M’Cheyne Bible Reading Plan
Da Smart Guys Who Know Plenny Bout Da Stars
2 Jesus, he born Betlehem town, Judea side. Herod, he da king dat time. An you know wat? Had dese smart guys who know plenny bout da stars, wen come Jerusalem town from one far place, from da east side. Dey saying, 2 “Wea da boy dat born, da King fo da Jews? We wen spock one star come up da east side dat show dat he born awready, an we come hea fo go down in front him an show him plenny respeck.” 3 King Herod hear dat, an he all shook up an scared. All da peopo inside Jerusalem town, dey all shook up an scared too.
4 Den Herod wen tell fo come by him all da main priest guys an all da teacha guys who teach Godʼs Rules to da peopo. He say, “Try tell me wea Godʼs Spesho Guy goin born.” 5 Dey tell um, “He goin born Betlehem, Judea side. Cuz da guy Micah wen say (he one guy dat talk fo God long time ago),
6 ‘Eh! You Betlehem guys, ova dea Judah side!
All da leadas inside Judah
Tink Betlehem importan.
Cuz from dea goin come one leada.
He goin take care Godʼs peopo,
Da Israel peopo.’ ”
7 Den Herod tell da guys who know plenny bout da stars fo come by him. Dey wen come, but dey neva tell nobody. He find out from dem wat time da star wen show up inside da sky. 8 Den he send um Betlehem. He say, “Go! Look all ova da place till you find da boy. Den come back ova hea an tell me. Cuz I like go dea, fo go down in front him an show him respeck too.”
9 Afta dey hear wat da king say, dey go. An you know wat? Dat same star, da one dey wen see befo, wen dey wen stay east side, dat star go in front dem, an stop right ova da place wea da boy stay. 10 Dey wen spock da star, an eh! dey wen feel real good inside.
11 Dey go inside da house. Dey see da boy an his mudda Mary. Dey go down in front him an show him respeck. Den dey take out dea rich stuffs, an give um to Jesus. Dey give um gold, incense, an spesho kine perfume. 12 Afta dat dey get one dream from God. He tell um, “You guys betta not go back by King Herod.” So dey go home one diffren way.
Dey Run Away Egypt Side
13 Afta da guys who know plenny bout da stars wen go home, you know wat? Had one angel guy from da Boss Up Dea come by Joseph, wen he stay dreaming. Da angel guy tell him, “Eh Joseph! Wake up! Take yoa boy an his mudda, an go run Egypt side. Stay ova dea till I tell you fo come back. King Herod, he goin look fo da boy fo kill him, dass why.” 14 So Joseph get up, an take his boy an Mary, an dey wen run Egypt side, dat nite.
15 Dey stay dea till Herod wen mahke. Wen all dis happen, was jalike Hosea wen say, da guy dat talk fo God long time ago, “I wen tell my boy fo come outa Egypt.”
Herod Kill da Kids
16 King Herod, he wen find out eh, dat da guys dat know plenny bout da stars wen fool him, an he wen come so wild, he wen go send his army guys an tell um, “Go kill all da small boys inside Betlehem an all da odda place ova dea.” Den dey wen kill all da boys two years old an mo younga. Herod wen figga da time, cuz da guys who know plenny bout da stars wen tell him wat time da star wen show up first time.
17 Dis happen jalike Jeremiah wen say, da guy dat talk fo God long time ago:
18 “Dey hear one voice from inside Ramah,
Rachel, she stay crying real hard,
She real sore inside,
Crying fo her kids,
She no like nobody come by her,
Cuz da kids mahke awready.”
Dey Come Back From Egypt Side
19 Lata, King Herod wen mahke. One angel messenja guy from da Boss come by Joseph wen he stay dreaming ova dea Egypt side. Da angel guy tell him, 20 “Eh Joseph! Wake up! Take yoa boy an his mudda, an go Israel side. Da guys dat like kill da boy, stay mahke awready.”
21 So den Joseph wen get up, fo take Jesus an Mary. Dey wen go back Israel side. 22 But he hear dat Arkelaus wen come king Judea side afta his fadda Herod wen mahke. Joseph scared fo go ova dea. God tell him inside one dream, “You betta not go ova dea.” So he go Galilee side, 23 an make house Nazaret town. Dis happen jalike da guys who talk fo God long time ago wen say, “Dey goin call him ‘da Nazaret guy.’ ”
Godʼs Spesho Spirit Come
2 Wen da Day Numba Fifty afta Passova wen come, da one dey name Pentecost, all da peopo dat trus Jesus wen stay togedda in one place. 2 Right den an dea one noise wen come down from da sky jalike one strong wind, an make big noise all ova da house wea dey stay sitting. 3 Den dey see wat look jalike small kine fire dat wen stay right ova every guy. 4 Godʼs Spesho Spirit wen take charge a dem, an dey wen start fo talk wit plenny odda kine languages, cuz Godʼs Spirit wen make um so dey can.
5 Had Jewish peopo dat had plenny respeck fo God from all da countries in da world, staying inside Jerusalem dat time. 6 Wen dey hear dat noise, plenny peopo come togedda, an dey was all shock, cuz every guy wen hear dem telling stuff in his own kine talk. 7 Wen blow dea minds, an make dem tink plenny. An dey wen tell, “Eh! Da guys dat stay talking, dey from Galilee, yeah? 8 Den how come us guys stay hear dem telling stuff wit our own kine talk? 9 We come from all ova da place -- from Partia, Medea, Elam, Mesopotamia, Judea, Cappadocia, Pontus, Asia, 10 Frygia, Pamfylia, Egypt, Libya near Cyrene, an some guys from Rome. 11 Get Jews, an guys dat wen trus God an come jalike one Jew. Get peopo from Crete an Arabia. An still yet, we all hear dem telling da awesome stuff God do, wit our own kine talk!” 12 Wen blow dea minds, an dey no can figga, an dey wen tell each odda, “Eh, wat dis mean?”
13 But had odda guys dat wen make fun a dem an say, “Eh, dese guys, dey drunk!”
Peter Teach All Da Peopo
14 Den Peter wen stand up wit da odda eleven guys, an wen tell da peopo wit one big voice, “My bruddas an sistas, all you Jewish peopo dat stay inside Jerusalem, listen! I like tell you guys wat mean dis stuff dass happening. 15 Dese guys, dey not drunk jalike you tinking. Ony stay nine clock in da morning. 16 Dis wat Joel wen tell, da guy dat wen talk fo God long time ago,
17 God wen say,
‘Dis wat I goin do in da last days,
I goin make my Spirit take charge a all da peopo.
Yoa boys an yoa girls goin talk fo me.
Yoa young guys goin see spesho tings.
An yoa old guys goin dream plenny dreams.
18 Yeah, an dat time too, I goin make my Spirit
Take charge a da peopo dat work fo me,
Guys an wahines,
An dey goin talk fo me.
19 I goin show awesome stuff up dea in da sky,
An down hea on top da earth
Goin get blood an fire an big kine smoke clouds.
20 Da sun goin come dark,
An da moon goin come red jalike blood.
Dat goin happen
Befo da big an awesome Day
Wen God da Boss come fo judge all da peopo.
21 An den, everybody dat know who da Boss fo real kine
An tell him fo take um outa da bad kine stuff dey do,
Da Boss goin listen an take um outa all dat.’
22 “Eh, you guys from Israel ohana, listen! I like tell you bout Jesus, da guy from Nazaret town. God wen show dat Jesus fo real, cuz God wen give him power, an he wen do all kine awesome stuff dat show who him. An you guys know dis fo real, cuz he wen do um ova hea by you guys. 23 God wen plan um long time ago, cuz he wen know dey goin give Jesus ova to you guys. An you guys wen take him an let da bad kine guys kill him on top one cross. 24 But God wen make him come back alive again from mahke. He no need suffa an mahke again, cuz a wat God wen do. He no can stay mahke, cuz he mo strong. 25 David wen say dis bout him:
‘I wen spock da Boss.
He stay in front me all da time.
He stay close by my right side.
I no goin come shook up.
26 So I stay real good inside,
Wen I tell peopo bout him.
No matta I goin mahke, I know I can rest an wait fo God,
27 Cuz God, you no goin let me stay inside da Mahke Peopoʼs Place,
An you no goin let me rot, cuz I stay good an spesho fo you.
28 You wen teach me how fo do,
So I can live fo real kine.
You goin make me stay real good inside,
Cuz you stay wit me.’
29 “Bruddas an sistas, good I tell you guys fo real kine dat da leada fo our ohana, David, he wen mahke, an dey wen bury him, an his grave stay hea still yet. 30 David was one guy dat wen talk fo God, an wen know dat God wen promise dis: ‘Bumbye I goin make one from yoa ohana king jalike you.’ 31 David wen know wat God goin do. He wen say dat da Spesho Guy God Send goin come back alive again. He no goin stay inside da Mahke Peopoʼs Place, an he no goin rot. 32 God wen make Jesus come alive again, an we all wen see him an tell bout him. 33 God wen put him in da mos importan place by his right side, an he wen get Godʼs Spesho Spirit, da One God wen promise. He wen make his Spirit take charge a us guys too, an dass wat you see an hear now. 34 Cuz David neva go up in da sky, but he wen say,
‘Da Boss wen tell my Boss:
“Come ova hea, sit down!
Dis da importan place by my right side.
35 Bumbye I goin make da peopo dat go agains you
Go down in front you,
Fo show dat you da winna ova dem.” ’
36 “So, listen! All da Israel peopo gotta know dis fo shua: You guys wen kill dis guy Jesus on top one cross, but God wen make him da Boss, an he da Spesho Guy God Wen Send.”
37 Wen da peopo hear dat, dea heart come sore, an dey tell Peter an da odda guys Jesus wen send all ova, “Bruddas, wat we goin do?”
38 Peter tell dem, “Every one a you guys gotta come sorry an stop doing all da bad kine stuff you stay do, an get baptize fo show you Jesus guys. He da Spesho Guy God Wen Send. Den he goin let you guys go, an hemo yoa shame fo all dat bad kine stuff, an he goin give you his Spesho Spirit. 39 He wen promise all dat fo you guys an yoa kids, an fo all da peopo dat no stay tight wit God -- all da ones da Boss our God goin tell fo come to him.”
40 Peter wen tell dem plenny mo stuff, an beg um, “Let God take you outa da bad kine stuff dat da odda peopo stay doing now.” 41 Had bout three tousand peopo dat wen trus wat he wen say, an wen get baptize. Den dey come togedda wit da odda peopo dat wen trus Jesus. 42 Dey wen stick wit all da stuff da guys dat Jesus wen send wen teach dem. An dey all wen stay togedda, an eat togedda, an wen pray.
Da Peopo Dat Trus Jesus Stay Togedda
43 Da guys Jesus wen send all ova, dey get power fo do plenny awesome stuff. Everybody stay scared, cuz dey get plenny respeck fo Jesus guys. 44 All da peopo dat wen trus Jesus wen stay togedda, an wen share all dea stuffs wit each odda. 45 Dey sell dea stuffs, an give da money to all da peopo dat need kokua. 46 Every day dey come togedda inside da temple yard. Dey broke da bread inside dea houses, an eat togedda da food. An dea heart wen stay good inside, an dey neva put on one ack. 47 Dey wen tank God an tell how good he stay. An all da peopo wen talk good bout dem. An every day da Boss wen bring odda peopo dat he wen take outa da bad kine stuff dey wen do.
Copyright © 2000 by Wycliffe Bible Translators International. All rights reserved