M’Cheyne Bible Reading Plan

Da Wahine An Da Dragon

12 Den, jalike one dream, I see one big, awesome ting inside da sky. Was one wahine wit da sun fo her clotheses, an da moon unda her feet, an one crown wit twelve stars on top her head. ² She hapai, an she stay crying, cuz real sore fo born her baby!

³ Den I wen see one nodda awesome kine ting inside da sky. Had one big, red dragon, an he had seven head an ten horn, wit seven small crown on top da seven head. ⁴ Da Dragon tail wen sweep some a da stars outa da sky, an throw um down to da groun: one star from every three stars. Da Dragon wen stand in front da wahine dat goin born one baby, so he can eat her baby as soon as he born. ⁵ She wen born one boy. He goin be da King fo lead all da diffren peopos on top da earth. He goin carry one king kine stick dat get iron on top fo show he in charge. But God wen grab up da boy to him an to his throne. ⁶ Den da wahine wen run to da boonies, to one place dat God wen make ready fo her, an somebody wen take care her three an a half year.

⁷ Den had war inside da sky. Michael an his angel messenja guys wen fight da Dragon, an da Dragon an his bad angel messenja guys wen fight back wit dem. ⁸ But da Dragon guys no was strong, so dey no can stay inside da sky wit God no moa. ⁹ Da big Dragon, God wen throw um outa da sky. Dass da old snake. Dey call um da Devil, an Satan. He bulai all da peopo inside da world. God wen throw him an his angel messenja guys down on top da earth.

¹⁰ Den I wen hear one loud voice inside da sky dat say,

¹³ Wen da Dragon wen see dat God wen throw um down to da earth, he wen chase da wahine dat wen born da baby boy. ¹⁴ God wen give her two wings jalike one big eagle, so she can fly to da place wea he wen make ready fo her inside da boonies. Ova dea he goin take care her fo three an a half years, an da Dragon no can touch her.

¹⁵ Den da Dragon wen blow out plenny water outa his mout, jalike one river, so dat he can grab da wahine an take her away. ¹⁶ But da groun wen help her. Da groun wen open up one crack, an swallow up da water dat da Dragon wen blow outa his mout. ¹⁷ So da Dragon wen come real huhu at da wahine, an wen go way fo fight agains her odda kids. Dass everybody dat listen to wat God tell um fo do, an do all da true stuff dat Jesus wen show us.

Den da Dragon wen go stand on top da beach by da sea.

Lazarus Come Back Alive

11 Had one guy, name Lazarus. He get two sistas, Mary an Marta, an dey all come from Betany town. Mary, she da wahine dat wen put da perfume on top da Boss Jesus feet, an wipe um wit her hair. Now, Lazarus wen come sick. ³ So Lazarus sistas, dey send guys fo tell Jesus, “Boss, yoa good friend Lazarus, he stay sick.”

⁴ Wen Jesus wen hear dat, he wen say, “Lazarus no goin mahke from dis sick. Dis wen happen so everybody goin know how awesome God stay. I Godʼs Boy, an everybody goin find out from dis how awesome I stay too.”

⁵ Now Jesus get love an aloha fo da sistas, Marta an Mary, an fo Lazarus too. ⁶ Afta Jesus hear dat Lazarus stay sick, he still yet stay ova dea da odda side da Jordan River two mo days. ⁷ Den he tell his guys, “Come on. We go back Judea side, wea Lazarus stay.”

⁸ Da guys Jesus teaching wen tell him, “Eh, Teacha, ony litto wile befo dis da Jewish peopo wen like throw stones at you fo kill you. An you still like go back ova dea again?”

⁹ Jesus tell dem, “No scared! God goin take care us guys, cuz he jalike da light. Day time get twelve hours, yeah? If you walk aroun day time, you no goin trip an fall down, cuz da light dat shine inside dis world let you see. ¹⁰ But if you walk aroun nite time, you goin trip an fall down, cuz you no mo light.”

¹¹ Afta Jesus wen say dat, he tell dem, “Our friend Lazarus wen go sleep, but I going ova dea fo wake him up.”

¹² Jesus guys wen say, “Boss, if he sleeping, he goin come good.”

¹³ Jesus mean he mahke die dead, but his guys tink he talking bout rest an sleep. ¹⁴ Den Jesus tell um strait, “Lazarus mahke awready. ¹⁵ I feel good inside fo you guys, cuz I neva stay ova dea wen he wen mahke. Cuz you guys goin trus me cuz a wat goin happen. An now, we going ova dea by him.”

¹⁶ Den Thomas da Twin tell Jesus odda guys, “Eh, mo betta we go wit Jesus too, so we can mahke wit him.”

Jesus Make da Mahke Peopo Come Alive Fo Real Kine

¹⁷ Den wen Jesus go Betany, he wen find out dat Lazarus wen stay inside da grave four days awready. ¹⁸ Now, Betany stay not too far from Jerusalem, not even two miles. ¹⁹ Plenny Jewish peopo wen come fo kokua Marta an Mary, cuz dea brudda wen mahke.

²⁰ Den Marta wen find out dat Jesus stay coming. She go outside da town an meet him. But Mary stay inside da house. ²¹ Marta tell Jesus, “Boss, if you was hea, my brudda no wen mahke! ²² But I know dat even now, God goin do wateva you aks him fo do.”

²³ Jesus tell her, “Yoa brudda goin come back alive again.”

²⁴ Marta tell him, “I know dat he goin come back alive, bumbye wen all da mahke guys goin come back alive, an dis world goin pau.”

²⁵ Jesus tell her, “I da Guy dat make peopo come back alive an stay live fo real kine. Whoeva trus me goin come alive, no matta dey mahke. ²⁶ Whoeva stay live fo real kine an trus me, dey no goin mahke inside, eva! You believe dat, Marta?”

²⁷ She tell him, “Yeah, Boss! I trus you, dat you da Christ, da Spesho Guy God Wen Send. You Godʼs Boy, da Guy dey wen tell us goin come inside dis world.”

Jesus Cry

²⁸ Afta Marta wen say dat, she go back by her sista Mary. Dey talk wea nobody can hear wat dey say. She say, “Da Teacha wen come, an he like see you.” ²⁹ Mary wen hear dat. She get up quick an go outside wea Jesus stay. ³⁰ You know, Jesus neva come inside da town yet, but he stay da place wea Marta meet him. ³¹ Da Jewish peopo dat stay inside da house wit Mary, fo kokua her, dey wen see her get up quick an go outside. So dey wen go too. Dey tink she going to da grave fo cry ova dea.

³² Den Mary wen come wea Jesus stay, an see him. She go down in front his feet an say, “Boss, if you was hea, my brudda no wen mahke.”

³³ Wen Jesus see her crying, an da Jewish peopo who wen come wit her crying too, he come all bodda an funny kine inside. ³⁴ He say, “Wea you guys wen bury him?”

Dey say, “Boss, come see.”

³⁵ Jesus wen cry. ³⁶ Den da Jewish peopo say, “Look, how plenny love an aloha he get fo Lazarus!”

³⁷ But some a dem say, “Eh! Dis guy wen make da blind guys see. How come he no can make Lazarus come good, so he no mahke, aah?”

Lazarus Come Back Alive

³⁸ One mo time Jesus wen come all funny kine inside. He go to da cave wea dey wen bury Lazarus. An had one big stone dea dat cover da cave so nobody can go inside. ³⁹ Jesus say, “Take away da big stone.”

Marta, da mahke guyʼs sista, she say, “Auwe, Boss, he mahke four days awready! Goin get bad smell!”

⁴⁰ Jesus tell her, “I wen tell you awready dat if you trus God, you goin find out how awesome he stay, yeah?” ⁴¹ Den some guys wen take da stone away from da puka. Jesus look up to da sky an say, “Fadda, mahalo plenny dat you wen listen to me. ⁴² I know dat you everytime listen to me. But I wen say dat so dey goin believe me, dat you wen send me hea.” ⁴³ Afta he say dat, he talk real loud, “Lazarus, come outa dea!” ⁴⁴ Da mahke guy wen come outside. He get bandage fo mahke guys aroun his hands an feet, an anodda bandage aroun his face. Jesus say, “Hemo da bandage from his face, an let him go.”

Dey Talk How Dey Goin Kill Jesus

⁴⁵ Den plenny Jewish peopo dat wen come fo kokua Mary, an wen see all da awesome stuff Jesus wen do, dey wen trus him. ⁴⁶ But odda guys wen go by da Pharisee guys, an tell dem all da stuff Jesus wen do.

⁴⁷ Den da main priest guys an da Pharisee guys wen tell all da Jewish leadas fo come togedda. Dey say, “Dis guy Jesus doing all kine awesome stuff dat show who him! Wat we goin do? ⁴⁸ If we let him stay do dis kine stuff, everybody goin go trus him jalike he dea king! An cuz a dat, da Rome army guys goin come an wipe out our temple an our peopo.”

⁴⁹ One a dem, Kaiafas, da Head Priest guy dat year. He tell dem, “You guys donno notting! ⁵⁰ Mo betta fo you guys if one guy mahke fo all da peopo. If not, da Rome guys goin wipe out all da Jewish peopo!” ⁵¹ Kaiafas neva say dat by himself, but he da Head Priest guy dat year, dass why he can talk lidat. He wen talk fo God wen he say dat Jesus goin mahke fo all da Jewish peopo. ⁵² An he no goin mahke ony fo da Jewish peopo, but fo all Godʼs kids dat stay all ova da world, fo bring dem all togedda fo come one peopo.

⁵³ Dass why, from dat time, da Jewish leada guys wen talk togedda how dey goin kill Jesus.

⁵⁴ So Jesus no go aroun no moa wea da Jewish leada guys can see him. He go one place near da boonies, Efraim town. An he wen stay ova dea wit da guys he teaching.

⁵⁵ Now, almos time fo da Jewish Passova religious time. Plenny peopo from da boonies wen go Jerusalem befo da Passova, so dey can do all da stuff Godʼs Rules say fo do fo make demself clean fo pray Passova time. ⁵⁶ Da peopo stay looking fo Jesus. Wen dey standing inside da temple yard, dey aks each odda, “Wat you guys tink? You tink Jesus goin come to da spesho religious time, o wat?” ⁵⁷ But da main priest guys an da Pharisee guys wen tell dat if anybody know wea Jesus stay, dey gotta tell dem, so dey can send da police guys fo bus Jesus.