M’Cheyne Bible Reading Plan
Da Peopo Dat Stay Spesho Fo God
2 So den. No do no bad kine stuffs. No bulai nobody. No say one ting an do anodda. No get jealous. No talk stink notting. 2 Jalike da babies dat jus wen born dey try get da milk, you guys go get da kine stuff dat stay good fo yoa spirit, so dat can make you guys come mo an mo strong inside everytime, an God still goin take you guys outa da bad kine stuff. 3 Cuz now you guys find out dat da Boss get plenny good heart.
4 Go stick wit Christ. He jalike da main stone da builda guys wen throw out, but den God wen still pick him. He stay alive, an God say he worth plenny. 5 Eh, you guys, come tight wit Christ so dat God can use you guys too, jalike you guys da stones fo make one place fo Godʼs Spirit. An you guys stay alive too, jalike Christ. All you guys goin be jalike priest guys dat stay spesho fo God. Jalike you guys goin give God sacrifices, da kine sacrifices God like, cuz Jesus Christ wen mahke fo all you guys. 6 Cuz inside da Bible God say,
“Eh, try look. I put down da corner block
Right hea inside Jerusalem, inside Zion town,
Dass da one I wen pick.
Dat stone worth plenny to me.
Anybody dat goin trus him plenny,
Dey no need worry notting.”
7 Jesus, he jalike dat stone. You guys dat trus him, he worth plenny to you guys, too. But den, fo da peopo dat no trus him, da Bible say,
“Da stone da builda guys wen throw out,
Dat stone wen come da corner block,
Da one dey wen need.”
8 An da Bible say dis too,
“Dis da stone dat wen make da peopo fall down.”
Dey fall down cuz dey no do wat God say. Dass wat God wen say goin happen to dem.
9 But you guys da one God wen pick. You da priest guys fo da King. You guys da peopo dat stay spesho fo God. You, da peopo God say, “Dey mines.” So den, you guys goin tell everybody all da good stuff God wen do. He wen tell you guys fo come outa da bad kine stuff, an stick wit da good kine stuff he like us do. Jalike you go outa da dark an come inside da light. 10 Befo time you guys wen make jalike you guys not one ohana, but now you guys Godʼs ohana. Befo time God wen like give you guys chance, but you guys neva take um. Ony now, you guys take um.
11 My friends, you guys no mo house inside da world. Dass why I stay begging you guys fo no do da bad kine stuff you guy like do jus cuz you peopo. Deep inside you, da bad kine stuff stay fight wit you. 12 Make shua you guys do da right tings in front da peopo dat donno God, so dat, no matta dey poin finga you guys now, dey goin ony see da good kine stuff you guys do. An den, wen Christ come back, dey goin tell how awesome God stay.
Listen To Each Odda
13 Listen, an do wat all da leadas fo da peopo say, an do um fo da Boss. Listen to da king, cuz he da main leada. 14 Listen to da governa guys, cuz dey da one da king wen send fo punish da guys dat do da bad kine stuff, an fo talk good bout da guys dat do da right kine stuff. 15 Dass why God like you guys fo do da good kine stuff, so da guys dat donno notting, an no tink right, dey no can poin finga you. 16 No matta you guys can go do wateva you like, no tink you can make excuse fo make any kine. Make like you work fo God. Rememba, he own you. 17 Get respeck fo everybody. Get love an aloha fo da bruddas an sistas dat trus Christ. Get plenny respeck fo God. An get plenny respeck fo da king.
Worka Guys, Listen To Yoa Boss
18 You worka guys, listen to yoa boss, an get respeck fo dem. Not ony fo da boss dat make good to you, but fo da boss dat give you hard time too. 19 Get one guy dat get punish fo someting he neva do, but he take um, cuz he still tinking bout God. God say dass good. 20 You tink God owe you someting if dey bus you up cuz you wen do someting bad, an still yet you take um? No way! But den, if you do someting good, an suffa fo dat, an still yet take um, God goin say dass good. 21 Az why Christ wen tell you guys fo come tink bout dis: He wen suffa fo you guys, an dass jalike one picha, so you guys can do jalike he wen do. 22 Da Bible say, “He neva do notting wrong. Nobody wen hear him bulai eva.” 23 Wen dey wen say any kine to him, he neva say any kine back. Wen he wen suffa, he neva say he goin pay um back. But he wen let God da Judge take care dat, cuz he know God do da right ting. 24 Christ, he da One dat wen take wit him all da bad kine stuff we wen do, wen he wen go mahke on top da cross. He wen do dat so us guys no gotta do da bad kine stuff no moa. Now, we no stay live fo do da bad kine stuff. We ony stay live fo do da right kine stuff. Christ wen mahke on top da cross fo us so we can come good. 25 You guys was jalike da sheeps dat stay lost, but now you guys wen come back to God. He make shua he take care you guys good, jalike da sheep farma guy take care da sheeps.
Jesus Send His Twelve Guys All Ova
9 Jesus tell his twelve guys fo come togedda, an he give um da right an da power fo make all da bad kine spirits let go peopo, an make all kine sick peopo come good. 2 Den he send um all ova fo tell everybody bout how dey can get God fo dea King, an fo make da sick peopo come good. 3 He tell um, “No take notting fo da trip; no walking stick, no bag, no bread, no money, no extra clotheses. 4 Wen you guys go somebodyʼs house, stay dea till you go way from dat town. 5 If da peopo inside da town no like you guys come, an no like hear wat you guys teach, den wen you guys go outa da town, dust da dust from yoa feet, fo show da peopo dea dat God no like if dey no listen.” 6 So da guys wen go out an go from one small town to anodda, an dey teach da Good Stuff From God, an make da sick peopo all ova da place come good.
King Herod Come All Mix Up
7 Dat time King Herod wen hear bout all dat wen happen. An he come all mix up, cuz some peopo wen say John Da Baptiza Guy, he wen come back alive. 8 Odda peopo say dat Elijah wen show up. An oddas dat one guy dat wen talk fo God long time ago wen come back alive. 9 Herod say, “I wen make my army guys cut off Johnʼs head. Den who dis guy? I stay hearing bout all da kine stuff he do.” An Herod wen like see Jesus.
Jesus Feed Five Tousand Guys
10 Da guys Jesus wen send all ova da place come back, an dey tell Jesus wat dey wen do. Den he take dem wit him an dey go way by demself to Betsaida town. 11 But all da peopo wen hear dat Jesus dem stay ova dea, so dey go dea too. Jesus give da peopo his aloha. He tell um bout how dey can get God fo dea King, an he make da sick peopo come good.
12 Wen da sun stay going down, da twelve guys wen come by him an say, “Send all da peopo away so dey can go da small towns an odda places aroun hea an get someting fo eat an some place fo sleep, cuz ova hea no mo notting.”
13 Jesus say, “You guys, you give um someting fo eat.”
Dey say, “We ony get five breads an two fishes. You like us go buy food fo all dis peopo?” 14 (Had bout five tousand guys ova dea.)
But he tell his guys, “Make everybody sit down, like fifty ova hea, fifty ova dea.” 15 His guys wen do dat, an everybody sit down. 16 Jesus take da five breads an da two fishes. He look up da sky, an tell God “Eh God! You good heart fo give da peopo food!” an broke da bread an da fishes. Den he give um to his guys fo give to da peopo. 17 Dey all wen eat, an come full. His guys wen take twelve big baskets an fill um up wit da lefovas.
Wat Peter Say Bout Jesus
18 One time Jesus wen pray in one place wea neva have nobody, an ony his guys wen stay dea wit him. He aks um, “So! Who da peopo tink me?”
19 Da guys say, “Some guys say you John Da Baptiza Guy. Odda guys say Elijah. An odda guys say you one guy dat wen talk fo God long time ago, an now you come back alive.”
20 He aks dem, “Kay den, wat bout you guys? Who you guys tink me?”
Peter say, “You da Christ Guy, da Spesho Guy God Wen Send.”
Jesus Tell Um He Gotta Mahke An Come Back Alive
21 Jesus tell um, “You guys betta not tell nobody dat I da Christ Guy, da Spesho One God wen send.” 22 He say, “I da Guy Dass Fo Real. I gotta suffa plenny stuff. Da older leadas, an da main priest guys, an da teachas dat teach Godʼs Rules, dey goin figga I not Da Guy Dass Fo Real, an dey goin kill me fo dat. But day numba three, I goin come back alive.”
23 Den he tell all dem, “Whoeva like stick wit me, dey gotta make up dea mind dat dey no goin be dea own boss no moa. Goin be hard, jalike dying on top one cross every day. An den dey can stick wit me. 24 If bodda you dat you goin mahke, fo shua you goin mahke. But if you like do everyting you do fo me, an no bodda you if you mahke fo dat, den you goin live fo real kine. 25 Dis poho: one guy get everyting inside dis world, but end up losing himself, an no mo life inside. 26 If one guy stay shame a me an da tings I say, den me, da Guy Dass Fo Real, I goin be shame a him wen I come back. I goin be awesome jalike my Fadda, wen I come back wit my spesho angel guys. 27 Dass true, wat I telling you guys: Some a da peopo dat stay hea now, dey no goin mahke befo dey see how stay wen God da King.”
Jesus Come Diffren
28 Bout one week lata, Jesus wen take Peter, John, an James wit him up one mountain fo pray. 29 Wen he stay praying, his face wen change an he look real diffren. His clotheses come bright jalike da lightning. 30 Right den an dea two guys, Moses an Elijah, come outa no wea, an dey stay talking wit Jesus. 31 Dey awesome. Dey talk bout how Jesus goin do everyting, jalike God wen say, cuz pretty soon he goin mahke Jerusalem side. 32 Peter an his friends wen sleep. But wen dey wake up, dey see Jesus, an da two guys standing dea wit him. An he look awesome. 33 Wen da two guys wen start fo go way from Jesus, Peter tell him, “You know wat, Boss? Good we stay ova hea! We goin make three shacks, one fo you, one fo Moses, an one fo Elijah!” (He neva know wat he was saying.)
34 Wen Peter still talking, one cloud wen come an cover um. An his guys come real scared. 35 Den one voice from inside da cloud say, “Dis my boy, da One I wen send. Listen to him!”
36 Wen da voice pau talk, ony Jesus stay dea. Dat time da guys he teaching no tell nobody bout wat dey wen see.
Jesus Make One Bad Kine Spirit Let Go One Boy
37 Da nex day dey wen go down from da mountain, an plenny peopo come fo meet Jesus. 38 One guy wen yell, “Teacha! I beg you, look my boy, my ony boy! 39 Everytime one bad kine spirit take um ova, right den an dea he yell, an roll aroun on top da groun, an foam come outa his mout. Da bad kine spirit hurt him everytime, an no like let him go. 40 I wen beg yoa guys fo throw um out, but dey no can.”
41 Jesus say, “You guys! Nowdays nobody even trus God! You guys ony know how do wrong stuff! How long I gotta be wit you guys an put up wit you guys? Bring da boy ova hea!”
42 Wen da boy stay coming, da bad spirit wen throw him down on top da groun an da boy shake all ova. But Jesus wen scold da bad spirit, an make da boy come good, an wen give him back to his fadda. 43 Dat wen blow da peopoʼs minds wen dey see Godʼs awesome power.
Jesus Tell Again Dat He Goin Mahke
Da peopo still tinking plenny bout all da stuff Jesus stay doing, an he wen tell his guys, 44 “No foget wat I goin tell you now! I da Guy Dass Fo Real. But goin get one guy goin set me up an turn me ova to some odda guys.” 45 But Jesus guys neva know wat dat mean. God neva let dem undastan till lata, an dey scared fo aks Jesus.
Who Da Numba One Guy?
46 Jesus guys wen start fo make argue bout who da numba one guy. 47 Jesus wen know wat dey tinking, so he tell one small kid fo stand by him. 48 Den he tell um, “Whoeva take in one small kid jalike dis kid cuz da kid my guy, dat guy take me in too. An whoeva take me in, dey take in da One dat wen send me too. Da guy dat put himself last, he goin be mo importan, jalike he goin come first.”
Whoeva Not Agains You, Dey Fo You
49 John say, “Boss, we wen spock one guy making da bad kine spirits let go da peopo, an using yoa name fo do um. An we tell him fo no do dat, cuz he no come from us guys.”
50 Jesus tell him an da odda guys, “No stop him, cuz whoeva not agains you, dey fo you.”
Da Peopo Inside One Small Town Inside Samaria No Like Jesus
51 Da time stay near wen Jesus going up to da sky, an he make up his mind fo go Jerusalem. 52 He send some messenja guys befo him so dey can get tings ready fo him. Dey go inside one small town Samaria side fo find one place fo stay dat nite. 53 But da peopo ova dea, dey no like him fo stay dea, cuz he going Jerusalem, an dey no like Jerusalem peopo. 54 Wen his guys James an John see dat, dey aks him, “Boss, you like us tell God fo send down fire from da sky fo kill um?” 55 But Jesus turn aroun an scold dem. 56 An dey wen go one nodda small town.
Da Guys Dat Say Dey Like Go Wit Jesus
57 Jesus dem stay walking down one road, an one guy tell him, “I going wit you wea eva you go.”
58 Jesus tell him, “Da foxes get hole fo house, an da birds get nest. But me, Da Guy Dass Fo Real, I no mo no place fo lay down.” 59 He tell anodda guy, “Come wit me. Be my guy.”
But da guy say, “First let me go bury my fadda.”
60 Jesus say, “You gotta let da guys dat no mo life inside bury dea own mahke guys. But you, go tell da peopo how dey can get God fo dea King.”
61 Anodda guy say, “Boss, I goin wit you, but first let me go back fo tell my ohana goodbye.”
62 Jesus say, “Da guy dat stay plowing da field, den look back, everyting come kapakahi. Dat kine guy no good fo work fo God da King.”
Copyright © 2000 by Wycliffe Bible Translators International. All rights reserved