M’Cheyne Bible Reading Plan
Jesus An One Guy Dat No Can Move
2 Afta couple days, Jesus wen go back Capernaum wea he wen stay befo. Da peopo wen hear dat Jesus stay home now. 2 So, plenny peopo wen come togedda an neva have room. No can even go near da door. An Jesus teach um.
3 Some guys wen come by Jesus. Four a dem wen carry one guy dat no can move. 4 Get so plenny peopo, dey no can bring him near Jesus. So dey wen go up on top da flat roof, an make one big puka inside da roof, right ova da place wea Jesus stay. Dey put da guy on top his mat an put um down real slow in front Jesus. 5 Wen Jesus see dat, he wen tink, “Eh, wow! Dis guys trus me fo real kine, dat I goin make dea friend come good!” Den he tell da guy, “Eh, my boy, you know all da bad kine stuff you wen do befo? I tell you now, da shame from all dat, pau awready!”
6 But get some teacha guys dea dat teach Godʼs Rules. Dey stay tinking, 7 “Eh! Who dis guy tink he is fo talk lidat! He talking stink bout God! Ony God can let da guy go an hemo da shame from da bad kine stuff!”
8 But right den Jesus wen know inside wat dey tinking. He say, “How come you guys tinking bad kine stuff lidat?
Dass why he tell da guy, 11 “Eh, get up! Take yoa mat an go home awready!”
12 So da guy wen get up, pick up da mat an go outside in front all dem. Dat wen blow dea minds big time. Dey say, “Dis unreal! Dis neva happen befo. Dis God, he awesome!”
Jesus Tell Levi Come Wit Him An Be His Guy
13 Jesus wen go by da lake. Plenny peopo come by him, an he wen teach um. 14 He was walking, an he wen spock Levi. (Leviʼs fadda name Alfeus.) Levi stay by da tax place collecting money fo da govermen. Jesus tell him, “Eh! Come wit me! Be my guy!” Levi get up, an go wit him.
15 Jesus wen go Leviʼs house fo eat. Had plenny guys dat collect money fo tax fo da govermen an odda guys dat get bad name jalike dem, dat like hang out wit Jesus. Dey all dea, eating wit Jesus an his guys.
16 Had some Pharisee guys dea dat teach Godʼs Rules. Dey see Jesus dea eating wit all da tax guys an odda kine peopo dat get bad name jalike dem. So, dey aks Jesus guys, “Eh, yoa teacha, how come he eating wit da tax guys an odda kine peopo dat get bad name?”
17 Jesus wen hear dat, an he tell dem, “Da peopo dat not sick, dey no need docta, ony da sick guys need. Me, I neva come fo tell da good kine peopo fo come by me fo be my guys, but da peopo dat get bad name.”
How Come Jesus Guys No Skip Food So Dey Can Pray?
18 Now, Johnʼs guys an da Phariseeʼs guys was skipping food so dey can pray. Some peopo come aks Jesus, “How come John Da Baptizaʼs guys an da Pharisee guys skip food so dey can pray, but da guys you teaching, dey no skip food, but still yet dey can pray?”
19 Jesus tell dem, “Wat you tink? You go one wedding an skip food, wen da guy dat getting married stay dea? Nah! 20 Bumbye, da time goin come wen dey goin take away da guy dat getting married. An den, dass wen his friends goin skip food.
Da Old Kine Teaching An Da New Kine Teaching
21 “Fo fix up one old puka clothes, you no goin take one new piece cloth dat no shrink yet fo cover da puka. You go do dat, den wen you wash um, da new piece goin shrink plenny an make one mo bigga puka, an you make da old clothes mo worse.
22 An same ting, you no put grape juice fo make wine inside one old kine leather bag, an close um fo let um ferment. You do dat, da new wine goin come mo big an bus da wine bag, an da wine goin spill out. Da old leather no good no moa. Mo betta, you put new wine inside new kine leather bag.”
Dey Give Jesus Hard Time Bout Da Rest Day
23 Anodda time was da Jewish Rest Day. Jesus an his guys walk thru da wheat fields. Da guys pick litto bit wheat fo eat. 24 But had Pharisee guys ova dea dat wen tell Jesus, “Hala! Dese guys, you teaching dem, but still yet dey stay doing da kine stuff dey not suppose to on da Rest Day!”
25 Jesus tell um, “Wot! You guys neva read inside da Bible wat David wen do wen him an his guys was hungry? 26 Wen Abiatar was da Head Priest, David go inside Godʼs house an eat da bread dass spesho fo God. But no can do dat kine, cuz Godʼs Rules say dat ony da priest guys can eat dat bread. But David, he give um to his guys too, an nobody say notting.”
27 Den Jesus wen tell, “You know, God neva make da peopo fo da Rest Day. He make da Rest Day fo da peopo. 28 Dass why I da One dat get da right fo say wat can do da Rest Day, cuz I da Guy Dass Fo Real.”
God Da Judge Goin Tell Um Strait
2 So den, no matta who you, if you go poin finga somebody dat he doing bad kine stuffs, no foget you doing da same kine tings jalike him. Eh, you too no mo excuse, cuz you poin finga back yoa own self.
2 But we know dis: Everytime God tell dat da peopo wen do bad kine stuff, we know wat he say stay true.
3 So, wat you figga? Wen you poin finga da odda guys cuz dey doing bad kine stuffs, an you doing da same ting, you tink God goin let you go?
4 God get plenny good heart fo you, an he stay hanging in dea an waiting fo you. An den, you make like dass notting? You no undastan dat he like you come sorry an pau do all da bad kine stuff you guys doing?
5 But you get hard head, an you no like change how you stay doing. So, you stay making tings mo worse fo yoaself. Bumbye God da Judge goin tell who wen do da bad kine stuff, an everybody goin know dat wat God say stay true. Den he goin punish you, cuz he no goin take wat you wen do. 6 How you make, same ting, God goin give you back.
7 God goin give some peopo da real kine life dat stay to da max foeva, cuz everytime dey hang in dea an do da right ting. Dey like get plenny respeck from God, an get da real kine life. 8 But da odda peopos, God no goin take wat dey do. He goin had it wit dem awready, cuz dey like make big kine trouble. Dey no like do da true stuff, but dey everytime like do wass wrong.
9 Everybody dat stay doing da bad kine stuff goin get hard time how dey living, an dey goin suffa plenny presha. First goin be da Jewish peopo. Den goin be da odda peopos dat not Jews. 10 But everybody dat stay doing da good kine stuff, God goin give dem plenny respeck, an dea hearts goin rest inside. First goin be da Jewish peopo. Den da odda peopos dat not Jews. 11 God make um everybody da same ting. 12 Everybody dat do bad kine stuff, an dey neva know dat God wen make Rules fo everybody, dey goin get cut off from God, no matta dey donno dat Godʼs Rules stay. An everybody dat do da bad kine stuff, an dey know Godʼs Rules stay, God goin use da Rules fo judge dem. 13 Fo get um right wit God, no nuff fo ony hear Godʼs Rules. Gotta do jalike Godʼs Rules say, fo get um right wit him.
14 Da peopo dat not Jews, dey donno dat Godʼs Rules stay. But if get peopo dat by demself do jalike Godʼs Rules say, but dey donno dat da Rules stay, den dey stay ack jalike dey get um. 15 How dey ack, dass jalike dey get Godʼs Rules right dea inside dea heart. Dea heart tell dem bout wat dey doing. Wen dey go tink wat stay right an wat stay wrong, den dey figga. 16 Dass how goin be bumbye wen God goin make Jesus Christ da Judge fo da secret stuff inside everybodyʼs heart. Dass wat da Good Kine Stuff From God say, jalike I stay teaching.
Da Jewish Peopo An Godʼs Rules
17 Now you dea, you like peopo fo know you one Jewish guy. You trus Godʼs Rules. You talk big bout God. 18 You know wat God like you fo do. You know wass da bestes kine stuff, cuz da teachas wen teach you from Godʼs Rules. 19 You stay shua you can tell da peopo dat no can see wea fo go. You tink you jalike one light fo all da peopo dat stay inside da dark. 20 You can teach da peopo who donno notting an da ones dat still yet need one teacha. Cuz you get Godʼs Rules, you tink you get all da trut an you know everyting.
21 So, you go teach da odda peopo. You teach yoaself too, o wat? You go preach dey betta not rip off nobody. You rip off too, o wat? 22 You say, “No go fool aroun behind yoa husban o wifeʼs back.” You go fool aroun too, o wat? You tink da idol kine gods no good. You take stuff from dea temples, o wat? 23 You talk big bout Godʼs Rules. You making God shame cuz you broke um, o wat? 24 Jalike da Bible wen say befo time, “Da peopos dat not Jews try run down Godʼs name cuz a you guys.”
25 If you do wat Godʼs Rules say, az good you get da cut skin mark dat show you one Jewish guy. But if you go broke Godʼs Rules, az jalike you no mo da mark awready, an you not one Jewish guy fo real kine. 26 So den, if get one guy dat not one Jew, an he do all da good kine stuff Godʼs Rules say, den no matta he neva cut skin, he Godʼs guy. Dass jalike he get da mark too. 27 So den, da peopo dat not Jews, if dey do wat Godʼs Rules say, dey goin show dat you Jewish peopo wen broke Godʼs Rules. No matta dey no mo da cut skin mark, an you guys get da Rules inside da Bible from befo time, an da cut skin mark too.
28 No matta somebody who come from Abraham get da cut skin mark on top his body, dat no make him one Jewish guy fo real kine. 29 Da Jewish guy who fo real stay same ting lidat inside. Godʼs Spirit stay in charge da guy, an dass jalike one spesho mark inside his heart. Da Rules inside one book, dass not wat make him Godʼs kid. Az not da peopo dat goin talk good bout him, goin be God dat goin do um.
Copyright © 2000 by Wycliffe Bible Translators International. All rights reserved