M’Cheyne Bible Reading Plan
Da Twelve Guys Jesus Send All Ova Da Place
10 Jesus tell his twelve guys fo come togedda wit him, an he give um da power fo make da bad kine spirits let go da peopo dat dey wen take ova, an fo make all kine sick peopo come good. 2 Dis da twelve guys he send all ova da place:
Simon, da one dey name Peter, an Andrew his brudda;
James, dass Zebedee boy, an John, dass James brudda;
3 Philip an Bartolomew;
Thomas an Matthew, dass da guy befo time dat collect money fo tax fo da govermen;
James, dass Alfeus boy, an Taddeus;
4 da odda guy name Simon, he from da Jewish sovereignty guys; an
Judas Iscariot, dass da guy dat goin set up Jesus fo mahke bumbye.
Wat Da Twelve Guys Suppose to Do
5 Jesus send da twelve guys all ova, an he tell um, “No go wea da peopo dat not Jews stay, an no go wea da Samaria peopo stay, 6 but go by da peopo from Israel ohana, cuz dey jalike sheeps dat stay lost. 7 An wen you guys go, teach lidis, ‘God, da King from da sky, he stay King hea now.’ 8 Make da sick guys come good, make da mahke guys come back alive again, make da lepa guys come good, an make da bad kine spirits let go da peopo. God give you guys plenny, an he no expeck notting back. So den, you guys give plenny too, an you guys no expeck notting back. 9 Gold, o silva, o copper money, no take um wit you guys. 10 No even take one bag fo da trip, o extra clothes, o slippas, o walking stick; cuz da peopo suppose to give da worka guy wat he need.
11 “Wen you guys go inside one big o small town, look fo one guy dea dat da peopo get respeck fo, an stay his place till you go way from dea. 12 Wen you guys go inside da guyʼs house, tell um you dea fo bring aloha. 13 An if dat ohana give you guys respeck, den tell dem you like fo God make dea hearts rest inside. But if dey no give respeck, take back wat you aks God fo do fo dem. 14 If no mo nobody take you guys in, an dey no like hear wat you say, wen you go outa dea, dust da dust from yoa feet, fo show da peopo dea dat God no like, cuz dey no listen. 15 Dass right! An I tell you guys dis too: wen dey stand in front God da Judge, dey goin get mo hard time den da peopo from Sodom town an Gomorrah town, dat time God wen wipe um out.
You Guys Goin Suffa Plenny
16 “You know, I sending you guys out jalike sheeps, an you guys goin go wea da wild wolfs stay. So you guys gotta tink, jalike da snakes, an no hurt nobody, jalike da doves. 17 Watch out fo da guys dat goin set you up in front da main leadas, an goin whip yoa back hard inside da Jewish churches. 18 Dey goin drag you guys in front governas an kings cuz you my guys. Den you guys goin tell wat you know bout me in front dem, an in front da peopos dat not Jews. 19 Wen dey set you guys up lidat, no worry wat you goin say o how you goin say um. Ony say wat yoa Fadda goin tell you right den. 20 Dat time goin be his Spirit talking, not you guys.
21 “One brudda goin set up his own brudda fo mahke, an one fadda his kid, an kids goin fight wit dea mudda an fadda, an dey goin set um up fo mahke. 22 Everybody goin hate you guys cuz you my guys. But da guy dat no give up till pau goin come out okay.
23 “Wen da guys inside one town make you guys suffa, go way from dea, den go one nodda town. Dass right! An I tell you guys dis too: I da Guy Dass Fo Real, an I goin come back befo you guys even can go all da towns Israel side.
24 “Da teacha, he mo importan den da guy learning. Da boss, he mo importan den da worka. 25 Da guy learning goin feel good inside if bumbye he can come jalike his teacha, an da worka guy come jalike his boss. If dey call da head guy inside da house ‘Beelzebul’ o ‘Da Devil,’ den dey goin call his ohana ‘Da Devil Guys’ an even mo worse tings.
No Scared Dem
26 “No scared dem. Da tings dey cover an hide, everybody goin know an see. 27 Wat I telling you guys in da dark, tell um wea get light too. An wat I wispa in yoa ear, stand on top da house an yell um out. 28 No scared da guys dat can make yoa body mahke, but no can make yoa spirit mahke. But you guys betta be scared God. He can make yoa body an yoa spirit get cut off from God inside Hell. 29 Dey sell two sparrow birds in da market fo one penny. But not even one sparrow bird goin fall down from da sky on top da groun if yoa Fadda no like. 30 Yoa Fadda, he even know how much hairs you get on top yoa head! 31 No scared! Cuz God know you guys worth mo den plenny sparrow birds.
Da Guy Dat Tell Da Peopo He Know Christ
32 “If get one guy dat tell in front all da peopo dat he know me, den I goin tell in front my Fadda in da sky dat I know him. 33 But if get one guy dat tell in front da peopo dat he donno me, den I goin tell in front my Fadda in da sky dat I donno him.
Not Friends, But Fighting
34 “No tink dat I come hea to dis world fo make everybody come friends an no fight. I no come fo do dat, but fo make um turn agains each odda. 35 I come an I hea now, an jalike da Bible wen say from befo time, ‘Dat goin make one guy turn agains his fadda, one girl agains her mudda, one daughta-in-law agains her mudda-in-law. 36 You goin get guys dat hate you inside yoa own ohana.’
37 “Whoeva get love fo his fadda o his mudda mo den he get love fo me, not good nuff fo be my guy. An whoeva get love fo his boy o his girl mo den he get love fo me, not good nuff fo be my guy. 38 Da guy dat not ready fo go wit me an be my guy, no matta dey even goin kill um on top one cross, he not good nuff fo be my guy. 39 If bodda you dat you goin mahke, fo shua you goin mahke. But if you like do everyting you do fo me, an no bodda you if you mahke fo dat, den you goin live fo real kine.
Da Guys Dat Goin Get Someting Good
40 “Anybody take you guys in an make friends wit you guys, same guys, dey goin take me in, an I goin make friends wit dem. Anybody take me in an make friends wit me, same guys, dey goin take in da One dat wen send me, an he goin make friends wit dem. 41 Whoeva take in one guy dat talk fo God an make friends wit him, jus cuz he talk fo God, God goin have plenny good kine stuff bumbye in da sky fo dem, jalike dey was Godʼs talka guy too. Whoeva take in one good guy an make friends wit him, jus cuz he one good guy, God goin have plenny good kine stuff bumbye in da sky fo dem, jalike dey was one good guy too. 42 Whoeva give one guy dat I teaching hea even one drink cold water, jus cuz he one guy I stay teaching, no matta he ony one regula guy, I tell you guys fo shua, God goin have plenny good kine stuff bumbye in da sky fo him.”
Peter An Cornelius
10 Had one guy Cesarea side name Cornelius. He one captain fo six hundred Rome army guys from Italy. 2 Him an his ohana, dey not Jewish, but dey all pray an get respeck fo God. He wen give plenny money fo da poor peopo, an everytime he pray to God. 3 One time, three clock in da aftanoon, he wen see someting jalike one dream. He see one angel messenja guy from God dat wen come by him an say, “Eh, Cornelius!” 4 Cornelius wen look at um real good, an wen come real scared. He say, “Yeah, Boss?”
Da angel guy say, “God hear wat you wen aks him fo do, an he rememba all da money you wen give fo da poor peopo. 5 Now send some guys Joppa side fo bring back one guy name Simon, da same guy dey wen call Peter. 6 He stay in da odda Simonʼs house by da sea, da guy dat work wit da leather.” 7 Wen da angel guy go way, Cornelius wen call two a his worka guys an one army helpa. Da helpa guy pray an get respeck fo God too. 8 Cornelius wen tell dem all da stuff dat wen happen, an wen send da three guys Joppa side.
9 Da nex day, noon time, dey stay coming near Joppa. Dat time Peter wen go up on top da flat roof fo pray. 10 He wen come hungry an like eat. Dey stay making da food ready, an he see someting jalike one dream. 11 He see da sky open up, an one ting jalike one big sheet, dat come down on top da groun by da four corners. 12 Inside had all kine animals, da kine dat get four feet, an snakes an lizards from da groun, an birds from da sky. 13 Den one voice wen tell him, “Eh Peter! Stand up! Kill um an eat um!”
14 But Peter wen say, “No way, Boss! I neva eat anyting dat stay kapu an not suppose to eat um!”
15 One mo time da voice wen tell um, “No say dat da kine stay kapu dat God wen make okay.” 16 An dat wen happen three times, an right den an dea da sheet wen go back up to da sky.
17 Peter was tinking wat da dream mean. Right den an dea da guys dat Cornelius wen send, wen find out da house wea Simon da leather guy stay, an dey stop in front da gate fo da house. 18 Dey yell, “Eh, get one guy name Simon Peter ova hea?”
19 Peter still trying fo figga out wat da dream mean, an Godʼs Spirit wen tell him, “Simon, get three guys dat not Jewish, stay downstairs looking fo you. 20 So stand up an go down dea. Go wit dem an no worry, cuz was me wen bring um.” 21 Peter wen go down an wen tell um, “I da guy you stay looking fo. How come you hea?”
22 Da guys say, “Captain Cornelius wen send us. He one good guy dat get respeck fo God, an all da Jewish peopo get respeck fo Captain Cornelius. One spesho angel guy from God wen tell him fo bring you by his house so he can hear wat you get fo say.” 23 Den Peter wen tell da guys fo come inside an make house.
Da nex day Peter wen go wit da guys, an some a da bruddas from Joppa wen go too. 24 Da nex day dey wen come Cesarea. Cornelius stay wait fo dem, an he tell his ohana an his good friends fo come his house. 25 Wen Peter go inside da house, Cornelius go in front him, an go down on his knees, cuz he get plenny respeck fo him. 26 But Peter tell um, “Stand up. I ony one guy, you know.” 27 Peter stay talking to him, an dey go inside da house. He see plenny peopo ova dea. 28 He tell um, “You guys know dat our Jewish Rules say dat one Jewish guy no can stay togedda wit one guy dat not Jewish, an da Jewish guy no can go inside da odda guyʼs house. But God wen show me dat I no can say one guy stay kapu. 29 So wen da guys wen tell me fo come ova hea, I wen come lidat, an I neva say I no can. So try tell me why you wen tell me fo come.”
30 Cornelius say, “Three days ago I stay praying inside my house, same time like now, three clock in da aftanoon. An right den an dea one guy in da shiny kine clotheses wen stand in front me. 31 An he say, ‘Cornelius, God wen hear wat you pray, an he know bout all da money you wen give fo da poor peopo. 32 Send some guys Joppa side fo find Simon, da same guy dey call Peter. He stay inside Simonʼs house by da sea, da guy dat work wit da leather.’ 33 So right den an dea I wen send dem fo bring you, an you get good heart fo come my house. Now we all stay hea in front God, an we like hear all da stuff God wen tell you fo tell us.”
Wat Peter Say
34 Den Peter wen start fo talk. He tell um, “Now I know dat stay true dat God tink an do da same ting fo everybody. 35 He take everybody in from all da peopos dat get respeck fo him an do da right ting. 36 Dis da Good Stuff dat God wen send peopo fo tell da Israel peopo: ‘Eh! Us guys can come Godʼs friends an feel good inside, cuz a wat Jesus Christ wen do. He da Boss fo everyting an everybody.’ 37 You guys know wat wen happen all ova Judea. First da guy John wen tell da peopo in Galilee fo get baptize. 38 An God wen give Jesus from Nazaret his Spesho Spirit an power. Jesus wen go all ova da place, an do da good kine stuff. Da Devil wen take charge a plenny sick peopo wit his power, but Jesus wen even make dem all come good. Jesus wen do dat cuz God wen stay wit him. 39 Us guys wen see all dis stuff happen. He wen do all dat in da Jewish countryside an inside Jerusalem. Dey wen kill him on top one cross. 40 Day Numba three God wen make him come back alive, an wen let some peopo see him. 41 All da peopo neva see um, but us guys dat God wen pick fo tell bout him, we wen see um. We wen eat an drink wit him afta he wen come back alive. 42 He tell us fo teach da peopo an fo tell dem dat we know he da One dat God Wen Send fo judge da peopo dat stay alive an da peopo dat stay mahke. 43 All da guys dat wen talk fo God long time ago wen talk bout him. Dey say dat whoeva trus him, God goin let um go an hemo dea shame fo all da bad kine stuff dey wen do. God goin do dat cuz a wat Jesus wen do.”
Da Peopo Dat Not Jews Get Godʼs Spesho Spirit
44 Wen Peter still talking lidat, Godʼs Spesho Spirit wen take charge a all da peopo dat wen hear da Good Stuff From God. 45 Da Jewish guys dat trus Jesus an wen come wit Peter, wen blow dea minds, cuz Godʼs Spesho Spirit wen take charge a even da peopo dat not Jews. 46 Cuz dey hear um talking in odda languages an saying good stuff bout God. 47 Den Peter say, “Dese guys, dey can get baptize wit water, yeah? Dey get Godʼs Spesho Spirit, jalike da time wen we wen get um.” 48 So he wen tell um fo get baptize cuz a da One name Jesus, da Spesho Guy God Wen Send. An dey tell Peter fo stay dea wit dem some moa.
Copyright © 2000 by Wycliffe Bible Translators International. All rights reserved