M’Cheyne Bible Reading Plan

Paul Dem Go Macedonia An Greece

20 Wen da big noise wen pau, Paul wen tell Jesus guys fo come by him. He wen kokua dem, an wen tell um aloha, an den wen go Macedonia. ² He wen go thru Macedonia, an wen talk to da peopo ova dea an kokua dem. An den he wen go Greece side.

³ He wen stay ova dea three months. He stay ready fo sail Syria side, but da Jewish guys wen make plan fo kill him, so he wen go back thru Macedonia. ⁴ Sopater from Berea, Pyrrhus boy, an Aristarkus an Sekundus from Tessalonika, Gaius from Derbe, Timoty, an Tykicus an Trofimus from Asia, dey all wen go wit him. ⁵ Dem guys wen go ahead an wen wait fo us inside Troas. ⁶ We wen sail from Philippi afta da spesho religious time fo da Bread Dat No Mo Yeast. Five days afta dat we wen go by da guys inside Troas, an we wen stay ova dea one week.

Da Last Time Paul Go Troas

⁷ Da first day in da week we wen come togedda fo broke bread an eat fo rememba dat Jesus wen mahke. Den Paul wen teach da peopo. Cuz he wen like go way da nex day, he wen talk till da middle a da nite. ⁸ Had plenny lamps inside da place upstairs wea we wen stay. ⁹ One young guy name Eutykus wen sit by da window. He wen come sleepy wen Paul stay talk. Wen he wen sleep, he wen fall down on top da groun from three floors up. Dey wen pick um up, an jalike he mahke. ¹⁰ Paul wen go down dea, an throw himself on top da guy, an wen put his arms aroun him. He say, “No worry, he still stay alive!” ¹¹ Den he wen go upstairs again, an wen broke da bread, an eat. He talk to dem till da sun wen come up, an den he wen go. ¹² Da peopo wen take da young guy Eutykus home, an dey wen feel good inside cuz he alive.

Paul Sail From Troas To Miletus

¹³ Paul wen tell us guys fo go by da boat an sail aroun da poin to Assos, cuz he wen like walk ova dea. ¹⁴ He wen meet us Assos side, an he wen come inside da boat. An den we wen all go Mitylene. ¹⁵ Da nex day we wen sail from dea, an wen go Kios Island. Da nex day we wen cross ova to Samos Island, an da nex day we wen go Miletus town, da Asia mainland. ¹⁶ Paul wen tink fo go aroun Efesus. He no like stay Asia side, cuz he wen like go Jerusalem fo Pentecost Day fifty days afta Passova, if he can make um.

Paul Tell Da Older Leadas From Efesus Aloha

¹⁷ From Miletus Paul wen send somebody fo tell da older church leada guys from Efesus fo come by him. ¹⁸ Wen dey wen come ova dea, he wen tell um, “You guys know how I stay all da time, from da first day I wen stay wit you guys Asia side. ¹⁹ I wen work fo da Boss Jesus wit good heart. An I was crying, cuz da Jewish guys wen make me suffa plenny, an wen try kill me. ²⁰ You guys know I no stay scared fo teach you guys all da stuff dat goin kokua you. I wen teach you guys in front all da peopo, an inside yoa house. ²¹ I tell da Jewish peopo an da peopo dat not Jewish, dat dey gotta come by God, an come sorry an like pau all da bad kine stuff dey stay do, an no do um no moa, an dey gotta trus our Boss Jesus. ²² Now, Godʼs Spesho Spirit stay telling me fo go Jerusalem. I donno wat goin happen to me ova dea. ²³ I ony know dat Godʼs Spesho Spirit been telling me dat I goin suffa an go jail every place I go. ²⁴ But den, fo me, fo stay alive, dass notting. I ony like do everyting da Boss Jesus wen tell me fo do to da end. He wen tell me fo tell everybody da Good Stuff bout how plenny good tings God do fo us.

²⁵ “I wen go all ova da place wea you guys stay, an wen tell you guys bout how bout how peopo can get God fo dea King. I know dat none a you guys goin eva see me any moa. ²⁶ Dass why I stay tell you guys today dat nobody can blame me fo anodda guy if dat guy no trus God, an cut himself off from God, ²⁷ cuz I no scared fo tell you guys all da stuff God like you guys fo do. ²⁸ Watch out fo yoaself an fo all da peopo dat Godʼs Spesho Spirit wen give you guys fo take care dem. You guys gotta take care da church guys jalike one sheep farma take care his sheeps. Cuz da Boss Jesus wen bleed an mahke fo make dem Godʼs kids. ²⁹ I know dat afta I go, some guys jalike wild dogs goin come by you guys fo try wipe you guys out. ³⁰ Some a dem guys goin come from you guys. Dey goin change da true stuff fo take some peopo wit dem. ³¹ So watch out, you know! Rememba dat fo three years I neva stop telling all you guys day an nite bout dis stuff, an I even wen cry bout um.

³² “Now, I give you guys ova to God, an I tell you fo listen to wat God say bout how he like do good tings fo peopo. All dat can make you guys come strong inside an give you guys all da good stuff God get fo all his kids. Dey stay spesho fo him. ³³ I neva like get odda peopoʼs silva o gold o clotheses. ³⁴ You guys know dat I wen work fo all da stuff me an my friends need. ³⁵ I do all dat fo show you guys dat by dis kine hard work we gotta help da guys dat no stay strong inside. I rememba wat da Boss Jesus wen say, ‘Da guy who give, he stay mo good inside den da guy who get.’ ”

³⁶ Wen he say dat, he wen go down on his knees wit all dem guys an wen pray. ³⁷ Dey all cry an dey wen hug him an kiss him bye. ³⁸ Dey was mo sad cuz he wen say dey no goin see him no moa. An dey wen go wit him to da boat.

Jesus In Front Pilate

15 Early morning time, all da main priest guys, da older leadas fo da peopo, da teachas who teach Godʼs Rules, an all da main leadas, wen go figga out wat fo do bout Jesus. So dey tie him up, take him away, an wen give him to Pilate, da governa. ² Pilate aks Jesus, “Eh, you da King fo da Jews, o wat?”

Jesus tell him, “You da one wen say dat.”

³ Da main priest guys wen poin finga plenny at Jesus an say he wen do plenny bad kine stuff. ⁴ So Pilate aks him one mo time, “You no goin say notting? You no hear all da stuff dey saying bout you?”

⁵ An still yet Jesus neva say notting. So Pilate start fo try figga out dis guy.

Dey Say Jesus Gotta Mahke

⁶ Now, Governa Pilate, he let one prisona guy go every year at da Passova religious time. Any guy da peopo pick, Pilate let him go. ⁷ Had one guy name Barabbas dat stay inside da prison wit all da odda terrorist guys dat wen kill peopo wen dey wen beef agains da Rome army guys.

⁸ All da peopo wen come by Pilate an tell him, “Eh, you goin do jalike you everytime do fo da Passova?” ⁹ Pilate aks um, “You guys like fo me let go da King fo da Jews?” ¹⁰ Now, Pilate know dat da main priest guys wen give Jesus to him cuz dey so mad at Jesus, cuz everybody listen to him an not dem.

¹¹ But da main priest guys wen presha da peopo fo say dis: “We like Barabbas! Kill Jesus awready!” ¹² Den Governa Pilate aks dem one mo time, “Den wat I goin do wit Jesus, da guy you guys call da King fo da Jews?”

¹³ Dey yell, “Kill him on top one cross!”

¹⁴ But Pilate say, “How come? Wat kine bad ting he wen do?”

But dey yell mo loud, “Kill him on top one cross!”

¹⁵ Pilate like make da peopo stay good inside, so he wen let Barabbas go fo dem. He tell da army guys fo whip Jesus an den kill him on top one cross.

Da Army Guys Make Fun A Jesus

¹⁶ Den da army guys wen take Jesus inside da palace, da Rome army headquarters, an dey tell all da odda army guys fo come by dem. ¹⁷ Dey put one long red king kine robe on top him. Dey make one crown from thorns, an put um on top his head. ¹⁸ Den dey say, “Ho! Check um out! Da King fo da Jews!” ¹⁹ An dey wack him on top his head wit one bamboo, an spit on top him. An dey go down in front him jalike dey showing respeck fo him. ²⁰ Wen dey was pau making fun a him, dey take off da red robe an put his own clotheses back on top him. Den dey take him outside fo kill him on top one cross.

Dey Put Jesus On Top Da Cross Fo Mahke

²¹ Had one guy name Simon from Cyrene town. Alexander an Rufus, Simon dea fadda. He was coming inside Jerusalem. So dey tell him he gotta carry Jesus cross. ²² Dey bring Jesus to da place dey call Golgota. Dat mean “da Skull Place.” ²³ Dey try give him wine wit bitta stuff inside, but he no like. ²⁴ Dey hang him on top da cross wit nails, an den dey go throw dice, fo see wat guy goin get wat clotheses from Jesus. ²⁵ Dey hang him on top da cross bout nine clock in da morning. ²⁶ Dey make one sign fo tell everybody wat he wen do wrong. Da sign say,

²⁷ Dey hang two crook guys on top two crosses near him, one on da right side an da odda one on da left side. ²⁸ [Jalike da Bible say, “Dey wen make him jalike one crook.”]

²⁹ Had some peopo dea dat shake dea finga at him an say, “Oh, fo shame! You wen say you goin broke down da temple an goin build um up again in three days! ³⁰ So, we like see you get yoaself outa dis! Come down from da cross, now!”

³¹ Jalike da odda guys, da main priest guys an da teachas dat teach Godʼs Rules wen make fun a him too. Dey tell each odda, “He wen get da odda peopo outa da stuff dey stay in, but he no can get himself outa dis! ³² If he da Christ, da Spesho Guy God Wen Send, da King fo us Israel peopo, kay den, he can come down from da cross now! Den we goin trus him!” An da crook guys dat stay hanging dea near him on top da odda crosses, dey talk any kine to him too.

Jesus Mahke

³³ Noontime wen get real dark all ova da place, fo three hours. ³⁴ Three clock Jesus wen yell real loud, “Eloi, eloi, lema sabaktani!” Dat mean, “My God, my God, how come you go way an leave me ova hea?”

³⁵ Some odda guys dat stay ova dea wen hear him, an dey tell, “Listen! He stay calling Elijah!” ³⁶ One guy wen run an put one sponge inside da sour wine, an put um on top one bamboo, an try give um to Jesus fo drink. He say, “Try wait! We go see if Elijah goin come fo get him outa dis.”

³⁷ Den Jesus yell again real loud, an den he let go his spirit.

³⁸ Right den an dea da big curtain inside da temple broke in two from da top to da bottom. ³⁹ Da captain fo da army guys standing in front Jesus hear him yell an see how he wen mahke. He say, “Fo real kine, dis was Godʼs Boy!”

⁴⁰ Get some wahines standing far, watching everyting dat wen happen. Had Mary from Magdala, one nodda Mary dat get two boys, da younga James an Joses, an Salome. ⁴¹ Befo time, dey wen go wit Jesus from Galilee side, fo take care him. Had plenny odda wahines who wen come wit him to Jerusalem. Dey standing dea too.

Dey Bury Jesus

⁴² Dat was da day fo make everyting ready fo da Rest Day, befo da sun go down. ⁴³ Had one guy, Joseph from Arimatea, from da main leadas. Everybody get respeck fo him. He stay waiting fo God come da King on top da earth too. He no scared. He go aks Pilate if he can take Jesus body. ⁴⁴ Pilate say, “Wow! I neva know he mahke awready!” So he tell da captain fo come, an aks him if Jesus wen mahke fo shua. ⁴⁵ Da captain tell him dat Jesus wen mahke awready, so Pilate tell his guys fo give da body to Joseph. ⁴⁶ Joseph go buy some linen cloth, take down da body, wrap um inside da cloth, an put um inside da tomb, da one dat was awready cut inside da rock. Den dey push one big rock in front da hole fo close um. ⁴⁷ Mary from Magdala, an Mary, Joses mudda, dey wen see um put him dea.