M’Cheyne Bible Reading Plan
Dey Come Togedda In Jerusalem
15 Some guys dat trus Jesus wen come from Judea to Antiok an dey wen teach da bruddas an sistas. Dey say, “If you no cut skin jalike Moses wen tell our ancesta guys, you no can come outa da bad kine stuff you do.” 2 Paul an Barnabas wen talk agains dat real hard wit dem. So da Antiok church leadas wen pick Paul an Barnabas an some odda guys dat trus Jesus fo go Jerusalem fo talk to da guys Jesus wen send an da older leadas bout dis cut skin stuff.
3 Da Antiok church guys wen send dem. Dey wen go thru Fonicia an Samaria, an dey wen tell da bruddas an sistas dea dat da peopo dat not Jews wen trus Jesus. All da bruddas an sistas wen stay good inside wen dey wen hear dat. 4 Paul an Barnabas guys wen come Jerusalem. Da guys dat come togedda fo church, an da guys Jesus wen send, an da older leadas, dey all wen show dem aloha. An Paul an Barnabas wen tell um all da stuff God wen do wit dem. 5 But some a da Pharisee guys dat wen trus da Good Stuff Bout Jesus wen stand up an say, “Da guys dat not Jews, no matta dey trus Jesus, dey gotta cut skin an do all da odda stuff Moses wen write down inside da Rules.”
6 Da guys Jesus wen send an da older leadas wen come togedda fo talk bout dat. 7 Dey talk fo long time, an den Peter wen stand up an tell um, “Bruddas, you know dat befo time God wen pick me fo go tell da peopo dat not Jews da Good Stuff Bout Jesus so dey can trus him. 8 God, he know wat stay inside us. He show us dat he wen take in da peopo dat not Jews, cuz he wen make his Spesho Spirit take charge a dem, jalike he wen do fo us. 9 God see dem da same, jalike he see us. He wen make dem clean inside, cuz dey wen trus him. 10 Now, how come you guys try find out if God really mean dat he see dem da same jalike us Jewish peopo? Why you guys put hard kine rules on top da guys dat stick wit Jesus? You guys know dat we an our ancesta guys neva can do um. 11 No can! We trus dat we wen come outa da bad kine stuff we do, not cuz we do wat da Rules say, but cuz da Boss Jesus wen do plenny good tings fo us, jalike he wen do fo da peopo dat not Jews.”
12 All da guys wen come quiet fo listen wen Paul an Barnabas tell um bout all da awesome stuff God wen do fo show his power wen dey stay wit da peopo dat not Jews. 13 Wen dey pau talk, James say, “Bruddas, listen to me. 14 Simon Peter wen tell us bout da time God wen show he stay care fo da peopo dat not Jews, cuz he wen pick some peopo fo himself from dem guys. 15 Da guys dat wen talk fo God long time ago, dey say da same ting. Dey wen write dis down inside da Bible, dat God say:
16 ‘Afta dis I goin come back
An I goin make Davidʼs ohana come good one mo time,
Jalike wen dey fix up one poho house.
17 Den all da odda peopos,
Dey can look fo da Boss,
An all da peopo dat not Jews dat stay mines,
Dey can look fo me too.
18 Dass wat da Boss say.
He da One dat do all dis stuff
An he wen tell us dis long time ago.’ ”
19 An James say dis too: “Dass why I tink mo betta we no put rules dat goin make um mo hard fo da diffren peopos dat not Jews fo trus God. 20 Mo betta we write um one letta fo help da Jews an da odda peopo get togedda. We tell um fo
no eat da food da peopo wen give to da idol kine gods, an
no fool aroun, an
no eat da meat from da animals dey wen choke, an
no eat da blood too.
21 Cuz da Rules Moses wen write down, get peopo teach dat stuff in all da towns from long time ago, an dey read um in all da Jewish churches every Rest Day.”
Da Letta Fo Da Peopo Dat Not Jews Dat Trus Jesus
22 Den da guys Jesus wen send, an da older leadas, an all da Jerusalem church guys, dey wen pick some a dea own guys fo send um Antiok wit Paul an Barnabas. Dey wen pick Judas Barsabbas, an Silas, two guys dat wen lead da bruddas an sistas. 23 Dey wen send dis letta wit dem:
“Dis letta from da guys Jesus wen send, an from da older leadas. We stay yoa bruddas. Aloha fo all you bruddas an sistas dat not Jews dat stay Antiok town, an Syria, an Cilicia. 24 We hear dat some guys wen go by you guys from ova hea, but we neva send um. Dey wen bodda you guys, an wat dey wen say bout gotta cut skin, wen make you guys all mix up. 25 So, us guys wen talk togedda, an tink stay good fo pick some guys fo send um by you guys, wit our good friends Barnabas an Paul. 26 Barnabas an Paul almos wen mahke cuz dey stick wit da Boss Jesus, da Spesho Guy God Wen Send. 27 Dass why we send Judas an Silas so dey can tell you guys dat wat we wen write stay true. 28 Godʼs Spesho Spirit an us guys tink no good fo us put hard kine rules on top you guys, ony dis: 29 No eat da meat from da sacrifices dey wen make fo da idol kine gods, no eat blood, o da meat from da animal dey wen choke, an no mo fool aroun. You guys goin do good if you no do dat kine stuff. Dass all.”
30 Dey wen send da guys, an dey wen go Antiok town. Dey wen tell all da church guys fo come togedda, an dey give um da letta. 31 Da peopo wen read um an dey stay good inside, cuz da letta wen kokua dem. 32 Judas an Silas, dey wen talk fo God. So dey kokua da bruddas an sistas fo come strong, an wen help um trus God moa. 33 Dey wen stay dea long time, an den da bruddas wen send um back wit aloha so dey can go by da guys dat wen send um befo. 34 [But Silas wen like stay ova dea.] 35 Paul an Barnabas wen stay Antiok town. Dem an plenny odda guys, dey wen teach wat da Boss Jesus wen say an tell da Good Stuff From God.
Paul An Barnabas Split Up
36 Afta long time Paul wen tell Barnabas, “We go back an stay wit da bruddas an sistas in all da towns wea we wen teach wat da Boss wen say, so we know how dey stay.” 37 Barnabas wen like take John Mark wit dem. 38 But Paul neva like take um, cuz John Mark wen go way from dem befo, in Pamfylia, an neva work wit dem from dat time. 39 Paul an Barnabas no can tink da same way, an dey wen talk hard. So dey wen split up. Barnabas wen take da guy Mark an wen sail up Cyprus side. 40 Paul wen take Silas an wen go way, an da bruddas an sistas wen aks God fo take care dem wit his aloha. 41 Paul dem wen go Syria an Cilicia, an wen kokua da church guys.
Da Guy Dat Dump His Wife
10 Den Jesus wen go way from dat place an go Judea side, da odda side da Jordan River. One mo time plenny peopo wen go by him, an he teach um jalike he everytime do.
2 Some Pharisee guys come fo trap him. Dey aks him, “Dass right, o wat, inside da Rules, fo one guy go dump his wife?”
3 Jesus wen aks um, “Wat Rule Moses wen give yoa ancesta guys bout dat?”
4 Dey say, “Moses wen tell, ‘Gotta give da wife one paper fo get one divorce, den can dump her.’ ”
5 Jesus tell um, “Cuz all you guys so hard head, dass why Moses wen give you guys dat Rule. 6 But I telling you guys dis: Wen God wen make da world, he make one guy an one wahine. 7 An God say, ‘Cuz I wen do dat, da guy no goin stay wit his fadda an mudda no moa, he goin stay wit his wife. 8 An da guy an da wahine goin be togedda jalike one body.’ So jalike dey not two peopo no moa, dey jalike one. 9 Wat God wen put togedda, da peopo betta not broke um up.”
10 Afta dey wen go inside da house one mo time, da guys he teaching wen aks um bout dat. 11 He tell um, “Da guy who dump his wife an go marry one nodda wahine, da way God see um, da first one still stay his wife. Da guy ony fooling aroun da second wahine. 12 An da wahine who dump her husban an go marry one nodda guy, da way God see um, da first one still stay her husban. Da wahine ony fooling aroun da second guy.”
Jesus Put His Hands On Top Da Small Kids An Pray Fo Dem
13 Da peopo wen bring dea small kids by Jesus, cuz dey like him fo put his hands on top dea heads an aks God fo do good tings fo dem. But den Jesus guys wen scold da peopo cuz dey wen bring da kids, an dey tink da kids goin bodda Jesus. 14 Wen Jesus wen see wat his guys doing, he huhu. He say, “Let da kids come! No stop dem! Cuz da peopo who make God dea King, inside demself dey jalike dese kids. 15 Dass right! An I like tell you dis too: Da guy who not jalike one small kid inside, God no goin be his King.” 16 An he wen hug da kids, an put his hands on top da kids heads, an aks God fo do good tings fo dem.
Da Young Guy Dat Get Plenny Stuff
17 Wen Jesus was starting fo go, one guy wen run up by him, an go down on his knees in front him, an say:
“Eh, Teacha, you good. Can aks you one question? Wat I gotta do fo live to da max foeva?”
18 Jesus say: “How come you call me good? Ony get One dat stay good fo real kine, dass God. 19 You know Godʼs Rules: No go kill nobody, no go fool aroun behind da oddaʼs back, no rip off nobody, no bulai any kine bout nobody, no cockaroach nobody, show respeck fo yoa fadda an mudda.”
20 He say: “Ho, Teacha! From small kid time I do all dat stuff.”
21 Jesus wen look at um, an get aloha fo him. He say: “Ony one ting mo you neva do dat you gotta do. Go sell all da stuffs you get, an give da money to da poor peopo. An garans you goin get da real kine rich stuff up dea wea God stay. Den come wit me fo be my guy.”
22 Da guy wen hear dat, an he wen come real sad, an he wen go way, cuz he get plenny rich stuffs dat he neva like sell.
23 Jesus wen look aroun at his guys an say, “Az why hard fo one rich guy fo get God fo his King!”
24 His guys wen hear wat Jesus say, an wen blow dea minds. Jesus say one mo time, “Eh you guys! Stay hard, you know, fo get God fo yoa King. 25 Stay mo easy fo one camel go thru da puka in one needle, den fo one rich guy fo get God fo his King.”
26 Dey all shock, an dey tell each odda, “If dass how stay, who can come outa da bad kine stuff he stay in, den?”
27 Jesus look strait at dem an tell, “No mo nobody dat can do um, but ony God, he da One dat can do um all.”
28 Den Peter wen tell, “Eh, Boss, look! We wen give up everyting we get fo go wit you.”
29 Jesus say, “Az right! An I tell you guys dis: Whoeva give up dea home, dea bruddas, dea sistas, dea mudda an fadda, dea kids, an dea lands, so dey can stick wit me an da Good Stuff From God I stay telling you, 30 bumbye dey goin get hundred times mo plenny even befo dey mahke. Dey goin get home, bruddas, sistas, mudda, kids, lands. An one nodda ting dey goin get -- peopo goin make um suffa. Bumbye, in da time to come, dey goin live to da max foeva. 31 Goin get plenny peopo who like make demself come first, but bumbye dey goin come last. An get plenny peopo who like make demself come last, but bumbye dey goin come first.”
One Mo Time Jesus Tell He Goin Mahke
32 Jesus go in front his guys, an dey all going Jerusalem. Jesus guys was all shook up, an da odda peopo who wen go wit dem was all scared. One mo time he wen take da twelve guys by da side a da road, an tell um wat goin happen. 33 He tell dem, “Eh, listen, we going Jerusalem. I da Guy Dass Fo Real. One guy goin set me up so da main priest guys an da teacha guys dat teach Godʼs Rules can take me. Den dey goin say I gotta mahke. Dey goin give me to da guys dat not Jews. 34 Dey goin make fun a me, an spit on top me, an whip me, an kill me. But on day numba three, I goin come back alive.”
Wat James An John Aks Him
35 James an John, Zebedeeʼs boys, dey come by Jesus. Dey say, “Teacha, us guys like you do someting fo us, yeah?”
36 Jesus say, “Wat you like?”
37 Dey say, “Wen you come King, goin be awesome, yeah? We like you let us sit by you, one by da left side an da odda by da right side.”
38 Jesus say, “You guys donno wat you aksing fo. You tink you guys can suffa jalike I goin suffa? You tink you can handle da big trouble I goin get?”
39 Dey say, “Shua, us guys can handle.”
He tell um, “Fo shua you guys goin suffa jalike me, an you goin handle all da trouble I goin get. 40 But fo sit by my right side an by my left side bumbye wen I come King, dass not mines fo say. My Fadda, he da One who can say dat, an he awready stay make da spesho places ready fo da peopo dat suppose to sit ova dea.”
41 Wen da odda ten guys hear dat, dey come all huhu wit James an John. 42 Jesus say, “Eh, all you guys! Come ova hea! You know, da leadas fo da peopos dat donno God, dey get any kine power ova dea peopo. Dea main guys get da rights fo tell da peopo wat fo do. 43 But you guys, no goin be lidat wit you. Wit you guys, whoeva like be da leada guy, he gotta be da helpa guy first. 44 Wit you guys, whoeva like be da numba one guy, he gotta do wat you guys tell him. 45 I da Guy Dass Fo Real. I neva come so peopo can take care me. I wen come fo take care dem. I wen come fo give up my life an mahke fo cut loose plenny peopo from da power dat da bad kine stuff get ova dem.”
Jesus Make Bartimeus So He Can See
46 Dey go Jericho. Wen dey going away from da town, get plenny peopo wit dem. Bartimeus, one blind guy, stay sitting by da road side begging. He Timeus boy. 47 He hear dat Jesus from Nazaret passing by, an he wen start fo yell, “Eh, Jesus! You da guy dat suppose to show up from King Davidʼs ohana! Try pity me!”
48 Had plenny peopo ova dea dat wen scold him an tell um fo shut his mout. But he wen yell even mo loud, “Eh Boss, you da guy from King Davidʼs ohana! Try pity me!”
49 Jesus stop an say, “Call him!” So dey wen call da blind guy an tell um, “Eh, dass okay! Get up! He stay call you.”
50 He wen jump up an throw down his coat, an go by Jesus.
51 Jesus aks um, “Wat you like me do fo you?”
Da blind guy say, “Teacha! I like see!”
52 Jesus tell um, “Go! You wen trus me, dass why you come good now.” Right den an dea he can see, an he go wit Jesus on da road.
Copyright © 2000 by Wycliffe Bible Translators International. All rights reserved