M’Cheyne Bible Reading Plan
Tej tyolin Jesús tiˈj tuˈn tyuchˈjjo tnejil ja te naˈbˈl Dios(A)
13 Tetz Jesús toj tnejil ja te naˈbˈl Dios, bˈeˈx xi tqˈmaˈn jun t‑xnaqˈtzbˈin te: Xnaqˈtzil, ayex kye junjun tij abˈj ex junjun tij ja tbˈanilqex wen.
2 Xi tqˈmaˈn Jesús te: Tbˈanilqex kye junjun tij ja nchi ok tkaˈyiˈn, me twutzxix kxel nqˈmaˈn tey, qa tkyaqilx kchi kˈwel yuchˈj, ex ntiˈx jun abˈj kyjel tibˈaj juntl, aj tpon tqˈijil.
Tej t‑xi tqˈmaˈn Jesús tiˈ kbˈajil, aj chˈixtaq tjapin bˈaj tkyaqil(B)
3 Tbˈajlinxiˈ ikyjo, bˈeˈx xiˈ Jesús kyukˈa t‑xnaqˈtzbˈin twiˈ wutz Olivos, xinin twutzjo tnejil ja te naˈbˈl Dios. Teˈ kykanin, kubˈ qe Jesús, me ayetzin Pegr, Santyaw, Juan exsin Andrés, xi kyqanin kyjunalx: 4 ¿Jtojtzin bˈaˈn tbˈajjo ikyjo, ex tiˈchaqtzin txqantl kbˈajil, aj chˈixtaq tkˈul kaniˈn ikyjo? chi chiˈ.
5 I xi ttzaqˈwin Jesús: Kykaˈyink kyibˈa tuˈn mix aˈl kubˈ sbˈun kyeˈy, 6 quˈn ilaˈxte tzul, ex k‑okil kyqˈoˈn kyibˈ tzeˈn ayiˈn. Chichkuˈ kyjaluˈn: Ayin weˈ Crist, ex nimx xjal kbˈaj kˈwel kyuˈn, tuˈn kybˈaj ok lipe kyiˈj. 7 Aj tok kybˈiˈn tqanil jniˈ qˈoj n‑ok tzaluˈn mo tzachiˈn, mina chi jaw xobˈa, quˈn atziˈn jniˈ anetziˈn ilx tiˈj tuˈn tbˈaj. Me naˈmtaqtzin tul kanin teˈ qˈij, a jaˈ tuˈn tbˈaje twutz txˈotxˈ tkyaqilx. 8 Ilx tiˈj tuˈn kykˈul kaniˈn qˈij, jaˈ tuˈn toke qˈoj tuˈn junjun nim tnam tukˈa junjuntl; ex tzul kyaqnajnabˈ ex nintz waˈyaj noq jaˈchaqku tkyaqil twutz txˈotxˈ. Tkyaqiljo ikyjo, ikyjo tzeˈnku tnejil tchyoˈn tkˈuˈj jun qya tukˈa tal.
9 Bˈaˈnx chi kaˈyin kyibˈa, quˈn kchi bˈaj xel qˈoˈn toj kyqˈobˈjo kawil ex kchi bˈajil lankˈiˈn toj muˈẍ ja te naˈbˈl Dios. Kchi bˈaj pon qˈiˈn kywutz nmaq kawil ex kywutz muchˈ kawil, noq tuˈn npaja. Antza kˈwele kychikyˈbˈiˈn nqanila kywutz. 10 Me tuˈn tbˈajjo tkyaqil twutz txˈotxˈ, il tiˈj nej tuˈn tbˈaj yolitjo nyola te kolbˈil kyexjal toj kykyaqil twutz txˈotxˈ. 11 Me mina chi jaw bˈisin kyeˈ, aj kyxi qˈiˈn kywutzjo nmaq kawil, ex tiˈ tuˈn txi kyqˈmaˈn kye, quˈn nyaqe kyeˈ kchi yolil, qalaˈ ikytzin ate Xewbˈaj Xjan k‑yolil kyiˈja.
12 Kyojjo qˈij anetziˈn, iteˈ itzikybˈaj kchi bˈaj xel kykˈayin kyitzˈin kye kawil, tuˈn kybˈaj kubˈ bˈyoˈn; ex iteˈ manbˈaj kchi bˈaj kxel kykˈayin kykˈwal, ex ikyqexl kˈwalbˈajjo, kchi bˈaj xel kykˈayin kytata, tuˈn kybˈaj kubˈ bˈyoˈn. 13 Kykyaqilxjo xjal nya nimilqe kchi bˈaj okil ikyˈin kyuˈn noqx tuˈn npaja, me ankye teˈ mina tzˈel tiˈn tnimbˈil wiˈja, ajxi tjapin bˈaj tqˈijil, apente kkletiljo.
14 Ajtzin t‑xi kykaˈyinjiˈy ajo ichin, a kˈwel tbˈinchin a tixqex toj najbˈil xjanxix (aj tkux kyuˈjinjiˈy luˈn, tzˈelku kynikyˈa te). Ajtzin tok kykaˈyin xjaljo tkyaqiljo lo, ayeˈ iteˈ toj txˈotxˈ te Judey, bˈeˈx kchi xel oq toj kˈul. 15 Ex atzin xjal, a tokxtaq twiˈja, nlay taqˈ ambˈil tuˈn tkuˈtz qˈilte jun tiˈ te tuja. 16 Ex ikyxljo, a tzmataq n‑aqˈnin toj ttxˈotxˈ, mi taqˈ ambˈil tuˈn tul qˈilkye t‑xbˈalin tja. 17 ¡Ayexjo tal qya, ayeˈ chˈixtaq kykubˈ tzˈaq, ex ayeˈ tzmataq nbˈaj miˈẍin kyal! 18 Chi naˈn Diosa, noqit nya toj jbˈalilku, mo tojku jun qˈij te ajlabˈl kubˈ tzˈaqe ikyjo. 19 Quˈn nimkux jun kyixkˈoj kkyˈelix kyuˈn, a bˈajxi kylaˈy tukˈaxjo tzajlin xkye twutz txˈotxˈ, ex mixla kqlaˈbˈil juntl majl, aj tjapin bˈaj tkyaqil. 20 Quˈn noqit mi tzˈajtz tajsin Dios kyiˈjjo qˈij anetziˈn, mixitla aˈlx jun aku kyij anqˈin. Me ok ajitz tajsin Dios noq tuˈn tqˈaqˈbˈil tkˈuˈj kyiˈjjo o chi jaw tskˈoˈn. 21 Qa at jun saj qˈmaˈnte kyeˈy kyojjo qˈij anetziˈn: Lu Crist lo, mo qa luˈ at tzachiˈn, qa chiˈ, mi txi kynimiˈn. 22 Quˈn chi ul sbˈul k‑okil kyqˈoˈn kyibˈ te Crist, mo te jun xjal tzeˈnku jun yolil Tyol Dios ojtxe. Ex okpe kˈwel kybˈinchin nim techil kyipin, noq tuˈn kysbˈetkuxjal kyuˈn. Ex okpela k‑okil kynikyˈin tuˈn kykubˈjo skˈoˈnqe tuˈn Dios, me nlay chi kubˈ. 23 Kykaˈyink kyibˈa. Tuˈnpetziˈn, ma txi nqˈmaˈn kyeˈy naˈmtaq tuˈn tul kanin ikyjo.
A tulil Jesucrist juntl majl(C)
24 Noqx aj kybˈaj ikyˈjo qˈij te yajbˈil, k‑okil qlolqex twutz qˈij, ex mi kˈantl yaye. 25 Ex jniˈ qeˈ cheˈw kchi kˈwelitz tzˈaq twutz txˈotxˈ. Ex tkyaqiljo jniˈ at twutz kyaˈj okx kchi luˈlilx.
26 Exsin kchin xel kykaˈyintza, aj ntzaja toj muj twutz kyaˈj tukˈa tkyaqil wipiˈn ex jniˈ nqoptzˈajiyila, ayiˈn a Tkˈwal Ichin. 27 Ajtzin nkˈula twutz txˈotxˈ, kchi tzajil nsmaˈn n‑angela, tuˈn kyok chmetjo jniˈ skˈoˈnqe wuˈn toj tkyaqil twutz txˈotxˈ.
28 Kykaˈyinkjiˈy techil tiˈj tqan iw: Aj ttzaj xulin tal tqˈobˈ, ex aj tzaj poqˈle t‑xaq, antza k‑elile kynikyˈa te, qa chˈix tul kanin qˈijil. 29 Ikyxsintzjo, aj tok kykaˈyiˈn tkyaqiljo luˈn, tzˈelku kynikyˈa te, qa chˈix tpon tqˈijil tuˈn wula juntl majl. 30 Twutzxix kxel nqˈmaˈn kyeˈy, a naˈmxtaq kybˈaj kyimxjal, a iteˈ tojjo tqˈijil jaˈlin, aj t‑xi xkyejo jniˈ luˈn. 31 A kyaˈj ex txˈotxˈ ok kchi bˈajil, me mex weˈ nyol nlayx chi kyij xkyeˈ, tuˈn mi chi japin bˈaje.
32 Me alkye qˈij ex alkye or chin ula, mix aˈl teˈ bˈilte, mixpe aye angel toj kyaˈj, mixpe ayinkuy, a Kˈwalbˈaj te Dios; qalaˈ oˈkx te nMan bˈilte. 33 Tuˈnpetziˈn kyimil kywatla toj kynimbˈila, ex kykaˈyink kyibˈa, quˈn nya bˈiˈn kyuˈn jtoj bˈaˈn nmeltzˈaja.
34 Ikyx te luˈn tzeˈnku jun ichin kyjaˈ t‑xi toj jun tbˈe toj junxil tnam najchaq. Kyjel kyqˈmaˈn kye taqˈnil tuˈn tok kykaˈyin tja; ex kyjel tqˈoˈn taqˈin junjun, kyjel tqˈmaˈn te xqˈuqil tja, tuˈn telsin twatl, ex tuˈn tok tkaˈyin tkyaqil. 35 Ikyqexsin kyejiˈy bˈant‑x kyteˈn, ex bˈaˈnx chi kaˈyin kyibˈa, quˈn nya bˈiˈn kyuˈn jtoj bˈaˈn wula, qa noq aj qok yupj, mo nikyˈjin aqˈwilj, mo aj toqˈ ekyˈ, mo nqo el sqixkuj. Tuˈnpetzintzjo, ilx tiˈj tuˈn tkubˈ kybˈinchin kyteˈn, quˈn ntiˈ nqanila aj wula. 36 ¿Yajtzin qa nchin ulkuy, ex nya bˈinchin kyteˈn? 37 Tuˈnpetziˈn, nxi nqˈmaˈn kyeˈy, ex nya noq kyekuy ex majx kye jniˈ xjal tkyaqil twutz txˈotxˈ: ¡Kybˈinchim kyteˈn!
13 Kyqˈonx kyibˈa tjaqˈ kawil tzaluˈn twutz txˈotxˈ, quˈn tuˈn ntiˈ jun kawbˈil, a nya tuˈn Dios; ex tkyaqil kawil, ax Dios qˈolte kyoklin. 2 Tuˈnpetziˈn, qa at jun xjal mi nkubˈ tnimiˈn kawbˈil, n‑el tiˈjliˈn a tkubˈ tuˈn Dios. Ex ankyeˈ nkubˈ tbˈinchin ikyjo, ax n‑ok aj paj tiˈjx, ex kkawil Dios tiˈj. 3 Quˈn aye kawil nya tuˈn kykawin kyiˈjjo nchi bˈinchin wen; qalaˈ kyiˈjjo nya wen nkybˈinchin. Tuˈnpetziˈn, qa taj te tuˈn mi txi kawiniˈy tuˈn kawil, bˈinchinkutzinjiˈy wen, ex axte kawil k‑yolil tiˈja qa wena, 4 quˈn tkubˈ tuˈn qMan Dios tuˈn tajbˈin te. Me qatzin qa mina xkubˈ tnimiˈn, kxel kawin tuˈn, quˈn nya noq tokku te kawil; qalaˈ ax Dios qˈolte tuˈn tkawin kyiˈjjo kykyaqil nchi bˈinchin nya wen. 5 Tuˈnpetziˈn, il tiˈj tuˈn tokx kyqˈoˈn kyibˈa tjaqˈ kawbˈil, nya noq oˈkx tuˈn mi cheˈxe kawiniˈy tuˈn, qalaˈ ikytzin ikyx tumiljo.
6 Tuˈnpetziˈn, kychjonxjiˈy tkyaqil wiq kˈaybˈil kye kawil, quˈn aye kawil nchi ajbˈin te Dios, ex at kyoklin tiˈjjo aqˈuntl lo. 7 Ex kychjonxjiˈy tkyaqil kykˈasa, jaˈ kˈasbˈinaqiˈy, tzeˈnku chojbˈil te kawil, ex jniˈ kˈaybˈil. Ex qa at jun at toklin tuˈn tkubˈ nimit, kyniminkuy.
8 Mi chi anqˈiˈn noq tuˈn txˈex, me at jun kykˈasa; noq tuˈn kykˈuˈjlin te kyibˈa kyxolxa. Quˈn alkye nkˈuˈjlin tiˈj tukˈa, tuˈntzintzjo njapin tkyaqiljo tajbˈil qMan Dios tuˈn, a tzeˈnku ntqˈmaˈn toj ojtxe kawbˈil. 9 Quˈn ntqˈmaˈn kawbˈil tuˈn mi kyˈaˈjiniy, ex mi bˈiyiˈn, ex mi tzˈelqˈiˈn, ex mi ja bˈant jun yol tuˈn tiˈj juntlch, ex mi pon tkˈuˈja tiˈjjo kyexjal. Quˈn tkyaqiljo luˈn ex jniˈ txqantl kawbˈil npon bˈaj noq tukˈa nukˈbˈil lo: Tuˈn tok kykˈuˈjliˈn kykyaqil kyxjalila tzeˈnkuxjo kyeˈ. 10 Ankye nkˈuˈjlin kyiˈj tukˈa, nlay kubˈ tbˈinchin jun nya bˈaˈn kyiˈj. Atzintza njapine bˈajjo t‑xilin ojtxe kawbˈil quˈn, tuˈn qkˈuˈjlin te qibˈ.
11-12 Toj tkyaqiljo lo, tzˈeltzin kynikyˈa tiˈj tqˈijil jaˈlin, quˈn o qo klet, ex chˈix tul qAjaw qˈilqe te jun majx. Tuˈnpetziˈn, kyqˈonktziˈn tilil, tuˈn kyjaw sakˈpaja toj kynimbˈila. Quˈn tkyaqiljo il chˈix tjapin bˈaj, tzeˈnku jun qnikyˈin, aj ttzaj t‑xe kyaˈj. Tuˈn ikyjo, kytzaqpinkjtzinjiˈy tkyaqil taqˈnbˈin qxopin, a bˈinchj il, ex kyktxunk kyibˈa tukˈa taqˈnil spikyˈin, a tajbˈil qMan, tzeˈnku jun xoˈl qˈaqˈ at xbˈalin ex tkxbˈil te joybˈil qˈoj. 13 Qo bˈet‑xix toj tumil ex toj spikyˈin, nya noq tuˈn qloˈn, tuˈn qtxˈujte, tuˈn qkyˈaˈjin, ex jniˈ tzeqbˈil, ex tuˈn qqˈojin, ex tuˈn tloˈchj qkˈuˈj. 14 Qalaˈ tuˈn tyekˈin qAjaw Jesucrist toj qchwinqil, tzeˈnku jun xbˈalin saq tok qiˈj kywutzxjal. Ex mi txi qqˈoˈn ambˈil tuˈn qbˈinchin a ntqanin ojtxe qteˈn, a nya wen.
Copyright © 2002 by Wycliffe Bible Translators International