M’Cheyne Bible Reading Plan
Jesus Make One Guy Wit Bad Kine Spirits Come Good
5 Afta dat, Jesus dem go da odda side da lake wea da Gerasa peopo stay. 2 Wen Jesus was getting outa da boat, one guy dat get one bad kine spirit dat wen take ova him wen come from da grave yard. 3 He everytime stay inside da grave yard. Da bad spirit wen make him so strong, nobody can tie him up, not even wit chains. 4 Befo, dey wen tie da guyʼs hand an feet plenny times wit da chains, but he wen bus um. Nobody stay strong nuff fo hold da guy down. 5 Nite an day, da guy everytime yelling from da grave yard, an da hills, an cutting himself wit stones.
6 Wen he see Jesus far away, he wen run an go down in front him.
9 Den Jesus wen aks him, “Eh, wat yoa name?” An da bad kine spirit tell him, “My name ‘Army,’ cuz us guys, we uku paila spirits!”
10 An da spirit beg Jesus plenny times, “Eh, no send us outa dis place!”
11 On da odda side da hill, get one big pig farm, an da pigs was grinding. 12 Da bad kine spirits wen beg Jesus, “Send us inside da pigs! We like take ova dem.”
13 Jesus tell um, “Go!” So da bad spirits wen let go da guy, an go take ova da pigs. Had bout two tousand pigs ova dea. An you know wat? All da pigs wen run down one steep hill an fall ova da cliff inside da lake, an drown inside da water.
14 Den da pig farmas wen run, an go inside da town an all da place aroun dea, telling everybody wat wen happen. All da peopo from da town wen go fo see.
15 Wen dey come by Jesus, dey spock da guy dat befo get da uku paila bad kine spirits dat wen take ova him. He look diffren now. He all dress up, an not pupule no moa. So da peopo real scared. 16 Da odda guys who wen see wat wen happen, dey tell da peopo wat wen happen to da guy wit da bad kine spirits an da pigs. 17 Den da peopo, dey start fo beg Jesus fo go way from dea.
18 Wen Jesus climb inside da boat, da guy dat da bad kine spirits wen take ova befo time, he say, “Try let me go wit you.”
19 But Jesus tell, “No. Go home to yoa ohana, an tell um all da good kine stuff da Boss Up Dea wen do fo you. He wen pity you an give you chance.” 20 So da guy go way, an tell everybody in da Ten Towns wat Jesus wen do fo him. An wat he tell all da peopo, wen blow dea minds.
Jairus, Da Leada Guy
21 So den, Jesus wen come back in da boat to da odda side da lake. An plenny peopo wen come aroun him wen he still near da lake. 22 One leada guy from da Jewish church name Jairus wen come dea. He spock Jesus, an wen go down on his knees by Jesus feet 23 an beg him plenny, “Eh, my litto girl, her ony twelve years old, an her stay going mahke. Try come an put yoa hand on top her, so she can come good an stay alive!” 24 So Jesus wen go wit Jairus. An all da peopo wen go wit Jesus. Dey so plenny, dey wen push aroun him.
Jesus Wen Make One Sick Wahine Come Good
25 Get one wahine wit da peopo. Her was bleeding fo twelve years. 26 Her wen suffa plenny, no matta plenny doctas wen try make her good. Her wen spend all her money, but her neva come good. Her come mo worse. 27 Her wen hear bout Jesus, so her come in back a him wit all da peopo aroun him, an her touch his clotheses. 28 Her tinking, “If I can ony touch his clotheses, I goin come good again.” 29 Right away her bleeding wen pau, an her wen feel inside her dat she no mo suffa.
30 Right den an dea, Jesus wen feel power go outa him. He wen turn aroun an look all da peopo. He tell, “Eh, who wen touch my clotheses?”
31 His guys say, “How come you say dat? Get uku paila peopo pushing aroun you. But you go aks who touch you?” 32 Jesus stay looking aroun fo see who wen touch him.
33 Den da wahine, she wen know wat wen happen to her. She so scared, she shaking. She wen go down by his feet, an wen tell him da whole story.
34 An Jesus wen tell her, “Eh sista, you wen trus me. Dass why you come good. Go now, yoa heart goin rest inside. You no suffa no moa.”
Jesus Make Jairus Girl Come Good
35 Jesus still talking, an some guys wen come from Jairus house, da leada guy fo da Jewish church. Dey tell him, “Yoa litto girl wen mahke! Mo betta you no bodda da teacha no moa.”
36 But Jesus neva listen to dem. He tell Jairus, “No scared. Ony trus me.”
37 He ony let Peter, James, an James brudda John, go wit him. 38 Dey wen come Jairus house. Jesus see all da peopo an hear um making big noise an crying. 39 He go inside an tell, “Eh, how come you guys making big noise an crying? Da girl neva mahke, her ony sleeping.”
40 An dey wen laugh at him. So he wen chase um all outside, an take da girlʼs fadda an mudda, an his three guys, an dey go inside da room wea da girl stay. 41 He take da girlʼs hand an tell her, “Talita kum.” Dat mean, “Eh! Litto girl, get up!”
42 Eh, right den an dea her wen stand up, an walk aroun. An da peopo, right den an dea, dea jaws wen drop. 43 Den he wen tell um, “You guys betta not tell nobody bout dis! Now, go make her someting fo eat.”
We Get Um Right Wit God
5 So den, cuz we wen trus God, az why we get um right wit him. Dass why our heart stay clear inside wit God awready, cuz our Boss Jesus, da Spesho Guy God Wen Send, he wen make um good fo everybody. 2 Christ wen make um so we can come tight wit God an get all da good stuff he like do fo us, cuz we wen trus him first. An dass how we come solid inside. We feel good inside cuz we stay shua dat bumbye God goin make us come awesome jalike him.
3 No matta we get any kine hard time, we goin feel good inside, cuz we know, dat hard time goin make um so we can hang in dea mo betta. 4 Wen we hang in dea, dat make us mo solid. Wen we mo solid, den we stay shua dat bumbye God goin do plenny fo us. 5 Wen we stay shua dat God goin do um fo us, we no need worry notting. Cuz God give us his Good an Spesho Spirit, fo make us feel inside our heart how much plenny he get love an aloha fo us.
6 Wen we neva have power notting, Christ wen mahke fo all us guys dat wen ack jalike God no matta. Dass da time God wen pick. 7 Eh you know, nobody goin mahke fo one guy dat ony do right kine stuff! If get one guy dat everytime get good heart, maybe bumbye somebody go mahke fo help dat kine guy. 8 But den God wen show how plenny love an aloha he get fo us, cuz same time we was doing bad kine stuff, Christ still yet wen go mahke fo us.
9 God wen say we get um right wit him, cuz Christ wen bleed an mahke fo us. God no take da bad kine stuff peopo stay doing, but cuz a Christ, us guys no goin suffa.
10 Befo time, we wen stay agains God. But den Godʼs Own Boy wen mahke so we can go da same side wit God. So now we da same side wit God, even mo, Christ goin take us outa da bad kine stuff we doing, cuz he wen come back alive again. 11 An dass not all! We like tell dat God stay awesome, cuz we stay tight wit him. An we stay tight wit him, cuz our Boss Jesus Christ wen mahke fo us, so now we can go da same side wit God.
Adam an Christ, Dey Da Same But Dey Diffren
12 So den, from da start befo time, da first man Adam, he da one wen start fo do da bad kine stuff. Az why God neva let um live foeva. An from dat time, all da peopo inside da world make jalike dat man. Cuz dey make lidat, same ting jalike dat man, dey all gotta mahke. 13 Befo time, wen still yet neva have da Rules from God, all ova da world had peopo dat was doing bad kine stuff. But wen neva have da Rules, nobody wen go write down wat da bad kine stuff peopo do. 14 Everybody from Adam till Moses time gotta mahke fo shua, no matta dey neva do da same ting dat God wen tell Adam fo no do. Still yet, dey wen do odda kine bad stuff. Az why dey gotta mahke jalike Adam.
You know, Adam an Jesus, dem two da same, but den dey diffren. Az Adam da one, he jalike one picha fo show Jesus, da One dat goin show up bumbye. 15 Da bad kine stuff dat Adam wen do, dass notting like da good kine stuff Jesus wen do fo us. Had da one guy Adam, dat wen go do wat God tell um not fo do, an cuz a dat, everybody wen mahke. But den da odda guy, Jesus Christ, eh, he do plenny good kine stuffs fo us, an he neva expeck notting back from nobody. Dass nuff fo everybody, cuz God everytime like do plenny fo us. 16 Eh, da ting dat God wen give us guys, dass mo betta fo everybody den da bad ting dat da one guy Adam wen do. Afta he wen do dat, God da Judge say, “Gotta punish um!” But even afta da peopo wen go blow it choken times, jalike God da Judge give um one spesho present -- he tell, “Now, can get um right wit me!” 17 So den, da one guy Adam, wen go do one ting dat he not suppose to do. Cuz a dat, now everybody gotta mahke. An now, da one guy Jesus Christ wen do one real good ting, an dass mo betta fo us guys. Now, us guys get um right wit God. Dass jalike one present he give us. An he goin make us come alive fo real kine, an be da Kingʼs helpas.
18 So, had dat one guy dat wen do wat he not suppose to do, an cuz a dat now everybody gotta get punish. But den same ting, had one nodda guy dat wen do da right ting, an cuz a dat, everybody can get um right wit God an come alive fo real kine. 19 Dis wat I mean: Adam, he one guy dat neva listen to God. Dat make plenny guys be peopo dat do da bad kine stuff dat God no like. An da odda guy Jesus, he wen listen to wat God wen tell him fo do. Dat goin make plenny guys be peopo dat get um right wit God.
20 God wen give us his Rules so everybody goin know how plenny bad da bad kine stuff stay. But wea eva get peopo dat do da bad kine stuff mo an moa, God do mo an mo plenny good kine stuff. 21 Befo time, da bad kine stuff dat peopo wen do, take ova dem an make um mahke. But now, cuz a wat our Boss Jesus Christ wen do, God do someting real good fo us, he take us ova, so us guys can get um right wit him an come alive fo real kine foeva.
Copyright © 2000 by Wycliffe Bible Translators International. All rights reserved