M’Cheyne Bible Reading Plan

Paul Go Jerusalem

21 Afta us guys wen go way from dem, we wen sail strait to Cos Island. Da nex day we wen go Rhodes Island, an den Patara town, da Asia mainland. ² We wen find one boat dat stay goin Fonicia side, an we wen go on top um an wen sail away. ³ We wen see Cyprus, an pass sout from dea, an wen go Syria. We wen go outa da boat at Tyre, wea dey wen take off all da stuffs from da boat. ⁴ We wen find da peopo dat stay tight wit Jesus ova dea, an we wen stay wit dem fo seven days. Dey wen try fo tell Paul fo no go Jerusalem, cuz Godʼs Spirit wen tell um dat. ⁵ But wen da time wen come, we wen go way from dea. All da guys an da wahines an da kids wen go wit us outside da town. An by da beach we wen go down on our knees an wen pray. ⁶ Afta we wen tell each odda aloha, we wen go inside da boat, an dey wen go home.

⁷ We wen sail from Tyre to Tolemais. We wen tell da bruddas an sistas aloha ova dea, an wen stay wit dem one day. ⁸ Da nex day we wen go Cesarea. We stay Philipʼs house. He one guy dat tell peopo da Good Stuff Bout Jesus. He one a da Seven guys dey wen pick befo time fo help give da widows food. ⁹ He get four girls dat neva marry yet. God wen give da girls da power fo tell odda peopo wat God say. ¹⁰ Afta we wen stay dea litto wile, one guy name Agabus dat talk fo God wen come from Judea. ¹¹ He wen come by us, an wen take Paulʼs belt. He wen tie up his own hands an feet wit um, an say, “Godʼs Good an Spesho Spirit say dis, ‘Da Jewish leada guys inside Jerusalem goin tie up da guy who own dis belt lidis. An dey goin give dat guy to da peopo dat not Jews.’ ”

¹² Wen we hear dat, we an all da peopo ova dea wen beg Paul fo no go Jerusalem. ¹³ Den Paul say, “Why you crying an stay broke my heart? I stay ready fo get all tie up, an even fo mahke inside Jerusalem cuz I da Boss Jesus guy.”

¹⁴ We no can make Paul stay, so we pau try. An we say, “Wat da Boss like, dass wat goin happen.”

¹⁵ Afta litto wile we wen get our stuffs, an go Jerusalem. ¹⁶ Some a da guys from Cesarea dat stay tight wit Jesus, dey wen go wit us too. Dey wen take us Mnasonʼs house, an we wen stay ova dea. He one guy from Cyprus an one a da first guys dat wen trus da Good Stuff Bout Jesus.

Paul Go See James

¹⁷ Wen we wen come Jerusalem, da bruddas wen show us plenny aloha. ¹⁸ Da nex day Paul an all us guys wen go by James. All da older leadas, dey stay dea too. ¹⁹ Paul wen give dem his aloha. He wen tell um all da stuff God wen help him fo do fo da peopo dat not Jews. ²⁰ Afta dey hear dat, dey tell, “God, he awesome!” Den dey tell Paul, “Look brudda, how plenny tousand Jewish peopo wen trus da Good Stuff Bout Jesus. An dey all stick wit all da stuff da Rules say. ²¹ Dey wen hear dat you teach all da Jewish peopo dat live near peopo dat not Jews, dat dey gotta turn away from wat Moses wen write. An dey say dat you say dey no need cut skin dea kids, o do da odda stuff our peopo do.

²² So, wat we goin do? Fo shua dey goin hear dat you wen come ova hea. ²³ So, dis wat we tell you fo do. Get four guys hea dat wen make one strong promise in front God, an fo dat kine promise, dey no cut dea hair from da time dey make da promise. ²⁴ Now, someting wen happen dat make dea promise pau. Cuz a dat, dey gotta do da religious kine stuff fo seven days so dey can go back in front God. Afta dat, dey gotta make sacrifice an shave dea heads fo show dat da promise pau. So den, take dese guys, an go wit um fo do da religious kine stuff. You pay da money fo make da sacrifice dem guys gotta make befo dey can shave dea heads. Den all da peopo goin know dat da stuff dey wen hear bout you no stay true, but you stay do all da stuff da Rules say too. ²⁵ But da peopo dat not Jews an stay tight wit Jesus, we wen awready write dem one letta. We tell um dey betta not eat da meat from da sacrifices fo da idol kine gods, o blood, o da meat from da animals dey wen choke, an no mo fool aroun.”

²⁶ Da nex day Paul wen take da guys to da temple yard fo do da stuff dey gotta do so dey can go in front God. Den he wen go inside da temple an tell da priest guys wat day da spesho time goin pau, so da priest guys can make da right offering fo da four guys.

Dey Bus Paul

²⁷ Wen da seven days fo do da religious kine stuff almos pau, some Jewish guys from Asia wen spock Paul inside da temple yard. Dey wen make all da peopo like beef, an wen grab Paul. ²⁸ Dey yell, “Eh! You Israel guys! Come help us! Dis da guy dat stay teach da peopo all ova da place fo go agains our peopo, an agains our Rules an our temple. One nodda ting, he wen bring guys dat not Jews inside da temple yard, an make dis place dat stay spesho fo God, all pilau so no can pray dea.” ²⁹ (Dass cuz befo dey wen see Trofimus, da guy from Efesus, inside Jerusalem wit Paul, an dey wen tink Paul wen bring him inside da temple yard.)

³⁰ All da peopo from Jerusalem wen come all mix up, an dey wen come running from all ova da place. Dey wen grab Paul, an wen drag him from da temple yard. An right den an dea da priest guys wen shut da temple gates. ³¹ Da peopo stay trying fo kill him, an da main captain fo da Rome army guys wen hear dat all da peopo from Jerusalem stay make big beef. ³² Right den an dea he wen take some captains an odda army guys an dey wen run by da peopo. Wen da guys dat stay make big beef wen spock da main captain an da army guys, dey wen pau bus up Paul. ³³ Da main captain wen come an wen bus Paul, an tell da guys fo tie um up wit two chains. Den he aks, “Who dis guy? Wat he wen do?” ³⁴ Some guys wen yell one ting, an some odda guys anodda ting. Da main captain no can find out da trut bout wat wen happen. So he wen tell da guys fo take Paul inside da army place. ³⁵ Wen Paul wen come near da door, da peopo wen come wild, so da army guys wen carry him. ³⁶ All da peopo dat wen go wit dem wen yell, “Kill um!”

Paul Talk To Da Peopo

³⁷ Da army guys wen start fo take Paul inside da army place, an he wen tell da main captain, “Eh, try listen to me!”

Da captain say, “You talk Greek? ³⁸ You not da guy from Egypt dat wen start one big beef befo time, an wen take four tousand rebel guys inside da boonies?”

³⁹ Paul say, “No, I not! I one Jewish guy. I wen born Tarsus, Cilicia side. I one citizen from dat big town. Try let me talk to da peopo.”

⁴⁰ Da main captain wen let um talk, an Paul wen stand on top da steps, an wen wave his hand to da peopo. Wen dey pau yell, he wen talk to dem in local talk.

Jesus Come Back Alive

16 Afta da Rest Day pau, Mary from Magdala, James mudda Mary, an Salome, dey go buy perfume so dey can put um on top Jesus body. ² Was da first day in da week. Ony get litto bit light inside da sky, an dey wen go da tomb. ³ Dey aksing each odda, “Eh, who goin push da big stone away from da opening part in da tomb fo us?” ⁴ But wen dey look up, dey see dat somebody wen push da big stone away awready. ⁵ Dey go inside. Dey spock one young guy wit one long white robe on. He stay sitting on da right side. An dey real scared.

⁶ He tell um, “Eh, no scared! I know you guys looking fo Jesus, da guy from Nazaret, yeah? Dey wen kill him on top one cross. Eh, he wen come back alive! He no stay hea. Try look da place dey wen put him. ⁷ Den, go tell his guys an Peter, ‘Jesus going Galilee side befo you guys. Dass da place wea you guys goin see him, jalike he wen tell you guys.’ ”

⁸ Da wahines stay shaking an all mix up, an dey run from da tomb. Dey no say notting to nobody, cuz dey so scared.

Jesus Come by Mary from Magdala

⁹ [Afta da first day in da week, wen Jesus come back alive, he show up first by Mary from Magdala. You know, befo time Jesus wen make seven bad kine spirits let go her. ¹⁰ So she go tell da peopo who was wit him befo, dat stay sad an crying, “Eh! I wen see da Boss Jesus! He not mahke no moa!”. ¹¹ Wen dey hear wat she wen say, dey no believe her.

Jesus Show Up By Two Guys

¹² Afta dat Jesus show up by two a his guys dat stay walking in da countryside. An he look diffren. ¹³ Da two guys go back, an tell da odda peopo. But still yet da odda peopo no believe wat dey tell um.

Jesus Show Up By Da Eleven Guys

¹⁴ Lata Jesus show up by da eleven guys wen dey eating. He scold um, cuz dey neva trus him an dey so hard head, an dey neva like believe da odda peopo who wen see him afta he wen come back alive. ¹⁵ He tell um, “Go all ova da world, an teach da Good Stuff Bout Me to everybody. God wen make um all. ¹⁶ Whoeva trus da Good Stuff Bout Me an get baptize, God goin take dem outa da bad kine stuff dey doing. But whoeva no trus da Good Stuff, God goin say dey gotta take da blame fo all da bad kine stuff dey wen do. ¹⁷ Da peopo dat trus me, dey goin do awesome stuff. Cuz dey my guys, dey goin use my power fo make da bad kine spirits let go da peopo. Dey goin talk diffren kine languages. ¹⁸ Dey even goin pick up snakes wit dea hands. If dey drink poison, no goin hurt dem. Dey goin put dea hands on top da sick peopo, an da sick peopo goin come good.”

Jesus Go Up Inside Da Sky

¹⁹ Afta Jesus da Boss pau talk to dem, God take him up inside da sky, an he sit down in da mos importan place by Godʼs right side. ²⁰ Den all his guys go all ova da place an teach. An da Boss Up Dea stay working wit dem, an doing awesome kine stuff fo show dat wat he wen say stay fo real.]