M’Cheyne Bible Reading Plan
Da Guy Dat Dump His Wife
10 Den Jesus wen go way from dat place an go Judea side, da odda side da Jordan River. One mo time plenny peopo wen go by him, an he teach um jalike he everytime do.
2 Some Pharisee guys come fo trap him. Dey aks him, “Dass right, o wat, inside da Rules, fo one guy go dump his wife?”
3 Jesus wen aks um, “Wat Rule Moses wen give yoa ancesta guys bout dat?”
4 Dey say, “Moses wen tell, ‘Gotta give da wife one paper fo get one divorce, den can dump her.’ ”
5 Jesus tell um, “Cuz all you guys so hard head, dass why Moses wen give you guys dat Rule. 6 But I telling you guys dis: Wen God wen make da world, he make one guy an one wahine. 7 An God say, ‘Cuz I wen do dat, da guy no goin stay wit his fadda an mudda no moa, he goin stay wit his wife. 8 An da guy an da wahine goin be togedda jalike one body.’ So jalike dey not two peopo no moa, dey jalike one. 9 Wat God wen put togedda, da peopo betta not broke um up.”
10 Afta dey wen go inside da house one mo time, da guys he teaching wen aks um bout dat. 11 He tell um, “Da guy who dump his wife an go marry one nodda wahine, da way God see um, da first one still stay his wife. Da guy ony fooling aroun da second wahine. 12 An da wahine who dump her husban an go marry one nodda guy, da way God see um, da first one still stay her husban. Da wahine ony fooling aroun da second guy.”
Jesus Put His Hands On Top Da Small Kids An Pray Fo Dem
13 Da peopo wen bring dea small kids by Jesus, cuz dey like him fo put his hands on top dea heads an aks God fo do good tings fo dem. But den Jesus guys wen scold da peopo cuz dey wen bring da kids, an dey tink da kids goin bodda Jesus. 14 Wen Jesus wen see wat his guys doing, he huhu. He say, “Let da kids come! No stop dem! Cuz da peopo who make God dea King, inside demself dey jalike dese kids. 15 Dass right! An I like tell you dis too: Da guy who not jalike one small kid inside, God no goin be his King.” 16 An he wen hug da kids, an put his hands on top da kids heads, an aks God fo do good tings fo dem.
Da Young Guy Dat Get Plenny Stuff
17 Wen Jesus was starting fo go, one guy wen run up by him, an go down on his knees in front him, an say:
“Eh, Teacha, you good. Can aks you one question? Wat I gotta do fo live to da max foeva?”
18 Jesus say: “How come you call me good? Ony get One dat stay good fo real kine, dass God. 19 You know Godʼs Rules: No go kill nobody, no go fool aroun behind da oddaʼs back, no rip off nobody, no bulai any kine bout nobody, no cockaroach nobody, show respeck fo yoa fadda an mudda.”
20 He say: “Ho, Teacha! From small kid time I do all dat stuff.”
21 Jesus wen look at um, an get aloha fo him. He say: “Ony one ting mo you neva do dat you gotta do. Go sell all da stuffs you get, an give da money to da poor peopo. An garans you goin get da real kine rich stuff up dea wea God stay. Den come wit me fo be my guy.”
22 Da guy wen hear dat, an he wen come real sad, an he wen go way, cuz he get plenny rich stuffs dat he neva like sell.
23 Jesus wen look aroun at his guys an say, “Az why hard fo one rich guy fo get God fo his King!”
24 His guys wen hear wat Jesus say, an wen blow dea minds. Jesus say one mo time, “Eh you guys! Stay hard, you know, fo get God fo yoa King. 25 Stay mo easy fo one camel go thru da puka in one needle, den fo one rich guy fo get God fo his King.”
26 Dey all shock, an dey tell each odda, “If dass how stay, who can come outa da bad kine stuff he stay in, den?”
27 Jesus look strait at dem an tell, “No mo nobody dat can do um, but ony God, he da One dat can do um all.”
28 Den Peter wen tell, “Eh, Boss, look! We wen give up everyting we get fo go wit you.”
29 Jesus say, “Az right! An I tell you guys dis: Whoeva give up dea home, dea bruddas, dea sistas, dea mudda an fadda, dea kids, an dea lands, so dey can stick wit me an da Good Stuff From God I stay telling you, 30 bumbye dey goin get hundred times mo plenny even befo dey mahke. Dey goin get home, bruddas, sistas, mudda, kids, lands. An one nodda ting dey goin get -- peopo goin make um suffa. Bumbye, in da time to come, dey goin live to da max foeva. 31 Goin get plenny peopo who like make demself come first, but bumbye dey goin come last. An get plenny peopo who like make demself come last, but bumbye dey goin come first.”
One Mo Time Jesus Tell He Goin Mahke
32 Jesus go in front his guys, an dey all going Jerusalem. Jesus guys was all shook up, an da odda peopo who wen go wit dem was all scared. One mo time he wen take da twelve guys by da side a da road, an tell um wat goin happen. 33 He tell dem, “Eh, listen, we going Jerusalem. I da Guy Dass Fo Real. One guy goin set me up so da main priest guys an da teacha guys dat teach Godʼs Rules can take me. Den dey goin say I gotta mahke. Dey goin give me to da guys dat not Jews. 34 Dey goin make fun a me, an spit on top me, an whip me, an kill me. But on day numba three, I goin come back alive.”
Wat James An John Aks Him
35 James an John, Zebedeeʼs boys, dey come by Jesus. Dey say, “Teacha, us guys like you do someting fo us, yeah?”
36 Jesus say, “Wat you like?”
37 Dey say, “Wen you come King, goin be awesome, yeah? We like you let us sit by you, one by da left side an da odda by da right side.”
38 Jesus say, “You guys donno wat you aksing fo. You tink you guys can suffa jalike I goin suffa? You tink you can handle da big trouble I goin get?”
39 Dey say, “Shua, us guys can handle.”
He tell um, “Fo shua you guys goin suffa jalike me, an you goin handle all da trouble I goin get. 40 But fo sit by my right side an by my left side bumbye wen I come King, dass not mines fo say. My Fadda, he da One who can say dat, an he awready stay make da spesho places ready fo da peopo dat suppose to sit ova dea.”
41 Wen da odda ten guys hear dat, dey come all huhu wit James an John. 42 Jesus say, “Eh, all you guys! Come ova hea! You know, da leadas fo da peopos dat donno God, dey get any kine power ova dea peopo. Dea main guys get da rights fo tell da peopo wat fo do. 43 But you guys, no goin be lidat wit you. Wit you guys, whoeva like be da leada guy, he gotta be da helpa guy first. 44 Wit you guys, whoeva like be da numba one guy, he gotta do wat you guys tell him. 45 I da Guy Dass Fo Real. I neva come so peopo can take care me. I wen come fo take care dem. I wen come fo give up my life an mahke fo cut loose plenny peopo from da power dat da bad kine stuff get ova dem.”
Jesus Make Bartimeus So He Can See
46 Dey go Jericho. Wen dey going away from da town, get plenny peopo wit dem. Bartimeus, one blind guy, stay sitting by da road side begging. He Timeus boy. 47 He hear dat Jesus from Nazaret passing by, an he wen start fo yell, “Eh, Jesus! You da guy dat suppose to show up from King Davidʼs ohana! Try pity me!”
48 Had plenny peopo ova dea dat wen scold him an tell um fo shut his mout. But he wen yell even mo loud, “Eh Boss, you da guy from King Davidʼs ohana! Try pity me!”
49 Jesus stop an say, “Call him!” So dey wen call da blind guy an tell um, “Eh, dass okay! Get up! He stay call you.”
50 He wen jump up an throw down his coat, an go by Jesus.
51 Jesus aks um, “Wat you like me do fo you?”
Da blind guy say, “Teacha! I like see!”
52 Jesus tell um, “Go! You wen trus me, dass why you come good now.” Right den an dea he can see, an he go wit Jesus on da road.
10 Bruddas an sistas, you know wat I like happen fo da Israel peopo? I aks God plenny fo dem, so dat da Israel peopo goin let God hemo dem from da bad kine stuff dey stay doing. Wen dat happen, dass wen I goin feel real good inside my heart!
2 You know, I can tell you dis bout dese peopo: Dey like go all out fo God, an dey try make lidat, but den, dey donno da main stuff dat dey suppose to know first. 3 Dey donno wat God wen do awready fo all us guys get um right wit him. So dey go try fo get um right wit God how dey like, an dass why dey no like listen to him.
4 Christ wen do everyting fo us get um right wit God. Wit ony da Rules, no can do dat. Now, whoeva go trus Christ, dey da ones dat goin get um right wit God.
God Like Take Everybody Outa Da Bad Kine Stuff Dey Stay Doing
5 Now Moses, he wen go write inside da Bible how fo get um right wit God if da peopo do everyting wat da Rules say. Dis wat Moses wen say: “Whoeva go do everyting da Rules say, cuz dey do dat, dey goin get life fo real kine.”
6 Da Bible say someting diffren den dat too, bout how you get um right wit God cuz you trus him. Da Bible say: “No good you go tink inside yoa head, ‘Eh, who going up dea inside da sky?’ ” Eh, dass jalike da guy going up dea fo tell da Spesho Guy God Wen Send dat we like him come back down hea by us guys. 7 Same ting, da Bible say: “No good you tink inside yoa head, ‘Who goin go way down inside da groun by da Deep Dark Hole wea da mahke peopo stay?’ ” Eh dass jalike da guy going down dea fo bring Christ back from mahke.
8 But you know, da Bible say, “Da main ting God wen say, stay right dea. Awready stay inside yoa mout an inside yoa heart.” Dass da same ting us guys stay teaching: Eh, gotta trus Christ! 9 Dat mean, if you talk strait wit yoa own mout, “Jesus, he my Boss,” an you trus deep inside yoa heart dat God wen bring Christ back alive afta he wen mahke, den God goin hemo you from da bad kine stuff you stay doing. 10 Cuz az wit yoa heart dat you trus God, an den he make you get um right wit him. An az wit yoa mout dat you talk strait everybody dat Jesus stay yoa Boss, an den God goin hemo you from da bad kine stuff. 11 Jalike da Bible say, “Whoeva trus God, no way dey goin come shame, cuz God goin do everyting wat he say.” 12 Da Jewish peopo an all da odda peopos, dey all same same. No mo diffrence. Cuz get da one Boss, an he da Boss fo everybody. He goin do plenny fo everybody dat aks him fo kokua dem. 13 Cuz da Bible say, “Everybody dat aks da Boss fo help um, he goin take um outa da bad kine stuff dey doing.”
14 But eh! How dey goin aks him fo help um if dey no trus him? An how dey goin trus him if dey neva hear notting bout him? An how dey goin hear bout him if nobody eva go tell um notting bout him? 15 An how dey goin tell peopo if nobody send um fo go teach? Jalike da Bible say, “Wen peopo go fo tell da Good Stuff From God, eh! dass so awesome!”
16 But you know, wen get Israel peopo dat neva like listen to da Good Kine Stuff From God. Jalike Isaiah wen say inside da Bible:
“Eh Boss! No mo nobody dat like go trus
Da tings dat dey wen hear from us guys!”
17 So den: Fo trus God, gotta listen to da tings he say. An fo listen to wat God say, first gotta hear bout Christ.
18 Try let me aks dis: You guys tink da Israel peopo neva hear notting, o wat? Fo shua dey wen hear! Jalike da Bible wen say befo time:
“All ova da world, get peopo dat wen hear da Good Stuff.
Da tings dey say, wen go all ova da place wea get peopo.”
19 An I aks one nodda ting: “Da Israel peopo, you tink dey neva undastan notting?” Moses da first one dat wen go tell inside da Bible, dat God wen say dis:
“I goin do someting fo some odda peopos
Dat not jalike you guys,
An dat goin make you guys jealous.
An I goin do someting fo peopo dat you guys tink stupid,
An dat goin make you guys come huhu.”
20 Isaiah wen come strong fo tell um strait inside da Bible dat God wen say,
“Da peopo dat no look fo me,
Dey da ones dat wen find me.
I even wen show myself
To da peopo dat neva aks fo see me.”
21 But da Israel peopo, dis wat he wen say bout dem:
“All day I wen put out my hands,
Waiting fo da Israel peopo fo come by me,
But dey no like listen.
Dey ony like go do someting else.”
Copyright © 2000 by Wycliffe Bible Translators International. All rights reserved