M’Cheyne Bible Reading Plan
“Aloha!”
1 Aloha! Dis me, Jude. I James brudda, you know. An I one worka fo Jesus Christ, da Spesho Guy God Wen Send.
I writing dis letta fo you guys. God da Fadda wen tell you guys fo come by him an be his guys. He get plenny love an aloha fo you guys dat stay tight wit him, an Jesus Christ take good care you guys. 2 I like God everytime give you guys plenny chance, an make you guys hearts rest inside, an give you real plenny love an aloha.
God Goin Punish Da Bad Kine Guys
3 My friends, I wen like write you guys real bad, fo tell you guys mo bout how God wen take all us guys outa da bad kine stuff. But now, I gotta write you guys dis: God wen teach da peopo dat stay spesho fo him, ony one time, fo all time, da stuff you guys wen trus. An you guys gotta fight fo no lose all dat.
4 Cuz get some bad kine guys dat wen sneak inside awready wit you guys. Da Bible wen say from long time ago, how dey goin make lidat. Dem guys ack like God no matta. Dey take all da good tings our God stay doing, an try change all dat so dey can go buckaloose an make any kine how dey like. Get ony one Boss, our Boss Jesus Christ, an dey say he no good. Da Bible wen say, dat kine peopo goin get punish.
5 I figga lidis: I know you guys know all dat stuff awready, but I like make you guys tink bout da time da Boss wen take da peopo outa Egypt so dey no gotta go back eva, den afta dat, he wen wipe out da peopo dat neva trus him. 6 Same ting wit some angel messenja guys, da one dat neva like stick wit da kuleana dat God wen give um. God wen give um dea own place fo stay, but dey wen bag. Now dey all tie up wit chains foeva. An dey down dea inside da Deep Dark Hole. Den wen da big day come, God goin judge dem. 7 An same ting wit da peopo from Sodom an Gomorrah an all da odda towns aroun dea. Dey wen fool aroun an dey even go cruising fo da angel guys. God wen use dem fo show everybody dat he can punish, cuz he punish dem foeva wit fire.
8 Same ting wit dem bad kine guys nowdays! Dey say dat, cuz dey wen dream um, okay fo dem do bad kine stuff wit dea own body. Dey no like listen to nobody dat get da right fo be da boss. An dey talk stink bout da peopo dat stay awesome. 9 Neva was lidat, wit Michael, da main angel guy. He was fighting wit da Devil bout da body afta Moses wen mahke, but he no dare poin finga da Devil an talk bad to him. He ony tell da Devil, “I like da Boss tell you, ‘No good wat you doing!’ ”
Dey Goin Wipe Out
10 But dose buggas, dey everytime talk stink bout wateva dey no undastan. Jalike da wild animals, dey no tink wen dey do tings. An dat kine stuff goin wipe dem out. 11 Auwe! Dey goin get it! Dey going down da same road jalike Cain. Dey go do any kine dey like fo make money, jalike Balaam. Dey goin wipe out, jalike Korah, wen he wen go up agains Moses.
12 Wen you guys stay eating togedda cuz you get love an aloha fo each odda, dose buggas mess you guys up. Dey ony come by you guys fo eat an party up. Dey ony care fo demself. Dey no shame. Dey say an no do, jalike da clouds dat no mo water an da wind blow um away. Dey jalike trees dat no mo fruit wen pick fruit time. Jalike somebody wen pull up da tree by da roots, an mahke awready. 13 Dem guys ony do shame kine stuff, jalike wen da big kine choppy waves in da storm throw up all kine junk stuff. Dey jalike da stars dat no go wea dey suppose to. God get one place fo dem. Dey goin stay dea fo eva, inside da real dark place.
14 Adam wen get one boy, an dat boy wen get one boy, an dat boy wen get one boy. Six times dat wen happen, an den Enok wen born. You know, Enok wen talk bout dis kine bad guys long time ago. He say,
“Listen, da Boss goin come
Wit tousands an tousands a his spesho guys.
15 He da Judge.
Everybody goin stand in front him,
An he goin show all da bad kine stuff dey wen do,
Da guys dat no mo respeck fo him.
Dey ack like God no matta.
But God, he goin show all da bad kine stuff
Da da guys dat no respeck him wen say agains him.”
Dass wat Enok wen say.
16 Dose guys, dey ony like grumble an blame all da odda peopo. Dey go do any kine how dey like. Dey talk big bout demself. Dey talk good bout da odda peopo, fo make da odda peopo do good kine tings fo dem.
Watch Out!
17 But now, my friends, rememba da guys da Boss Jesus Christ wen send, wat dey wen tell goin happen. 18 Dey wen tell you guys, “In da last times goin get guys goin come dat make fun a da Good Stuff From God. Dey goin do any kine how dey like.” 19 Dose guys come by you guys an split you guys up. Dey no mo Godʼs Spirit inside, ony dea own spirit. Dey ony like do da kine stuff from dis world. 20 My friends, you guys no make lidat. Make yoaself come strong inside, an trus God, cuz you guys trus da spesho stuff from God. Pray wit da power Godʼs Spesho Spirit give you guys. 21 Wateva you guys do, rememba how plenny love an aloha God get fo you guys. Hang in dea an wait, cuz our Boss Jesus Christ give you guys chance. He goin take you guys all da way, so you guys can live to da max foeva.
22 Give um chance to da guys who not shua dey trus God. 23 You guys gotta give da odda guys chance so dey no wipe out, jalike you try take someting outa da fire so no burn up. But watch out you no do da pilau kine stuff jalike dey do.
God Stay Good an Awesome
24 God, he can help you guys no do da bad kine stuff.
He awesome!
He can bring you guys in front him
An make you no mo bad kine stuff,
An you stay feel real good inside.
25 He da ony God!
He da One wen take us outa da bad kine stuff.
We gotta tell how awesome he stay.
He da Big King,
An he get all kine power fo do anyting.
Our Boss Jesus Christ wen make everyting right
Befo time,
An now,
An foeva.
Dass right!
Jesus In Front Pilate, Da Governa
23 Den all da peopo dat wen come togedda take Jesus away fo go in front Pilate, da governa. 2 Dey poin finga Jesus, an say, “Dis guy stay bulai our peopo! He teaching dem bad kine stuff! He say dey no need pay King Cesar his tax. He say dat he da Christ guy, da Spesho Guy God Wen Send, an dat he one king.”
3 Pilate aks Jesus, “Eh, you da King fo da Jews, o wat?”
Jesus say, “Dass right, wat you wen say.”
4 Den Pilate tell da main priest guys an all da peopo, “I no find notting wrong wit dis guy.”
5 But dey say mo strong, “All ova Judea da peopo like beef cuz a da stuff he teaching. He wen start Galilee side. Now, he stay come all da way ova hea.”
Jesus In Front King Herod
6 Pilate hear dat, an he aks Jesus, “You come from Galilee?” 7 Wen Pilate find out dat Jesus come from Galilee, he tell his guys fo take Jesus by Herod. Cuz Herod da one dat stay in charge inside Galilee, an he stay Jerusalem town dat time. 8 Herod, he feel good inside wen he spock Jesus, cuz Herod wen hear bout him an like see him from long time. Herod tink maybe Jesus goin do someting awesome so he can see um. 9 Herod aks Jesus plenny stuff, but Jesus neva say notting. 10 Da main priest guys an da teachas dat teach Godʼs Rules stay dea. Dey poin finga at Jesus real hard. 11 Den Herod an his army guys make fun a Jesus, an show dat dey hate him. Dey put one fancy robe on top him, an send him back to Pilate. 12 Dass how Herod an Pilate wen come friends. Befo dat time dey stay agains each odda.
Dey Say Jesus Gotta Mahke
13 Den Pilate tell da main priest guys, da leada guys, an da peopo fo come. 14 He tell um, “You guys wen bring dis guy by me, an you say he trying fo make da peopo beef agains us Rome guys. I wen aks him plenny stuff in front you, an I no find notting wrong like you guys say, fo poin finga him. 15 An Herod, he neva find notting fo poin finga him too. He wen send him back. You guys know he neva do notting dat say he gotta mahke. 16 So, I goin tell my army guys fo go whip um an let um go.”
17 [Now, every year, da Passova spesho religious time, Pilate gotta let one prisona guy go fo da peopo.] 18 All da peopo was yelling, “Kill Jesus! Let Barabbas go fo us!” 19 You know, da Rome army guys wen throw Barabbas inside jail befo, cuz he lead some a da peopo an dey try fo throw out da leada guys inside Jerusalem. Barabbas even wen kill one guy.
20 Pilate like let Jesus go, so he aks da peopo one mo time. 21 But dey yelling, “Kill Jesus on top one cross! Kill um on top one cross!”
22 One mo time he tell dem, “How come? Wat kine crime dis guy wen do? I no find notting dat say he gotta mahke. So I goin tell my army guys fo whip him an let him go.”
23 But dey stay yelling da top a dea lungs, fo presha Pilate an make um kill Jesus on top one cross, an dey win. 24 So Pilate say dat Jesus gotta mahke, jalike da peopo say. 25 He let Barabbas go, da guy dey pick, dat wen make da peopo beef an wen kill one guy. An he give Jesus to dem so dey can do wat dey like to him.
Dey Kill Jesus On Top One Cross
26 Den dey take Jesus away. One guy name Simon from Cyrene stay coming from da countryside. Da army guys wen grab him, put da cross on top him, an make him carry um behind Jesus. 27 Plenny peopo walking behind Jesus, an some wahines crying. Dey real sad inside cuz a wat happening. 28 Jesus turn an tell um, “Sistas from Jerusalem, no cry fo me. Cry fo yoaself an fo yoa kids. 29 Cuz da time goin come wen you goin say, ‘Lucky now, da wahines dat no mo kids, da wahines dat neva born kids, an da wahines dat neva nurse kids!’ 30 Dat time da peopo goin tell da mountains, ‘Fall down on top us!’ An dey goin tell da hills, ‘Hide us!’ 31 Cuz if dey doing dis kine stuff to one good guy like me, wat goin happen to da peopo dat not good?”
32 Dey take two crook guys wit him. Dey goin kill dem wit Jesus. 33 Dey come to da place name “Da Skull.” Dey hang Jesus on top da cross fo kill him dea. Dey hang da two crook guys on top da odda two crosses, one on da right side an da odda on da left side. 34 Jesus say, “Fadda, let um go fo dis bad ting dey doing. Dey donno wat dey doing!”
Da army guys throw dice fo take Jesus clotheses. 35 Da peopo stand dea an watch um. Da leada guys fo da Jews make fun a him. Dey say, “Eh, he wen take da odda guys outa da bad kine stuff dey stay in. If he da Spesho Guy God Wen Send fo real kine, how come he no can get himself outa dis now?!”
36 Da army guys make fun a him too. Dey come by him an like give him da cheap kine wine fo drink. 37 Dey say, “Eh, if you da King fo da Jews, get yoaself outa dis, den!”
38 Den dey write,
“Dis da King Fo Da Jews,”
an put um on top da cross.
39 One crook guy dat hanging dea talk any kine to him. He say, “Eh, you da Spesho Guy God Wen Send, o wat? Den get yoaself outa dis, an us guys too!”
40 But da odda crook guy scold him, an say, “Eh, you no scared God, o wat? Dey wen say you gotta mahke, too, jalike him. 41 Us guys get da pay fo wat we wen do, but dis guy, he neva do notting wrong.” 42 An he tell Jesus, “Jesus, rememba me wen you come King!” 43 Jesus tell him, “Eh, you get um! An I tell you dis: Today you goin be wit me inside Godʼs Beautiful Place.”
Jesus Mahke
44 Now was bout noon time, an come real dark all ova da place, till three clock, 45 cuz da sun pau shine. Da big curtain inside da temple wen broke in two. 46 Jesus wen yell real loud. He say, “Fadda, I give you my spirit.” Wen he say dat, he mahke.
47 Da captain fo da army guys see wat happen, an he say good stuff bout God. He say, “Fo shua, dis guy neva do notting wrong! How come dey wen kill him?”
48 Da peopo dat wen come dea fo see wat goin happen see dat, an dey pound dea chests, fo show dat dey know someting real bad wen happen. Den dey go home. 49 All da guys dat wen know Jesus, an da wahines dat wen come dea wit him all da way from Galilee side, dey standing far away, watching all da stuff dat stay happening.
Dey Bury Jesus
50 Had one guy name Joseph. He one a da Jewish National Council guys. He good an everytime do da right ting. 51 He come from Arimatea, Judea side. Wen da odda guys wen like kill Jesus, Joseph neva vote wit dem. He trus God, an stay waiting fo him fo come King. 52 He go in front Pilate, an aks him fo Jesus body. 53 He take Jesus down from da cross, wrap him up inside one linen cloth, an put him inside one cave somebody wen cut inside da rock fo bury somebody, but neva get one mahke guy inside yet. 54 Dat day was da Day Fo Make Ready Fo Da Passova, an da Rest Day almos come.
55 Da wahines dat stick wit Jesus from Galilee side, dey go wit Joseph, an see da cave, an how dey put Jesus mahke body inside. 56 Den dey go home fo make da spices an da perfume ready fo his body.
On da Rest Day dey rest, jalike da Bible say fo do.
Copyright © 2000 by Wycliffe Bible Translators International. All rights reserved