M’Cheyne Bible Reading Plan

Saul Wen Change

9 Saul still yet stay telling da peopo dat stay tight wit da Boss dat he goin kill dem. He wen go da Head Priest guy ² an wen tell him fo write lettas fo da Jewish churches Damascus side, so dat if he find some guys o wahines ova dea dat stick wit da Stuff bout Jesus, he can take dem inside da prison Jerusalem side.

³ Saul stay going on da road, an come near Damascus. An you know wat? Right den an dea one light from da sky wen flash aroun him. ⁴ He wen fall down on top da groun, an hear one voice telling him, “Eh, Saul! Saul! How come you making me suffa?”

⁵ Saul wen aks, “Who you, Boss?”

Da voice wen say, “I Jesus, da Guy you stay make suffa. ⁶ Now stand up an go inside da town, an somebody goin tell you wat you gotta do.”

⁷ Da guys dat wen go wit Saul wen stay dea an neva say notting. Dey wen hear da voice, but dey neva see nobody. ⁸ Saul wen stand up, but wen he wen open his eyes, he no can see notting. So dey wen take him by da hand an dey all wen go inside Damascus. ⁹ Fo three days he no can see notting. An all dat time he neva drink o eat notting.

¹⁰ Inside Damascus had one guy name Ananias dat wen stick wit da Good Stuff Bout Jesus. He wen see someting jalike one dream wea da Boss wen tell him, “Ananias!”

He say, “Yeah, Boss?”

¹¹ Da Boss wen tell, “Go da guy Judas house on Strait Street, an tell him you like talk to one guy name Saul from Tarsus. He stay praying ova dea. ¹² He wen dream an he see one guy name Ananias come an put his hands on top him an den his eyes come good again.”

¹³ Ananias say, “Boss, I hear bout dis guy plenny times. He do plenny bad kine stuff to da peopo Jerusalem side dat stay spesho fo you. ¹⁴ An da main priest guys wen give him power, an he wen come ova hea fo bus all da peopo dat aks you fo help dem.”

¹⁵ But da Boss wen tell Ananias, “Go! I wen pick dis guy fo tell who me to da peopos dat not Jews an dea kings an to da Israel peopo too. ¹⁶ An I goin show him how plenny he goin suffa cuz he my guy.”

¹⁷ Den Ananias wen go da house wea Saul stay, an go inside. He wen put his hands on top Saul, an say, “Brudda Saul, Jesus da Boss, da One dat wen show up by you wen you stay on da road coming ova hea, he wen send me by you, so you can see again, an so His Spesho Spirit goin take charge a you.” ¹⁸ Right den an dea someting jalike scales wen fall down from Saulʼs eyes, an he wen see again. He wen stand up, an Ananias wen baptize him. ¹⁹ Afta dat he wen eat, an come strong again.

Saul Tell Da Good Stuff Bout Christ Damascus Side

Saul wen stay litto wile inside Damascus wit da peopo dat trus Jesus. ²⁰ Right den an dea he wen start fo tell da peopo inside da Jewish churches dat Jesus, he Godʼs Boy. ²¹ All da peopo dat wen hear Saul, wen blow dea minds, an dey wen tell, “Eh, wass dis? Dis da guy dat wen wipe out da peopo in Jerusalem dat aks da One name Jesus fo help um, yeah? An he wen come ova hea fo take dem to da main priest guys an throw dem inside jail, yeah?” ²² But Saul wen teach wit mo an mo power, an da Jewish peopo dat wen stay Damascus side wen come all mix up, cuz he show proof dat Jesus, he da Spesho Guy God Wen Send.

²³ Plenny days lata, da Jewish guys wen come togedda fo talk how dey can kill Saul. ²⁴ But Saul wen hear bout dat. Da Jewish guys stay watch da gates fo da town day an nite, so dey can kill him. ²⁵ But nite time da guys dat wen stick wit Saul, wen put him inside one big basket, an wen let him down thru one puka in da wall nite time.

Saul Go Jerusalem

²⁶ Saul go Jerusalem, an try fo go by da odda guys dat stick wit Jesus, but dey all scared him. Dey neva trus him dat he really stay tight wit Jesus. ²⁷ But Barnabas, he wen take Saul an bring him by da guys Jesus wen send. He tell um dat Saul wen see da Boss Up Dea Inside Da Sky wen he stay going Damascus side, an da Boss wen talk to him. An inside Damascus he no scared fo use Jesus name fo do stuff. ²⁸ Dass why Saul wen stay ova dea wit dem, an wen go all ova inside Jerusalem. He no scared fo use da Boss name ova dea too fo do stuff. ²⁹ He talk wit da Jewish guys dat talk Greek, an wen try fo show um dat da Good Stuff Bout Jesus stay fo real. But dey wen make plan fo kill him. ³⁰ Wen da bruddas wen find out bout dat, dey wen take Saul Cesarea side, an send him away Tarsus side.

³¹ Dat time nobody wen bodda da peopo dat wen come togedda fo church all ova Judea, Galilee, an Samaria. Dey wen trus God mo an moa, an Godʼs Spesho Spirit wen kokua dem. Mo an mo peopo wen trus da Good Stuff Bout Jesus. An everyting dey wen do, dey do um an get respeck fo God.

Peter Go Lydda Side an Joppa Side

³² Peter wen go all ova dat place, an he wen go stay Lydda side wit da peopo dat stay spesho fo God ova dea. ³³ Had one guy ova dea name Eneas. He one guy dat no can move. An he neva can get off his bed fo eight years. ³⁴ Peter wen meet him an tell um, “Eh, Eneas, Jesus, da Spesho Guy God Wen Send, he make you come good. Stand up an make yoa bed good.” Right den an dea Eneas wen stand up. ³⁵ All da peopo dat stay Lydda side an Sharon side wen see um, an dey all wen trus da Boss right den an dea.

Da Wahine Name Dorcas

³⁶ Had one wahine dat wen trus Jesus inside Joppa town. Her name Tabita. (In Greek talk her name Dorcas. Dat mean “one deer.”) Everytime she do good tings an help da poor peopo. ³⁷ Dat time she wen come sick an wen mahke. Dey wen wash her body, an put um inside one room upstairs. ³⁸ Lydda town stay near Joppa. Wen da guys dat stick wit Jesus wen hear dat Peter stay Lydda side, dey send two guys by him fo beg um, “Try come now!” ³⁹ Peter wen go wit dem, an wen he come, dey take him upstairs to da room. All da widows stand aroun him, crying an showing him da shirts an coats Dorcas wen make wen she wen stay wit dem. ⁴⁰ Peter tell dem all fo go outside. Den he wen go down on his knees an pray. He wen turn aroun by da mahke wahine, an say, “Eh Tabita! Stand up!” She wen open her eyes, an spock Peter, an wen sit up. ⁴¹ He wen take her hand an wen help her stand up. An he tell Godʼs peopo an da widows fo come, an he show um dat she stay alive. ⁴² All da peopo Joppa side wen hear bout dat, an plenny peopo wen trus da Good Stuff bout da Boss. ⁴³ Peter wen stay Joppa side long time inside Simonʼs house, one guy dat work wit da leather.

Da Story Bout Da Farma Dat Plant Seed

4 Anodda time Jesus wen teach by da lake. Plenny peopo wen come aroun him, so he go inside one boat, an sit down dea. Da boat stay inside da lake. Da peopo, dey stay standing on da beach. ² He use plenny stories fo teach um. Dis wat he say:

³ “Listen! You guys wen hear da story bout da farma guy? ⁴ He go throw seeds fo plant. Some fall down by da trail, an da birds go eat um up. ⁵ Some fall down on top da rocks wea had ony litto bit dirt. Da plants grow up fast, no matta ony litto bit dirt dea. ⁶ But wen da sun come up, da plants dry up, cuz no mo root. ⁷ Odda seed, dey fall down inside da kine bushes wit thorns. Da bushes grow up, an choke um, so no mo wheat. ⁸ Odda seed, dey fall down inside da good dirt, an dey grow up good, an come up plenny. Some seed, dey give back thirty times moa, some odda seed give back sixty times moa, an some seed even give back hundred times moa.”

⁹ Jesus say, “If you guys hear dis, den listen!”

How Come Jesus Teach Wit Stories?

¹⁰ Wen Jesus stay by himself wit da peopo who stay dea, an da twelve guys he was teaching, dey wen aks him wat da stories mean. ¹¹ So he say, “God let you guys know all da stuff bout how he stay King. But da odda peopo on da outside, I teach um wit stories.

¹² Dass fo make happen jalike Isaiah wen tell dat God say,

Wat Da Story Mean

¹³ Jesus aks dem, “You guys no undastan dis story? Den how you guys goin undastan da odda stories?

¹⁴ “Da farma plant da seed. He jalike da guy dat tell wat God say.

¹⁵ “Da seed dat fall down by da trail, dass jalike wen one guy hear wat God say, an right den an dea da Devil come an make da guy so he no can rememba wat he wen hear.

¹⁶ “Da seed dat fall down on top da rocks, dass jalike wen one guy hear wat God say, an right den an dea he stay plenny good inside. ¹⁷ But da guy, he jalike da plant dat no mo root inside him. He stick wit um fo litto wile. But wen get trouble, o wen da peopo make him suffa cuz he wen trus da stuff he wen hear, da guy give up right den an dea.

¹⁸ “Da seed dat fall down inside da kine bushes wit thorns, dass jalike wen one guy hear wat God say, ¹⁹ but bumbye da guy worry bout all da stuffs he need hea inside dis world. He like come rich, an all dat throw him off. So all dat stuff choke out all da tings God say dat was inside him. He no can do da right tings, jalike one wheat plant dat no can give wheat, growing inside da kine bushes wit thorns.

²⁰ “Da seed dat fall down inside da good dirt, dass jalike wen one guy hear wat God say an trus um. He do da right tings, jalike da good plant dat give wheat. All da good stuff da guy do, he do um thirty times moa, some guys do um sixty times moa, an some odda guys hundred times moa.”

Da Lamp On Top Da Shelf

²¹ Den Jesus aks dem, “Eh, try tell me dis. You bring da lamp fo cover um up? O you put um unda da bed? Nah! You goin put um on top da shelf so you can see, yeah? ²² Kay den, wateva you no undastan now, you goin undastan bumbye. ²³ If you guys hear dis, den listen!”

²⁴ He tell um dis too: “Tink real good bout wat you hear. If you do dat, God goin give you even mo fo know. ²⁵ If you guys undastan all da kine stuff, den God goin tell you moa. But if you guys no like know all dat stuff, den God goin make you no rememba even da litto bit you know now.”

Nobody Know How Da Seeds Grow, But Dey Grow

²⁶ Jesus tell um anodda story. He say: “Wen God stay King, dass jalike one farma dat throw da seed all ova da groun. ²⁷ Nite an day, no matta he sleep o get up, da plant goin poke da head up from da groun an goin grow, even if da guy donno how. ²⁸ Da dirt no need nobody fo help um make da wheat. First da stalk come, den da head, den da food inside da head. ²⁹ Wen da wheat come ripe, da farma cut um wit da sickle, cuz dey stay ready.”

Da Story Bout Da Mustard Seed

³⁰ Jesus tell um anodda story. “God, he stay King. Wat story I can tell you guys so you guys can undastan? ³¹ Wen God stay King, dass jalike one mustard seed. Dat seed mo small den all da odda seeds, you know. If get one guy plant um inside his field, ³² an da seed grow, da plant come mo big den all da odda plants in da garden. Da branches so big, da birds from da sky can sit on top um in da shade!”

Jesus Ony Teach Dem Wit Stories

³³ Jesus teach da peopo wit plenny stories lidat. He ony tell dem stuff dey can undastan. ³⁴ He neva teach dem odda stuff, ony wit stories. But every time he wen stay ony wit da guys he teaching, he tell dem wat da stories mean.

Jesus Make Da Storm Pau

³⁵ Dat time afta da sun go down, Jesus wen tell his guys, “Eh, we go da odda side da lake.” ³⁶ Dey wen leave all da peopo, an Jesus guys take him inside da boat. Had odda boats dea too. ³⁷ Den had one big storm ova dea, an da waves was bussing ova da boat, so da boat almos wen huli. ³⁸ But Jesus still yet stay sleeping in da back on one pillow. His guys wen go wake him up, an tell him, “Eh, Teacha! You no care we goin mahke, o wat?”

³⁹ Jesus get up, an scold da wind an da waves. He say, “Quiet! No move aroun!” Den da wind wen pau an da waves wen come nice. ⁴⁰ An he tell his guys, “How come you guys scared? You guys no trus me, o wat?”

⁴¹ Dey so scared, dey wen tell each odda, “Eh, wat kine guy dis? Even da wind an da waves do wat he tell um!”