M’Cheyne Bible Reading Plan
God Do Everyting Good
19 Afta da big angel guy wen talk, jalike one dream, I wen hear one big noise dat wen sound like get plenny peopo inside da sky. Dey singing,
“God, he da greates! Hallelujah!
He take us outa da bad kine stuff we stay in!
He da awesome One!
An he da One dat get plenny power!
2 God, he da Judge.
He ony tell da trut,
An do wass right!
He wen punish da big wahine
dat fool aroun fo money.
Cuz she wen make da peopo inside da world
do real bad kine stuff, jalike her.
An he wen punish her
cuz she wen kill da peopo dat work fo God.”
3 Den dey sing one mo time inside da sky,
“God, he da greates! Hallelujah!
Da smoke from Babylon, da big town,
Stay burn foeva an eva!”
4 Den da twenty-four older leadas an da four tings dat stay alive, dey go down an show love an respeck fo God, da One dat sit on top his throne. Dey say,
“Fo shua, God, he da greates!
Hallelujah!”
Da Lu‛au Fo Godʼs Baby Sheep Guy
5 Den, jalike one dream, one voice come from Godʼs throne an say,
“Everybody dat work fo our God,
An get respeck fo him,
All da big an small peopo too,
Talk good bout him!”
6 Den I wen hear someting dat wen sound like get plenny peopo making big noise, jalike big water pounding, an jalike loud thunder. Dey say,
“God, he da greates! Hallelujah!
Cuz he da Boss dat stay in charge,
An he da King ova all!
He da God Dat Get All Da Power!
7 Now we can feel good inside,
An dance an sing,
An tell how awesome he stay!
“Cuz now, get da big lu‛au
Fo Godʼs Baby Sheep Guy!
He goin take his peopo fo be wit him,
An dey wen make demself ready fo him,
Jalike da groom take his bride
An she wen make herself ready fo him.”
8 God wen give da bride fancy linen kine clotheses fo wear, dat stay white an clean. (Da kine white an clean linen clotheses mean, all da good an right tings dat da peopo dat stay spesho fo God do.)
9 Den, jalike one dream, da angel guy tell me, “Write dis: Dey can stay good inside, all da peopo dat God tell fo come to da wedding lu‛au fo Godʼs Baby Sheep Guy!” Den da angel say, “Dass fo real wat God say.”
10 An I wen go down by da angelʼs feet fo show him love an respeck. But he tell me, “No do dat! I ony one worka fo God jalike you an yoa bruddas an sistas dat stick wit da trut dat Jesus tell. Show love an respeck fo God! Cuz da trut dat Jesus tell, dass wat make da guys dat talk fo God know wat fo say.”
Da Guy On Top Da White Horse
11 Den, jalike one dream, I see da sky open up, an dea in front me had one white horse wit one guy on top him. Dey call dat guy Da One Dat Do Wat He Say an Da One Dat Tell Da trut. He everytime do wass right, wen he make like one Judge, an wen he lead one army fo fight one war. 12 His eyes shine jalike da fire, an on top his head he get plenny crown. He get one name dat dey write on top him dat nobody know. Ony him, he know um. 13 He get one robe on, dat get blood all ova um. Dey call dat Guy, “Godʼs Talk.” 14 All da army guys inside da sky stay go wit him. Dey riding on top white horses, an dey wear da fancy linen kine clotheses dat stay white an clean. 15 One sharp kine sword come out from his mout, an he win da war agains all da diffren peopos from all ova da world wit da sword. He goin be King ova dem, an lead dem wit one iron club. Da Guy on top da white horse goin walk all ova da grapes dat make da wine. An dat show dat da God Dat Get All Da Power stay huhu, an no take da bad kine stuff da peopo wen do. 16 He get one sign on top his robe an on top his leg, dat say,
“Da King Ova All Da Kings,
an Da Boss Ova All Da Bosses.”
17 Den, jalike one dream, I wen see one angel guy standing wea da sun stay shine. He was talking loud to da scavenja birds flying in da air, “Come hea fo da big lu‛au God goin make! 18 So you birds can eat all da peopo dat goin mahke! da kings, da army bosses, da strong guys, horses, an da guys dat ride on top um, an all da odda peopo -- da slave guys, da guys dat not slaves, big guys an litto guys.”
19 Den I wen spock da Wild Animal, an da kings from all ova da world, an dea army guys. Dey wen come togedda fo make war agains da Guy on top da horse an his army. 20 But da Guy on top da horse wen win agains da Wild Animal, an agains da guy dat say he talk fo God but he bulai. Da Bulaia Guy wen do all kine awesome stuff fo show dat da Wild Animal get power. Az how he wen bulai all da peopo dat wen get da Wild Animalʼs mark on top dea forehead, an dat wen go down an pray to his statue. Den da Guy dat stay ride da horse wen throw da two guys inside da lake dat stay burn wit sulfur. 21 Da Guy dat stay riding da horse wen kill all da oddas wit da sword dat come out from his mout. An all da scavenja birds wen eat um all up!
Da Police Guys Grab Jesus
18 Wen Jesus wen pau pray, he wen go ova da Kidron Stream wit da guys he teaching, an dey wen go inside one garden wit trees. 2 Judas, da guy who wen set Jesus up fo mahke, wen know da place, cuz Jesus wen go ova dea plenny times befo wit his guys. 3 Da main priest guys an da Pharisee guys wen let Judas take dea army guys an police guys wit him. So Judas dem go to da garden, an dey all wen go dea togedda, wit lanterns an torches an swords.
4 Jesus wen know all da stuff dat going happen to him, so he wen go by dem an aks dem, “Who you guys looking fo?”
5 Dey tell him, “Jesus, da guy from Nazaret.”
He tell dem, “I da guy.” Judas, da guy who wen set him up fo mahke, was right dea wit dem. 6 An you know wat? Wen Jesus wen tell dem, “I da guy,” dey wen back up an wen fall down on top da groun.
7 He wen aks dem again, “Who you looking fo?”
Dey tell, “Jesus, da guy from Nazaret.”
8 Jesus tell um, “I wen tell you, I da guy. If I da guy you looking fo, den let dese odda guys go.” 9 He wen say dat fo make wat he wen say befo come true, “Fadda, Da guys you wen give me, I neva lose dem, not even one guy.”
10 Simon Peter, he get one sword. He pull um out an wack one guy dat work fo da Head Priest, an cut off his right ear. Da worka guyʼs name was Malkus. 11 Jesus tell Peter, “Put back yoa sword! My Fadda say I suppose to suffa all dis kine stuff, an dass wat I goin do! Jalike he give me one cup full wit da bitta kine stuff fo drink, an I goin drink da whole ting.”
Jesus an da Head Priest Guy
12 Den da captain, da army guys, an da police guys from da Jewish leada guys wen take Jesus an tie him up. 13 Dey wen bring Jesus by Annas first. He Kaiafas fadda-in-law. Kaiafas, he da Head Priest guy dat year. 14 Kaiafas da guy wen tell da Jewish leada guys befo, “Mo betta fo you guys if one guy mahke fo all da peopo.”
Peter Tell, “I Donno Jesus”
15 Simon Peter wen go wit Jesus. An anodda guy Jesus wen teach go too -- dass me. Now, da Head Priest guy know me. Dass how I wen go inside da Head Priest guyʼs yard togedda wit Jesus. 16 But Peter, he stay outside by da gate. Den me, cuz I Jesus odda guy dat was dea, an da Head Priest guy know me, I wen go outside, talk to da girl dat watch da gate, an bring Peter inside. 17 Den da girl dat watch da gate wen tell Peter, “You one a da guys dat bugga wen teach, yeah?”
Peter say, “No way! I not!”
18 Had odda worka guys an police guys standing dea by one charcoal fire dey wen make, cuz was cold, an dey like come mo warm. An Peter, he wen stand dea too wit da odda guys, fo come warm.
Da Head Priest Guy Aks Jesus Plenny Stuff
19 Den da Head Priest guy aks Jesus bout da guys he wen teach, an wat he teaching dem.
20 Jesus tell him, “I wen talk wea everybody can hear me. Everytime I teach inside da Jewish churches an inside da temple yard. I neva say notting secret. 21 How come you aksing me? Aks da peopo who wen hear me, wat I wen tell dem. Fo shua, dey know wat I wen say.”
22 Afta dat, one police guy who was standing dea wen slap Jesus an say, “Eh! You not suppose to talk lidat to da Head Priest!”
23 Jesus tell him, “If I wen talk bad, tell me wat I wen say was bad. But if was good, how come you wen go slap me?” 24 Den Annas wen send him, all tie up, to da Head Priest guy, Kaiafas.
Peter Say He Donno Jesus One Mo Time
25 Simon Peter, he still yet stay standing by da fire fo come warm. Da odda guys standing dea tell him, “Eh! You one a da guys Jesus wen teach, yeah?”
Peter say, “No way! I not!”
26 Had one nodda guy dea dat work fo da Head Priest an was ohana to da guy dat Peter wen cut off his ear. Da guy tell, “Eh! Dat was you inside da garden wit him, yeah?”
27 One mo time Peter wen say, “No way! Not me!” Right den an dea, da roosta wen make noise.
Jesus an Pilate
28 Den da guys dat work fo da Head Priest take Jesus away from Kaiafas place to da Rome army headquarters. Was early in da morning. But dey neva go inside da Rome guys place, cuz if dey do dat, bumbye dey no can eat da spesho food fo da Passova cuz jalike dey pilau. 29 Den Governa Pilate wen go outside wea da Jews stay. He aks dem, “Wat you guys get agains dis guy?”
30 Dey tell him, “If da bugga no was one crook, us guys no goin turn him ova to you.”
31 Den Pilate tell dem, “Take him den an judge him jalike how yoa Rules say you gotta do.”
Da priest guys tell Pilate, “Us guys no can do dat, cuz us guys no mo da right fo kill nobody da Rome way, on top one cross.” 32 Wen dey say dat, da ting Jesus wen say befo wen come true. He wen tell his guys awready dat he goin mahke da Rome way on top one cross.
33 Den Pilate go back inside da army headquarters, an he tell Jesus fo come inside, an tell him, “Eh, you! You da King fo da Jews, o wat?”
34 Jesus tell him, “Dass wat you figga yoaself? O odda peopo wen tell you dat bout me?”
35 Pilate tell, “Me? You tink I one Jew? Dass was yoa own peopo an da main priest guys wen bring you to me. Wat you wen do?”
36 Jesus tell, “I not da kine king from dis world. If I was dat kine king, den my guys goin fight so da Jews no can take me. I one king, but no mo nobody hea inside dis world wen make me one king.”
37 Pilate aks him, “So, you one king den?”
Jesus tell him, “You wen say I one king. Az why I wen born, an az why I wen come hea inside da world -- so I can tell everyting dat I know bout da true stuff. Everybody dat stick wit da trut, dey listen to me.”
38 Pilate aks him, “Wat da trut?”
Dey Say, Jesus Gotta Mahke
Wen Pilate wen say dat, he wen go back outside to da Jews, an he tell dem, “I no find notting wrong wit dis guy. 39 But you guys get dis ting wea I suppose to let one guy go at da Passova time. So, you guys like me let go da King fo da Jews, o wat?”
40 Dey all yell an say, “Not dis guy! We like Barabbas!” Now, Barabbas, he was one mean crook guy.
Copyright © 2000 by Wycliffe Bible Translators International. All rights reserved