M’Cheyne Bible Reading Plan
Jesus Feed Four Tousand Guys
8 Dat time plenny peopo wen come aroun Jesus. Dey no mo food, so he tell his guys fo come by him. He say, 2 “Eh, I feel pity fo da peopo. Dey stay hea wit me three days awready, an dey no mo notting fo eat. 3 I no like send um away hungry. Bumbye dey goin pass out on da way home. You know, some peopo wen come from far away.”
4 But his guys say, “Eh, we stay in da boonies, you know. An get plenny peopo. Wea we goin find nuff food fo feed um?”
5 But Jesus say, “How much bread you guys get?”
Dey tell him, “Seven small breads.”
6 So Jesus tell da peopo fo sit down on top da groun. An he take da seven breads, an tank God fo um. Den he broke um, an give um to his guys. An da guys give um to all da peopo. 7 Had some small fish too. So Jesus tell God he good heart fo give um da food. He tell his guys fo give um to da peopo.
8 Dey all wen eat an come full. An Jesus guys pick up da lefovas, seven big baskets full. 9 Had bout four tousand guys dea who wen eat. Den he tell um, “Go home now.”
Show Us Proof!
10 Right den an dea he go inside one boat wit his guys. An dey go Dalmanuta side. 11 Da Pharisee guys come fo make argue wit Jesus. Dey like poin finga him, so dey say, “Do someting awesome lidat, so us guys can see proof dat you come from God in da sky.”
12 Jesus wen moan from deep inside, an say, “How come da peopo nowdays everytime like see someting awesome? Dass how dey stay, but I tell you guys, dey no goin see notting!” 13 Den he wen go way from dem, go back inside da boat, an go da odda side da lake.
Wat Da Pharisee Guys An Herod Teach
14 Now, Jesus guys wen foget da bread. Ony had one bread dea inside da boat. 15 Jesus tell um, “Watch out fo da yeast from da Pharisee guys an King Herod. Dey jalike da yeast dat make da bread mo bigga.”
16 Jesus guys talking, an trying fo figga out wat he mean. Dey say, “He talking lidat cuz we neva bring bread.”
17 Jesus wen know wat dey talking bout, an he say, “Wat you guys talking bout, no mo bread? You guys no undastan, still yet? You guys hard head, dass why. 18 You guys get eyes but no can see, an ears but no can hear. You guys no rememba? 19 Wen I wen broke da five breads fo da five tousand guys, how much big baskets lefovas you wen pick up afta?”
Dey say, “Twelve.”
20 “An da seven breads dat wen feed four tousand guys, how much big baskets lefovas you wen pick up afta?”
Dey say, “Seven.”
21 Jesus tell um, “You guys! You still yet no undastan who me!”
Jesus Make One Blind Guy Come Good Betsaida Side
22 Jesus dem go Betsaida. Some peopo wen bring one blind guy, an beg Jesus fo touch him. 23 He wen take da blind guy by da hand, an dey go outside dat small town. Jesus wen spit on da guyʼs eyes, an put his hands on top him, an tell him, “Wat you see now?”
24 Da guy wen look up an say, “I can see peopo, but dey look jalike trees walking aroun!”
25 Den Jesus put his hands on top da guyʼs eyes one mo time. Da guy wen open his eyes wide, his eyes wen come good, an he can see everyting real good. 26 Den Jesus wen tell him, “Go home, but no go inside da town.”
Wat Peter Say Bout Jesus
27 Jesus dem go da small towns Cesarea side, da place King Philip wen build. Wen dey stay going, he tell um: “Eh, who da peopo say me?”
28 Dey say, “Some peopo say you John Da Baptiza Guy. An get odda peopo dat say you Elijah. An get odda peopo dat say you jalike da odda guys who wen talk fo God long time ago.”
29 Den Jesus say, “Kay den. Wat bout you guys? Who you guys say me?”
Peter say, “You da Christ Guy, Da Spesho Guy God Wen Send.”
30 Den Jesus tell his guys, “No go tell nobody dat I da Christ Guy.”
Jesus Say He Goin Mahke An Come Back Alive
31 Den Jesus start fo teach his guys. He say, “I Da Guy Dass Fo Real, you know, an I gotta suffa plenny. All da older leadas, da main priest guys, an da teacha guys who teach Godʼs Rules, dey goin figga I not fo real, an dey goin kill me fo dat. But I goin come back alive afta three days.” 32 He wen talk real clear bout dis. Den Peter wen take him on da side an scold him. He say, “Eh! No way, Boss! No way dass goin happen to you!”
33 But Jesus wen turn aroun, look at his guys, an he wen scold Peter. He say, “Get outa my way. You acking jalike da Devil! You tink jalike da peopo tink, not jalike God tink.”
34 Den he tell all da peopo an his guys fo come by him. He say, “Whoeva like stick wit me, gotta make up dea mind, dat dey no goin be dea own boss no moa. Goin be hard, jalike dying on top one cross. An den dey can stick wit me. 35 If bodda you dat you goin mahke, fo shua you goin mahke. But if you like do everyting you do fo me, an fo teach da Good Stuff From God, an no bodda you if you mahke fo dat, den you goin live fo real kine. 36 Dis poho: one guy get everyting inside dis world, but da guy end up cut off from God, an no mo da real kine life inside. 37 You tink you rich nuff fo buy back yoa life?
38 “Da peopo nowdays in dis world, jalike dey stay fooling aroun behind Godʼs back, an do all kine stuff dey not suppose to do. Anybody dat stay shame a me an da tings I say, kay den, wen I come back, I goin be shame a dem. I da Guy Dass Fo Real. I goin come back wit my spesho angel guys, an I goin be awesome, jalike my Fadda, he awesome.”
You Can Live Fo Real Kine If You Stay Tight Wit Godʼs Spirit
8 So den, God no goin punish da peopo dat stay tight wit Jesus Christ! 2 Cuz get two tings dat stay fo real: First ting, if you stick wit Godʼs Spirit, he goin make you come alive fo real kine an make you stay tight wit Jesus Christ. Da odda ting is dat if you stick wit da bad kine stuff, you goin cut yoaself off from God. Now, if you get Godʼs Spirit, Godʼs Spirit cut you loose from da bad kine stuff.
3 Even if we do wat da Rules from God say, dat no can throw out da bad kine stuff inside us, cuz da way us guys stay, we not strong inside. But den God, he wen go send his own Boy fo come one guy jalike us. Da way Jesus wen stay, God wen make him look jalike one regula guy dat can do bad kine stuff, jalike all da odda peopo. But den, Jesus neva do bad kine stuff -- how he wen live, he wen show proof dat da tings da peopo was doing was bad fo shua. Plus, he wen come one sacrifice fo hemo da shame fo da bad kine stuff dat all da odda peopo wen do. 4 God wen send Christ fo mahke so us guys can do all da right kine stuffs Godʼs Rules say we gotta do. Now, we stay doing da kine stuff Godʼs Spirit like us do, not da kine stuff we do wen we live da way we like.
5 Da peopo dat live da way dey like, dey live lidat cuz dass how dey stay inside, an dass da ony kine stuff dey tinking bout all da time. But da peopo dat live da way Godʼs Spirit like, dey ony tinking bout da kine stuff dat Godʼs Spirit like. 6 Da guy dat ony like tink bout doing da bad kine stuff he like do, jalike he stay mahke inside awready. But da guy dat ony like tink bout doing wat Godʼs Spirit like, he stay alive fo real kine, an his heart stay rest inside.
7 An if you ony like tink bout doing da kine stuff you do wen you live da way you like, cuz dass how you stay inside, you ony going agains God everytime, you know. Dat mean, you not doing wat Godʼs Rules say -- cuz you no mo da power fo do um. 8 Da peopo dat ony stay doing da bad kine stuff dey like do, no way God goin like wat dey doing.
9 But you guys, you guys da one dat no stay doing da bad kine stuff you do wen you live da way you like. If Godʼs Spirit stay live inside you, you guys stay doing da kine stuff Godʼs Spirit like. Whoeva no mo Christʼs Spirit inside him, dass da guy dat not Godʼs guy. 10 But Christ stay tight wit you guys. You guys spirits stay alive fo real kine, cuz you guys get um right wit God. So, no matta you guys goin mahke cuz you guys wen do bad kine stuff. 11 God da One dat wen make Jesus come back alive afta he wen mahke. If Godʼs Spirit stay tight wit you guys, den he goin make you guys come back alive, yoa body, everyting, jalike how he wen make Christ come back alive. His Spirit goin do dat fo you guys, no matta yoa body gotta mahke.
Godʼs Spirit Tell Us We Godʼs Kids
12 So den, bruddas an sistas, we gotta do someting. But we no need do notting fo da bad kine stuff inside us, da way our bodies like make us do. 13 If you guys go ack jus da way you stay inside, fo shua kine you goin cut yoaself off from God! But den, if you let Godʼs Spirit help you kill off all da bad kine stuff you do wen you live da way you like, den you goin live fo real kine.
14 Da peopo dat listen to Godʼs Spirit so he can tell um wat fo do, dem guys Godʼs kids. 15 Wen you guys get Godʼs Spirit in charge a you, Godʼs Spirit no goin make you guys ack jalike slaves dat gotta stay scared all da time. Az how was befo time. Wen you get Godʼs Spirit in charge a you, you know you stay Godʼs kids! Dass why he goin listen wen we yell out, “Daddy!”
16 Jalike our own spirit tell us inside, Godʼs Spirit tell us we Godʼs kids. 17 Cuz us guys Godʼs kids, dat mean, we goin get all da good kine stuff God goin give his kids, cuz he our Fadda. Jalike da Fadda give everyting he get to Christ, his Boy, an dass how he goin make to us guys, same time he give um to Christ. Ony one ting: us guys gotta suffa jalike Christ wen suffa, so den bumbye, God make us come awesome jalike he wen make Christ come awesome.
Bumbye God Goin Make Us Come Awesome
18 You know, I figga dat da stuff we stay suffa right now, az notting! Cuz da awesome stuff God goin show us bumbye, dat goin be unreals! 19 All da tings dat God wen make, jalike dey ony stay watching real hard, cuz dey waiting fo see wen God goin show everybody he proud who his kids stay. 20 All da tings God wen make, he wen figga, first, everyting gotta come all hamajangs an stay lidat. Not suppose to be lidat, an God know fo shua dat bumbye he goin make all dat stuff come okay one mo time. 21 Right now, all da tings dat God wen make, dey stay stuck hamajang kine, an stay coming all pilau kine. But bumbye, God goin do awesome tings fo get um outa dat, so dey can come jalike suppose to be. Same time, God goin do awesome tings fo get all his kids outa da pilau kine stuff too.
22 Us guys know, from befo time till now, all da tings God wen make stay making noise jalike dey get big pain, jalike wen one wahine goin born one baby an she stay suffa plenny. 23 Eh, us guys too, no matta we get da Spirit in charge a us dat God wen give us first ting, jalike we still yet make big noise inside us lidat too. We make lidat cuz we still yet waiting an watching real hard fo da time wen God goin make us his kids to da max, an goin hemo loose our bodies from all da pilau kine stuff.
24 Wen God wen take us outa da bad kine stuff, he wen make us know fo shua wat he goin do bumbye. But still yet, we gotta wait. If we see someting happen, den we no goin wait fo dat same ting fo happen. Nobody goin stay wait fo someting dat wen pau happen awready. 25 But wen we stay waiting fo someting we no can see still yet, den we still goin hang in dea an wait some moa.
26 Same ting, Godʼs Spirit help us plenny, cuz we no mo power. We donno how fo pray da right way. But Godʼs Spirit, he go take ova an aks God fo do good tings fo us, no matta we jalike get big pain inside dat make us so we donno how fo say um. 27 An God, he know all da tings dat us guys like say inside our heart, an he know how his Spirit tink. Dass how God know everyting his Spirit like say fo help us, cuz Godʼs Spirit tink jalike God tink, an da Spirit talk to God an aks him fo help da peopo dat stay spesho fo God.
28 Us guys know dis too: God make everyting come out all good fo da peopo dat get love an aloha fo him. Befo time, God wen go make plan wat he goin do fo dem, an he wen tell um awready, “Come wit me! Be my guys!” 29 Befo time, he wen pick dose peopo awready, cuz he like make um come da kine peopo jalike his Boy. Godʼs Boy, dass Christ. He da main one, an da odda guys, dey jalike his younga bruddas an sistas. 30 Dat same peopo God wen pick befo time lidat, he wen tell um fo come be his guys. An dose same guys, God wen make um get um right wit him, an he wen make um come awesome jalike him.
God Get Love An Aloha Fo Us Guys
31 So den, wat we goin say bout all dat? God stay fo us guys to da max. Cuz God stay lidat, who going agains us? No mo nobody! 32 God neva even hold back his own Boy. He wen make um one sacrifice fo help all us guys. God wen give his own Boy fo mahke fo us. You know, dat mean God no hold back notting. He give us every good ting to da max!
33 An den, who goin poin finga da peopo God wen pick? No mo nobody fo do dat! Cuz God, he da One dat say dat his peopo get um right wit him awready. 34 Eh! No mo nobody dat can say God gotta punish all da peopo he wen pick. Jesus Christ, he da One dat wen go mahke. An mo importan den dat, he da One dat God wen make um come back alive afta he wen mahke. From dat time, he stay da mos importan place, by Godʼs right side. Same time, Jesus da One dat stay aksing God fo help us guys!
35 You tink get somebody o someting dat goin make Christ no get love an aloha fo us guys? No way! You tink presha, hard time, o wen get somebody dat like hurt us, o wen no mo notting fo eat, o no mo clotheses, o wen we scared, o wen we get peopo dat like kill us? Not even! 36 Jalike da Bible wen say,
“Cuz we yoa peopo,
Everytime dey try kill us.
Dey tink we jalike sheeps dey goin kill.”
37 Cuz Christ get love an aloha fo us guys to da max, no matta wat kine trouble get, no bodda us, cuz we da winnas fo shua!
38 I shua bout dis: No mo notting can make God stop loving us guys. No matta if we stay alive o we mahke, no matta if get angel guys o leada guys in da sky, o if get spirits wit power dat go agains us, no matta wateva stay happen now o goin happen bumbye, 39 no matta get guys wit power up dea inside da sky, o down dea inside da groun, no matta get all kine odda kine tings dat God wen make -- no mo notting dat can hemo us from God, so he no love us no moa! Cuz us guys stay tight wit Jesus Christ, da Spesho Guy God Wen Send, an he our Boss.
Copyright © 2000 by Wycliffe Bible Translators International. All rights reserved