M’Cheyne Bible Reading Plan

Inside Da Sky, Dey Show Love An Respeck Fo God

4 An afta dat I wen look, an I wen see someting jalike one dream. An I wen see one open door inside da sky. An I hear da same voice I wen hear befo time, dat sound jalike one trumpet. He was talking to me, an he say, “Eh, come up hea! I show you wass gotta happen bumbye.”

² Right den an dea, Godʼs Spirit wen take charge a me. In front me, up dea inside da sky, had one throne, an somebody was sitting on top da throne. ³ Da One dat sit dea get strong light dat come from him, jalike da light dat come from da jasper stone an da red carnelian stone! An aroun him had one rainbow dat look jalike da green emerald.

⁴ Aroun da throne had twenty-four odda thrones, an twenty-four older leadas sitting on top dem. Dey had white clotheses on, an had da gold kine crown on top dea heads. ⁵ Outa da throne da lightning was flashing, an thunder making big noise. In front da throne had seven torches dat stay burn real bright, an dass da seven spirits dat come from God. ⁶ In front da throne wen look jalike one pond dat you can see thru, jalike da glass. In da middle, aroun da throne, had four tings dat stay alive, an dey get eyes all ova da front an back.

⁷ Da first one dat stay alive wen look jalike one lion, da nex one look jalike one boy kine cow, numba three get one face jalike us, an da last one look jalike one eagle dat stay flying. ⁸ Da four tings dat stay alive, dey all get six wings, an day get eyes all ova, even unda dea wings. Dey no stop singing all day an all nite. Dey sing like dis:

⁹ God da One dat sit on top da throne, an stay alive foeva an eva. Da four tings dat stay alive, dey show respeck fo him, an tell him “Mahalo plenny!” an tell um how awesome he stay. ¹⁰ Everytime da twenty-four older leadas go down in front God dat sit on top da throne, an show love an respeck fo him. He da One dat stay alive foeva an eva. Dey put dea crowns down in front his throne, an sing lidis:

Jesus Talk to Nicodemus

3 Had one Pharisee guy. His name Nicodemus, an he was one leada fo da Jewish peopo. ² One nite he wen go by Jesus an tell him, “Teacha, we know dat you one teacha who come from God, cuz nobody can show us da kine awesome stuff dat you doing, if God no stay wit him.”

³ Jesus tell him, “Dass right! An I tell you dis too: Whoeva not born again Godʼs new way, dey no goin get God fo dea King.”

⁴ Nicodemus tell him, “How one old guy can get born again? No way he can go inside his mudda one mo time an get born!”

⁵ Jesus tell him, “Dass right! An I tell you dis too: Whoeva not born again from water an from Godʼs Spirit, dey no can get God fo dea King. ⁶ Peopo born from peopo, an peopoʼs spirit born again from Godʼs Spirit. ⁷ Eh, no let um blow yoa mind, jus cuz I tell you, ‘You guys gotta born again Godʼs new way.’ ⁸ Da wind blow hea an dea. You can hear um, but you donno wea da wind wen come from o wea going. Dass jalike everybody dat born again from Godʼs Spirit.”

⁹ Nicodemus go aks him, “How can be?”

¹⁰ Jesus tell him, “You da main teacha fo da Israel peopo, an you no undastan dis stuff? ¹¹ Fo shua, I tell you dis too: I know wat I talking bout. I wen see da stuff I telling. But you guys, you still no like trus wat I tell you. ¹² Wen I tell you guys bout stuff down hea inside dis world, you guys no believe me. Den how you guys goin believe me if I tell you guys bout da stuff up dea wea God stay inside da sky? ¹³ Nobody wen eva go up inside da sky. Ony me, da Guy Dass Fo Real, I wen come down from da sky.

¹⁴ “You know, long time ago inside da boonies, Moses wen put one snake on top one stick so everybody can see um an come good. Da same ting gotta happen to me, da Guy Dass Fo Real. Dey goin put me on top one cross, ¹⁵ so dat everybody who stay trus me, can get da real kine life dat stay to da max foeva.

¹⁶ “God wen get so plenny love an aloha fo da peopo inside da world, dat he wen send me, his one an ony Boy, so dat everybody dat trus me no get cut off from God, but get da real kine life dat stay to da max foeva. ¹⁷ You know, God neva send me, his Boy, inside da world fo punish da peopo. He wen send me fo take da peopo outa da bad kine stuff dey doing. ¹⁸ Whoeva stay trus me, God no goin punish dem. But whoeva no trus me, garans God goin punish dem, cuz dey neva trus me, Godʼs ony Boy.

¹⁹ “God wen send da light inside da world. Da light show everybody how dey stay inside. But da peopo like stick wit da dark an dey hate da light, cuz dey stay do bad kine stuff. Dass why God goin punish da peopo. ²⁰ Everybody dat stay do bad kine stuff hate da light, an no like let da light shine on top dem, cuz dey no like nobody know bout da bad kine stuff dey doing. ²¹ But whoeva stay do wat da true stuff say fo do, dass jalike dey like let da light shine on top dem, fo show everybody dat everyting dey do, dass wat God say fo do.”

Jesus an John Da Baptiza Guy

²² Afta dat, Jesus an da guys he teaching wen go Judea side. He wen stay wit dem ova dea an wen baptize peopo. ²³ Da same time John stay baptize da peopo Enon side, near Salim, cuz had plenny water ova dea. Da peopo stay come by John an he stay baptize dem. ²⁴ You know, dis wen happen befo dey throw John inside da jail.

²⁵ Now, had one Jewish guy wen make argue wit da guys John stay teaching. Dey make argue bout how dey gotta wash demself befo dey can pray. ²⁶ So dey go by John an tell um, “Teacha, you know da guy dat wen stay by you ova dea, da odda side da Jordan River, an you wen tell us bout him? Look! Everybody going ova dea, an he stay baptizing um.”

²⁷ John tell um, “Nobody can get anyting, ony wat God in da sky give um. ²⁸ You guys, you wen hear me say, ‘I not da Christ, da Spesho Guy God Goin Send, but God wen send me first, befo him.’

²⁹ “Da groom, he da guy dat get da bride. Da bes man, he standing dea, an he stay real good inside wen he hear da groom talking. I jalike da bes man, an Jesus, jalike da groom. Dass why I stay real good inside. ³⁰ He gotta come mo importan den me, cuz I not dat importan.”

Da Guy From Up Dea Come Down

³¹ Da One who come from up dea wea God stay inside da sky, he mo importan den anybody. Da guy who come from down hea on top da earth, he jalike all da peopo hea on top da earth, an he talk bout da kine stuff from down hea. Da guy from up dea wea God stay inside da sky, fo shua he mo importan den all da peopo. ³² He tell wat he wen see an hear, but nobody trus wat he say. ³³ But whoeva take wat da One from up dea say, dat guy show dat God tell da trut. ³⁴ Da guy dat God wen send tell wat God say, cuz God no hold back wen God give him his Spirit. ³⁵ Da Fadda get plenny love an aloha fo his Boy. He wen give him da power ova everyting. ³⁶ Whoeva stay trus Godʼs Boy, dey get da real kine life dat stay to da max foeva. But whoeva no trus Godʼs Boy, an no do wat he say, dey no goin get dat kine life, cuz God no take wat dey do.