M’Cheyne Bible Reading Plan
Peter An Cornelius
10 Had one guy Cesarea side name Cornelius. He one captain fo six hundred Rome army guys from Italy. 2 Him an his ohana, dey not Jewish, but dey all pray an get respeck fo God. He wen give plenny money fo da poor peopo, an everytime he pray to God. 3 One time, three clock in da aftanoon, he wen see someting jalike one dream. He see one angel messenja guy from God dat wen come by him an say, “Eh, Cornelius!” 4 Cornelius wen look at um real good, an wen come real scared. He say, “Yeah, Boss?”
Da angel guy say, “God hear wat you wen aks him fo do, an he rememba all da money you wen give fo da poor peopo. 5 Now send some guys Joppa side fo bring back one guy name Simon, da same guy dey wen call Peter. 6 He stay in da odda Simonʼs house by da sea, da guy dat work wit da leather.” 7 Wen da angel guy go way, Cornelius wen call two a his worka guys an one army helpa. Da helpa guy pray an get respeck fo God too. 8 Cornelius wen tell dem all da stuff dat wen happen, an wen send da three guys Joppa side.
9 Da nex day, noon time, dey stay coming near Joppa. Dat time Peter wen go up on top da flat roof fo pray. 10 He wen come hungry an like eat. Dey stay making da food ready, an he see someting jalike one dream. 11 He see da sky open up, an one ting jalike one big sheet, dat come down on top da groun by da four corners. 12 Inside had all kine animals, da kine dat get four feet, an snakes an lizards from da groun, an birds from da sky. 13 Den one voice wen tell him, “Eh Peter! Stand up! Kill um an eat um!”
14 But Peter wen say, “No way, Boss! I neva eat anyting dat stay kapu an not suppose to eat um!”
15 One mo time da voice wen tell um, “No say dat da kine stay kapu dat God wen make okay.” 16 An dat wen happen three times, an right den an dea da sheet wen go back up to da sky.
17 Peter was tinking wat da dream mean. Right den an dea da guys dat Cornelius wen send, wen find out da house wea Simon da leather guy stay, an dey stop in front da gate fo da house. 18 Dey yell, “Eh, get one guy name Simon Peter ova hea?”
19 Peter still trying fo figga out wat da dream mean, an Godʼs Spirit wen tell him, “Simon, get three guys dat not Jewish, stay downstairs looking fo you. 20 So stand up an go down dea. Go wit dem an no worry, cuz was me wen bring um.” 21 Peter wen go down an wen tell um, “I da guy you stay looking fo. How come you hea?”
22 Da guys say, “Captain Cornelius wen send us. He one good guy dat get respeck fo God, an all da Jewish peopo get respeck fo Captain Cornelius. One spesho angel guy from God wen tell him fo bring you by his house so he can hear wat you get fo say.” 23 Den Peter wen tell da guys fo come inside an make house.
Da nex day Peter wen go wit da guys, an some a da bruddas from Joppa wen go too. 24 Da nex day dey wen come Cesarea. Cornelius stay wait fo dem, an he tell his ohana an his good friends fo come his house. 25 Wen Peter go inside da house, Cornelius go in front him, an go down on his knees, cuz he get plenny respeck fo him. 26 But Peter tell um, “Stand up. I ony one guy, you know.” 27 Peter stay talking to him, an dey go inside da house. He see plenny peopo ova dea. 28 He tell um, “You guys know dat our Jewish Rules say dat one Jewish guy no can stay togedda wit one guy dat not Jewish, an da Jewish guy no can go inside da odda guyʼs house. But God wen show me dat I no can say one guy stay kapu. 29 So wen da guys wen tell me fo come ova hea, I wen come lidat, an I neva say I no can. So try tell me why you wen tell me fo come.”
30 Cornelius say, “Three days ago I stay praying inside my house, same time like now, three clock in da aftanoon. An right den an dea one guy in da shiny kine clotheses wen stand in front me. 31 An he say, ‘Cornelius, God wen hear wat you pray, an he know bout all da money you wen give fo da poor peopo. 32 Send some guys Joppa side fo find Simon, da same guy dey call Peter. He stay inside Simonʼs house by da sea, da guy dat work wit da leather.’ 33 So right den an dea I wen send dem fo bring you, an you get good heart fo come my house. Now we all stay hea in front God, an we like hear all da stuff God wen tell you fo tell us.”
Wat Peter Say
34 Den Peter wen start fo talk. He tell um, “Now I know dat stay true dat God tink an do da same ting fo everybody. 35 He take everybody in from all da peopos dat get respeck fo him an do da right ting. 36 Dis da Good Stuff dat God wen send peopo fo tell da Israel peopo: ‘Eh! Us guys can come Godʼs friends an feel good inside, cuz a wat Jesus Christ wen do. He da Boss fo everyting an everybody.’ 37 You guys know wat wen happen all ova Judea. First da guy John wen tell da peopo in Galilee fo get baptize. 38 An God wen give Jesus from Nazaret his Spesho Spirit an power. Jesus wen go all ova da place, an do da good kine stuff. Da Devil wen take charge a plenny sick peopo wit his power, but Jesus wen even make dem all come good. Jesus wen do dat cuz God wen stay wit him. 39 Us guys wen see all dis stuff happen. He wen do all dat in da Jewish countryside an inside Jerusalem. Dey wen kill him on top one cross. 40 Day Numba three God wen make him come back alive, an wen let some peopo see him. 41 All da peopo neva see um, but us guys dat God wen pick fo tell bout him, we wen see um. We wen eat an drink wit him afta he wen come back alive. 42 He tell us fo teach da peopo an fo tell dem dat we know he da One dat God Wen Send fo judge da peopo dat stay alive an da peopo dat stay mahke. 43 All da guys dat wen talk fo God long time ago wen talk bout him. Dey say dat whoeva trus him, God goin let um go an hemo dea shame fo all da bad kine stuff dey wen do. God goin do dat cuz a wat Jesus wen do.”
Da Peopo Dat Not Jews Get Godʼs Spesho Spirit
44 Wen Peter still talking lidat, Godʼs Spesho Spirit wen take charge a all da peopo dat wen hear da Good Stuff From God. 45 Da Jewish guys dat trus Jesus an wen come wit Peter, wen blow dea minds, cuz Godʼs Spesho Spirit wen take charge a even da peopo dat not Jews. 46 Cuz dey hear um talking in odda languages an saying good stuff bout God. 47 Den Peter say, “Dese guys, dey can get baptize wit water, yeah? Dey get Godʼs Spesho Spirit, jalike da time wen we wen get um.” 48 So he wen tell um fo get baptize cuz a da One name Jesus, da Spesho Guy God Wen Send. An dey tell Peter fo stay dea wit dem some moa.
Jesus Make One Guy Wit Bad Kine Spirits Come Good
5 Afta dat, Jesus dem go da odda side da lake wea da Gerasa peopo stay. 2 Wen Jesus was getting outa da boat, one guy dat get one bad kine spirit dat wen take ova him wen come from da grave yard. 3 He everytime stay inside da grave yard. Da bad spirit wen make him so strong, nobody can tie him up, not even wit chains. 4 Befo, dey wen tie da guyʼs hand an feet plenny times wit da chains, but he wen bus um. Nobody stay strong nuff fo hold da guy down. 5 Nite an day, da guy everytime yelling from da grave yard, an da hills, an cutting himself wit stones.
6 Wen he see Jesus far away, he wen run an go down in front him.
9 Den Jesus wen aks him, “Eh, wat yoa name?” An da bad kine spirit tell him, “My name ‘Army,’ cuz us guys, we uku paila spirits!”
10 An da spirit beg Jesus plenny times, “Eh, no send us outa dis place!”
11 On da odda side da hill, get one big pig farm, an da pigs was grinding. 12 Da bad kine spirits wen beg Jesus, “Send us inside da pigs! We like take ova dem.”
13 Jesus tell um, “Go!” So da bad spirits wen let go da guy, an go take ova da pigs. Had bout two tousand pigs ova dea. An you know wat? All da pigs wen run down one steep hill an fall ova da cliff inside da lake, an drown inside da water.
14 Den da pig farmas wen run, an go inside da town an all da place aroun dea, telling everybody wat wen happen. All da peopo from da town wen go fo see.
15 Wen dey come by Jesus, dey spock da guy dat befo get da uku paila bad kine spirits dat wen take ova him. He look diffren now. He all dress up, an not pupule no moa. So da peopo real scared. 16 Da odda guys who wen see wat wen happen, dey tell da peopo wat wen happen to da guy wit da bad kine spirits an da pigs. 17 Den da peopo, dey start fo beg Jesus fo go way from dea.
18 Wen Jesus climb inside da boat, da guy dat da bad kine spirits wen take ova befo time, he say, “Try let me go wit you.”
19 But Jesus tell, “No. Go home to yoa ohana, an tell um all da good kine stuff da Boss Up Dea wen do fo you. He wen pity you an give you chance.” 20 So da guy go way, an tell everybody in da Ten Towns wat Jesus wen do fo him. An wat he tell all da peopo, wen blow dea minds.
Jairus, Da Leada Guy
21 So den, Jesus wen come back in da boat to da odda side da lake. An plenny peopo wen come aroun him wen he still near da lake. 22 One leada guy from da Jewish church name Jairus wen come dea. He spock Jesus, an wen go down on his knees by Jesus feet 23 an beg him plenny, “Eh, my litto girl, her ony twelve years old, an her stay going mahke. Try come an put yoa hand on top her, so she can come good an stay alive!” 24 So Jesus wen go wit Jairus. An all da peopo wen go wit Jesus. Dey so plenny, dey wen push aroun him.
Jesus Wen Make One Sick Wahine Come Good
25 Get one wahine wit da peopo. Her was bleeding fo twelve years. 26 Her wen suffa plenny, no matta plenny doctas wen try make her good. Her wen spend all her money, but her neva come good. Her come mo worse. 27 Her wen hear bout Jesus, so her come in back a him wit all da peopo aroun him, an her touch his clotheses. 28 Her tinking, “If I can ony touch his clotheses, I goin come good again.” 29 Right away her bleeding wen pau, an her wen feel inside her dat she no mo suffa.
30 Right den an dea, Jesus wen feel power go outa him. He wen turn aroun an look all da peopo. He tell, “Eh, who wen touch my clotheses?”
31 His guys say, “How come you say dat? Get uku paila peopo pushing aroun you. But you go aks who touch you?” 32 Jesus stay looking aroun fo see who wen touch him.
33 Den da wahine, she wen know wat wen happen to her. She so scared, she shaking. She wen go down by his feet, an wen tell him da whole story.
34 An Jesus wen tell her, “Eh sista, you wen trus me. Dass why you come good. Go now, yoa heart goin rest inside. You no suffa no moa.”
Jesus Make Jairus Girl Come Good
35 Jesus still talking, an some guys wen come from Jairus house, da leada guy fo da Jewish church. Dey tell him, “Yoa litto girl wen mahke! Mo betta you no bodda da teacha no moa.”
36 But Jesus neva listen to dem. He tell Jairus, “No scared. Ony trus me.”
37 He ony let Peter, James, an James brudda John, go wit him. 38 Dey wen come Jairus house. Jesus see all da peopo an hear um making big noise an crying. 39 He go inside an tell, “Eh, how come you guys making big noise an crying? Da girl neva mahke, her ony sleeping.”
40 An dey wen laugh at him. So he wen chase um all outside, an take da girlʼs fadda an mudda, an his three guys, an dey go inside da room wea da girl stay. 41 He take da girlʼs hand an tell her, “Talita kum.” Dat mean, “Eh! Litto girl, get up!”
42 Eh, right den an dea her wen stand up, an walk aroun. An da peopo, right den an dea, dea jaws wen drop. 43 Den he wen tell um, “You guys betta not tell nobody bout dis! Now, go make her someting fo eat.”
Copyright © 2000 by Wycliffe Bible Translators International. All rights reserved