M’Cheyne Bible Reading Plan
Godʼs Baby Sheep Guy An His Peopo
14 Den I wen look, an jalike one dream, right dea in front me I see da One dat was jalike Godʼs Baby Sheep. He stay standing on top Mount Zion, an wit him was 144,000 peopo dat get Godʼs Baby Sheepʼs name an his Faddaʼs name on top dea forehead. 2 Afta dat I wen hear one big noise come from da sky, jalike wen plenny water pound, an jalike da thunder. Da sound I wen hear, jalike peopo playing plenny guitars. 3 Dey wen sing one new song in front da throne, an in front da four tings dat stay alive, an da older leadas. No mo nobody can learn da song, ony da 144,000 peopo on top da earth dat God wen pay da price fo get um back fo himself, dey can learn um.
4 Dey da guys dat neva make demself pilau, but dey stay clean, cuz dey neva fool aroun da wahines. Every place Godʼs Baby Sheep Guy go, dey go wit him. God wen pay da price fo cut dem loose from da bad kine stuff, from all da peopo on top da earth. Dey da first peopo dat give demself to God an his Baby Sheep Guy, jalike one gif. 5 No mo nobody can tell dat dey bulai. No can poin finga dem.
Three Angel Messenja Guys
6 Den I wen see anodda angel messenja guy, jalike one dream, flying up dea. An he get Good Stuff From God dat stay foeva fo tell everybody dat stay on top da earth: all da diffren countries, an ohanas, an languages, an peopos. 7 Da angel talk wit one loud voice, an say, “Give respeck fo God an tell how awesome he stay! Cuz da time stay now wen he goin come da Judge fo everybody. Give love an respeck to da One dat wen make da sky, da earth, da ocean, an da pukas wea get water.”
8 Den I wen see da numba two angel messenja guy come, an he tell, “Babylon, da Big Town, wen wipe out! Cuz da Babylon peopo wen ack jalike one wahine dat make all da diffren peopos drink her kine wine, an dat make dem all go pupule an ony like fool aroun.”
9 Den da numba three angel messenja guy wen come afta dat, an tell wit one loud voice, “Get peopo dat go down an pray in front da Wild Animal an his statue. An get peopo dat get his mark on top dea forehead o dea hand. 10 God come real huhu an no take da bad kine stuff dose peopo stay doing. He goin make dose peopo suffa real bad from da burning sulfur, in front Godʼs spesho angel guys an Godʼs Baby Sheep Guy. Dass jalike wen one guy make anodda guy drink too much real strong wine, fo make um come real drunk. 11 Da smoke from da fire wea dey stay suffa goin go up in da sky foeva an eva. Everybody dat go down an pray in front da Wild Animal an his statue, o get da mark fo his name on top dem, dey no goin rest day time o nite time, eva!”
12 Dat mean, da peopo dat stay spesho fo God gotta hang in dea. Dey da ones dat listen to God, an stay trus Jesus.
13 Den I hear one voice from da sky tell, “Write dis: From now, everybody dat trus da Boss Up Dea, dey goin stay good inside wen dey mahke.”
Godʼs Spirit say, “Yeah! Dey goin rest from all dea hard work, an everybody goin know da good stuff dey wen do.”
Time Fo Bring In Da Grapes
14 Den I wen look, an jalike one dream, in front me had one white cloud. Had one guy sitting on top da cloud dat look jalike us. He da Guy Dass fo Real. He get one gold kine crown on top his head, an one sharp sickle in his hand.
15 Den anodda angel messenja guy wen come outa da temple, an wit one loud voice he tell da One dat stay sitting on top da cloud, “Now cut da grapes wit yoa sickle, cuz az da right time now. Da grapes inside da fields all ova da world stay ready fo cut.”
16 Da One dat stay sitting on top da cloud wen swing his sickle ova da earth, an wen bring in all da grapes.
17 Den I wen see one nodda angel messenja guy come outa da temple inside da sky, an he get one sharp sickle too. 18 An had one nodda angel messenja guy dat stay in charge a da fire. He wen come from da altar, an wit one loud voice he tell da angel dat get da sickle, “Now cut da grapes from da grape fields all ova da world wit yoa sickle, cuz dey stay ready now.”
19 So, jalike one dream, da angel guy wen swing his sickle ova da earth. Den he wen bring in da grapes, an throw um inside da puka wea dey smash um. Dat show dat God no take da bad kine stuff da peopo do. 20 Dey wen smash da grapes inside da wine puka outside da big town, an blood wen come outa da puka dat was so plenny, was two hundred miles long an five feet deep.
Jesus Wash His Guys Feet
13 Was jus befo da Passova time. Jesus wen know dat was time fo him fo go outa dis world, an go by his Fadda. He everytime get love an aloha fo his peopo dat stay inside da world, an he get love an aloha fo dem all da way.
2 Jesus dem was eating da Passova dinna. An da Devil wen awready make Judas, Simon Iscariotʼs boy, tink dat he like set Jesus up.
3 Jesus know dat his Fadda wen give him all da power ova everyting. He know he wen come from God an now he going back to God. 4 So Jesus wen stand up from da table, take off his robe, an put one towel aroun his waist. 5 Den he wen pour water inside one small wash tub, an wen start fo wash his guys feet, first one guy, den da odda. An den he dry um wit da towel he wen get aroun his waist. 6 Den he wen go by Simon Peter. An Peter wen aks him, “Eh, Boss! Wat you doing? You goin wash my feet?”
7 Jesus tell him, “You no undastan how come I doing dis now, but bumbye you goin undastan um.”
8 Peter tell him, “No way you eva goin wash my feet!”
Den Jesus tell him, “If I no wash you, den you no can be my guy.”
9 Den Simon Peter tell him, “Kay den, Boss. No wash ony my feet. Wash my hands an my head too!”
10 Jesus tell him, “Whoeva wen bafe, dey ony need wash dea feet. Dea body stay clean awready. You guys stay clean inside, but not all you guys.” 11 (Cuz Jesus know awready who goin set him up. Dass why he say, “All you guys not clean.”)
12 Afta Jesus wen wash dea feet, he put on his robe an go back to da table. Den he aks um, “Eh, you guys undastan how come I wen wash you guys feet? 13 You guys call me ‘Teacha’ an ‘Boss.’ Dass good, cuz dass who me. 14 I you guys Boss an Teacha, yeah? an I wen wash you guys feet. Kay den. You guys suppose to wash each oddaʼs feet too. 15 I wen show you guys wat fo do, cuz jalike I wen do fo you guys, you guys suppose to do too. 16 Dass right! An I tell you guys dis too: Da slave guy not mo importan den his boss. An da messenja guy not mo importan den da guy dat wen send him. 17 You guys know all dis stuffs. So, if you guys do um, you guys goin stay good inside.
18 “I not talking bout all you guys. I know da guys I wen pick. But gotta happen jalike da Bible say from befo time, ‘One guy dat wen eat wit me, like go agains me.’ 19 I stay telling you guys dis now, befo he do um, so wen he do um, you guys goin know fo shua dat I Godʼs Spesho Guy. 20 Dass right! An I like tell you guys dis too: Whoeva stick wit da guy I send, dey stick wit me too. An whoeva stick wit me, dey stick wit da One who wen send me too.”
Dey Goin Set Up Jesus fo Mahke
21 Afta Jesus wen say dat, he come all funny kine inside. He tell da guys he teaching, “Dis fo shua wat I telling you guys: One a you guys goin set me up fo mahke.”
22 His guys wen look at each odda, an dey no can figga who he talking bout. 23 Had one a Jesus guys was sitting by him at da table. Jesus get plenny love an aloha fo him. 24 So Simon Peter nod da head at da guy an say, “Eh! Try find out who he talking bout.”
25 So da guy wen move mo close an aks Jesus, “Eh, Boss! Who da guy?”
26 Jesus say, “I goin take one piece bread, dip um inside da sauce, an give um to da guy.” So he take da bread, dip um inside, an give um to Judas, Simon Iscariotʼs boy. 27 Judas wen take da bread, an right den an dea, da Devil take ova him. Den Jesus say, “Hurry up an go do wat you goin do!” 28 But da odda guys sitting dea neva undastan how come Jesus wen tell him dat. 29 Some a Jesus guys was tinking dat Jesus telling Judas, “Go get wat we need fo da Passova,” o “Go give someting to da peopo dat no mo notting.” Dey tinking lidat cuz Judas stay in charge a da money fo all da guys.
30 So afta Judas take da bread, he go outside quick. Was nite time.
Da New Ting Dey Gotta Do
31 Afta Judas go way, Jesus say, “I da Guy Dass Fo Real. Now everybody goin see how awesome I stay. An from dat, dey goin find out how awesome God stay. 32 I goin show how awesome God stay, an he goin make me awesome too, cuz I stay tight wit him. An he goin do um right away. 33 Eh guys! I get plenny love an aloha fo you guys! But I goin stay wit you guys ony litto wile moa. Den you guys goin look fo me, but jalike I wen tell da Jewish leada guys, I telling you guys now, ‘Da place wea I going, you guys no can go dea.’
34 “I give you guys one new ting you gotta do: Show love an aloha fo each odda. Jus like I get love an aloha fo you guys, dass how you guys gotta get love an aloha fo each odda. 35 If all you guys get love an aloha fo each odda, den everybody goin know you my guys.”
Bumbye Peter Goin Say He Donno Jesus
36 Simon Peter aks him, “Eh, Boss, wea you going?”
Jesus tell him, “Da place I going, you no can go dea now, but bumbye you going dea.”
37 Peter tell him, “Eh, Boss, how come I no can go wit you now? I stay ready fo mahke fo you!”
38 Jesus tell him, “Fo real? You tink you stay ready fo mahke fo me? Dass right! But I tell you dis too: Befo da roosta make noise early today, you goin say three times dat you donno who me!”
Copyright © 2000 by Wycliffe Bible Translators International. All rights reserved