M’Cheyne Bible Reading Plan

संसार बँटि गवा

11 बाढ़ क पाछे संसार एक ही भाखा बोलत रहा। सब लोग एक ही सब्द-भण्डार बइपरत रहेन। ² लोग पूरब कइँती स बढ़ेन। ओनका सिनार देस मँ एक मइदान मिला। लोग हुवाँ बसइ गएन। ³ लोग कहेन, “हम पचन क ईंटा बनउब अउ ओका पजावा मँ तपावइ चाही, ताकि उ सबइ पककी होइ जाइँ।” ऍह बरे मनइयन आपन घर बनावइ बरे पाथरन क जगह ईंटा क बइपरेन। अउ मनइयन चूना क गारा क जगह राल क प्रयोग किहेन।

⁴ लोग कहेन, “हम पचे आपन खातिर एक ठु सहर बनाई अउ हम सबइ एक बहोत ऊँच इमारत बनाउब जउन अकासे क छुइ। हम पचे नामी होइ जाब। अगर हम पचे अइसा करब तउ पूरी धरती प बिखरेब नाही। हम पचे एक ही ठउर प एक संग रहब।”

⁵ यहोवा सहर अउ बहोत ऊँच इमारत क लखइ बरे तरखाले आवा। यहोवा मनइयन क इ सब बनावत लखेस। ⁶ यहोवा कहेस, “इ सबइ लोग एक भाखा बोलत हीँ अउर मइँ निहारत हउँ कि उ पचे इ काम खतम करइ बरे एकउटा अहइँ, इ तउ, इ सबइ जउन कछू कइ सकत हीँ ओकर, सिरिफ सुरुआत अंहइ। हाली ही उ पचे सब कछू करइ जोग्ग होइ जइहीं जउन इ पचे करइ चइही। ⁷ ऍह बरे आवा हम तरखाले चली अउ एनकइ भाखा क गड्डमड्ड कइ देइ। तब उ पचे एक दूसर क बात न बूझि पइही।”

⁸ यहोवा मनइयन क समूचइ धरती प फइलाइ दिहस। ऍहसे मनइयन सहर क बनाउब पूरा नाही किहन। ⁹ इहइ उ ठउर रहा जहाँ यहोवा समूचइ संसार क भाखा क गड्डमड्ड कइ दिहस। ऍह बरे इ ठउर क नाउँ बाबुल धरा गवा। इ तरह यहोवा उ जगहिया स मनइयन क पृथ्वी क सब देसन मँ फइलाएस।

सेम क परिवार क कहानी

¹⁰ इ सेम क परिवारे क कहानी बाटइ। बाढ़ क दुइ बरिस पाछे जब सेम सौ बरिस क रहा ओकर पूत अर्पखद क जनम भवा। ¹¹ ओकरे पाछे सेम पाँच सौ बरिस जिअत रहा। ओकरे दूसर पूत अउ बिटियन रही।

¹² जब अर्पखद पैंतीस बरिस क रहा ओकर पूत सेलह क जनम भवा। ¹³ सेलह क पइदा होइ क पाछे अर्पखद चार सौ तीन बरिस जिअत रहा। इ दिन ओकर दूसर पूतन अउ बिटियन पइदा भइन।

¹⁴ सेलह क तीस बरिस होइ क पाछे ओकर पूत एबरे क जन्म भवा। ¹⁵ एबेर क जन्म क पाछे सेलह चार सौ तीन बरिस जिअत रहा। इ दिनन मँ ओकरे पूतन अउ बिटियन पइदा भएन।

¹⁶ एबेर क चौंतीस बरिस क होइ क पाछे ओकरे पूत पेलेग क जन्म भवा। ¹⁷ पेलेग क जन्म क पाछे एबेर चार सौ तीस बरिस अउर जिअत रहा। इ दिनन मँ ओकरे दूसर पूतन अउ बिटियन पइदा भइन।

¹⁸ जब पेलेग तीस बरिस क भवा, ओकर पूत “रु” क जन्म भवा। ¹⁹ “रु” क जन्म क पाछे पेलेग दुइ सौ नौ बरिस अउर जिअत रहा। उ दिनन मँ ओकरे दूसर बिटियन अउ बेटवन क जन्म भवा।

²⁰ जब रु बत्तीस बरिस क भवा, ओकरे पूत सरुग क जन्म भवा। ²¹ सरुग क जन्मे क पाछे रु दुइ सौ सात बरिस अउर जिअत रहा। इ दिनन ओकरे दूसर बेटवन अउ बिटियन पइदा भएन।

²² जब सरुग तीस बरिस क भवा, ओकरे पूत नाहोर क जन्म भवा। ²³ नाहोर क जन्म क पाछे सरुग दुइ सौ बरिस अउर जिअत रहा। इ दिनन मँ ओकरे दूसर पूतन अउ बिटियन क जन्म भवा।

²⁴ जब नाहोर उनतीस बरिस क भवा, ओकर पूत तेरह क जन्म भवा। ²⁵ तेरह क जन्म क पाछे नाहोर एक सौ उन्नीस बरिस अउर जिअत रहा। इ दिनन मँ ओकरे दूसर बिटियन अउ बेटवन क जन्म भवा।

²⁶ तेरह जब सत्तर बरिस क भवा, ओकरे पूत अब्राम, नाहोर अउ हारान क जन्म भवा।

तेरह क परिवार क कहानी

²⁷ इ तेरह क परिवार क कहानी अहइ। तेरह अब्राम, नाहोर अउ हारान क बाप रहा। हारान लूत क बाप रहा। ²⁸ हारान आपन जन्मभूमि कसदियन क उर सहर मँ मरा। जब हारान मरा तब ओकर पिता तेरह जिअत रहा। ²⁹ अब्राम अउ नाहोर दुइनउँ आपन आपन बियाह किहन। अब्राम क मेहरारु सारै रही। नाहोर क मेहरारु मिल्का रही। मिल्का हारान क बिटिया रही। हारान मिल्का अउ यिस्का क बाप रहा। ³⁰ सारै क कउनो बच्चा नाही रहा काहेकि उ कउनो बच्चा क जन्म देइ जोग्ग नाही रही।

³¹ तेरह आपन परिवार क संग लिहेस अउ कसदियन क उर सहर क तजि दिहस। उ पचे कनान क जात्रा करइ क मन मँ ठान लिहन। तेरह आपन पूत अब्राम, आपन पोता लूत (हारान क पूत), आपन पतोहू (अब्राम क मेहरारु) सारै क संग लिहस। उ पचे हारान तलक जात्रा किहन अउ हुआँ ठहराउब तय किहन। ³² तेरह दुइ सौ पाँच बरिस जिअत रहा। तब उ हारान मँ मरि गवा।

सुसमाचार क प्रचार बरे प्रेरितन क पठउब

(मरकुस 3:13-19; 6:7-13; लूका 6:12-16; 9:1-6)

10 तउ ईसू आपन बारहु चेलन क लगे बोलवाइके ओनका दुस्ट आतिमन क बाहेर खदेरइ, अउर हर तरह क रोगन अउर दारुन दु:खन क दूर करइ क सक्ती दिहेस। ² उ सबइ बारहु प्रेरितन क नाउँ इ अहइँ

⁵ ईसू इन बारहु प्रेरितन क बाहेर पठवत हुकुम दिहेस कि उ सबइ, “गैर यहूदियन क पहँटा मँ न जाइँ अउर कउनो सामरी सहर मँ न घुसइँ। ⁶ मुला उ सबइ इस्राएल क परिवारे क हेराइ गइ भेड़न क नगिचे जाइँ ⁷ अउर ओनका उपदेस देइँ, ‘सरगे क राज्य नगिचे अहइ।’ ⁸ उ सबइ बेरमियन क नीक करइँ, मरे भएन क जिन्नगी देइँ, कोढ़िन क नीक करइँ अउर दुस्ट आतिमन क खदेरइँ। तू सबइ बे कछू देए भए पर्भू क असीस अउर सक्ती पाए अहा, एह बरे दुसरउँ क बे कछू लिए अजादी स बाँटा। ⁹ आपन बटुआ मँ सोना, चाँदी अउर ताँबा जिन रखा। ¹⁰ जात्रा बरे कउनो झोला तक जिन रखा। कइसो फालतू कुर्ता, चप्पल अउर छड़ी जिन ल्या। काहेकि मजदूर क ओकरे खइया प हक अहइ।

¹¹ “तू पचे जब कबहुँ कउनो सहर या गाउँ मँ जा तउ पता करा कि हुवाँ बिसवास क लायक कउन अहइ। फिन तब ताईं हुवाँ ठहरि जा जब ताई हुवाँ स चल न द्या। ¹² जबहि तू उ कउनो क घरे मँ जा तउ उ परिवार क मनइयन क मान सम्मान करत कहा, ‘तोहका सांति मिलइ।’ ¹³ जदि घरे क मनई सुपात्र होइहीं तउ तोहार असीस ओनके संग रही अउर जदि ओकरे जोग्ग नाहीं होइहीं तउ तोहार असीस तोहरे लगे लौटि आई। ¹⁴ जदि कउनो तोहार अगवानी न करइ या तोहार बतियन क न सुनइ तउ उ घरवा या सहर क तजि द्या। अउर आपन गोड़वा मँ लागी माटी क हुवँइ झाड़ि द्या। ¹⁵ मइँ तोहसे सच कहत हउँ कि जब निआव होई तब उ सहर क दसा सदोम अउर अमोरा^[b] सहरन क दसा कहूँ जिआदा बढ़िया होई।

आपन प्रेरितन क ईसू क चिताउनी

(मरकुस 13:9-13; लूका 21:12-17)

¹⁶ “होसियार! मइँ तोहका बिगवन मँ भेड़न क नाई बाहेर पठवत अहउँ। कीरा क नाई चालाक अउर कबूतरे क नाईं भोला बना रहा। ¹⁷ मनइयन स होसियार रह्या काहेकि उ पचे तोहका बंदी बनाइके यहूदी पंचायत क दइ देइहीं अउर तोहका आपन आराधनालयन मँ कोड़ा स धुनवइहीं। ¹⁸ तोहका हुकूमत क सासक अउर राजा क समन्वा हाजिर करिहीं, काहेकि तू सबहीं मोर चेलन अहा। तोहका इ औसर दीन्ह जाई कि तू ओनका अउर गैर यहूदियन क मोरे बारे मँ साच्छी द्या। ¹⁹ जब उ पचे तोहका धरइँ तउ फिकिर जिन कर्‌या कि तोहका का कहइ क बाटइ अउर कइसे कहइ क अहइ। काहेकि उ समइ प तोहका बताइ दीन्ह जाई कि तोहका का कहइ क अहइ। ²⁰ याद रखा कि बोलवइया तू नाहीं अहा, मुला तोहरे परमपिता क आतिमा तोहरे भीतर बोली।

²¹ “भाई आपन भाइयन क धरवाइ क मरवइहीं, महतारी बाप आपन गदेलन क पकड़वइहीं अउर बचवन आपन महतारी बाप क खिलाफ होइ जइहीं। उ पचे ओनका मरवाइ देइहीं। ²² मोरे नाउँ क कारण मनई तोहसे घिना करिहीं। मुला आखिर तक जउन टिका रही उहइ क उद्धार होई। ²³ उ सबइ अब तोहका सहर मँ सतावइँ तउ तू दूसर सहर मँ पराइ जाया। मइँ तोहसे सच सच कहत हउँ अइसे पहिले तू इस्राएल क सबइ ही सहरन क चक्कर लगाइ ल्या, मनई क पूत दुबारा आइ जाई।

²⁴ “चेला आपन गुरु ते बड़वार नाहीं होतेन अउर न ही कउनो नउकर आपन मालिक ते बड़वार होत ह। ²⁵ चेला क गुरु क नाईं होइ मँ अउर नउकरे क मालिक क नाई होइ मँ संतोख करइ चाही। जब उ घरे क मालिक क बेल्जाबुल (सइतान) कहइँ तउ, ओकरे घरे क दूसर लोगन क संग तउ अउ भी बुरा बेवहार करिहीं!”

परमेस्सर स डेराअ मनइयन स नाहीं

(लूका 12:2-7)

²⁶ “एह बरे ओनसे डेराअ जिन काहेकि जउन छुपी अहइ, सब खुलि जाई। अउर हर चीज जउन छुपी अहइ, परगट होइ जाई। ²⁷ मइँ अँधियारे मँ जउन कछू तोसे कहत हउँ, मइँ चाहित ह कि तू उजियारे मँ कहा। मइँ जउन कछू तोहरे कनवा मँ कहेउँ तू ओकरे मकाने क छत्तियापर चढ़िके, एलान करा। ²⁸ ओनसे जिन डेराअ, जउन तोहरे देह क नास कइ डइहीं मुला तोहरे आतिमा क नाहीं मारि सकतेन। बस उ परमेस्सर स डेराअ जउन तोहार देह अउर आतिमा क नरके मँ नाइ के नास कइ सकत ह। ²⁹ एक ठु पइसा क दुइ चिड़िया बेसहे मँ स भी एक तोहरे परमपिता क बे जाने भए अउर ओकर बिना इच्छा स धरती प नाहीं गिर सकत। ³⁰ अरे तोहरे मूँड़े क एक एक बार तक गिना भवा बाटइ। ³¹ यह बरे डेराअ जिन, तोहार कीमत तउ वइसी बहोत स चिड़ियन ते जिआदा बाटइ।

ईसू मँ बिसवास

(लूका 12:8-9)

³² “जउन कउनो मोका सब मनइयन क समन्वा अपनाई, मइँ भी ओका सरगे मँ बसा आपन परमपिता क समन्वा अपनियाउब। ³³ मुला जउन कउनो मोका सब मनइयन क समन्वा न अपनियाई, मइँ भी ओका आपन परमपिता क समन्वा न अपनियाउब।

ईसू क अनुसरण तोहार बरे परेसानी लावइ सकत ह

(लूका 12:51-53; 14:26-27)

³⁴ “इ जिन सोचा कि मइँ धरती प सांति लइ आवइ आइ हउँ। सांति नाहीं मुला एक तरवारे क लइ आइ हउँ। ³⁵ मइँ तउ:

³⁷ “जउन आपन महतारी बाप स मोसे जिआदा पिरेम करत ह, उ मोर होइ क जोग्ग नाहीं जउन अपने बेटवा अउर बिटिया से मोसे जिआदा पिरेम करत ह, उ मोर होइके जोग्ग नाहीं। ³⁸ उ जउन क्रूसे (यातना) उठाइके मोरे पाछे होत नाहीं, मोर होइके जोग्ग नाहीं। ³⁹ उ जउन आपन प्राण बचावा चाहत ह, आपन प्राण खोइ देइ। मुला जउन मोरे बरे आपन प्राण दइ देइ, उ जिन्नगी पाई।

परमेस्सर ओका आसीस देब जउन तोका स्वीकार करी

(मरकुस 9:41)

⁴⁰ “जउन तू पचन क अपनावत ह, उ मोका अपनावत ह अउर जउन मोका अपनावत ह, उ उहइ परमेस्सर क अपनावत ह, जउन मोका पठएस ह। ⁴¹ जउन कउनो नबी क यह बरे अपनावत ह कि उ नबी अहइ, ओका उहइ ओकरे बदले मँ फल मिली जउन कि नबी क मिलत ह। अउ जदि तू कउनो धर्मी क यह बरे अगवानी करत ह कि उ धर्मी बाटइ, ओका सच उहइ बदले मँ फल मिली जउन कउनो धर्मी क मिलत ह। ⁴² अउर जदि कउनो मोर इ भोला भाला चेलन मँ स कउनो एक क एक लोटा ठंडा पानी तक दइ दे कि उ मोर चेला अहइ, तउ मइँ तोसे सच कहत हउँ कि ओका ऍकरे बदले मँ फल सचमुच बे मिले भए न रही।”

लोग आपन पाप स्वीकार करत हीं

10 एज्रा पराथना करत रहा अउर पापन क स्वीकार करत रहा। उ परमेस्सर क मन्दिर क समन्वा रोवर रहा अउर निहुरिके प्रणाम करत रहा। जउने समइ एज्रा इ कहत रहा उ समइ इस्राएल क लोगन क एक बड़ा समूह मेहरारू मनसेधू अउर बच्चन ओकरे चारिहुँ कइँती बटुर गएन। उ सबइ लोग भी जोर-जोर स रोवत रहेन। ² तब यहीएल क पूत सकन्याह जउन एलाम क सन्तानन मँ स रहा, एज्रा स बातन किहस। सकन्याह कहेस, “हम लोग अपने परमेस्सर क भक्त नाहीं रहे। हम लोग इ भुइँया क लोग क बिदेसी मेहररूअन क संग बियाह किहा ह। मुला जदपि हम इ कइ चुके अहइ तउ भी इस्राएल क बरे आसा अहइ। ³ अब हम अपने परमेस्सर क समन्वा ओन सबहिं मेहररूअन अउर ओनके बच्चन क वापस पठवइ क वाचा करी। हम लोग इ एज्रा क सलाह मानइ बरे अउ ओन लोगन क सलाह मानइ क बरे करब जउन परमेस्सर क नेमन क सम्मान करत हीं। हम परमेस्सर क नेमन क पालन करब। ⁴ एज्रा खड़े हवा, इ तोहार उत्तरदायित्व अहइ, किन्तु हम तोहार समर्थन करब। एह बरे साहसी बना अउर एका करा।”

⁵ एह बरे एज्रा उठ खड़ा भवा। उ प्रमुख याजक, लेवीबंसियन अउर इस्राएल क सबहिं लोगन स जउन कछू उ कहेस, ओका करइ क प्रतिग्या कराएस। ⁶ तब एज्रा परमेस्सर क भवन क समन्वा स दूर हट गवा। जब तलक एज्रा हुवाँ रहा उ भोजन नाहीं किहस अउर न ही पानी पियस। उ इ किहस काहेकि उ तब भी बहोत दुःखी भवा। उ इस्राएल क ओन लोगन बरे दुःखी रहा जउन यरूसलेम क वापस आए रहेन। ⁷ उ पचे यहूदा अउ यरूसलेम मँ हर एक जगहिया मँ इ एलान किहेस कि सबइ यहूदी लोग जउन कि बन्धुवाई स वापस लउटे यरूसलेम मँ एक संग एकट्ठा होइ। ⁸ कउनो भी मनई जउन तीन दिन क भीतर यरुसलेमा नाहीं आई, तउ ओकर सम्पत्ति उ भुइँया मँ जबत कइ लीन्ह जाई। बड़के अधिकारियन अउर नेतन (प्रमुखन) इ निर्णय लिहन अउर उ मनई ओन लोगन क समूह क निअंबर नाहीं रहि जाई जउन कि बन्धुवाई स वापस लउटी क आएन।

⁹ एह बरे तीन दिन क भीतर यहूदा अउ बिन्यामीन के परिवार क सबहिं मनई यरूसलेम मँ एकट्ठा भएन अउर नवें महीने क बीसवें दिन सबहिं लोग मन्दिर क आँगन मँ आइ गएन। उ पचे इ बिसय क डर स अउर भारी बर्खा क कारण काँपत रहेन। ¹⁰ तब याजक एज्रा खड़ा भवा अउर उ ओन लोगन स कहेस, “तू लोग परमेस्सर क बरे बिस्सासी नाहीं रहेन। तू पचे बिदेसी मेहररूअन क संग बियाह किहा ह। तू पचे वइसा कइके इस्राएल क अउर जियादा अपराधी बनाया ह। ¹¹ अब तू लोगन क यहोवा क समन्वा स्वीकार करब होइ कि तू पचे पाप किहा ह। यहोवा तू लोगन क पुरखन क परमेस्सर अहइ। तू पचन्क यहोवा क आदेस क पालन करइ चाही। अपने चारिहुँ ओर रहइवाले लोगन अउ अपनी बिदेसी मेहररूअन स अपने अलग करा।”

¹² तब पूरा समूह जउन एक संग एकट्ठा रहा, एज्रा क जवाब दिहस। उ पचे ऊँची आवाज मँ कहेन: “एज्रा तू बिल्कुल ठीक कहत ह। हम क उ करइ चाही जउन तू कहत ह। ¹³ मूला हुवाँ बहोत स लोग अहइँ अउर इ बर्खा क समइ अहइ तउ हम लोग बाहेर खड़े नाहीं रहि सकित। इ समस्या एक या दुइ दिन मँ हल नाहीं होइ काहेकि हम लोग बुरी तरह पाप किहे अही। ¹⁴ पूरे समूह क सभा कइँती स हमरे प्रमुखन क निर्णय करइ द्या। तब निहचित समइ पइ हमरे नगरन क हर एक मनई जउन कउनो बिदेसी मेहरारू स बियाह किहेस ह, यरूसलेम आएन। ओनका अपने अग्रजन (प्रमुखन) अउर नगरन क निआव अधीसन क संग हिआँ आवइ दीन्ह जाइ। तब हमार परमेस्सर हम पइ किरोधित होब तजि देइ।”

¹⁵ सिरिफ थोड़े स मनई इ जोजना क बिरुद्ध रहेन। इ सबइ मनई रहेन असाहेल क पूत योनातान अउ तिकवा क पूत यहजयाह रहेन। लेवीबंसी मसुल्लाम अउ सब्बतै भी इ जोजना क बिरुद्ध रहेन।

¹⁶ एह बरे इस्राएल क उ सबइ लोग, जउन यरूसलेम मँ वापस आए रहेन, उ जोजना क स्वीकार करइ क सहमत होइ गएन। याजक एज्रा परिवार क प्रमुख मनईयन क चुनेस। उ हर एक परिवार स एक मनई क चुनेस। हर एक मनई नाउँ लइके चुना गवा। दसवें महीने क पहिले दिन जउन लोगन चुने गए रहेन हर एक मामले क जाँच क बरे बइठेन। ¹⁷ पहिले महीने क पहिले दिन तलक उ पचे ओन सबहिं मनइयन पइ बिचार करब पूरा कइ लिहन जउन विदेसी मेहररूअन स बियाह किहे रहेन।

बिदेसी मेहररूअन स बियाह करइवाला क सूची

¹⁸ याजकन क सन्तानन मँ इ सबइ नाउँ अहइँ जउन बिदेसी मेहररूअन स बियाह किहन:

²³ लेवीबंसियन मँ स एन मनइयन बिदेसी मेहररूअन स बियाह किहस:

²⁵ इस्राएल क लोगन मँ स इ सबइ लोग अहइँ जउन बिदेसी मेहररूअन स बियाह किहन:

⁴⁴ एन सबहिं लोग बिदेसी मेहररूअन स बियाह किहे रहेन अउर एनमाँ स कछू क एन मेहररूअन मँ स बच्चे भी रहेन।

पतरस अउर कुरनेलियुस

10 कुरनेलियुस नाउँ क एक मनई कैसरिया मँ रहा। उ फउज क उ दले क नायक रहा जेका इतालवी कहा जात रहा। ² उ परमेस्सर स डेरॅाइवाला भगत रहा अउर वइसा ही ओकर परिवार भी रहा। उ गरीबन क मदद करइ बरे दिल खोलिके दान देत रहा अउर हमेसा ही परमेस्सर क पराथना करत रहत रहा। ³ दिन क नवे^[a] पहर क नगिचे उ एक दर्सन मँ साफ साफ लखेस कि परमेस्सर क एक सरगदूत ओकरे लगे आवा ह अउर ओसे कहत ह, “कुरनेलियुस।”

⁴ तउ कुरनेलियुस डेरात भवा सरगदूत कइँती लखत भवा बोला, “हे पर्भू, इ का अहइ?”

सरगदूत ओसे कहेस, “तोहार पराथना अउर गरीब गुरबा क दिया भवा तोहार दान एक यादगार क रूप मँ तोहार याद दियावइ बरे परमेस्सर क लगे पहोंचा अहइँ। ⁵ तउ कछू मनइयन क याफा पठवा अउर समौन नाउँ क एक मनई क, जउन पतरस कहा जात ह, हिआँ बोलॉइ ल्या। ⁶ उ समौन नाउँ क एक चमार क हिआँ रहत ह। ओकर घर समुदूदर क किनारे बा।” ⁷ उ सरगदूत जउन ओसे बात करत रहा, जब चला गवा तउ उ आपन दुइ नउकरन अउर आपन खुद क सहायक लोगन मँ स एक भक्त सिपाही क बोलाएस ⁸ अउर जउन कछू भवा रहा, ओनका सब कछू बताइके याफा पठइ दिहेस।

⁹ अगले दिन जब उ पचे चलतइ चलत सहर क निचके पहोंचइ क ही रहेन, पतरस दुपहरिया मँ पराथना करइ छत्ते प चढ़ा। ¹⁰ ओका भूख लाग, तउ उ कछू खाइ चाहत रहा। उ पचे जब खइयाके तइया करत रहेन तउ ओकर समाधि लग गइ। ¹¹ अउर उ लखेस कि अकास खुलि गवा अहइ अउर एक बड़वार चद्दर जइसी चीज तरखाले उतरत बा। ओका चारिहुँ कइँती स धइके धरती प उतारा जात बा। ¹² ओह प हर तरह क पसु, धरती प रेंगइ वाला जीव-जंतु अउर अकासे क पंछी रहेन। ¹³ फिन एक अवाज ओसे कहेस, “पतरस उठ, मार अउर खा।”

¹⁴ पतरस कहेस, “पर्भू, फुरइ तउ नाहीं, काहेकि मइँ कबहुँ भी अपवित्तर या असुद्ध चीज क नाहीं खाएउँ ह।”

¹⁵ ऍह पइ ओनका दूसरी बार फिन अकासबाणी सुनाई दिहेस, “कउनो भी चीज क जेका परमेस्सर पवित्तर बनाए अहइ, ओनका तू ‘अपवित्तर’ न काह!” ¹⁶ तीन दाई अइसा ही भवा अउर उ पूरी वस्तु फिन अकास मँ वापिस उठाइ लीन्ह गइ। ¹⁷ पतरस जउने दर्सन जेका लखे रहा क अरथ क बारे मँ दुबिधा करत रहा, कुरनेलियुस क पठए भए लोग दुआरे प ठाड़ भवा पूछत रहेन, “समौन क घर कहाँ बा?” ¹⁸ उ सबइ बाहेर गोहरावत भए पूछेन, “का पतरस कहा जाइवाला समौन मेहमान क रूप मँ हियँइ रूका अहइ।?”

¹⁹ पतरस अबहिं उ दर्सन क बारे मँ सोचत ही रहा कि आतिमा ओसे कहेस, “सुना! तोहका तीन मनई हेरत अहइँ। ²⁰ तउ खड़ा ह्वा, अउर तरखाले उतरिके बेझिझके चला जा, काहेकि ओनका मइँ ही पठएउँ ह।” ²¹ इ तरह पतरस तरखाले उतरि आवा अउर ओन मनइयन स बोला, “मइँ उहइ अहउँ, जेका तू हेरत बाट्या। तू काहे आया ह?”

²² उ पचे बोलेन, “हम सबनक फऊजीनायक कुरनेलियुस पठएस ह। उ अच्छा मनई अहइ अउर सच्चे परमेस्सर क आराधना करत ह। यहूदी मनइयन मँ ओकर बहोत सम्मान अहइ। पवित्तर सरगदूत ओसे तोहका आपन घरे नेउतइ बरे कहे अहइ अउर जउन कछू कहइ ओका सुनइ बरे कहे अहइ।” ²³ ऍह पइ पतरस ओका भितरे बोलाइ लिहस अउर ठहरइ क जगह दिहेस।

फिन दूसर दिन तइयार होइके उ ओऩके संग चला गवा। अउर याफा क निवासी कछू अउर बंधु भी ओकरे संग होइ गएऩ। ²⁴ दूसर दिन उ कैसरिया पहोंच गवा। हुवाँ आपन खास मित्र अउर नातेदार क बोलाइके कुरनेलियुस ओनका जोहत रहा।

²⁵ पतरस अब भीतर पहोंचा तउ कुरनेलियुस ओसे भेंटइ आवा। कुरनेलियुस श्रद्धा स ओकरे गोड़वा प गिरत भवा ओका प्रणाम किहेस। ²⁶ मुला ओका उठावत भवा पतरस बोला, “ठाड़ ह्वा! मइँ तउ खुद सिरिफ एक मनई हउँ।” ²⁷ फिन ओकरे संग बात करत करत उ भितरे चला गवा। अउर हुवाँ उ बहोत म मनइयन क बटोरेस।

²⁸ उ ओनसे कहेस, “तू सबइ जानत ह कि एक यहूदी बरे गैर यहूदी जाति क मनई क संग कउनो सम्बंध रखब या ओकरे हियाँ जाब विधान क खिलाफ अहइ मुला तउ भी परमेस्सर मोका देखाएस ह कि मइँ कउनो भी मनई क ‘असुद्ध’ या ‘अपवित्तर’ न कहउँ। ²⁹ यह बरे मोका जब बोलावा गवा तउ मइँ बिना कउनो एतराज क आइ गएउँ। यह बरे मइँ तोहसे पूछत हउँ कि तू मोका काहे बरे बोलाया ह।”

³⁰ ऍह पइ कुरनेलियुस कहेस, “चार दिन पहिले इहइ समइ दिन क नवें पहर (तीन बजे) मइँ आपन घरे मँ पराथना करत रहेउँ। एकाएक चमचमात ओढ़न मँ एक मनई मोरे समन्वा आइके खड़ा भवा। ³¹ अउर बोला, ‘कुरनेलियुस! तोहार बिनती सुनि लीन्ह गइ अहइ अउर गरीब गुरबन क दीन्ह भवा तोहार दान परमेस्सर क समन्वा याद कीन्ह ग अहइँ। ³² यह बरे याफा पठइके पतरस कहावावइवाला समौन क बोलवाइके पठवा। उ समुद्दर क किनारे चमार समौन क घरे रूका बा।’ ³³ यह बरे मइँ तुरंतहि तोहका बोलवावइ पठवा ह अउर हिआँ आवइ क कृपा कइके बहोत नीक किहा ह तउ अब पर्भू जउन कछू आग्या तोहका दिए अहइँ, उ सब कछू सुनइ बरे हम पचे हिआँ परमेस्सर क अगवा हाजिर अही।”

कुरनेलियुस क घरे पतरस क उपदेस

³⁴ फिन पतरस बोलइ लाग अउर कहेस, “फुरइ अब मइँ समुझ गवा हउँ कि परमेस्सर कउनो भेद-भाव नाहीं राखत ³⁵ बल्कि हर जाति क कउऩो मनई जउन ओसे डेरात ह अउर नीक काम करत ह, उ ओका अपनावत ह। ³⁶ इहइ अहइ उ संदेसा जेका उ ईसू मसीह स सांति क सुसमाचार क उपदेस देत भवा इस्राएल क मनइयन क दिहे रहा। उ सबहिं का पर्भू अहइ।

³⁷ “तू पचे उ बड़की घटना क जानत ह, जउन समूचइ यहूदिया मँ भइ रही। गलील स सुरू होइके यूहन्ना क जरिए बपतिस्मा दीन्ह जाए क पाछे जेकर प्रचार कीन्ह गवा रहा। ³⁸ तू सबइ नासरी ईसू क बारे मँ जानत ह कि परमेस्सर पवित्तर आतिमा स अउर सक्ती स ओकर अभिसेक कइसे किहे रहा अउर उत्तिम कारज करत भवा अउर ओन सब क जउऩ सइतान क बस मँ रहेन, नीक करत भवा चारिहुँ कइँती उ कइसे घूमत रहा। काहेकि परमेस्सर ओकरे संग रहा।

³⁹ “अउर हम पचे सब बातन क साच्छी अही जेनका उ यहूदियन क पहँटा अउर यरूसलेम मँ किहे रहा। उ पचे ओका ही एक ठु लकड़ी के सलीब प टाँगिके मारि डाएन। ⁴⁰ मुला परमेस्सर तीसरे दिना ओका फिन स जिन्दा कइ दिहेस अउर ओका परगट कराएस। ⁴¹ सब मनइयन क समन्वा नाहीं मुला ओन साच्छियन क अगवा जउन परमेस्सर क हीला स पहिले ही चुन लीन्ह गएन। अरथ अहइ हमरे समन्वा जउन मर भएन मँ स जी जाए क पाछे ओकरे संग खाएन अउर पीएऩ।

⁴² “उहइ हमका हुकुम दिहे अहइ कि हम लोगन क उपदेस देइँ अउर सिद्ध करइँ कि इ उहइ, अहइ जउन परमेस्सर क हीला स जिन्दा भएऩ अउर मरे भएऩ मँ स निआव करइवाला मुकर्रर कीन्ह गवा अहइ। ⁴³ सब नबी लोग ओकरे बारे मँ साच्छी दिहे अहइँ कि ओहमा बिसवास करइवाला हर मनई ओकरे नाउँ क हीला स पापन्क छमा पावत ह।”

गैर यहूदियन प पवित्तर आतिमा क उतरब

⁴⁴ पतरस अबहिं इ बातन क करत ही रहा कि ओन सब प पवित्तर आतिमा उतरि आइ जउन सुसमाचार सुने रहेन। ⁴⁵ काहेकि पवित्तर आतिमा क बरदान गैर यहूदी प उड़ेरा जात रहा, तउ पतरस क संग आए भए यहूदी अचरज मँ पड़ि गएन। ⁴⁶ उ पचे किसिम किसिम क भाखा बोलत रहेन अउर परमेस्सर क स्तुति करत भए अनकत रहेन। तब पतरस बोला, ⁴⁷ “का कउनो इ मनइयन क बपतिस्मा देइ बरे, जल आसानी स देइ बरे मना कइ सकत ह? ऍनका भी वइसे ही पवित्तर आतिमा मिलि गवा ह, जइसेन हम पचन क।” ⁴⁸ इ तरह उ ईसू मसीह क नाउँ मँ ओनका बपतिस्मा देइ क हुकुम दिहेस। फिन पतरस स उ पचे पराथना किहेन कि कछू दिन ओनकइ संग ठहरइ।