M’Cheyne Bible Reading Plan

Da Wahine Dat Fool Aroun Fo Money An Da Wild Animal

17 Den, jalike one dream, one a da seven angel messenja guys dat get da seven bowl wen come tell me, “Come. I show you how God goin punish da big wahine dat fool aroun fo money, dat get her throne near da big ocean. ² Da kings all ova da world wen fool aroun wit her. An da peopo dat live inside da world, she make um do any kine, jalike she make um come real drunk, cuz dey fool aroun wit her.”

³ Den Godʼs Spirit wen take charge me, an da angel guy wen take me inside da boonies.

Ova dea, jalike one dream, I see one wahine sitting on top one red wild animal. Dat animal get names all ova him dat talk stink bout God, an get seven head an ten horn. ⁴ Da wahine had on purple an red clotheses, an had all kine gold dat shine, an fancy kine jewelry, an pearls. She get one gold wine cup in her hand dat stay full a all kine pilau kine stuff, an da bad kine stuff dat show she fool aroun. ⁵ Da wahine get one sign on top her forehead wit her name, dat nobody know befo:

⁶ An I wen see, jalike one dream, dat da wahine stay high cuz she wen kill plenny peopo dat stay spesho fo God, an drink dea blood. Dass all da ones dat wen bleed an mahke cuz dey tell bout Jesus.

Wen I wen spock da wahine, wen blow my mind. ⁷ Da angel messenja guy tell me, “Eh, how come dat blow yoa mind? I goin tell you da secret bout da wahine dat ride on top da Wild Animal dat get seven head an ten horn.

⁸ “Da Wild Animal dat you wen see, he wen stay befo time, an he no stay now. But he goin come outa da Deep Dark Hole, an den he goin get wipe out. Get da peopo dat no mo dea name inside da Book Dat Tell Who Get Godʼs Kine Life from da time wen God wen make da world. Dose peopo, goin blow dea minds wen dey spock da Wild Animal. Cuz he wen stay befo, an he no stay now, but he goin come back.

⁹ “Fo dis, you gotta tink real hard an stay sharp. Da seven head, dass jalike one picha fo da seven hill wea da wahine get her throne, an dey seven kings too. ¹⁰ Five kings wen fall down awready, one king stay now, an one king neva come still yet. But wen he come, he goin stay ony litto wile. ¹¹ Da Wild Animal dat wen stay befo, an no stay now, dass da numba eight king. He come from da seven kings, an he goin be wipe out.

¹² “Da ten horn you wen see, dey ten kings dat no mo power fo be king still yet. But dey goin get power fo come king fo one hour togedda wit da Wild Animal. ¹³ Dey get ony one ting dey like do: dey goin give dea power an dea right fo come king to da Wild Animal. ¹⁴ Dey goin make war an fight agains Godʼs Baby Sheep Guy. But he goin win agains dem, cuz he da Boss ova all da bosses an da King ova all da kings! All da peopo dat Godʼs Baby Sheep Guy wen pick an tell dem fo come be his guys, dey do wat dey say dey goin do, an dey goin stay wit him.”

¹⁵ Den da angel messenja guy tell me, “Da big ocean you wen see, wea da wahine dat fool aroun get her throne, dass peopos, nations, countries, an languages. ¹⁶ Da Wild Animal an da ten horn you wen see, dey goin hate da wahine dat fool aroun, an take away everyting she get, an leave her wit notting, not even clotheses. Dey goin eat her an burn her wit fire. ¹⁷ Cuz God wen make dem guys tink how he like. Az why dem guys goin give da Wild Animal dea power fo come king. Dey get dat power till everyting God wen say come true. ¹⁸ Da wahine you wen see, dass da big town wea da big king stay dat get power ova all da odda kings inside da world.”

16 “I wen tell you guys dis stuff awready, cuz no good bumbye you guys no stick wit me no moa. ² Da Jewish peopo goin throw you guys outa dea churches. An even goin get one time wen whoeva kill you guys goin tink dey doing someting good fo God. ³ Dey goin make lidat to you guys cuz dey donno my Fadda an dey donno me. ⁴ I wen tell you guys dis stuff too, so wen da time come, you guys goin rememba dat I wen tell you guys bout um. I neva tell you guys dis stuff befo, cuz I was wit you guys.

Wat Godʼs Spirit Do

⁵ “But now I going to da One dat wen send me. But still yet, you guys no even aks me wea I going. ⁶ I wen tell you guys dis stuff awready. Dass why you guys stay all sad an crying inside. ⁷ Dis da trut, wat I stay telling you guys: Mo betta fo you guys if I go way. Cuz if I no go way, da One who goin kokua you guys no goin come hea. But if I go way, den I goin send him to you guys.

⁸ “Wen da Kokua Guy come, he goin show da peopo inside da world how dey mess up. Dat mean, da Kokua Guy goin show peopo dat dey do bad kine stuff, an dat dey no do wat stay right, an dat God goin be dea Judge. ⁹ He goin show dem dat dey do bad kine stuff, cuz dey no like trus me. ¹⁰ He goin show dem dat dey no do wat stay right, cuz I going to my Fadda, an den you guys no goin see me no moa. ¹¹ He goin show dem dat God goin be dea Judge, cuz God awready wen judge da main leada fo dis world, da Devil.

¹² “I still yet get plenny mo stuff fo tell you guys, but dass mo den you guys can handle right now. ¹³ Wen da Spirit come dat make you guys know da trut, he goin show you guys how fo do da true stuff. He no goin talk by himself, but he goin tell wat my Fadda wen tell him. An he goin tell you guys bout da stuff dat goin happen bumbye. ¹⁴ Dass how he goin show how awesome I stay, cuz he goin take all da true stuff bout me an show you guys wat all dat mean. ¹⁵ Everyting my Fadda get, dass mines too. Dass why I wen say, Godʼs Spirit goin take all da true stuff bout me, an show you guys wat dat mean.

You Guys Goin Cry Inside, An Afta Dat, You Goin Stay Good Inside

¹⁶ “In litto wile, you guys no goin see me. Den litto wile moa, you guys goin see me.”

¹⁷ Den some a da guys he wen teach wen tell each odda, “Eh, wass he talking bout? He say, ‘In litto wile, you guys no goin see me. Den litto wile moa, you guys goin see me.’ An how come he say, ‘Cuz I going to my Fadda’?” ¹⁸ So dey wen say, “Wass dis he mean, ‘In litto wile’? We donno wat he talking bout.”

¹⁹ Jesus know dey like aks him question, so he tell um, “I wen say, ‘In litto wile you guys no goin see me. Den litto wile moa, an you guys goin see me.’ Dat wat you aksing each odda bout? ²⁰ Dass good you aks! An I like tell you guys dis too: you guys goin cry an come sad inside, but da peopo hea inside da world, dey goin stay good inside. You guys goin be crying inside, but afta, you guys goin stay good inside. ²¹ You know, wen one wahine goin born one baby, she sad cuz she stay suffa. But afta da baby born, she no tink bout dat no moa. Den she stay good inside cuz one baby wen born hea inside dis world. ²² Same ting wit you guys: Now, you guys stay sad an crying inside, but bumbye I goin see you guys again, an den you guys goin stay good inside. Dat time, no goin get nobody can make you feel bad again.

²³ “Wen dat time come, you guys no goin need aks me bout notting. Dass right! I tell you guys, wateva you guys aks my Fadda fo do cuz you my guys, he goin do um fo you guys. ²⁴ Befo now, you guys neva aks my Fadda fo do notting cuz you my guys. Aks now, an you guys goin get um, so you guys can stay good inside to da max.

Jesus, He Da Winna

²⁵ “Till now I wen teach you guys wit stories. Da time goin come wen I no goin teach you guys wit stories lidat no moa. Den I goin tell you strait out bout my Fadda. ²⁶ Wen dat time come, you guys goin aks my Fadda fo do stuff cuz you my guys. No need fo me aks him fo you guys. ²⁷ My Fadda, he da One dat get love an aloha fo you guys, cuz you guys get love an aloha fo me, an you stay shua dat I wen come from God. ²⁸ Befo, I wen go way from wea my Fadda stay, an wen come inside da world. Now I going outa da world, an going back to my Fadda.”

²⁹ Den da guys he teaching tell him, “Eh! Now you talking strait out, an not ony teaching wit stories! ³⁰ Now, we know fo shua dat you know everyting. You no need nobody fo aks you notting, cuz you know awready wat dey like aks an wat da answer. Dat show us dat you wen come from God.”

³¹ Jesus tell um, “Fo real? You guys trus me now? ³² You know wat? Da time goin come, an almos stay hea now, wen all you guys goin bag, an run all ova da place. Everybody goin go his own place, an I goin stay by myself. But I no stay by myself, cuz my Fadda stay wit me.

³³ I wen tell you guys all dis stuff so yoa hearts can rest inside, cuz you guys stay tight wit me. Da peopo inside da world goin make you guys suffa. But make strong! I da winna ova all da power inside da whole world!”