M’Cheyne Bible Reading Plan
Who Da Numba One Guy?
18 One nodda time da guys Jesus teaching come by him, an aks him, “From all da guys dat get God in da sky fo dea King, who da numba one guy?”
2 Jesus tell one small kid fo come, an he put um in front dem. 3 He say, “I tell you guys dis fo shua: If you guys no change an start fo tink jalike one litto kid, no way God in da sky goin be yoa King. 4 Da guy dat no tink he gotta be numba one everytime, jalike dis small kid, dat guy goin come numba one, from dose dat get God in da sky fo dea King. 5 Whoeva take in one small kid jalike dis one, cuz da kid stay tight wit me, same ting, dat guy take me in.”
No Good, Make Peopo Do Bad Kine Stuff
6 Den Jesus say, “Dese small kids hea, dey trus me! If somebody try make um so dey no like trus me no moa, mo betta take one real big heavy stone from da mill, an tie um aroun da guy, den throw him inside da ocean fo drown!
7 “Auwe! Da peopo hea inside da world, dey goin get it! Cuz get guys ova hea who try fo make odda guys do bad kine stuff! Fo shua, goin get peopo dat like make odda guys do bad kine stuff. But auwe! Da guy dat make one nodda guy do bad kine stuff, he goin get it!
8 If yoa hand o yoa leg make you do bad kine stuff, cut um off an throw um away! Mo betta you live to da max foeva, no matta you no mo hand o leg. No good you get da hand an da leg, an dey throw you inside da fire dat stay burning foeva. 9 If yoa eye make you do bad kine stuff, pull um out an throw um away! Mo betta you live foeva wit one eye. No good you get two eyes an dey throw you inside Hell wea get plenny fire.”
Da Sheep Dat Stay Lost
10 Jesus say, “Watch out dat you guys no tink you mo betta den one a dese small kids hea. I tell you guys, dey get spesho angel guys inside da sky dat stay wea dey can talk to my Fadda up dea, any time dey like.
If Yoa Brudda Do Bad Kine Stuff
15 Jesus say, “If yoa brudda do bad ting to you, go tell him wat he wen do. But go by yoaself. If he listen, den he goin come jalike yoa brudda again. 16 But if he no like listen, take one o two odda guys wit you an tell him one mo time, cuz jalike da Bible wen say from befo time, ‘Fo everyting, need two o three guys fo tell wat dey wen see an hear, so you know fo shua wat wen happen.’ 17 If he no like listen to dem, den go tell all da church guys. An if he no like listen to dem, make to him jalike he from one a da peopos dat donno God, o jalike he one crooked guy dat take money fo tax.
Wen You Say ‘Can’ o ‘No Can’
18 “I tell you guys dis too: If you say ‘No can’ bout someting ova hea inside dis world, God in da sky goin say ‘No can’ too. An if you guys say ‘Dass okay’ bout someting ova hea inside dis world, God in da sky goin say ‘Dass okay’ too. 19 I tell you guys one mo time, if two a you guys inside dis world pray togedda to God fo da same ting, my Fadda in da sky goin make um happen fo you guys. 20 Cuz weaeva two o three guys come togedda cuz dey my guys, I stay right ova dea wit dem.”
Da Worka Guy Dat No Like Let Da Odda Guy Go
21 Den Peter go by Jesus an say, “Eh, Boss, how much times my brudda can do bad tings to me, an I gotta let him go? Seven times, o wat?” 22 Jesus tell him, “No, not ony seven times, but seventy times seven.”
23 Den Jesus say, “Dass how you guys gotta make. Cuz everytime wen God in da sky stay King, dass jalike get one king dat check out wat money his worka guys owe him. 24 He sit down, an dey bring one worka guy by him dat owe um uku paila money. 25 But da worka guy no mo money fo pay him, so da king tell da odda worka guys, ‘Kay den. Go sell da guy fo make him one slave, an sell his wife an his kids too, an everyting he get. Dass how he goin pay wat he owe.’
26 “But dat worka guy go down an beg um. He say, ‘Ah, Boss, try wait! Give me chance! I goin pay you back all da money!’ 27 Da king get pity fo him, so he let um go, an tell him, ‘No need pay notting.’
28 “Den dat same worka guy go outside, an spock one nodda worka guy who owe him pay fo four month work. He grab him by da neck, an tell him, ‘Eh! You owe me money! You betta pay me back!’ 29 Da odda worka guy go down an beg um, ‘Try wait! Give me chance! I goin pay you back all da money.’
30 “But da first worka guy no like wait, so he tell da guards fo put da odda guy inside da prison till he can pay wat he owe him.
31 “Da odda worka guys see wat wen happen, an dey all bum out. Dey go tell da king everyting dat wen happen. 32 Den da king tell da first worka guy fo come, an say, ‘You so unreal! You one bad worka guy! You wen beg me. I wen let you go, an tell you dat you no need pay me back notting. 33 But how come you no pity da odda guy, jalike I wen pity you an give you chance?’ 34 Da king stay real huhu. He give da guy to da guards inside da prison fo torture him, till he pay everyting he owe.”
35 Den Jesus say fo finish, “My Fadda in da sky goin do lidat to all you guys, if you no let yoa brudda go fo real kine inside yoa heart, fo all da bad kine stuff yoa brudda wen do to you.”
Inside Corint
18 Afta dat Paul wen go way from Athens an wen go Corint. 2 Ova dea he wen come by one Jewish guy name Aquila. He from Pontus, an he jus wen come from Italy wit his wife Priscilla. Cesar Claudius da Big King wen tell all da Jewish peopo fo get outa Rome town, az why. Paul wen go an talk wit dem. 3 Paul make tents, an Aquila an Priscilla wen make um too, so he wen stay wit dem an work wit dem. 4 Every Rest Day he talk plenny wit da Jewish peopo an da peopo dat not Jewish inside da Jewish church fo try help um trus da Good Stuff Bout Jesus.
5 Silas an Timoty wen come from Macedonia. An den Paul wen ony talk to da Jewish peopo everytime. He tell um da Good Stuff Bout Jesus, dat he da Spesho Guy God Wen Send. 6 But wen da Jewish guys wen stand up agains Paul an wen talk bad to him, he wen shake out his clotheses fo show he wen had it wit dem, an wen tell um, “You guys get da blame if you guys goin be cut off from God! I no mo da blame fo dat. Now I goin go talk wit da peopo dat not Jews.” 7 Den he wen go way from da Jewish church, an wen go nex door, da house wea one guy name Titius Justus live. Dat guy, he get plenny respeck fo God. 8 Crispus, he da leada guy fo da Jewish church. Him an all his ohana wen trus da Boss Jesus. An had plenny peopo from Corint dat wen hear Paul an trus Jesus too, an wen get baptize.
9 One nite Paul wen see someting jalike one dream. Da Boss Jesus wen tell him, “No need be scared. No give up telling da Good Stuff. 10 Cuz I stay wit you, an nobody goin hurt you. Plenny peopo from dis town, dey stay mines.” 11 So Paul wen stay ova dea an wen teach um wat God wen say fo one year an a half.
12 Wen Gallio stay governa fo Akaia, da Jews wen gang up on Paul an wen take him in front da governa. 13 Da Jews wen tell da governa, “Dis guy, he stay make da peopo go down an pray to God da way dat stay agains our Rules.”
14 Paul wen start fo talk, but Governa Gallio wen tell da Jews, “If you Jewish guys wen squawk bout someting dat stay wrong o some crime, den dass good fo me fo listen to you guys. 15 But you guys squawk bout how da guy talk, an names, an yoa own rules. So you guys make um right yoaself. I no goin judge dat kine stuff.” 16 An he wen tell his guys fo throw um outside da place. 17 Den da Jewish guys wen grab Sostenes, da Jewish church leada guy, an wen bus um up in front da governa. But Gallio neva care bout dat.
Paul Go Back To Antiok
18 Paul wen stay Corint long time. Den he wen go way from da bruddas an wen sail Syria side. Priscilla an Aquila wen go wit him. Befo Paul wen sail, he cut off his hair inside Kenkrea, cuz he wen make one promise fo do someting. 19 Dey wen come Efesus, an Paul wen go way from Priscilla an Aquila. Paul wen go inside da Jewish church, an wen talk to da Jewish peopo fo help um trus da Good Stuff Bout Jesus. 20 Dey wen tell him fo stay ova dea some moa, but he neva like. 21 Wen he stay going, he wen promise dem, “I goin come back if az wat God like.” Den he wen sail from Efesus.
22 Wen Paul wen come Cesarea, he wen go show face to da church guys. Den he wen go Antiok. 23 He wen stay Antiok long time. Den he wen go all ova Galatia an Frygia, an wen kokua da peopo dat stay tight wit Jesus.
Apollos Stay Inside Efesus An Corint
24 One Jewish guy name Apollos wen come to Efesus. He from Alexandria. He one guy dat wen go school long time, an he know plenny stuff from da Bible. 25 Befo time odda bruddas wen teach him bout da Boss Jesus, an da way he wen talk, everybody know he tink dass importan. He wen teach da right way bout Jesus. But he ony know bout da guy Johnʼs baptism. 26 He wen start fo talk wit power inside da Jewish church. Wen Priscilla an Aquila hear him, dey tell him fo come dea house. An dey teach him bout Jesus way mo betta. 27 Apollos wen like go Akaia, an da bruddas wen kokua him. Dey wen write one letta fo da bruddas an sistas ova dea, so dey goin give Apollos dea aloha. Wen he go ova dea, he wen help da peopo dat wen trus God cuz God wen do plenny good tings fo dem. 28 An he wen talk wit plenny power to da Jewish guys in front all da peopo. He show um proof from da Bible dat Jesus, he da Spesho Guy God Wen Send.
Copyright © 2000 by Wycliffe Bible Translators International. All rights reserved