M’Cheyne Bible Reading Plan

Jesus Say Dey Goin Bus Up Da Temple

13 Jesus was goin outside da temple yard, an one guy he teaching say, “Eh, Teacha, check out dese buildings, da stone blocks! Awesome, yeah?”

² Jesus say, “You see all dese awesome buildings? Bumbye no goin get one stone on top da odda ova hea. Dey goin throw um all down.”

Goin Get Trouble An Suffa

³ Lata on, Jesus go Olive Ridge, an sit down ova dea wea can see da temple da odda side da valley. Peter, James, John, an Andrew come by him wen no mo odda guys dea. Dey aks him, ⁴ “Wat time all dat kine stuff goin happen? How we goin know wen da time come?” ⁵ Jesus tell um, “Watch out! No let nobody fool you guys! ⁶ Plenny guys goin show up an use my name. Dey goin say, ‘Eh, me, I dat Spesho Christ Guy from God!’ An dey goin fool plenny peopo lidat. ⁷ No get all shook up. You guys goin hear, ‘Dey fighting, an get war all ova da place.’ Dat gotta happen, but dat no goin mean everyting goin pau yet. ⁸ One country goin fight one nodda country. One king goin fight one nodda king. Plenny diffren places, da groun goin shake hard plenny. Plenny peopo goin get notting fo eat. Dey goin suffa plenny, but all dat ony fo start.

⁹ Watch out! Dey goin take you guys to dea leadas. Dey goin punish you guys wit whips inside da Jewish churches. You guys goin stand in front da governas an kings, cuz you my guys. An you goin tell um bout me. ¹⁰ But befo dis stuff happen, all da diffren peopos all ova da world gotta hear da Good Stuff From God. ¹¹ Every time dey bus you guys, an take you in front da judge, no worry wat you goin say. Ony say wat da Spirit tell you right den. Dat time goin be Godʼs Spesho Spirit talking, not you. ¹² Bruddas goin sell out dea bruddas fo mahke, an da faddas goin sell out dea kids. Kids goin fight dea mudda an fadda, an set um up fo mahke. ¹³ Everybody goin hate you cuz you my guys. But da guy dat hang in dea to da end, he goin come out okay.

Da Real Bad Ting

¹⁴ “Someting goin happen dat God hate plenny. Da bad ting goin stand wea not suppose to. Dat ting so bad, goin make everybody go way. (Whoeva read dis, dey gotta figga um out.) You know, wen you guys see dat happen, if you stay Judea side, run to da mountains. ¹⁵ If you stay on top one house dat get flat roof, no go inside fo take yoa stuffs wit you. ¹⁶ If you stay inside da fields, no go home fo get yoa clotheses.

¹⁷ “Dat time goin get hard time fo da hapai wahines an da muddas dat stay nursing dea babies! ¹⁸ Aks God fo no let dis stuff happen winta time. ¹⁹ Cuz dat time everybody goin suffa to da max. Neva have notting lidat eva wen happen befo, not even from wen God wen make da world till now, an no goin get notting lidat eva goin happen again. ²⁰ If da Boss Up Dea neva make dat time mo short, nobody goin come out okay. But fo help da peopo da Boss wen pick, he goin make dat trouble mo short.

²¹ “Dat time, if get one guy dat tell you guys, ‘Eh, look! Christ, da Spesho Guy God Wen Send, he stay ova hea! He stay ova dea!’ no go trus dat kine guy! ²² Goin get plenny fake kine guys who say dey Christ, an goin get plenny fake kine guys who say dey talk fo God. Dey goin do unreal an awesome stuff fo try prove dat dey fo real, an dey goin even try fool da peopo dat God wen pick, if dey can. ²³ Watch out, eh! Befo all dat happen, I stay telling you guys everyting now awready.”

Da Guy Dass Fo Real Goin Come Back

²⁴ “Right afta dat time fo suffa,

²⁶ “I da Guy Dass Fo Real. Dat time, da peopo goin see me coming inside da clouds wit all kine power, an I goin be awesome! ²⁷ Den I goin send my angel messenja guys fo bring togedda all da peopo God wen pick from all ova da world, every place dat get unda da sky.

Da Fig Tree Teach Us Someting

²⁸ “Eh, you guys, try learn someting from da fig tree. Everytime da fig tree make new branch an get new leafs, you guys know dat summa time coming. ²⁹ Same ting, wen you guys see all dis stuff happen, den you goin know, I stay coming, an everyting stay ready, jalike I outside da door. ³⁰ Dass right! An I like tell you guys dis too: From da peopo dat stay hea right now, get guys dat no goin mahke befo all dis stuff goin happen. ³¹ Da sky an da world goin pau, but da tings I say neva goin pau.

Nobody Know Da Day O Da Time

³² “Nobody know wen all dat goin happen, not even da day, o da time. Da angel messenja guys inside da sky, even dem, dey donno. Even me, I Godʼs Boy, an I donno da time. Ony my Fadda know da time! ³³ So watch out! Stay ready! Cuz you guys donno wat time yoa Boss goin come back. ³⁴ Jalike one guy goin on one trip. Befo he go, he tell his worka guys, ‘Come. Take care my house.’ Every guy get someting fo do. He tell da guard, ‘Stay ready!’ ³⁵ You guys gotta make lidat! Stay ready! Cuz you guys donno da time I goin come back. Might be afta da sun go down, o midnite, o real early in da morning wen da roosta make noise, o wen da sun stay coming up. ³⁶ If I come all of a sudden, you no goin like if I find you guys sleeping, yeah? ³⁷ I tell you guys an everybody dis: Stay ready an watch!”

Gotta Listen Da Guys In Charge A Da Law

13 Everybody gotta listen da guys dat stay in charge a da law. Dey get da power fo tell da odda peopo wat fo do, you know. But da power dey get, God wen give um dat. Da guys dat stay get power right now, dey da ones dat stay in charge cuz God wen make um lidat. ² Dat mean, if get somebody dat go agains da kine peopo dat get dat kine power, az jalike dey going agains da way how God wen go make one govermen fo us. If get anybody dat make lidat, dey goin get it from God da Judge.

³ If you do da right tings how suppose to, no need be scared a da guys dat stay in charge a da law. But den, if you do da bad kine stuff dass no good, you bes be scared! So, if you no like stay scared a da peopo dat get power, make shua you go do ony da good kine stuff. Den wen you do da good kine stuff, az wen dey goin tell you dat you stay okay. ⁴ Cuz da guys dat stay in charge a da law, dey da ones dat God wen pick fo help you. But, if you stay doing da bad kine stuff, eh, you bes be scared! Dey da ones dat get da right fo make shua you get it, an dey going do dat fo real kine, you know. Dose guys, az jalike dey da helpa guys fo God, fo punish da peopo dat doing da bad kine stuff. Cuz da bad kine stuff dat peopo do, God no goin take um.

⁵ Dass why you guys gotta listen to da govermen guys. Not ony cuz you know inside yoa heart, az how suppose to be, but cuz you know awready, God no goin take notting from you if you no do da right ting.

⁶ Same ting, dass how come you guys gotta pay tax too. Cuz da govermen guys, wen dey stay working hard fo do good job, dey stay working fo God. ⁷ So pay everybody wat you suppose to. Pay da tax guys all da diffren kine taxes dat you suppose to. Make shua you get respeck fo all da peopo dat suppose to get respeck. All da peopo dat stay doing good tings, go tell odda peopo dat dey doing good tings.

Love An Aloha Fo Da Bruddas An Sistas

⁸ No good you owe money to odda peopo. Ony get one ting dass good fo owe peopo -- dass love an aloha. Wen you go show dem love an aloha, dat mean you listen to everyting da Rules say awready. ⁹ Da Rules say, “No go fool aroun, no go kill nobody, no go steal, no go do any kine fo ony get wat you like,” an plenny odda kine stuffs too. Fo do all da tings da Rules say, ony gotta listen dis Rule: “Get love an aloha fo da odda guy jalike you get love an aloha fo yoaself.” ¹⁰ Eh, you show love an aloha fo da odda guy, you no goin do notting fo make bad kine to him! So den, wen you show um love an aloha everytime, dass how you goin do everyting da Rules from God tell you fo do.

Pretty Soon, Christ Goin Come Back

¹¹ God goin hemo us guys from da bad kine stuff, an da time dat goin happen, dat time mo close now den befo, wen we wen go trus Jesus Christ. Dass why you guys gotta get love an aloha, cuz you know how everyting stay nowdays. Jalike us guys was sleeping, but now, time fo us wake up awready! ¹² Litto mo pau da nite time, almos day time awready! So, good we pau da bad kine stuff we was doing. Dass jalike how peopo do dark time, wen nobody no can see wat dey stay doing. Now, jalike we goin put on da kine stuff da army guys use fo fight fo wat stay good, an do da good tings peopo do wen get light! ¹³ All us guys gotta live da right way, so everybody goin see an know dat we doing good kine tings. No good we go party up all da time an get drunk all da time. No good we go sleep wit everybody. No good we like go beef everybody. An no good bodda us every time we tink get somebody mo betta den us guys. ¹⁴ But you know wat? Mo betta you go change yoa heart an come jalike our Boss Jesus Christ, da Spesho Guy God Wen Send! No go make um so stay easy fo you fo go do any kine, jus cuz you feel like you like do any kine.