M’Cheyne Bible Reading Plan
“Aloha!”
1 Dis letta from Peter. Jesus Christ wen send me all ova da place fo tell peopo da Good Stuff from him.
I stay writing to all you guys dat God wen pick. You guys make house all ova Pontus, Galatia, Cappadocia, Asia, an Bitynia, no matta, you guys not from ova dea. 2 God da Fadda wen pick you guys fo be his guys, cuz he wen know you guys way befo you guys was born. Godʼs Spirit wen make you guys spesho fo him, so you guys can do everyting Jesus Christ tell you guys fo do. Jesus wen mahke fo you guys. Wen you guys do everyting Jesus tell you fo do, dass jalike God sprinkle Jesus blood on top you guys fo show dat you guys stay spesho fo him.
I like God do plenny good tings fo you guys, an help you guys hearts fo rest inside.
We Stay Trus God, An Our Hearts Wait Fo Him
3 I like everybody fo tell how good God our Fadda an his Boy, da Boss Jesus Christ, stay. God, his Fadda, he give us guys plenny chance. Wen Jesus Christ wen mahke, he wen come back alive again. So den, Christ wen make us live new kine life, jalike we wen born one mo time. Dass why we stay trus Christ, cuz we know fo shua he goin take care us bumbye. 4 Jalike one fadda leave stuffs fo his kids wen he mahke, Jesus wen make good tings ready fo us in da sky. Da stuff he goin give us no goin get wipe out, o come pilau, o come pau. 5 You guys trus God, an he get plenny power fo help you guys. He take care you guys, an he no let nobody hemo you guys from him. Wen da last time come, he goin show how he wen take you guys outa da bad kine stuff you stay in.
6 Dass why you guys feel plenny good inside, no matta now fo litto wile you guys gotta suffa plenny, cuz you get all kine hard time. 7 Stay happening lidat, so dat everybody goin see dat you guys trus God fo real. Jalike dey put da gold inside da fire fo wipe out all da junk stuff. Dass jalike why you guys suffa now, fo wipe out da junks you guys get inside, an fo show everybody dat you guys trus God fo real. All dat mo betta den da gold. Cuz bumbye wen Jesus Christ come back, da peopo goin tell how awesome he stay, an dey goin get plenny respeck fo him.
8 No matta you guys neva see Jesus, still yet you get love an aloha fo him. You guys still no can see him, but still yet you guys trus him. You guys feel so plenny good inside, you no can tell how awesome you feel. 9 Cuz you guys stay getting da main ting you guys trus God fo: he hemo da bad kine stuff you guys stay in from you guys.
10 Da way God stay hemo da bad kine stuff you guys stay in from you guys, da guys dat wen talk fo God long time ago, dey wen talk bout wat stay happening right now. Dey wen tell bout how God goin do plenny stuff fo you guys. Dem talka guys wen look real good, an check out plenny stuffs, fo find out bout da good ting you guys get. 11 Christʼs Spirit inside dem wen tell um how Christ goin suffa, an afta dat, all da awesome tings dat goin happen. So dem guys wen go try find out da time an how goin stay wen all dat stuff goin happen. 12 Da Spirit wen show da talka guys dat all dat kine stuff dey talking bout, no goin happen fo dem, but bumbye goin happen fo you guys. An now you guys wen hear bout um, cuz Godʼs Spesho Spirit from da sky wen help odda guys tell you guys da Good Stuff From God. You know, even da angel messenja guys like figga out all dis stuff plenny.
God Tell Us Fo Stay Spesho Fo Him
13 So den, get yoaself ready fo tink good bout all dis stuff. Watch out! Make shua yoa head stay strait. Stay ready fo trus Jesus Christ all da way till God bring him back, cuz dass wen God goin give you guys all good kine tings. 14 Now you guys gotta make jalike kids dat listen to dea mudda an fadda. No make like da bad kine stuff dat you guys wen like do befo time. Eh, dass wen you guys neva know notting. 15 God, he stay good an spesho. He wen tell you guys fo come be his guys. So, you guys gotta be good an spesho too, everytime, jalike him. 16 Cuz da Bible tell wat God say. He say, “Stay good an spesho inside, cuz I stay good an spesho.”
17 You guys talk to God jalike he yoa Fadda. He da Judge dat check out wat everybody wen do, an he no make like he like one guy mo den anodda. Dass why you guys gotta do everyting hea inside da world wit plenny awesome respeck fo God. 18 You guys know dat Christ wen pay fo cut you guys loose from da bad wase time kine life dat yoa ancesta guys wen leave you. But Christ neva pay fo you guys wit da kine silva o gold money dat goin pau, you know. 19 But he wen pay fo you guys wit his own blood. Dat cost plenny. He wen mahke, jalike one good kine baby sheep dat no mo notting wrong wit um an dey kill fo da sacrifice. 20 Befo God wen make da world, he wen know Christ was goin do all dat. But God neva show Christ to da peopo inside da world till dese last times. An he wen do dat fo you guys. 21 Cuz a wat Christ wen do, you guys can trus God plenny. God wen make Christ come back alive again, an make him come awesome. So now, God da One you guys stay trus, an you stay waiting fo him fo do wat he say.
22 You guys wen do wat stay true, so now you stay all out fo God. Dat make you get real love an aloha fo yoa bruddas an sistas an no ack. Eh, now go get even mo love an aloha fo each odda, cuz yoa heart stay all clean inside. 23 Now jalike you guys wen born one mo time, not from da kine fadda an mudda dat goin mahke, but from da Fadda dat no can mahke. Wat God say, make stuff happen jalike was alive, an wat he say, stay foeva. 24 Da Bible say,
“Everybody stay jalike one grass, o one flower.
Dey ony nice fo litto bit time.
Den da grass all dry up
An da flower fall down.
Afta, dey come no good, an mahke,
25 But wat da Boss say,
Dat goin go on foeva.”
You know, da ting God say, dass da Good Ting we wen tell you guys.
Some Wahines Go Wit Jesus
8 Afta dat Jesus wen go thru da big an da small towns, an he teach da Good Stuff bout how peopo can get God fo dea King. Da Twelve Guys wen go wit him. 2 Befo time Jesus wen make some wahines come good from da bad kine spirits an all kine sick. Dey all wen go too: Mary da Magdala wahine, dat had seven bad kine spirits dat wen take ova her befo, an Jesus wen make um let her go. 3 An Joanna, Kuzaʼs wife, she wen go. (Kuza, he da guy dat stay in charge, King Herodʼs house.) An Susanna, an plenny odda wahines, dey all wen go too. Da wahines wen use dea own money fo help take care Jesus dem.
Da Story Bout Da Farma An Da Seeds
4 Plenny peopo stay coming by Jesus from plenny towns, an he wen teach um wit one story. 5 He say, “You wen hear da story bout da farma guy? He wen go plant seed. He throw da seeds all ova da groun fo plant. Some seeds fall down by da side da trail. Da peopo wen walk on top um, an da birds wen go eat um up. 6 Some seeds fall down on top da rocks, an grow, an den dry up, cuz no mo water inside da dirt. 7 Odda seeds wen fall down inside da kine bushes wit kuku. Da seeds an da bushes grow up togedda, an da bushes wit kuku choke um. 8 Odda seeds, dey fall down inside da good dirt, an dey wen grow good, an come up plenny, one hundred times mo den da farma wen plant.”
Afta dat Jesus say, “If you guys hear dis, den tink bout um!”
How Come Jesus Teach Wit Stories?
9 Da guys Jesus teach wen aks him, “Wat dis story mean?” 10 He tell, “God let you guys know all da stuff bout how he stay King. But I teach da odda peopo wit stories, so jalike da Bible say, ‘dey see, but dey no can see fo real kine. Dey hear, but dey no can hear fo real kine.’ ”
Jesus Tell Wat Da Story Mean
11 Den Jesus tell, “Dis wat da story mean. Da seed, dass wat God say. 12 Da seeds dat fall down on top da trail, dass jalike da peopo dat hear. But da Devil come take away wat God say from inside dea heart, so dey no can trus God. Dass why God no can take um outa da bad kine stuff dey do. 13 Da seeds on top da rocks, dass da peopo dat take wat God say, an dey stay good inside wen dey hear um. Dey trus God litto bit, but wen get hard time dey pau trus, cuz dey no mo root, jalike da seeds on top da rocks. 14 Da seeds dat fall down inside da bushes wit kuku, dass da peopo dat hear, but den dey worry plenny, an dey like come rich an get plenny stuffs, an dey like play aroun all da time. All dat stuff grab um, an choke um. Dey no rememba wat God say, jalike da seeds dat no mo wheat cuz dey stay inside da bushes wit kuku. 15 But ho! Da seeds dat fall down inside da good dirt, dass jalike da peopo dat hear an rememba wat God say. Dey get good heart, do da right ting, an no give up. Dey jalike da seeds dat give good kine wheat.”
Da Lamp Unda Da Bucket
16 “You no light one lamp an cover um wit one bucket, o put um unda da bed. No way! You goin put um on top one shelf so da guys dat come inside dea can see da light. 17 Cuz everyting dat stay hiding, bumbye God goin show um, an everyting dass hard fo undastan he goin make um clear, so da peopo can undastan. 18 Tink! You gotta listen good! Da guy dat listen good goin undastan plenny, but da guy dat no listen good, God goin take away everyting he tink he know.”
Jesus Mudda An Bruddas
19 Dat time Jesus mudda an bruddas wen come fo see him, but dey no can come near him cuz get choke plenny peopo ova dea. 20 One guy tell Jesus, “Eh, yoa mudda an yoa bruddas, dey outside, an dey like talk to you.” 21 Jesus tell da guy, “My mudda an my bruddas? Da peopo dat hear wat God say an do um, dey da ones az my mudda an bruddas fo real.”
Jesus Make Da Storm Pau
22 One time Jesus wen tell his guys, “We go da odda side da lake.” So dey go inside da boat an wen start fo go. 23 Wen dey stay sailing, Jesus wen sleep. One big wind storm wen come down on top da lake, an da waves was bussing ova da boat, so da boat almos wen huli. Dey was in bad shape.
24 Da guys wen go wake Jesus up, an say, “Eh, Boss! We goin mahke!”
Jesus get up. He scold da wind an da big waves. Da storm wen pau, an everyting come nice. 25 He tell his guys, “How come you guys no trus me?”
Dey come real scared. Dat blow dea minds. Dey tell each odda, “Eh, who dis? Even da wind an da waves do wat he tell um!”
Jesus Make One Guy Wit Bad Kine Spirits Come Good
26 Dey wen sail da odda side da lake from Galilee, wea da Gerasa town peopo get dea fields. 27 Jesus wen go on top da beach. One guy from dat town wen come dat get some bad kine spirits in charge a him. Long time dat guy neva wear clotheses o stay inside one house, but he stay inside da caves wea dey put da mahke guys.
Da spirit yell, “Eh, wat you like do to me, Jesus? Da God Dass Mo Importan Den All Da Odda Gods, I know you his Boy! I beg you, no hurt me!”
30 Jesus aks da guy, “Wat yoa name?”
He tell, “My name ‘Army.’ ” He say dat cuz uku paila bad kine spirits wen take ova him. 31 Da bad kine spirits, dey beg Jesus plenny times fo no make um go suffa inside da Devilʼs Deep Dark Hole.
32 Had plenny pigs dat stay grinding on top da hill. Da bad kine spirits wen beg Jesus, “If you go make us let da guy, we like go take ova da pigs, yeah?”
Jesus tell um, “Go!” 33 So da bad kine spirits wen let go da guy, an go take ova da pigs. An den all da pigs wen run down one steep hill, an fall inside da lake, an drown.
34 Wen da guys taking care da pigs wen see wat wen happen, dey wen run go tell everybody inside da town an all ova da place wat dey wen see. 35 All da peopo wen come fo look. Wen dey come by Jesus, dey spock da guy, an he no mo da bad kine spirits now. He stay sitting by Jesus feet wit clotheses on, an he tink good stuff now. An all da peopo wen come real scared. 36 Da guys dat wen see wat wen happen, dey tell da peopo bout da guy dat da bad kine spirits wen take ova, dat he stay good now. 37 Den all da peopo from aroun Gerasa town aks Jesus fo go way from dem, cuz dey real, real scared. So he go inside da boat an go way.
38 Da guy dat no mo bad kine spirits now, he wen beg Jesus if he can go wit him, but Jesus tell him, “No, brah. No can.” Jesus tell, 39 “Go home. Tell how God wen help you plenny.” So da guy go way an tell all ova da town how Jesus wen help him plenny.
One Mahke Girl an One Sick Wahine
40 Wen Jesus come back, plenny peopo feel good inside fo see um, cuz dey stay waiting fo him. 41 Had one leada guy from da Jewish church, name Jairus. Right den an dea he wen come an go down by Jesus feet. He beg Jesus fo go his house, 42 cuz his ony girl, bout twelve years old, litto mo mahke ova dea.
Wen Jesus stay going, get plenny peopo stay jamming him. 43 Had one wahine ova dea dat stay bleeding twelve years. She wen pay everyting she get to da doctas, but nobody can make her come good. 44 She wen come behind Jesus, touch his clotheses. Right den an dea she wen pau bleed.
45 Jesus say, “Who wen touch me?”
Everybody tell him, “Not me!” Peter say, “Boss, get uku paila peopo aroun you, jamming agains you.”
46 But Jesus tell, “Somebody wen touch me. I know, cuz power wen go out from inside me.”
47 Den da wahine wen know dat dey goin find out, an she come an go down by Jesus feet, shaking real hard. In front all da peopo she wen tell how come she wen touch him, an how quick time she wen come good. 48 Jesus tell her, “Sista, you trus me, dass why you come good awready. Go. Now yoa heart can stay rest inside.”
49 Wen Jesus still talking, one guy come from Jairus house, an say, “Yoa girl mahke awready. No need bodda da teacha no moa.”
50 Wen Jesus hear dat, he turn aroun an tell Jairus, “No scared, ony trus me, an she goin come good.”
51 Wen Jesus wen come Jairus house, he ony let Peter, John, an James, an da fadda an mudda go inside wit him, an no odda peopo. 52 Same time all da peopo wen cry an moan fo her. Jesus tell, “Stop crying! She not mahke, she ony stay sleeping.”
53 An dey all wen laugh an make fun a him, cuz dey know she mahke. 54 But Jesus take her hand an say, “Eh litto girl, get up!” 55 Right den an dea her life wen come back, an she wen get up. Den Jesus tell um, “Give her someting fo eat.” 56 An her fadda an mudda, wen blow dea minds. But Jesus tell um, “Eh! No tell nobody wat wen happen, aah.”
Copyright © 2000 by Wycliffe Bible Translators International. All rights reserved