M’Cheyne Bible Reading Plan

Inside Tessalonika

17 Dey wen go thru Amfipolis an Apollonia, an wen come Tessalonika. Had one Jewish church ova dea. ² Paul wen go da Jewish church, jalike he everytime wen go. Fo three week on da Rest Day he wen talk to dem bout da Bible. ³ He wen teach um an show um dat da Spesho Guy God Wen Send gotta suffa an come back alive from mahke. He say, “Dis guy Jesus I stay tell you guys bout, he da Spesho Guy God Wen Send.” ⁴ Some a da Jewish peopo wen trus wat he say, an wen go wit Paul an Silas. An plenny guys dat not Jewish dat get plenny respeck fo God, an plenny wahines dat stay importan, dey wen trus da Good Stuff Bout Jesus too.

⁵ But da Jewish guys wen come jealous. So dey wen get togedda some bad kine guys from da market place, an dey wen come one big gang, an wen start one big beef inside da town. Dey wen run by one guy name Jasonʼs house fo look fo Paul an Silas so dey can bring um outside by da peopo. ⁶ But dey no can find um. Az why dey wen drag Jason an some odda bruddas in front da town leadas. Dey wen yell, “Dese guys, dey wen make big trouble all ova da whole world, an now dey stay come ova hea. ⁷ Dis guy Jason wen tell dem fo make house his place. An dey all stay broke King Cesarʼs rules, cuz dey say get one nodda King, one guy name Jesus.” ⁸ Wen dey hear dat, all da peopo an da town leadas, wen bodda dem plenny. ⁹ Den dey wen make Jason an da odda guys pay some money, an dey wen let um go.

Inside Berea

¹⁰ Dat nite da bruddas wen send Paul an Silas away to Berea. Wen dey wen come ova dea, dey wen go da Jewish church. ¹¹ Da Berea peopo, dey mo betta den da Tessalonika peopo, cuz dey wen like take in da Good Stuff Bout Jesus, an dey wen check out wat da Bible wen say from befo time, every day, fo find out if wat Paul wen say stay true. ¹² Plenny Jewish peopo, an plenny wahines dat not Jewish dat stay importan, an plenny guys dat not Jewish, dey all wen trus da Good Stuff Bout Jesus. ¹³ Wen da Jewish guys inside Tessalonika wen know dat Paul stay teach wat God say inside Berea, dey wen go ova dea too, an dey wen make plenny peopo like beef. ¹⁴ Da bruddas wen send Paul da coast side fast, but Silas an Timoty wen stay inside Berea. ¹⁵ Da guys dat wen go wit Paul wen take him to Athens. Den dey wen go back an wen tell Silas an Timoty fo go by Paul fast.

Inside Athens

¹⁶ Paul wen wait fo dem inside Athens, an he wen bum out wen he wen see had plenny idol kine gods ova dea. ¹⁷ He wen go da Jewish church an wen talk wit da Jewish peopo bout da Good Stuff, an da Greek peopo dat had plenny respeck fo God, he wen talk wit dem too. An, he wen go da market place every day an talk to da peopo dat stay come dea. ¹⁸ Some teachas dat tink like da guy Epicureas an odda teachas dat tink like da Stoic guys, dey wen come fo talk wit Paul. Some a dem wen say, “Wat dis mynah bird guy trying fo say?” Odda guys wen say, “Sound like he telling bout odda peopoʼs gods.” Dey wen say, dat cuz Paul stay teaching da Good Stuff Bout Jesus, an telling peopo dat Jesus wen come back alive from mahke. ¹⁹ Den dey wen take Paul in front da leada guys dat stay come togedda on top Ares Hill. Dey say, “Tell us bout dis new kine stuff you stay teach. ²⁰ You stay tell us some stuff we no can figga, an we like know wat dat mean.” ²¹ (You know, all da peopo from Athens an da peopo from odda places dat stay dea, dey everytime talk bout an listen to da new kine stuff. Dass all dey do.)

²² Paul wen stand up in da middle a dem guys on top Ares Hill, an say, “You guys from Athens, I see dat you guys everytime do da religious kine stuff. ²³ Cuz wen I wen walk aroun an see all da places wea you guys go down an pray, I even wen find one altar place dat get one writing on top um dat say, ‘Fo Da God We Donno.’ Now I goin tell you bout da god dat you go down an pray to, dat you donno. ²⁴ Da God dat wen make da world an all da stuff inside um, he da Boss fo da sky an da earth. He no stay inside da temples da peopo make. ²⁵ Peopo no need take care him jalike if he stay need someting. Cuz he da One dat stay make all da peopo alive, an he give dem air fo breathe, an all da odda stuff. ²⁶ From one guy, God wen make all da peopos, so dey can stay all ova da world. He wen make da times an da places fo dem fo stay. ²⁷ God wen do dat so da peopo can go look fo him. Den might be dey goin reach out an find him. But he no stay far from every one a us guys.

Jalike yoa own poet guys wen say,

²⁹ Cuz we stay his kids, no good if we tink dat God stay jalike one idol kine god dat one guy wen tink bout an make from gold o silva o one stone. ³⁰ Befo time God wen let da peopo tink dat stuff, cuz dey neva know, but now he stay tell all da peopo all ova da world dat dey gotta come sorry fo all da bad kine stuff dey wen do, an pau do um. ³¹ He wen make one day wen he goin judge everybody inside da world. He goin send one guy fo judge um da right way. He wen show dat dis stay true cuz he wen bring dat guy back alive from mahke.”

³² Wen dey wen hear him say dat one guy wen come back alive from mahke, some a dem guys wen make fun a him. But odda guys say, “We like hear you talk bout dis stuff one mo time.” ³³ Den Paul wen go way from da main leadas. ³⁴ Some guys wen go wit Paul an trus da Good Stuff Bout Jesus. One a dem guys name Dionysius, he wen stay one leada guy, an one wahine name Damaris, an odda peopo, dey wen trus Jesus.

Da Guys Dat Rent One Grape Field

12 Jesus start teaching um wit stories. He say, “One guy wen go plant one grape field. He make one fence aroun um, an dig one puka inside da groun fo squeeze da grapes. An he build one watch tower. Den he wen rent da grape farm to some farma guys, an den he go far away.

² “Wen time fo cut da grapes, he send one worka guy fo get his share from da farma guys grapes. ³ But da farma guys wen grab da worka guy, an bus um up, an throw him outside wit notting. ⁴ Da boss send one nodda worka. Dey bus up his head an dey no shame fo make any kine to him. ⁵ So he send one nodda worka, an dey kill um. He send plenny odda guys. Some a dem dey bus up, but da oddas, dey kill um.

⁶ “Still yet had one guy dea, but was his boy. He really love dat boy. In da end he wen send him. He say, ‘Eh, dey goin show respeck fo my boy.’

⁷ But wen da farma guys spock da boy, dey tell each odda, ‘Eh, dis da guy goin own da farm. Come, we kill him an take ova da grape farm.’ ⁸ So dey grab da boy an kill him, an throw him outside da grape field.

⁹ “Kay den, wen da boss who own da grape farm come, wat you guys tink he goin do to dem? He goin kill da bad guys, an den he goin rent da farm to some odda guys. ¹⁰ Eh, you guys neva read inside da Bible bout da stone dass jalike me? Da Bible say,

¹² Den da main priest dem was tinking how dey can bus him, cuz dey know he was talking bout dem. But dey scared da peopo. So dey go way from him.

Da Tax Money Fo King Cesar

¹³ Lata dey send some Pharisee guys an some King Herod guys fo try trick Jesus in wat he say. ¹⁴ Dey come an say, “Eh, Teacha, we know you fo real, no matta wat da peopo tink o who dem. An you tell da trut wen you teach Godʼs way. So, wat? Dass right fo pay King Cesar da tax money, o wat?”

¹⁵ But Jesus know dey say one ting an tink anodda, an he say, “How come you guys like trick me? Show me da kine coin fo da tax so I can look at um.” ¹⁶ An dey wen show him. He say, “Who dis guy on top da coin? An wass his name?”

Dey say, “Dass King Cesar.”

¹⁷ An he tell um, “Kay den. Give um to Cesar, wat his, an give to God, wat his!” Wen dey hear dat, wen blow dea minds.

Dey Aks If We Goin Come Back Alive

¹⁸ Den some Sadducee guys go by Jesus. Dis how dey teach: If you mahke, you mahke, you no goin come back alive again. So dey aks him, ¹⁹ “Eh, Teacha! Da guy Moses who wen give us Godʼs Rules, he wen say, ‘Wen one guy mahke an he no mo kids, his brudda gotta marry his wife, an make kids fo carry da name fo da brudda who wen mahke.’ ²⁰ Now den, had seven bruddas ova hea by us guys. Da first one wen marry one wahine, den he wen mahke, but neva have kids. ²¹ Da nex brudda wen marry da bruddaʼs wife, an den he wen mahke, an neva have kids. Da same ting wen happen to da nex brudda. ²² An dis ting wen happen to all da seven bruddas. An all dem guys neva have kids notting. An den afta dat, da wahine wen mahke too.

²³ “So, wen da time come wen all da peopo dat wen mahke come back alive, who goin be her husban? Cuz dey all wen marry her.”

²⁴ Jesus tell um, “You guys all jam up, you know. Cuz you guys donno wat da Bible say from befo time, az why, an you guys donno Godʼs power. ²⁵ Wen da peopo dat wen mahke come back alive again, dat time dey no marry. Dey goin be jalike da angel messenja guys in da sky. ²⁶ But da guys who wen mahke, dey goin come back alive. You guys neva read inside da Bible wat Moses wen write bout da burning bush? God say, ‘I da God fo Abraham, an fo Isaac, an fo Jacob.’ ²⁷ He not da God fo da mahke peopo. He da God fo da peopo dat get one spirit inside dem dat stay alive. Dass why you guys wrong!”

Da Main Rule

²⁸ One teacha who teach Godʼs Rules was standing dea. He hear dem talking, an he know dat Jesus wen shut up da Sadducee guys. So he aks him, “Eh, from all da Rules God wen give us, wat da main Rule?”

²⁹ Jesus tell him, “Da main Rule dis: ‘Listen, all you Israel peopo! Da Boss Up Dea, he our God, an he da one an ony Boss. ³⁰ Get love an aloha fo da Boss yoa God, wit all yoa heart, an wit everyting inside you, an wit how you tink, an wit all yoa power.’ ³¹ An da nex main Rule jalike dis one, ‘Get love an aloha fo da odda guy jalike you get love an aloha fo yoaself.’ No mo odda Rule, mo importan den dis two Rules.”

³² Da teacha who teach Godʼs Rules tell um, “Eh, Teacha, right on! Dass right wat you say, ‘God, he one God, an no mo odda God, ony him.’ ³³ Us guys gotta get love an aloha fo him wit all our heart, an wit how we tink, an wit all our power. An we gotta get love an aloha fo da odda guy jalike we get love an aloha fo ourself. Dass mo importan den make da burn kine offering an da sacrifice.”

³⁴ Jesus know dat da guy was tinking good wen he say dat. He tell him, “You stay near God, fo get him fo yoa King.”

From dat time, everybody scared fo aks Jesus odda stuff.

Da Spesho Guy God Wen Send, Whose Boy Him?

³⁵ Jesus was teaching inside da temple yard. He say, “How come da teachas dat teach Godʼs Rules say, ‘Da Spesho Guy God Goin Send, he goin come from King Davidʼs ohana’? ³⁶ You know, Godʼs Spirit wen tell King David fo say dis:

³⁷ “Kay den. David call Godʼs Spesho Guy ‘Boss,’ yeah? Den how he can be Davidʼs boy, same time?” All da peopo wen hear him, an dey feel good inside.

Da Teachas Dat Teach Godʼs Rules

³⁸ Wen he was teaching, he say, “Watch out fo da teachas who teach Godʼs Rules! Dey like wear rich kine clotheses. Dey like da peopo talk to dem wit respeck inside da open market. ³⁹ Dey like sit in da main place in da Jewish churches, an in da bestes place at da lu‛aus. ⁴⁰ Dey no mo shame fo trick da widows an take away dea house, an same time dey praying, saying plenny stuff, so nobody tink dey ripping off da widows. God goin punish dem mo den da odda peopo.”

Wat One Widow Wen Give God

⁴¹ Jesus go sit down da odda side by da place wea da peopo give money fo da temple. He watch da peopo. Plenny rich guys throw in plenny money. ⁴² Den one widow dat no mo notting put in two small copper coins dat make one penny.

⁴³ Jesus tell his guys fo come. He say, “Dass good! An I like tell you guys dis too: Dis widow da no mo notting wen put in mo plenny fo da temple den all da odda peopo. ⁴⁴ All da odda peopo wen give dea money from plenny money dey get. But she no mo notting, an she wen give everyting she get fo stay alive.”