M’Cheyne Bible Reading Plan
Da River Dat Make Us Come Alive Fo Real Kine
22 Den da angel guy show me da river wit da water dat make peopo come alive fo real kine. You can see thru da river, jalike da crystal. Da river go from da throne wea God an Godʼs Baby Sheep Guy stay, 2 down da middle a da main street inside Godʼs big town. On two side a da river da tree stand dat make peopo come alive fo real kine. Da tree give fruit every month, twelve time all togedda every year. Da leaf from da tree make all da diffren peopos all ova da world come good.
3 No mo nobody goin make kahuna no moa. Da throne wea God an Godʼs Baby Sheep Guy sit goin stay inside da town, an all Godʼs worka guys goin work fo him. 4 Godʼs worka guys goin see his face, an dey goin get Godʼs name on top dea forehead. 5 No goin get no nite time no moa. Dey no goin need da light from da lamp o da light from da sun, cuz God, da Boss, he goin give dem light. An dey goin be in charge a da world wit God da King foeva.
Godʼs Spesho Guy Goin Come Back
6 Da angel tell me, “Dis I telling you stay true, an you can trus um fo shua. God, da Boss, send his Spirit fo tell da guys dat talk fo him wat fo say. An he wen send his angel messenja guy fo show his worka guys da stuff dat gotta happen pretty soon.”
7 Jesus say, “Eh, listen! I coming back real soon! Everybody dat stick wit wat God say inside dis book goin stay good inside.”
8 Me, John, I da guy wen hear an see all dis stuff. Afta I wen hear an see dat, I wen go down in front da angel guy dat wen show um to me, fo show love an respeck to him. 9 But he tell me, “Nah! No do dat! I ony one worka guy jalike you an yoa bruddas dat talk fo God, an everybody dat stick wit wat dis book say. Mo betta, ony give love an respeck to God!”
10 Den da angel tell me, “No close up dis book an put seal on top, cuz den nobody can read um. Almos time now. 11 So whoeva like do da wrong kine stuff, let um stay do da wrong kine stuff. Whoeva like do pilau kine stuff, let um stay do pilau kine stuff. Whoeva like do da right kine stuff, let um stay do da right kine stuff. An whoeva stay spesho fo God, let um stay spesho fo God.”
12 Jesus say, “Eh, listen! I coming back real soon! An I goin bring wit me da stuff fo give back to everybody fo everyting dey wen do. 13 I da first one from befo, an da last, da start an da end, A an Z.
14 “Everybody dat wash dea clotheses clean, dey can stay good inside, cuz dey get da right fo eat from da tree dat make peopo alive fo real kine. An dey can go inside Godʼs big town thru da gate. 15 Outside da town get da peopo dat dey jalike dogs, da peopo dat make kahuna, da peopo dat fool aroun, da peopo dat like kill oddas, da peopo dat go down an pray to da idol kine gods, an everybody dat love fo bulai.
16 “Me, I Jesus. I wen send my angel messenja guy fo tell you guys inside da churches dis stuff. I come from Davidʼs ohana. I jalike da plant dat come up from da root. I jalike da bright Morning Star. 17 Bumbye da peopo dat stay spesho fo God goin come togedda wit me, jalike wen one wahine marry one guy. So Godʼs Spesho Spirit an Godʼs peopo, dey tell, ‘Try come!’ Everybody dat hear dat, say ‘Try come!’ too. Whoeva stay thirsty let um come, an whoeva like, let um take da water dat make um come alive fo real kine, an no goin cost dem notting.”
18 I tell everybody dat hear wat God say inside dis book: You guys betta not add notting to dis book. If anybody add someting, God goin give him all da big troubles God wen tell bout inside dis book. 19 An if anybody take away stuff dat God tell from dis book, God goin take away from him his share a da real kine life dat da tree give, an his place in da town dat stay spesho fo God, dat God wen tell bout inside dis book.
20 Da One dat tell all dis stuff say, “Yeah, I coming back real soon!”
Yeah, Boss! Come back real soon, Jesus!
21 I like all you guys know da good way our Boss Jesus make to you! Dass it!
Jesus Talk To His Guys
21 An den, afta dat, Jesus wen let his guys go see him again. Dis wen happen by Lake Tiberias. Dis wat wen happen. 2 Some a Jesus guys wen get togedda. Had
Simon Peter, an
Thomas da guy dey call Da Twin,
Natanael da guy from Cana town Galilee side, an
Zebedeeʼs two boys,
plus two odda guys. Jesus was dea teacha. 3 Simon Peter wen tell da guys, “Eh, I like go fish!”
An dey tell um, “Yeah! We like go too.”
So da guys wen go down to da beach, an dey wen go inside one boat. But dat nite, dey neva catch notting.
4 Den wen real early in da morning an get ony litto bit light, had Jesus standing dea on da beach. But his guys, dey neva know was him. 5 He tell um, “Eh! Wat you guys wen catch?”
Dey tell um, “Whitewash! No mo notting!”
6 Den he tell um, “Go throw da net ova da right side! You goin get plenny fish dea!”
Dey go throw da net, an get so plenny fish, da guys no can pull up da net.
7 Now me, I was dea. I da guy dat Jesus wen get plenny love an aloha fo. I wen tell Peter, “Eh! Dass da Boss!” Wen Simon Peter wen hear dat, he put on his shirt dat he wen take off befo fo work, an den he go jump outa da boat fo swim quick to da beach, 8 cuz da boat ony stay bout hundred yards from da beach. So den Jesus odda guys wen row da boat back to da beach, dragging da net wit all da fishes inside.
9 Wen da guys wen go outa da boat, dey spock one charcoal fire on da beach. Had fish on top, an had bread. 10 Jesus tell um, “Eh, bring some a da fish you wen catch ova hea.”
11 So Simon Peter go back inside da boat, an he help da guys drag da net on top da beach. Had plenny big kine fishes inside -- was hundred fifty three! An you know wat? Da net neva even broke, no matta had so plenny fish inside.
12 Jesus tell um, “Come on, you guys! Breakfas time awready!”
His guys, dey know awready, was da Boss. An dey too scared fo aks him, “Who you?” 13 Den Jesus wen go ova dea, an take da bread an give um to his guys. Same ting wit da fish. 14 Az was three times Jesus wen let da guys see him afta he wen come back alive from mahke.
Jesus an Peter
15 Afta dey pau eat, Jesus wen aks Simon Peter, “Eh Simon, Johnʼs boy. Tell me dis: You get mo plenny love an aloha fo me den dese guys get, o wat?”
Peter tell um, “Eh, fo shua, Boss. You know I yoa friend.”
An Jesus wen tell um, “Kay den. Feed my baby sheeps.”
16 Den Jesus aks um one mo time, “Eh Simon, Johnʼs boy. You get love an aloha fo me, o wat?”
Peter tell um, “Eh, fo shua, Boss! You know I yoa friend.”
An Jesus tell um, “Kay den. Take care my sheeps.”
17 An den one mo time, Jesus aks um, “Eh Simon, Johnʼs boy. You my friend, o wat?”
Den Peter wen come all hurt inside, cuz now three times awready Jesus go aks him. He wen say, “You my friend, o wat?” So Peter tell um, “Boss! You know everyting! You know I yoa friend.”
Jesus tell um “Feed my sheeps. 18 You know wat I mean? Den I like tell you dis too: Befo time, wen you was one young guy, you used to put on yoa clotheses an tie yoa belt an go wea eva you like. Bumbye, you goin come one old guy. Den you goin stick out yoa hands an one nodda guy goin tie you up an take you one place you no like go.” 19 (Jesus wen talk lidat fo tell Peter wat goin happen bumbye, how Peter goin mahke fo show how awesome God stay.)
Den Jesus tell um, “Come on! Stay tight wit me an be my guy.”
Da Guy Dat Jesus Love Plenny
20 Den Peter wen turn aroun, an spock me walking behind dem. I one a Jesus guys, da one Jesus get plenny love an aloha fo. I da guy dat wen sit by Jesus da time dey wen eat da Passova food, an wen aks Jesus, “Eh Boss, who da guy dat goin set you up fo mahke?” 21 Wen Peter spock me, he wen aks Jesus, “Eh Boss! Wat bout dis guy? Wat goin happen to him?”
22 Jesus tell um, “So, wat if I like him stay alive till I come back? Bodda you? You, you stay tight wit me!”
23 Cuz a dat, Jesus odda guys telling each odda, “Dat guy John, he no goin mahke, eva.” But Jesus neva tell um dat I no goin mahke, eva. He ony say, “So, wat if I like fo da guy stay alive till I come back? Bodda you?”
One Mo Ting
24 An you know who dat guy dat Jesus talk bout, yeah? Was me, John! Jesus, he my teacha. I telling you guys all dis stuff. I wen see um happen, an I wen write um all down. An we all know da stuff I stay telling you guys, dat stuff stay true.
25 An get plenny mo odda kine stuff Jesus wen do. If somebody wen try write all dat Jesus wen do, from da time he wen start till pau, I figga da whole world no mo room fo put all da kine books bout um.
Copyright © 2000 by Wycliffe Bible Translators International. All rights reserved