M’Cheyne Bible Reading Plan
Wat Da Peopo Teach Long Time Ago
15 Afta dat, some Pharisee guys an teacha guys dat teach Godʼs Rules wen go from Jerusalem by Jesus, an say, 2 “Eh, no good how dey do, da guys you teaching! How come dey no do wat our ancesta guys wen teach us from long time ago? Dey no wash dea hands da right way befo dey eat.”
3 Jesus tell um, “Yoa ancesta guys wen teach all kine stuff. How come you do dat kine stuff, but you no do wat Godʼs Rules say? 4 God say, ‘Get respeck fo yoa fadda an mudda.’ An he say dis too, ‘Da guy dat swear at his fadda o mudda, gotta kill him.’
5 “But you teacha guys say, ‘If one guy get someting, an he can use um fo help his fadda o mudda, he can say, “I no goin use um fo help you guys, cuz bumbye I goin give um to da temple.” 6 Den da guy no need show respeck fo his fadda o mudda.’ Dass wat you guys say. You guys make no good wat God wen say, so you can stick wit da stuff yoa ancesta guys wen teach.
7 “You guys say one ting an do anodda! Da guy Isaiah wen talk fo God long time ago, an fo shua he talking bout you guys! He say,
8 ‘God wen say, “Dese guys say dey get respeck fo me,
But inside dea heart dey stay far from me.
9 Dey go down an pray to me,
But dey ony wase time,
Cuz dey no mo love an respeck fo me.
Wat dey teach,
Dat ony wat da peopo say we gotta do,
An not wat God wen say.” ’ ”
Wat Make You Pilau Inside
10 Jesus tell all da peopo, “Come. Listen an try undastan! 11 Wat you guys put inside yoa mout no mean you pilau inside so you no can pray, but wat come outa yoa mout, dat make you pilau inside.”
12 Da guys he teaching come an say, “Eh, you know, da Pharisee guys, dey huhu wit you, cuz dey wen hear wat you wen say.”
13 He tell um, “Dey jalike plants dat my Fadda in da sky neva plant, an he goin pull out anybody dat try make lidat. 14 Foget dem awready! Dey jalike one blind guy going aroun, showing anodda blind guy wea fo go. Bumbye da two blind guys goin fall down inside one hole.”
15 But Peter say, “Try tell us wat you mean bout da stuff going inside da mout.”
16 He say, “Wot! You guys no can undastan still yet? 17 You guys no can figga dis: Wateva go inside da mout, go inside da stomach, an bumbye come out. 18 But wateva come out from da mout, dat come from inside da heart, an dass wat make you pilau inside so you no can pray. 19 Any kine bad kine stuff come out from inside da heart. Dass how everybody figga how dey can do bad kine stuff. Dass why dey kill peopo, dey married an go fool aroun, o dey not married an dey still yet go fool aroun, dey rip off da odda guy, dey bulai bout da odda guy, o dey talk stink. 20 All dat bad kine stuff, dass wat come from inside da heart. Dass why peopo stay pilau inside an dey no can pray. But if get one guy dat no wash his hands da right way, an den he eat, dat no goin make um pilau inside.”
One Wahine Trus Jesus
21 From dea Jesus go Tyre an Sidon side. 22 An you know wat? Get one wahine dea from da Canaan peopo who come an yell, “Boss, you from King David ohana. Pity me an give me chance! My girl get one bad kine spirit dat wen take ova her an make her suffa plenny.” 23 But Jesus neva say notting.
Den his guys come an beg him, “Eh, make her go way, cuz she stay following us an yelling.”
24 So Jesus wen tell her, “My Fadda wen send me ony fo help da Israel ohana peopo, cuz dey jalike da sheeps dat stay lost. He neva send me fo help all da odda peopo.”
25 But da wahine go down in front him, an say, “Boss, try help me!”
26 He say, “No good take da food from da kids an throw um down to da dogs.”
27 She say, “Dass right, Boss. But eh, even da dogs unda da table eat wat fall down from da table, yeah?”
28 Jesus tell her, “Eh, sista! You trus me fo real kine! Da way you like, dass how goin be.” An right den an dea, her girl come good.
Jesus Make Plenny Peopo Come Good
29 Jesus hele on from dea, an go by Galilee Lake. He go up one hill an sit down. 30 Plenny peopo come by him, an dey bring da guys dat no can walk, da guys dat no can see, da guys dat no can move da arm o da leg, da guys dat no can talk, an plenny odda guys. Dey bring um wea Jesus stay, an he make um all come good. 31 An all da peopo, wen blow dea minds wen dey see da guys dat no can talk, talk. Da guys dat no can move da arm o da leg, move um. Da guys dat no can walk, walk. Da guys dat no can see, see. Da peopo say, “God do dis! He da same God dat our ancesta guy Israel wen pray to, an he awesome!”
Jesus Feed Four Tousand Guys
32 Jesus tell his guys fo come by him, an he say, “Eh, I get pity fo dese peopo. Dey stay hea wit me three days awready, an dey no mo notting fo eat. I no like send um away hungry, cuz bumbye dey pass out on da way home.”
33 But his guys say, “Eh, we stay hea inside da boonies, you know. An get plenny peopo. Wea we goin find nuff food fo feed um?”
34 But Jesus say, “How much bread you guys get?”
Dey tell him, “Seven small bread, an get litto bit fish.”
35 So Jesus tell da peopo fo sit down on top da groun. 36 An he take da seven bread an da fish, an tank God fo um. Den he broke um, an give um to his guys. Dey give um to all da peopo. 37 Dey all wen eat an come full. An Jesus guys pick up da lefovas, seven big baskets full. 38 Had bout four tousand guys dea who wen eat, plus had wahines an kids too.
39 Den he tell um, “Go home, now.” An he climb inside one boat, an go Magadan side.
Dey Come Togedda In Jerusalem
15 Some guys dat trus Jesus wen come from Judea to Antiok an dey wen teach da bruddas an sistas. Dey say, “If you no cut skin jalike Moses wen tell our ancesta guys, you no can come outa da bad kine stuff you do.” 2 Paul an Barnabas wen talk agains dat real hard wit dem. So da Antiok church leadas wen pick Paul an Barnabas an some odda guys dat trus Jesus fo go Jerusalem fo talk to da guys Jesus wen send an da older leadas bout dis cut skin stuff.
3 Da Antiok church guys wen send dem. Dey wen go thru Fonicia an Samaria, an dey wen tell da bruddas an sistas dea dat da peopo dat not Jews wen trus Jesus. All da bruddas an sistas wen stay good inside wen dey wen hear dat. 4 Paul an Barnabas guys wen come Jerusalem. Da guys dat come togedda fo church, an da guys Jesus wen send, an da older leadas, dey all wen show dem aloha. An Paul an Barnabas wen tell um all da stuff God wen do wit dem. 5 But some a da Pharisee guys dat wen trus da Good Stuff Bout Jesus wen stand up an say, “Da guys dat not Jews, no matta dey trus Jesus, dey gotta cut skin an do all da odda stuff Moses wen write down inside da Rules.”
6 Da guys Jesus wen send an da older leadas wen come togedda fo talk bout dat. 7 Dey talk fo long time, an den Peter wen stand up an tell um, “Bruddas, you know dat befo time God wen pick me fo go tell da peopo dat not Jews da Good Stuff Bout Jesus so dey can trus him. 8 God, he know wat stay inside us. He show us dat he wen take in da peopo dat not Jews, cuz he wen make his Spesho Spirit take charge a dem, jalike he wen do fo us. 9 God see dem da same, jalike he see us. He wen make dem clean inside, cuz dey wen trus him. 10 Now, how come you guys try find out if God really mean dat he see dem da same jalike us Jewish peopo? Why you guys put hard kine rules on top da guys dat stick wit Jesus? You guys know dat we an our ancesta guys neva can do um. 11 No can! We trus dat we wen come outa da bad kine stuff we do, not cuz we do wat da Rules say, but cuz da Boss Jesus wen do plenny good tings fo us, jalike he wen do fo da peopo dat not Jews.”
12 All da guys wen come quiet fo listen wen Paul an Barnabas tell um bout all da awesome stuff God wen do fo show his power wen dey stay wit da peopo dat not Jews. 13 Wen dey pau talk, James say, “Bruddas, listen to me. 14 Simon Peter wen tell us bout da time God wen show he stay care fo da peopo dat not Jews, cuz he wen pick some peopo fo himself from dem guys. 15 Da guys dat wen talk fo God long time ago, dey say da same ting. Dey wen write dis down inside da Bible, dat God say:
16 ‘Afta dis I goin come back
An I goin make Davidʼs ohana come good one mo time,
Jalike wen dey fix up one poho house.
17 Den all da odda peopos,
Dey can look fo da Boss,
An all da peopo dat not Jews dat stay mines,
Dey can look fo me too.
18 Dass wat da Boss say.
He da One dat do all dis stuff
An he wen tell us dis long time ago.’ ”
19 An James say dis too: “Dass why I tink mo betta we no put rules dat goin make um mo hard fo da diffren peopos dat not Jews fo trus God. 20 Mo betta we write um one letta fo help da Jews an da odda peopo get togedda. We tell um fo
no eat da food da peopo wen give to da idol kine gods, an
no fool aroun, an
no eat da meat from da animals dey wen choke, an
no eat da blood too.
21 Cuz da Rules Moses wen write down, get peopo teach dat stuff in all da towns from long time ago, an dey read um in all da Jewish churches every Rest Day.”
Da Letta Fo Da Peopo Dat Not Jews Dat Trus Jesus
22 Den da guys Jesus wen send, an da older leadas, an all da Jerusalem church guys, dey wen pick some a dea own guys fo send um Antiok wit Paul an Barnabas. Dey wen pick Judas Barsabbas, an Silas, two guys dat wen lead da bruddas an sistas. 23 Dey wen send dis letta wit dem:
“Dis letta from da guys Jesus wen send, an from da older leadas. We stay yoa bruddas. Aloha fo all you bruddas an sistas dat not Jews dat stay Antiok town, an Syria, an Cilicia. 24 We hear dat some guys wen go by you guys from ova hea, but we neva send um. Dey wen bodda you guys, an wat dey wen say bout gotta cut skin, wen make you guys all mix up. 25 So, us guys wen talk togedda, an tink stay good fo pick some guys fo send um by you guys, wit our good friends Barnabas an Paul. 26 Barnabas an Paul almos wen mahke cuz dey stick wit da Boss Jesus, da Spesho Guy God Wen Send. 27 Dass why we send Judas an Silas so dey can tell you guys dat wat we wen write stay true. 28 Godʼs Spesho Spirit an us guys tink no good fo us put hard kine rules on top you guys, ony dis: 29 No eat da meat from da sacrifices dey wen make fo da idol kine gods, no eat blood, o da meat from da animal dey wen choke, an no mo fool aroun. You guys goin do good if you no do dat kine stuff. Dass all.”
30 Dey wen send da guys, an dey wen go Antiok town. Dey wen tell all da church guys fo come togedda, an dey give um da letta. 31 Da peopo wen read um an dey stay good inside, cuz da letta wen kokua dem. 32 Judas an Silas, dey wen talk fo God. So dey kokua da bruddas an sistas fo come strong, an wen help um trus God moa. 33 Dey wen stay dea long time, an den da bruddas wen send um back wit aloha so dey can go by da guys dat wen send um befo. 34 [But Silas wen like stay ova dea.] 35 Paul an Barnabas wen stay Antiok town. Dem an plenny odda guys, dey wen teach wat da Boss Jesus wen say an tell da Good Stuff From God.
Paul An Barnabas Split Up
36 Afta long time Paul wen tell Barnabas, “We go back an stay wit da bruddas an sistas in all da towns wea we wen teach wat da Boss wen say, so we know how dey stay.” 37 Barnabas wen like take John Mark wit dem. 38 But Paul neva like take um, cuz John Mark wen go way from dem befo, in Pamfylia, an neva work wit dem from dat time. 39 Paul an Barnabas no can tink da same way, an dey wen talk hard. So dey wen split up. Barnabas wen take da guy Mark an wen sail up Cyprus side. 40 Paul wen take Silas an wen go way, an da bruddas an sistas wen aks God fo take care dem wit his aloha. 41 Paul dem wen go Syria an Cilicia, an wen kokua da church guys.
Copyright © 2000 by Wycliffe Bible Translators International. All rights reserved