M’Cheyne Bible Reading Plan
Jesus Send Out Seventy-Two Guys
10 Afta dat da Boss Jesus wen pick seventy-two odda guys dat he like send out two by two, so dey can go befo him, every town an place wea he goin go lata on. 2 He tell um, “Get plenny peopo, dey jalike da crops, but ony get litto bit guys fo bring um in. So, aks da Boss Up Dea dat own da crops fo send out guys fo bring um in. 3 Go! I send you guys out jalike baby sheeps wea da wild wolfs stay.
4 “No take yoa money bag o odda bag o extra slippas, an no stop fo talk story wen you go down da road. 5 Wen you go inside one house, first say, ‘I come fo aks God fo make you guys heart rest inside, fo all you guys inside dis house.’ 6 If one guy wit good heart stay dea, you goin make him stay good inside. If his heart not good, wat you say goin come back to you. 7 Stay inside dat house, an eat an drink wateva dey give you. Cuz dass good dey give you someting fo da work you do. No move aroun from one house to anodda.
8 “Weneva you come to one town an da peopo like you stay ova dea wit dem, eat da food dey give you. 9 Make da sick peopo dat stay dea come good, an tell um, ‘God stay King hea wit you guys now.’
10 “But wen you go inside one town an da peopo no like you stay dea, go down da streets an say, 11 ‘Da dust from yoa town dat stick on our feet, we wipe um off fo show you guys dat God no like, cuz you guys no listen. But you betta know dis fo shua: God stay King hea now.’ 12 I telling you guys dis: Wen everybody stand in front God da Judge, he goin punish da peopo from Sodom town cuz dey wen do plenny bad kine stuff befo time. But goin be mo easy fo dem, den fo da peopo inside da town dat no like hear wat you guys say!”
Da Peopo Inside Some Towns No Trus
13 Jesus say, “Auwe you guys from Korazin town! You goin get it, cuz you neva listen! Auwe you guys from Betsaida town! You goin get it too, cuz you neva listen! If I wen do da kine awesome stuff fo show my power to da peopo from Tyre an Sidon towns, jalike I wen do fo you guys, long time awready da peopo ova dea wen show dey shame fo all da bad kine stuff dey wen do, an like pau do um. An dey wen sit down an put on one gunny bag, an put ash on top dea head fo show dey sorry. 14 Bumbye goin be mo easy fo da peopo from Tyre an Sidon towns wen dey stand in front God da Judge, den fo you guys. 15 An you guys from Capernaum town, you tink God goin take you up in da sky wit him, o wat? No way! Mo like he goin throw you guys down inside Hell, cuz you guys neva listen!”
16 Jesus tell his guys, “Whoeva hear you, dey hear me too. Whoeva no take you, dey no take me too. Whoeva no take me, dey no take da One dat wen send me.”
Da Seventy-Two Guys Come Back
17 Da seventy-two guys come back, an dey stay real good inside. Dey say, “Boss, even da bad kine spirits do wat we say, cuz we yoa guys, an we use yoa name.”
18 Jesus tell um, “I wen see da Devil, dat time God wen throw um down from da sky jalike da lightning. 19 Listen! I wen give you guys da power so you can walk on top da snakes an da scorpions, an you guys get da power fo win ova da guy dat stay agains us, da Devil. You guys get plenny mo power den da Devil get. An notting goin hurt you guys. 20 But no stay good inside jus cuz da bad spirits do wat you tell um. Stay good inside cuz God get you guys names inside his book inside da sky.”
Jesus Stay Good Inside
21 Dat time Godʼs Spesho Spirit wen make Jesus stay real good inside. An he say, “Fadda, you da Boss all ova da sky an da world. Mahalo plenny, cuz you wen hide all dis stuff from da smart guys an da guys dat know plenny stuff, an you wen show um to da small kids. Dass wat you like do.”
22 Jesus tell, “My Fadda give me everyting, you know. Nobody know me like my Fadda know me. An nobody know my Fadda fo real kine, ony me, I know him, an da peopo I like show him, dey know him too.”
23 Den Jesus wen turn aroun to his guys an tell um (but he neva tell da odda peopo), “You guys stay good inside cuz you see da stuff you see! 24 I telling you, Plenny kings an plenny guys dat wen talk fo God wen like see an hear da stuff you guys see an hear, but dey neva.”
Da Good Guy From Samaria
25 One teacha dat teach Godʼs Rules wen stand up fo aks Jesus one question fo trick him. He say, “Teacha, wat I gotta do fo get da real kine life dat stay to da max foeva?”
26 Jesus say, “Tell me, wat Godʼs Rules say inside da Bible?”
27 He say, “Get love an aloha fo da Boss yoa God wit all yoa heart, an wit everyting inside you, an wit how you tink, an wit all yoa power. An get love an aloha fo everybody jalike you get love fo yoaself.”
28 Jesus say, “Dass right! Do dat an you goin live fo real kine.”
29 But da guy like make himself look good, so he aks, “Wat you mean, love an aloha fo everybody?”
30 Jesus say, “Had one guy. He wen go Jericho town from Jerusalem. Den had some guys dat wen jump him, rip him off, bus him up, an leave him dea fo mahke. 31 Bumbye one Jewish priest guy come dat same road. He spock da guy, an go da odda side. 32 Same ting, one guy from da Levi ohana dat help da prieses, he spock him, an go da odda side too. 33 Den one guy from Samaria going dat road wen come wea da guy stay, spock him, an get pity fo him. 34 He go by him, put olive oil an wine on top his cuts, an wrap um up. He put da guy on top his own donkey, an bring him by da hotel, an take care him. 35 Da nex day he take out two silva coins an give um to da boss fo da hotel, an say, ‘Take care him, an wen I come back I give you wateva you wen pay.’
36 “Now, wat you tink? From da three guys dat wen pass, who wen get mo love an aloha fo da guy dose guys wen bus up?”
37 Da teacha guy say, “Da guy dat wen show pity fo him.”
Jesus say, “Go, make lidat.”
Jesus Go See Marta An Mary
38 Jesus an da guys he teach wen go down one road, an dey come to one small town. One wahine name Marta stay dea. She wen tell um fo come inside her house. 39 She get one sista name Mary, an Mary wen sit down by Jesus feet an listen to wat he say. 40 But wen bodda Marta cuz ony her was doing all da work, an she come an tell, “Boss, you no care dat my sista wen leave me all by myself fo do everyting? Tell her fo come help me!”
41 Da Boss wen tell Marta, “Marta! You bum out, an you worry bout plenny stuff, 42 but you ony need one ting. Mary wen pick da mo betta ting, an nobody can take dat away from her.”
11 An you guys, go copy me, jalike how I stay do. Cuz I trying fo copy Christ, jalike he wen do.
How Come Da Wahines Cover Up Dea Head Wen Dey Pray?
2 I get someting I like tell you folks -- you all good guys, cuz you guys tink bout me all da time, no matta wat. All da stuff I wen teach you guys, you guys still yet stay do um. Right on! 3 But no foget da ting you guys awready know: Da Spesho Guy God Wen Send, Christ, he stay in charge. He stay in charge a every man, jalike da head stay in charge a da body. Same ting fo da wahine, da husban stay in charge a her, jalike he da head fo her. An same ting wit God, he stay in charge a Christ, jalike he da head fo Christ.
4 If get one guy dat cover up his head wen he pray o talk fo God, dass jalike he do one shame kine ting dat make Christ shame. Cuz Christ stay in charge a dat guy, he da head fo him. 5 But if get one wahine dat no cover up her head wen she pray o talk fo God, dass jalike she do one shame kine ting dat make her husban shame. Cuz same ting, he stay in charge a her, an he da head fo her. Same ting, dass jalike if somebody wen cut her hair bolohead fo make her shame. 6 If da wahine no like cover up her head, den mo betta she cut off all her hair. But you know, if goin be shame fo her wen she cut her hair bolohead, mo betta cover up her head, yeah?
7 Tink bout dis: Da man betta not cover up his head, you know. Cuz God wen make da man look jalike him, an da man show how awesome God stay. An da wahine show how awesome da man stay. 8 Wen God wen make da world, he neva make da man from da wahine, you know. He wen make da wahine from da man. 9 An he neva make da man fo help da wahine. He wen make da wahine fo help da man. 10 Az why da wahine suppose to put someting on top her head, so everybody goin know dat she get da right fo pray an talk fo God -- even da angel guys inside da sky goin know.
11 But wen dey stay tight wit da Boss, da wahine no do notting by herself, an da man no do notting by himself. 12 God wen make da wahine outa da man, first time. But afta, every man born from da wahine. An God, he da One dat wen make everyting happen lidat.
13 You guys, figga dis yoa own self: Wen one wahine pray to God, an she no use notting fo cover up her head, you tink dat okay, o wat? 14 Da way you guys tink Corint side, if one guy get long hair, jalike az shame fo him, yeah? 15 But if da wahine get long hair, dat make her look awesome, yeah? Fo her, God wen give her da long hair fo cover up her head jalike how suppose to.
16 But if anybody like argue bout dis, dey gotta figga lidis: all us leada guys an da church peopo all ova, dass da way we do um.
How Fo Make Wen You Eat Da Bossʼs Food
17 Wat I goin say now, I no can say notting good bout you guys. Weneva you guys come togedda, dat no make you guys mo betta. You come mo worse, brah!
18 first ting, wen you guys come togedda fo church, I hear dis: you guys all split up. I figga, dis ting I hear, must be dass true. 19 (Fo shua, if get presha fo you guys split up, den you can find out who listen to da Boss, an who no listen.)
20 Cuz wen you guys come togedda fo eat, suppose to be fo rememba da Boss Jesus. But you guys no do dat. 21 Cuz nobody share, az why. Dey eat dea own food, so get guys dat stay hungry, an get odda guys, dey get drunk. 22 Eh! You guys no mo house fo go eat an drink inside? O you guys tink da odda peopo dat come togedda fo church, dey junk? Da peopo dat no mo notting, you guys make um feel shame! So, wat you guys like me say? Dass okay fo you guys fo make lidat? No way! Not even!.
Da Bread An Da Wine Fo Rememba Da Boss
23 You know, was da Boss Jesus wen tell me bout dis, an I wen tell um all to you guys. Da Boss Jesus, dat same nite befo dey wen set um up fo kill um, he wen pick up one bread. 24 He wen tell God “Mahalo plenny!” an broke um. Den he say, “Eat dis bread. Dis, my body. Dey goin broke um, an dat goin be fo you guys, fo rememba me.”
25 Same ting afta dey wen eat, he wen take da wine cup, an he wen say, “Dis cup mean dat God wen make one new kine deal fo you guys, an I gotta bleed an mahke fo make um happen lidat. Weneva you guys drink um, do um fo rememba me. 26 Everytime you guys eat dis bread an drink outa dis cup, till I come back, dass jalike you guys telling da story one mo time bout me yoa Boss, how I wen mahke.”
If Yoa Heart Not Okay Inside, No Eat
27 Dat mean, anybody dat go eat da bread an drink outa da cup fo rememba da Boss, but inside, dea heart not okay, God goin punish dem. Cuz az da Boss Jesus body an his blood, you know, an dass jalike dey no mo respeck, an make um any kine jalike was notting. 28 Mo betta, first ting, everybody check out how dey stay inside. If dey stay okay inside, den dey can eat da bread an drink outa da cup. 29 But anybody eat o drink an dey tinking, “No mo diffrence, you know, dat Jesus wen mahke. Da Boss Jesus body no mean notting spesho fo me.” Dass jalike dey aksing fo trouble, cuz dey goin get punish fo eat an drink lidat. 30 Az why, get plenny peopo ova dea by you guys, dat no stay strong, an dey sick, an get peopo dat wen mahke awready. 31 But if we wen check out our own self first, den we no goin get punish lidat. 32 Wen da Boss punish us guys, you know, he do dat fo teach us guys da right way. He no like us get punish an wipe out wit all da peopo inside da world, bumbye.
33 So den, bruddas an sistas. Wen you guys come togedda fo eat, wait fo each odda. 34 But if anybody stay hungry, mo betta dey stay home eat. No good you guys come togedda, jus fo get punish. An all da odda tings you guys wen aks bout, bumbye I goin tell you guys how fo make um wen I come dea.
Copyright © 2000 by Wycliffe Bible Translators International. All rights reserved