M’Cheyne Bible Reading Plan

Christ Help Us

2 Eh, my good friends! I stay write dis stuff to you guys, so you no do bad kine stuff. But wen get somebody dat do bad kine stuff, we get one Guy dat stay talk to his Fadda fo us. Dass Jesus Christ, da Spesho Guy God Wen Send. He everytime stay do da right ting. ² Jesus, he da one dat wen mahke fo be da sacrifice dat let us guys go an hemo da shame fo all da bad kine stuff we wen do. Jesus wen mahke, not ony fo us, but fo da bad kine stuff dat all da peopo inside da whole world wen do. ³ Dis how we stay shua we know God fo real kine: cuz we do da tings he tell us fo do. ⁴ Whoeva say “I know God,” but dey no do wat God tell us fo do, dey one bulaia. Dey donno da true way. ⁵ But whoeva do wat God say, dat show dey get plenny love fo God, an da love an aloha stay coming good to da max inside dem. Dass how we know we Godʼs guys. ⁶ Whoeva say dey stay tight wit God, dey gotta do everyting jalike Jesus wen do.

Da New Ting You Guys Gotta Do

⁷ My good friends, I no write you guys one new ting God say you guys gotta do, but one old ting you guys wen hear from da start. Dis old ting, dass da same stuff you guys wen hear befo. ⁸ Still yet, I writing you guys one new ting God say you guys gotta do. Da new ting stay true bout Jesus an bout you guys. Cuz wen you guys do wat God say, jalike da dark stay going away, an da real light stay shining awready.

⁹ Dis wat God say: whoeva say dey stay inside da light, but hate dea brudda o sista, jalike dey stay inside da dark still yet. ¹⁰ Whoeva get love an aloha fo dea brudda an sista, jalike dey stay inside da light, an no mo notting inside dem dat goin make anybody do bad kine stuff. ¹¹ But whoeva hate dea brudda o sista, jalike dey stay inside da dark. Dey walk aroun inside da dark, an dey donno wea dey going, cuz da dark make um blind.

¹⁵ No get love fo da bad kine stuff dat stay inside dis world. If anybody get love fo dis world, den dey no mo love fo da Fadda. ¹⁶ You know, all da bad kine stuff dat stay inside dis world, da kine da peopo like get real bad ony fo make demself feel good, da kine stuff dey like look at an get ony fo demself, an da kine stuff dey get dat let um make big show, all dat no come from da Fadda, but from dis world. ¹⁷ Dis world an all da stuff da peopo like get, dat goin all pau. But da guy dat do wat God like him fo do, he goin live fo real kine foeva.

Da Peopo Dat Go Agains Christ

¹⁸ My good friends, da last time stay now. You wen hear dat one guy goin come dat go agains Christ, da Spesho Guy God Wen Send. You know, get plenny guys awready dat go agains Christ. Dass how we know da last time stay now. ¹⁹ Dem guys wen go way from us, but dey neva come from us. If dey wen come from us, den dey wen stay wit us. But dey wen go way, an dat show dat all dem guys neva come from us.

²⁰ But you guys, you wen get power from Godʼs Good An Spesho Spirit, an you guys all know wass true. ²¹ I writing you guys cuz you awready know wass true. You guys know dat if anybody bulai, dass cuz dey no like you fo know wass true, yeah?

²² Kay den. Who da bulaia guys I talking bout? Anybody dat say dat Jesus not da Spesho Guy God Wen Send, dey da bulaia guys. Dey da guys dat go agains Godʼs Spesho Guy. Dey no listen to da Fadda o his Boy. ²³ Da peopo dat no listen to Godʼs Boy, God not dea Fadda. But da peopo dat say dat Jesus da Spesho Guy God Wen Send, God dea Fadda.

²⁴ Make shua you guys stick wit wat you guys wen hear from da first time. If you guys stick wit dat, den you goin stick wit God da Fadda an his Boy too. ²⁵ Dis wat he wen say he goin give us -- da real kine life dat stay to da max foeva.

²⁶ I writing you guys dis stuff bout da peopo dat bulai you guys. ²⁷ But you guys wen get power from Godʼs Spesho Spirit. He awready stay inside you guys, so you guys no need nobody fo teach you guys. Godʼs Spirit stay teach you guys bout everyting, an wat he teach stay true. He no bulai. So, jalike he wen teach you guys, stick wit him.

²⁸ So now, my good friends, stick wit Jesus, so dat wen he come back, we no need be scared o shame in front him. ²⁹ You guys know dat Godʼs Spesho Guy everytime do da right ting. So you guys know dat everybody dat do da right ting, dey Godʼs kids.

Da Bad Kine Stuff

17 Jesus tell da guys he teaching, “Tings dat make peopo do bad kine stuff goin happen, but auwe fo da guy dat make anodda guy do um! ² Mo betta take one big stone, tie um aroun da guyʼs neck, den throw him inside da deep ocean fo drown, so he no can make even one a my small kids hea do bad kine stuff. ³ So watch out wat you do!

“If yoa brudda do bad kine stuff, scold um, an if he come really sorry an pau do um, den no stay huhu wit him, but let him go. ⁴ If he do bad ting fo hurt you seven times in one day, an he come back by you seven times, an say, ‘I really sorry, an I pau do dat,’ den no stay huhu wit him, but let him go.”

Da Guy Dat Trus God Fo Real Kine

⁵ Da guys da Boss Jesus like send all ova tell him, “Help us trus God moa.”

⁶ Da Boss say, “If you trus God litto bit jalike one small mustard seed, you can tell dis mulberry tree, ‘Pull yoaself up an go plant yoaself in da ocean,’ an da tree goin do um.”

Wat One Worka Guy Gotta Do

⁷ “Wat you tink? If get one worka guy dat plow da dirt fo his boss, o take care his sheeps, wen da guy come inside from da field, you tink da boss goin tell um, ‘Come on! Eat’? No way! ⁸ Da boss goin say, ‘Make my suppa, go get ready, an bring um all fo me so I can eat an drink. Afta dat, you goin eat an drink.’ Dass wat he goin say. ⁹ You tink he goin tank da worka guy cuz he wen do wat da boss tell um fo do? No way! ¹⁰ Same ting. Wen you guys go do everyting you suppose to, den you goin say, ‘We jus worka guys. We ony wen do wat we suppose to.’ ”

Jesus Make Ten Lepa Guys Come Good

¹¹ Jesus stay going Jerusalem, an he pass by wea Samaria an Galilee come togedda. ¹² He go inside one small town, an ten lepa guys wen come by him. Dey stand far away ¹³ an yell, “Jesus, Boss, pity us!”

¹⁴ Jesus see um an tell um, “Go let da priest guys check you guys out.” An wen dey stay going, dey wen come good.

¹⁵ One a da guys see dat he wen come good. He come back, saying good stuff bout God wit one loud voice. ¹⁶ He throw himself down by Jesus feet, an tell him “Mahalo plenny!” He one guy from Samaria.

¹⁷ Jesus wen tell, “No had ten guys dat wen come good? Wea da odda nine? ¹⁸ How come da odda guys no come back an tell how awesome God stay, ony dis one guy dat not Jewish?” ¹⁹ Den Jesus tell da guy, “Get up! Go! You wen trus me, dass why you wen come good.”

God Da King Goin Come

²⁰ One time, da Pharisee guys wen aks Jesus wen God da King goin come an take ova. Jesus tell, “Wen God da King take ova, no goin get sign notting fo tell peopo wass goin happen. ²¹ An da peopo no goin say, ‘Eh! He stay ova hea!’, o ‘Eh! He stay ova dea!’. Cuz God awready stay King inside da peopo.”

²² Den he tell da guys he teaching, “Eh, you know, I Jesus, da Guy Dass Fo Real. Goin get one time, wen you guys goin tink, ‘Eh! Fo real kine, I like see Jesus come back now!’ But you no goin see me. ²³ Da peopo goin tell you, ‘Eh! He stay ova hea!’ o ‘Eh! He stay ova dea!’ But no listen, no go wit dem. ²⁴ Cuz I da Guy Dass Fo Real, an wen I come back, goin be real quick, jalike wen da lightning flash an make da sky come light from one side to da odda side. ²⁵ But first I gotta suffa plenny stuff, an da peopo dat stay nowdays no goin take me in.

²⁶ “I da Guy Dass Fo Real, an wen I come back, goin be jalike befo time wen Noah wen stay. ²⁷ Dat time da peopo wen eat an drink, dey wen marry an give dea girls fo marry, till da day Noah wen go inside da big boat. Den da big water wen come an kill um all. ²⁸ Goin be jalike wen Lot wen stay. Everybody stay eating an drinking, buying stuff an selling um, planting seed, an building house. ²⁹ But da day Lot wen go way from Sodom, fire an sulfur wen come down from da sky on top dem an kill um all. ³⁰ Dass how goin be wen I show up, me, da Guy Dass Fo Real.

³¹ Dat time da guy dat stay resting on top his flat roof house betta not go inside fo get his stuffs. Same ting, da guy inside da field betta not go back fo get someting. ³² Tink bout Lotʼs wife! ³³ Whoeva try hang on to his life goin lose um. An whoeva give up his life goin hang on to um. ³⁴ I telling you guys, dat nite wen I come, two peopo goin stay in one bed. God goin take one, an leave da odda. ³⁵ Two wahines goin stay grinding fo make da wheat flour togedda. God goin take one, an leave da odda.” ³⁶ [Two guys goin stay inside one field. God goin take one, an leave da odda.]

³⁷ Den da guys Jesus teaching say, “Wea, Boss?”

Jesus tell, “Wen dat happen, you guys goin know wea I stay. Jalike everybody know wea get someting mahke, cuz dass wea da scavenja birds come togedda.”