M’Cheyne Bible Reading Plan
Paul Stay Inside Efesus
19 Apollos wen stay inside Corint. Paul wen go da back road, an come Efesus. He find some guys dat trus God ova dea. 2 He aks um, “You wen get Godʼs Spesho Spirit fo take charge you wen you wen trus God, o wat?”
Dey say, “We neva even hear bout Godʼs Spesho Spirit befo dis.”
3 Paul say, “Wat kine baptism you wen get?”
Dey say, “Da kine baptism John wen make.”
4 Paul say, “Johnʼs baptism stay fo da peopo dat come sorry fo all da bad kine stuff dey wen do, an pau do um. He tell dem fo trus da Guy dat goin come bumbye, Jesus.” 5 Wen dey hear dat, dey wen get baptize fo show dey wen trus da Boss Jesus. 6 Wen Paul wen put his hands on top dem, Godʼs Spesho Spirit wen take charge a dem. So den dey wen talk odda kine talk, an wen tell wat God wen say. 7 Had bout twelve guys ova dea dat time.
8 Paul wen go inside da Jewish church. Fo three months he not scared fo tell da Good Stuff Bout Jesus. He teach um real good bout how dey can get God fo dea King, so dey can trus him. 9 But some a dem wen get all hard head. Dey neva like trus da Good Stuff, an dey wen talk any kine in front everybody bout da Boss Jesus way. So den Paul wen go way from dem. He wen take da guys dat stay tight wit Jesus wit him, an dey wen talk togedda every day inside da big room at Hale O Tyrannus. 10 Dey wen do dat fo two years, an all da Jewish peopo an da peopo inside Asia dat talk Greek wen hear wat da Boss Jesus wen say.
Scevaʼs Boys
11 God wen help Paul do real awesome stuff wit power. 12 Dey wen take handkerchiefs an aprons dat he wen touch, an bring um by da sick peopo, an dey wen come good. An da bad kine spirits wen let da peopo go. 13 Had some Jewish guys dat wen go all ova an make da bad kine spirits let go da peopo. Dey wen try use da Boss Jesus name fo make da bad kine spirits let um go. Dey say, “Wit Jesus power, da guy Paul talk bout, I tell you bad kine spirits fo let go da guy.” 14 Had one a da Jewish main priest ohana guys name Sceva dat get seven boys. Dey wen make lidat. 15 But da bad kine spirit wen tell dem, “I know who Jesus, an I know who Paul, but who you guys?” 16 Den da guy dat get da bad kine spirit wen jump um, an hold um down. Den he wen bus um all up. So den dey wen all run outside da house naked an all bleeding. 17 Da Jewish peopo an da Greek peopo dat stay inside Efesus wen hear bout dat, an dey wen all come real scared. An dey wen get plenny respeck fo da Boss Jesus. 18 Plenny peopo dat trus da Boss now, wen come fo tell everybody all da bad kine stuff dey wen do. 19 Befo time, plenny a dem guys wen make da kahuna. So dey wen come an pile up all dea kahuna books, an burn um in front everybody. Wen dey wen figga how plenny da books cost, wen cost um fifty tousand silva piece. 20 Dass how plenny peopo wen hear wat da Boss Up Dea wen say, an trus him, an wen do wat he say.
Da Big Beef Inside Efesus
21 Afta all dat wen happen, Paul wen tink fo go Jerusalem, an go thru Macedonia an Akaia. He say, “Afta I go ova dea, den I gotta go Rome too.” 22 He wen send two a his helpa guys Macedonia side, Timoty an Erastus. But he wen stay Asia side litto wile moa.
23 Dat time some guys wen make big trouble bout Jesus way. 24 Had one guy name Demetrius dat wen make stuff from silva. He make silva tings dat look jalike da temple fo da idol kine wahine god Artemis. Da guys dat work fo him wen make plenny money. 25 He tell um all fo come, an da worka guys dat wen make odda stuff fo dem. An he wen say, “Eh, you guys, you know us guys get plenny money cuz a all da stuff we make. 26 An you guys see an hear dat dis guy Paul wen make plenny peopo trus dis odda stuff, an wen turn away plenny peopo hea inside Efesus, an all ova Asia. He say da idol kine gods da peopo make no stay gods fo real. 27 Cuz a dat da peopo goin talk stink bout da stuff us guys make, an mo worse, dey goin tink da temple fo da big wahine god Artemis no good. She stay awesome, an da peopo all ova Asia an da world go down an pray to her. But dese guys, bumbye dey goin wipe her out!”
28 Wen da peopo wen hear dat, dey wen come plenny huhu, an wen start fo yell, “Artemis from Efesus, she get plenny power!” 29 Right den an dea, all da peopo inside Efesus wen come all mix up an wen make big noise. Da peopo wen grab Gaius an Aristarkus, two guys from Macedonia dat wen stay wit Paul, an dey all wen run togedda inside da stadium. 30 Paul wen like go in front da peopo, but Jesus guys neva let him. 31 Even some a da leada guys fo Asia, dey Paulʼs friends, an dey wen send him one letta dat say, “No go inside da stadium!” 32 Everybody wen stay all mix up. Some guys wen yell one ting, an odda guys one nodda ting. Plenny peopo neva know how come dey wen go ova dea. 33 Da Jewish peopo wen push one guy name Alexander in front, an some a da peopo wen yell at him wat fo do. He wen wave his arms fo tell dem fo no make noise so he can talk. 34 But wen da peopo wen figga dat he one Jewish guy, dey all yell togedda fo two hours, “Artemis from Efesus, she get plenny power!”
35 Den da town secretary fo Efesus wen make da peopo shut dea mouts, an say, “You peopo from Efesus! Everybody know dat Efesus town take care a da temple fo da importan wahine god Artemis, an her idol dat drop down from da sky, yeah? 36 Nobody can say dass not true! Dass why you guys betta shut yoa mouts an no do someting stupid. 37 You guys bring dese guys ova hea, an dey neva steal notting from da temple, an dey neva talk stink bout our wahine god. 38 So den, if Demetrius an his worka guys get anyting fo say agains somebody, dey can go in front da judge an da governas. Dey can make one squawk agains um ova dea. 39 If you get mo tings you like fo say agains dem, you gotta come togedda an do um jalike da rules say. 40 Cuz dis way, da army guys can bus us fo make big beef, cuz we no can tell um stay good we wen make lidis.” 41 Wen he wen pau say dat, den he wen tell everybody fo go home.
Dey Goin Set Jesus Up
14 Da spesho religious time fo da Bread Dat No Mo Yeast, dat da time wen dey no put yeast inside da bread dat make um come big. Two days befo da spesho religious time an da Passova, da main priest guys an da teachas who teach Godʼs Rules, dey trying fo find one way fo trick Jesus so dey can bus him an kill him. 2 Dey say, “We no can do um wen get da spesho religious time, cuz bumbye da peopo goin make big noise an fight.”
One Wahine Pour Perfume On Top Jesus Head
3 Jesus was Simonʼs house, inside Betany town. Simon, he one lepa guy befo time. Wen Jesus stay eating ova dea, had one wahine dat wen bring one fancy bottle made from alabaster rock. Inside had da nard kine fancy perfume dat cost plenny. She wen put da perfume on top Jesus head wen he was eating. 4 Some guys dea come all huhu, an tell each odda, “Eh, how come she throw way da perfume lidat? 5 How come she neva sell um fo mo den three hundred silva coin, an give da money to da peopo dat no mo notting?” An dey scold her.
6 Jesus tell um, “Eh, no give her hard time! How come you guys bodda her? She wen do dis fo me wit plenny aloha. 7 Everytime goin get peopo dat no mo notting stay wit you guys, an you can help dem weneva you like. But I no goin stay wit you guys everytime. 8 She wen do wat she can do. Wen she wen put dis perfume on top me, befo I mahke, dis wen make me ready fo wen dey goin bury me. 9 Dass right! An I like tell you guys dis too: Weaevas my guys goin teach da Good Kine Stuff Bout Me all ova da world, dey goin tell wat dis wahine wen do, an da peopo goin rememba her.”
Judas Say He Goin Set Jesus Up
10 Judas Iscariot, he one a Jesus twelve guys. He go talk to da main priest guys, so he can set Jesus up fo dem guys. 11 Dey hear dat, an dey stay good inside. Dey promise dey goin give him money. From dat time Judas wen look fo chance fo set Jesus up.
Jesus Eat Da Passova Food Wit His Guys
12 On da first day a da spesho religious time wen dey make da Bread dat No Mo Yeast, dass wen da peopo kill da baby sheep fo make da Passova sacrifice. Jesus guys wen go by him an aks him, “Wea you like us make da stuff ready fo you fo eat da Passova kine food?”
13 He send two a his guys. He tell um, “Go inside da town. One guy goin come by you guys dea. He carry one big water jug. Go wit him. 14 Da guy going inside one house. Tell da owna, ‘Da Teacha say, “Wea my spesho room stay, so I can eat da Passova food wit my guys?” ’ 15 Da owna goin show you guys one big room upstairs, all set up awready. Dass da place wea you guys can make da food ready fo us.”
16 Da two guys go inside town, an find everyting jalike Jesus wen say. Dey make da food ready fo da Passova dinna.
17 Afta da sun go down, Jesus wen come wit his twelve guys. 18 Dey eating, an he say, “I tell you guys fo shua: one a you guys who stay eating wit me goin set me up!”
19 Dey come real sad, an each guy tell him, “Boss, eh, fo shua you not talking bout me, yeah?”
20 Jesus say, “One a you twelve guys who wen put his piece bread inside da same sauce wit me, he da guy goin set me up. 21 I da Guy Dass Fo Real. I goin mahke jalike da Bible wen say befo time. But auwe! Da guy who goin set me up goin get it! Mo betta he neva been born!”
Da Dinna Wit Da Boss
22 Dey eating, an Jesus take one piece bread an tell God he good heart fo give peopo food. He broke da bread, an give um to his guys. He tell um, “Take dis an eat um. Dis hea, my body.”
23 He take da cup an tell God, “Mahalo plenny,” an give um to his guys, an dey all drink from um. 24 He say, “Dis hea, my blood fo make solid da new deal dat God making. Dey goin kill me, an my blood goin come out from my body jalike wen dey make one sacrifice. Dat goin happen so God can help plenny peopo, an hemo dea shame fo all da bad kine stuff dey do. 25 Dass right! An I telling you guys, afta dis I no goin drink notting from da grape vine again till da time come wen we all stay togedda wea God stay King. Dat time, I goin drink da new kine wine.”
26 Den dey wen sing one song an go ova dea by Olive Ridge.
Peter Goin Say He Donno Jesus
27 Den Jesus tell um, “All you guys goin bum out cuz you no can handle da shame fo wat goin happen to me. Cuz da Bible wen say befo time, ‘I goin kill da sheep farma, an all his sheeps goin run all ova da place.’ 28 But afta I mahke, I goin come back alive, an den, I going Galilee side. Den you guys goin go by me ova dea.”
29 Den Peter say, “Eh, no way, Boss! No matta all da odda guys bum out an like go way from you, eh, no way I eva goin do dat!”
30 Jesus tell him, “You tink so? I tell you dis: Befo da roosta make noise two times early today, three times you goin say dat you donno who me.”
31 But Peter tell him, “No way! Not even! No matta I gotta mahke wit you, no way I goin say I donno who you!” An all da odda guys say da same ting.
Jesus Pray Inside Getsemane Place
32 Den Jesus dem go da place dey call Getsemane. He tell da guys, “Sit down ova hea. I going ova dea fo pray.”
33 He take Peter, James, an John wit him. He wen come real sore inside, an he get plenny trouble inside him. 34 He tell um, “Eh, you know, my heart stay real sad, jalike I goin mahke. No go sleep -- stay ova hea wit me.”
35 He go mo down, an go down on top da groun an tell God, “If can, maybe I no gotta suffa all dat bad kine stuff!” 36 Den he say, “Papa, you my Fadda. You can do everyting. No let me suffa lidis. But wateva you like, dass okay. I like do um da way you like do um.”
37 He go back by his guys, an dey stay sleeping. He tell Peter, “So, wat? Simon, how come you stay sleeping? You guys no can stay up wit me fo ony one hour? 38 Hang in dea an aks God fo help you, so you no go do bad kine stuff wen you get chance. You know, inside, you guys like do da right ting, but you guys no can do um, cuz you guys no stay strong inside.”
39 Den Jesus go talk to God one mo time, an say da same ting jalike befo. 40 He come back, an his guys stay sleeping again, cuz dea eyes no can stay open. Dey neva know wat fo tell him.
41 He come back one mo time, an tell um, “So, wat? You guys still sleeping an resting! Nuff awready. Da time stay now! I da Guy Dass Fo Real, an now dey goin set me up fo da bad guys. 42 Get up! We go by dem now. Da guy who wen set me up stay hea now awready.”
Dey Bus Jesus
43 Wen Jesus still talking, Judas, one a his twelve guys, wen come. Had choke peopo wit him. Dey carry swords an clubs. Da main priest guys, da teachas who teach Godʼs Rules, an da older leadas, dey da guys who wen send um. 44 Now Judas, da guy dat wen set him up, wen tell um befo time, “Da guy I goin kiss, az da guy. Grab him an tell da police guys fo take um!”
45 Right away, Judas go by Jesus an say, “Aloha, Teacha!” an wen kiss him. 46 Den da odda guys come an grab Jesus an take him. 47 One a Jesus guys standing dea wen grab his sword an hit one guy dat work fo da Head Priest, an cut off one a his ears. 48 Jesus say, “You guys tink I one crook, o wat? You guys tink you gotta come afta me wit swords an clubs fo bus me? 49 Eh, I was wit you guys teaching inside da temple yard every day, an you guys neva bus me dat time. But all dis gotta happen, jalike da Bible say from befo time.”
50 Den all his guys wen bag, an he stay dea all by himself.
51 Had one young guy wit one lavalava on, an he go wit Jesus. 52 Dey wen grab him, an he drop da lavalava an run away naked.
Jesus Stand In Front Da Main Leada Guys
53 Den dey bring Jesus in front da Head Priest guy. Ova dea all da main priest guys, da older leadas fo da peopo, an da teacha guys who teach Godʼs Rules, dey all wen come togedda. 54 Peter wen go wit Jesus, but he wen stay far. He go inside da yard an sit down ova dea wit da police guys fo get warm by da fire. 55 Da main priest guys an all da main leadas wen try find proof agains Jesus so dey can kill him, but dey neva find notting. 56 Plenny peopo come an try bulai bout him, but dey say diffren stuff dat no check out.
57 Den some guys stand up an bulai agains him. Dey say, 58 “Us guys wen hear dis bugga say, ‘I goin broke down Godʼs temple dat peopo wen build, an den, three days afta, I goin build up one nodda temple, dat peopo neva make.’ ” 59 Still yet, wat one guy say no check out wit da odda guy.
60 Den da Head Priest guy wen stand up in front dem, an aks Jesus, “Eh, you no hear wat dese guys saying bout you? You no goin say notting, o wat?”
61 But Jesus no talk. One mo time da Head Priest guy tell him, “Eh you! Tell us if you da Christ guy dat God suppose to send. Da One Up Dea Dat We Tell Good Stuff Bout, you his Boy, o wat?”
62 Jesus say, “Dass me. Bumbye you guys goin see me, da Guy Dass Fo Real, sitting down on top da importan place by God who get all da power, right dea on his right side. An I goin come back on top da clouds in da sky.”
63 Den da Head Priest guy wen rip his own clotheses, fo show dat he tink Jesus wen talk stink bout God. He say, “Wat you guys tink now? No need mo plenny guys fo tell wat dey wen see an hear bout him, yeah? 64 You guys wen hear da bad kine stuff he say bout God! Wat you guys tink?”
Dey all say, “He talk stink bout God! He gotta mahke!”
65 Den some guys spit on top him, an dey cover his eyes wit one cloth, an punch him, an say, “Talk some moa!” Da police guys take him an wack him too.
Peter Say He Donno Who Jesus
66 All dis time Peter stay downstairs inside da yard. Had one girl dea who work fo da Head Priest guy. 67 She spock Peter sitting by da fire. She look him real good, an say, “Eh, you was wit Jesus too, yeah? da bugga from Nazaret.”
68 But he say, “No way! I donno wat you talking bout!” Den he go ova by da gate. An da roosta wen make big noise.
69 Da worka girl see him out dea, she tell da guys who was standing ova dea, “Hey! Dis bugga, he one a dem, you know!” 70 But he say one mo time, “Not!”
Lata on, da guys who was standing near Peter say, “Yeah! You one a dem guys too! You come from Galilee, yeah?”
71 Den Peter swear real bad, an say, “God punish me if I no tell you guys da trut: I donno who you guys talking bout!”
72 Right den an dea da roosta wen make big noise one mo time. Den Peter rememba wat Jesus wen say, “Befo da roosta make noise two times, you goin say you donno who me three times.” An he broke down an bus out crying.
Copyright © 2000 by Wycliffe Bible Translators International. All rights reserved