M’Cheyne Bible Reading Plan
Jesus Make One Lepa Guy Come Good
8 Jesus wen go down from da mountain, an plenny peopo wen go wit him. 2 An you know wat? Had one lepa guy wen go by him an go down in front him. He say, “Boss, if you like, you can make me come good, yeah? jalike da way God like.” 3 Jesus wen stick out his hand an touch him, an say, “Okay, I do um. Come good.” Right den an dea da lepa guy come good. 4 Den Jesus tell him, “Make shua dat you no tell nobody bout dis. Go, let da priest guy check you out. No foget make da kine sacrifice, now, jalike Moses wen tell in Godʼs Rules. Den everybody goin know dat you stay good now, an you can go pray wit da odda peopo.”
Jesus Make One Captainʼs Worka Guy Come Good
5 Wen Jesus was going inside Capernaum town, one captain fo da Rome army guys wen come by him fo beg um, 6 “Boss, I get one worka guy dat stay home sick. He no can move, an he stay suffa plenny.”
7 Jesus tell him, “Kay. I goin go yoa house fo make him come good.” 8 But da captain say, “Eh Boss, you know, I not good nuff fo you fo come inside my house. Ony say da ting, den my worka guy goin come good. 9 You know, I get one army boss who tell me wat fo do. An I tell my army guys wat fo do. I tell dis guy, ‘Go,’ an he go. An I tell dat guy, ‘Come,’ an he come. An my slave guy, I tell um, ‘Do dis,’ an he do um.”
10 Jesus wen hear dat, an he tell da odda guys dat stay following him, “Ho! Dis guy get um! An I like tell you guys dis: no mo Israel peopo dat trus me lidat! 11 An I like tell you guys one mo ting: wen God in da sky stay King, goin get plenny guys dat goin come from far away an all aroun, east side an west side, an dey all goin make big party togedda wit Abraham, Isaac, an Jacob. 12 But goin get odda guys, God suppose to be dea King, but dey no like um. An den he goin throw um outside inside da dark. Ova dea dey goin cry plenny an grind dea teet cuz dey so huhu an futless.”
13 Den Jesus tell da captain, “Go. Jalike how you stay trus me, dass how goin be fo you now.” Dat same time, da worka guy wen come good.
Jesus Make Plenny Peopo Come Good
14 Den Jesus wen go Peterʼs house. He go inside, an see Peterʼs mudda-in-law on top da bed. She get feva. 15 He wen touch her hand an da feva wen pau. She wen get up an she wen bring food fo Jesus dem. 16 Afta da sun wen go down, den da peopo dea wen bring plenny guys dat get bad kine spirits dat stay take ova dem. Jesus tell da bad kine spirits, “Let um go!” an dey let um go. He make all da sick peopo come good. 17 Dis wen happen jalike da guy Isaiah, who talk fo God long time ago, wen say: “Was him dat wen hemo all our sick an take um away.”
Da Guys Dat Say Dey Going Wit Jesus
18 Bumbye, Jesus wen see choke peopo aroun him. He tell his guys fo go ova da odda side da lake. 19 One teacha guy dat teach Godʼs Rules wen come by him, an say, “Teacha, I goin go wit you weaeva you go.”
20 Jesus tell him, “Da foxes get hole fo house, an da birds in da sky get nest. But me, da Guy Dass Fo Real, I no mo house fo lay down.”
21 One nodda guy dat Jesus stay teaching tell him, “Eh, Boss, try let me go. I no can go wit you till afta my fadda mahke. Gotta bury um, eh?”
22 But Jesus tell him, “You, jus come wit me an be my guy! Let da mahke peopo bury da mahke peopo.”
Jesus Make Da Storm Pau
23 Jesus an his guys wen go inside one boat. 24 Den had one big storm ova dea, an da waves was bussing ova da boat. But Jesus still yet stay sleeping. 25 His guys wen go wake him up, an tell him, “Eh, Boss! Get us outa dis! We goin mahke!” 26 But he aks um, “How come you guys scared? Wot! You guys no trus me?!” Den he get up. He scold all da winds an da waves. Den everyting wen come good. 27 His guys, wen blow dea minds, an den dey say, “Eh, wea dis guy from? Even da winds an da waves do wat he tell um!”
Jesus Make Two Guys Wit Bad Kine Spirits Come Good
28 He go da odda side da lake, dea wea da Gadara peopo get dea land. Had two guys dea dat da bad kine spirits take um ova. Eh, you know, dem guys, dey ack so wild, jalike dey crazy. Dass why nobody strong nuff fo go dat road. Dey live ova dea wea da dead peopo stay buried. Da two guys come outa dea, an den dey go by Jesus. 29 An eh! dey yelling, “Wat you like do to us, Jesus? You Godʼs Boy! You come hea fo make us suffa befo da time come, o wat?”
30 Had plenny pigs near dea, grinding. 31 Da bad kine spirits wen beg Jesus, “Wen you goin make us let go da guy, we like go inside da pigs an take um ova.”
32 He tell um, “Go.” So dey wen let go da guys, an go take ova da pigs. An you know wat? All da pigs wen run down one steep hill an fall ova da cliff inside da lake, an drown inside da water. 33 Den da pig farmas wen run, an go inside da town, an tell everybody wat wen happen. Dey tell bout da guys who get da bad kine spirits too. 34 All da peopo from inside da town wen go out fo see Jesus. An wen dey wen see him, dey beg um fo go way from dea.
8 Da guy Saul stay dea, an he tink dass good dey wen kill Stephen.
Saul Make Jesus Guys Suffa
Dat same day dey wen start fo make all da peopo suffa plenny dat wen come togedda fo church Jerusalem side. So all da peopo dat wen trus da Good Stuff From God wen go all ova Judea an Samaria. But da twelve guys Jesus wen send neva go way. 2 Some guys dat trus God an do wat he say wen bury Stephen, an dey sad an crying real hard cuz he wen mahke.
3 But da guy Saul wen start fo wipe out da peopo dat come togedda fo church. He wen go inside all da houses, an he drag away da guys an da wahines, an throw dem inside da jail.
Philip Teach Da Good Stuff Samaria Side
4 Jesus guys dat wen go all ova wen teach wat God say inside all da places dey wen go. 5 Philip wen go one big town inside Samaria, an teach da peopo ova dea bout da Spesho Guy God Wen Send. 6 All da peopo dea wen hear Philip, an dey wen see all da awesome stuff he wen do dat show wat kine guy him, so den dey wen listen real good to da stuff he wen say. 7 Plenny bad kine spirits wen make big noise an let go plenny peopo. Plenny peopo dat no can move an no can walk wen come good. 8 So everybody dat town wen come real, real good inside.
Simon da Kahuna Guy
9 Had one guy name Simon dea dat wen make kahuna dat town. An all da Samaria kine peopo, wen blow dea minds cuz a him. He wen say he one big shot, aah. 10 All da big guys an da odda peopo wen listen to him real good an say, “Dis guy, he da guy dey name ‘Da Big Power From God.’ ” 11 Dey wen stick wit him cuz he stay blow dea minds long time, cuz he wen make da kahuna kine stuff. 12 But Philip wen teach da peopo dea da Good Stuff bout how peopo can get God fo dea King, an dat Jesus, he da Spesho Guy God Wen Send. So da guys an da wahines wen trus wat Philip wen say, an he wen baptize dem. 13 Simon, he wen trus Jesus too, an Philip wen baptize him. An Simon wen stick wit Philip all da places he wen go. Philip wen do all kine awesome stuff dat show da power he get, an wen blow Simonʼs mind.
14 Da guys Jesus wen send, dey wen stay Jerusalem side. Dey wen hear dat da peopo Samaria side wen trus wat God wen say. So dey wen send Peter an John ova dea by dem. 15 Wen Peter an John come, dey wen pray fo da peopo, so dey can get Godʼs Spesho Spirit. 16 Cuz Godʼs Spesho Spirit neva take charge a da peopo dea yet. Dey wen get baptize cuz a da One name Jesus ony. 17 Den Peter an John wen put dea hands on top everybody, an den Godʼs Spesho Spirit wen take charge a dem.
18 Simon wen see dat Godʼs Spesho Spirit wen take charge a da peopo wen da guys Jesus wen send wen put dea hands on top dem. He wen try give dem money, an he say, 19 “You can give me da power too, so dat wen I put my hands on top da peopo, Godʼs Spesho Spirit goin take charge dem?”
20 Peter wen tell him, “You an yoa money goin mahke togedda! Cuz you tink dat you can buy Godʼs gif wit yoa money! 21 You no can work fo God wit us, cuz God see yoa heart no stay right. 22 You betta come sorry cuz a dis real bad ting you wen do, an aks da Boss if he can hemo you from da bad kine stuff you tinking! 23 Cuz I know you stay real jealous an nuha deep inside, an you stay all tie up wit da kine stuff dat no stay right.”
24 Den Simon wen tell Peter an John, “You can pray to da Boss fo me, so dat all dis stuff dat you wen say no happen to me?”
25 Den Peter an John wen tell da peopo wat God wen do fo dem, an dey wen teach wat God wen say. Den wen dey going back Jerusalem side, dey wen teach da Good Stuff From God inside plenny small towns Samaria side.
Philip An Da Guy From Etiopia
26 One angel guy from da Boss wen tell Philip, “Go sout to da road inside da boonies dat go from Jerusalem to Gaza.” 27 So Philip wen go, an he come by one eunuch guy dat no can marry from Etiopia. He one real importan guy dat stay in charge a all da money fo Queen Candace from Etiopia side. Dis guy wen go Jerusalem fo go down an pray to God. 28 Now he going home, an he sitting inside his carriage. He was reading da book dat Isaiah wen write, da guy dat wen talk fo God befo time. 29 Godʼs Spesho Spirit wen tell Philip, “Go by dat carriage, an stay near um.” 30 Philip wen run ova dea, an hear da guy reading Isaiahʼs book. Philip wen aks da guy, “You undastan wat you reading, o wat?”
31 Da Etiopia guy wen say, “I no can undastan um if nobody tell me wat dis mean.” Den he tell Philip fo climb inside da carriage an sit down by him. 32 Da place inside da Bible wea he wen read say,
“Dey wen take him away
Jalike dey take one sheep away fo kill um.
He jalike one baby sheep
Dat no make noise
Wen dey cutting off his wool.
He neva say notting.
33 Dey wen make him shame,
An dey neva do da right kine ting fo him.
Nobody can talk bout his kids,
Cuz his life wen pau
Inside dis world.”
34 Da guy wen tell Philip, “Please, tell me who Isaiah stay talking bout. He talking bout himself o one nodda guy?” 35 Den Philip wen teach him. He wen start in dat place wea da guy was reading inside da Bible, an wen tell him da Good Stuff Bout Jesus. 36 Dey stay going on da road, an dey come by some water. An da guy wen say, “Look ova dea! Get water. You can baptize me, yeah?”
37 [Philip wen tell him, “I can baptize you if you trus God inside yoa heart fo real kine.”
Da guy wen say, “I trus dat Jesus, he da Spesho Guy God Wen Send. He Godʼs Boy.”] 38 Da guy wen tell his worka guy fo make da carriage stay dea. Den Philip an da guy wen go down inside da water, an Philip wen baptize him. 39 Wen dey wen come outa da water, right den an dea da Bossʼs Spesho Spirit wen take Philip away. Da eunuch guy neva see Philip any moa, but he wen stay going an he feel real good inside. 40 Den Philip wen show up Azotus side, an he wen go all da towns, teaching da Good Stuff From God. An den he go Cesarea side.
Copyright © 2000 by Wycliffe Bible Translators International. All rights reserved