M’Cheyne Bible Reading Plan
Godʼs Kids
3 Tink bout da kine love an aloha da Fadda wen show us! He even wen call us his kids! An we his kids fo real kine, you know. Az why da peopo inside da world donno wat kine peopo us, cuz dey donno wat kine God. 2 My good friends, we Godʼs kids awready. God neva show us yet wat kine we goin be bumbye. But we know dat wen Christ come back, we goin be jalike him, cuz we goin see him jalike he stay. 3 Everybody dat know dat, an stay trus Christ, an wait fo him, dat guy make his own heart clean inside, jalike Christ stay clean inside.
4 Whoeva do bad kine stuff wen broke Godʼs Rules, cuz wen you do bad kine stuff, dat mean you no listen to Godʼs Rules. 5 You guys know dat Christ wen come fo throw out da bad kine stuff we wen do. Christ, he no do bad kine stuff, eva. 6 Whoeva stay tight wit Christ no stay do bad kine stuff. Whoeva stay do bad kine stuff, jalike dey neva see Christ o know him fo real kine.
7 My good friends, no let nobody bulai you guys. Whoeva stay do da right kine tings, dey stay right, jalike Christ stay right. 8 Whoeva stay do bad kine stuff, dey da Devilʼs kid, cuz from da first time da Devil stay do bad kine stuff. Dass why Godʼs Boy wen come, fo bus up da bad kine stuff da Devil stay doing.
9 Whoeva Godʼs kids no stay do bad kine stuff, cuz jalike God stay live inside dem now. Dey no stay do bad kine stuff, cuz dey come from God. 10 Dis how we can know who Godʼs kids an who da Devilʼs kids. Whoeva no do da right kine tings, not Godʼs kids. Whoeva no mo love an aloha fo dea brudda an sista, dey not Godʼs kids too.
Get Love An Aloha Fo Each Odda
11 Da ting you wen hear from da first time say dis: We gotta get love an aloha fo each odda. 12 Tink bout da story inside da Bible from befo time. No make like Cain. He wen stick wit da Bad Guy, da Devil, an kill his own brudda. How come he wen kill him? Cuz Cain wen do bad kine tings, an his brudda wen do da right kine tings.
13 My bruddas an sistas, wen da peopo inside dis world hate you guys, no let dat blow yoa mind. 14 Us guys not mahke inside no moa, but we wen come alive inside fo real kine. An how come we know dat? Cuz we get love an aloha fo our bruddas an sistas, az why. Whoeva no mo love an aloha, stay cut off from God, jalike dey stay mahke inside. 15 Whoeva hate dea brudda an sista, jalike dey one guy dat kill peopo. An you know dat one guy dat kill peopo no mo da real kine life dat stay to da max foeva. 16 Dis how we know wat real love stay like: cuz Christ wen give himself fo mahke fo us. So den, we gotta be ready fo do da same kine ting fo our bruddas an sistas. 17 If get somebody dat get plenny stuffs, an dey see dat dea brudda o sista no mo notting, but dey no mo pity fo dem, how dey can say dat dey get love an aloha fo God? No can. 18 My good friends, no can show love wit talk ony, but gotta show da kine love dass fo real, an do good kine tings fo everybody.
We No Need Come Scared In Front God
19 So, wen us guys get dat kine love an aloha, den we know dat we stick wit wass true. We tell our own heart dat everyting stay okay now, da way God see us. 20 But no matta inside our heart we tinking plenny bout da bad kine stuff we wen do, same time, we know dat God mo big den our heart, an he know everyting bout us guys. 21 My good friends, if our heart no tell us we wen do bad kine stuff, we know same time we no need be shame in front God. 22 An we get from God wateva we aks him fo do, cuz we do wat he tell us, an do wat he like. 23 Dis wat God wen tell us fo do: Trus his Boy Jesus Christ, da Spesho Guy God Wen Send, an get love an aloha fo each odda, jalike he wen tell us. 24 Everybody dat do wat God tell us, dey stay tight wit God, an God stay tight wit dem. Dis how we know dat God stay tight wit us, cuz God wen give us his Spirit.
Da Story Bout Da Widow An Da Judge
18 Jesus wen tell his guys one story fo show dem dat dey gotta pray everytime an no give up. 2 He say, “Inside one town, had one judge dat no scared God an no mo respeck fo da peopo. 3 Had one widow ova dea inside dat town dat stay come by da judge fo beg him, ‘Please, make tings right fo me! Cuz get one guy dat stay ripping me off.’ 4 Long time da judge neva like do notting. Den in da end he tink, ‘No matta I no scared God an I no mo respeck fo da peopo, 5 dis widow stay bodda me, so I goin make tings right fo her, so she no come no mo an wear me out!’ ”
6 Den da Boss Jesus wen tell his guys, “Tink bout wat da judge wen say, dat neva like do da right ting. 7 You guys tink God no goin make tings right fo da ones he wen pick, wen dey stay beg him day an nite? You tink he goin take long time fo help dem? 8 I telling you, he goin make tings right fo dem right away. But I da Guy Dass Fo Real, an wen I come back, you tink I goin find peopo dat trus God hea on top da earth, o wat?”
Da Story Bout Da Pharisee Guy An Da Tax Guy
9 Jesus tell one story fo da guys dat stay shua dey good guys an all da odda guys bad. 10 He say, “Two guys wen go to Godʼs Temple fo pray, one Pharisee guy, an one guy dat collect money fo tax fo da govermen. 11 Da Pharisee guy stand up an pray by himself lidis, ‘God, tank you dat I no stay like da odda guys, da guys dat steal, no do da right ting, fool aroun da odda guyʼs wife, an even like dis guy hea dat take money fo tax. 12 Two times every week, I no eat so I can pray, an I give da temple ten percent from all da money I get.’ 13 But da guy dat take money fo tax wen stand up far away. He no even like look up to da sky, but he beat on his chest an say, ‘God, I one guy dat wen do bad kine stuff. Give me chance!’ ” 14 Jesus say, “I telling you, wen dis tax guy go home, he get um right wit God awready. But not da Pharisee guy. Cuz whoeva make himself importan goin come not importan, an whoeva make himself not importan goin come importan.”
Jesus Pray Fo Da Small Kids
15 Da peopo wen bring dea small kids by Jesus, cuz dey like fo him put his hands on top dea heads an pray fo dem. Wen Jesus guys see dat, dey wen scold da peopo cuz dey wen do dat. 16 But Jesus tell da kids fo come, an he say, “Let da small kids come by me, an no stop dem, cuz da peopo dat get God fo dea King, inside demself dey jalike dese kids. 17 Dass right! An I like tell you guys dis too: Whoeva no take God fo be his King jalike one small kid, he no can get God fo his King.”
Da Rich Guy
18 One leada guy wen tell him, “Teacha, you good. Wat I gotta do fo get da real kine life dat stay to da max foeva?”
19 Jesus tell him, “How come you say I good? Ony get One dat stay good, dass God. 20 You know Godʼs Rules: ‘No go fool aroun da odda guyʼs wife, no go kill nobody, no rip off nobody, no bulai any kine bout nobody, show respeck fo yoa fadda an mudda.’ ”
21 Da guy wen say, “Ho, Teacha! From small kid time I stay do all dat stuff.”
22 Wen Jesus hear dat, he tell him, “Ony one mo ting you neva do dat you gotta do. Go sell all da stuffs you get, an go give da money to da peopo dat no mo notting. Den garans you goin get plenny good kine stuffs inside da sky. Den come wit me fo be my guy.” 23 Da guy wen hear dat, an he come real sad, cuz he get plenny rich stuffs.
24 Jesus look at him an say, “Az why hard fo one rich guy fo get God fo his King! 25 Stay mo easy fo one camel go thru da puka in one needle, den fo one rich guy fo get God fo his King.”
26 Da peopo dat wen hear him, dey say, “If dass how gotta be, who can get outa da bad kine stuff he stay in, den?”
27 Jesus tell, “No mo nobody dat can do um, but ony God, he da One dat can do um all.”
28 Den Peter tell, “Eh Boss, look! We wen leave everyting we get fo go wit you.”
29 Jesus say, “Az right! An I tell you, Everybody dat leave his home o wife o bruddas o fadda an mudda o kids fo God da King, 30 he goin get plenny mo now in dis time, an bumbye he goin get da real kine life dat stay to da max foeva.”
Jesus Say One Mo Time He Goin Mahke
31 Jesus wen take his twelve guys by da side a da road, an tell um, “Eh, listen, we going Jerusalem. I da Guy Dass Fo Real, an everyting da guys dat wen talk fo God befo time wen say bout me, goin happen. 32 Dey goin turn me ova to da guys dat not Jews. Dey goin make fun a me, an talk any kine to me, an spit on me, an whip me hard, an kill me. 33 But day numba three, I goin come back alive.”
34 Jesus guys, dey neva know wat he say. Jalike someting stay hiding from dem.
Jesus Make One Blind Begga Guy Come Good
35 Jesus come to Jericho town, an one blind guy stay sitting an begging by da side a da road. 36 Da blind guy hear all da peopo pass, an he aks um, “Wass happening?”
37 Dey tell him, “Jesus from Nazaret stay pass.”
38 Den he yell, “Jesus! You King Davidʼs boy! Pity me an give me chance!”
39 Da peopo in front scold him an tell him fo shut up. But he yell mo loud, “Davidʼs boy! Pity me an give me chance!”
40 So Jesus wen stop an tell da peopo fo bring da blind guy by him. Wen he wen come near, Jesus tell him, 41 “Wat you like me do fo you?”
He say, “Boss, I like see.”
42 Den Jesus tell him, “See den! You wen trus me, so now, you can see.”
43 Right den an dea da guy wen see, an he wen go wit Jesus, talking bout how awesome God. Wen all da peopo see dat, dey wen tank God an talk good bout him.
Copyright © 2000 by Wycliffe Bible Translators International. All rights reserved