odda side. Dass wea dey can see da tomb.

Da Police Guards By Da Tomb

⁶² Da nex day, afta da Make Ready Day Fo Da Passova time, da main priest guys an da Pharisee guys come togedda in front Pilate. ⁶³ Dey say, “Eh Governa, us guys rememba, wen dat fake guy still alive, he tell, ‘Afta three days I goin come back alive again.’ ⁶⁴ So us guys tinking, try put some guards in front da tomb till day numba three, so dat his guys no can come an steal his body. Cuz if dey do dat, den dey goin tell da peopo, ‘Try look! He wen come back alive from mahke.’ An den dis fake ting goin be mo worse den da first fake ting, wen he wen tell he da Christ guy.”

⁶⁵ So Pilate tell um, “Use yoa own police guys. Send um fo guard um, jalike you guys wen say.” ⁶⁶ Den dey wen go an put one seal on top da big rock da close da tomb, an leave some police guards ova dea fo guard um.