M’Cheyne Bible Reading Plan

Yal Comam Jesús ta chiuchcˈalaxayo yatut Comam Dios

13  Yet lan̈an yelti Comam Jesús yul yatut Comam Dios, yalni huneˈ naj iscuywom Comam:

―Mamin, ¡ilcˈanab huntekˈan chˈen chˈen yeb huntekˈan nimeta n̈a tiˈ lah! ẍi naj.

² Istakˈwi Comam:

―Huntekˈan nimeta n̈a tiˈ chiuchcˈalaxtoj, matxa hunu chˈen chˈen latzˈbil tiˈ chican yiban̈ yet chˈenal, ẍi Comam.

Huntekˈan yechel chu yet chihul islahobal tzˈayic

³ Lahwi tuˈ xin, isto Comam Jesús yeb ebnaj iscuywom yin̈ istzalanil won̈an Olivo ayco yetcˈulal satacˈtiˈ yatut Comam Dios; yay tzˈon̈no Comam bey tuˈ. Iskˈamben naj Pedro, naj Juan yeb naj Andrés tet Comam yet ischuquilxan̈e:

⁴ ―Mamin, hal jetan̈ bakˈin chihul huntekˈan chawal tiˈ, ¿tzettaxca yechel chiyu yet chijni isba? ẍi ebnaj.

⁵ Istakˈwi Comam:

―Caw cheyil heba, machojab mac chexakˈni subchahoj. ⁶ Yuto caw txˈiˈal ebnaj chuli cat isbalnico ebnaj inbihan yin̈, cat yalni ebnaj hacaˈ tiˈ: “Hanintiˈan Cristo hinan,” ẍi ebnaj. Caw xin txˈiˈal mac chisubcha yu ebnaj.

⁷ Hayet cheyabeni ta ay howal hecawilal maca nahata, mach chexxiwi yuto yilal yuni huntekˈan tiˈ, cat iswejchacan̈ anma, yajaˈ maẍto istan̈balo huneˈ yul sat yiban̈kˈinal tiˈ. ⁸ Chakˈlecan̈ howal ej txˈotxˈ nimeta con̈ob yeb huntekˈanxa txˈotxˈ nimeta con̈ob, cat yanipaxico howal huneˈ con̈ob yin̈ huneˈxa con̈ob. Caw xin txˈiˈal bay chiecˈ chixcab yeb wahil, yajaˈ huntekˈan tuˈ yichebaniln̈e isyaˈtajil.

⁹ Caw cheyil heba yuto chexálaxico sata ebnaj yahaw con̈ob, cat hemakˈlax yulaj capilla. Chexalaxpaxico sata ebnaj gobernador yeb sata ebnaj rey, yu ayexxaco yul inkˈaban. Hac tuˈ xin chu quinheyalnilojan tet ebnaj. ¹⁰ Yet maẍto chitan̈ilo yul yiban̈kˈinal tiˈ, yilal ispujbalaxicˈo Tzotiˈ cˈul yet colbanile yulajla txˈotxˈ nimeta con̈ob. ¹¹ Hayet chexalaxico sata ebnaj yahaw con̈ob tuˈ, mach cheyaco yin̈ hecˈul yin̈ tzet cheyala; wal xin haˈ tzet chihallax teyet yu Comam Dios haˈ cheyala, yuto maẍtajex chextzoteli, to haˈ Comam Espíritu Santo.

¹² Haˈ yin̈ huneˈ tiempohal tuˈ, ay ebnaj chaco yuẍta yul iskˈab camical, ay mame miˈe chaco yuninal yul iskˈab camical, aypaxo ebnaj uninale chiyaco howal yin̈ ismam yeb ismiˈ cat yakˈni camoj. ¹³ Caw sunil anma chioc ishowal teyin̈ yuto ayexico yul inkˈaban, yajaˈ mac chitecha yu masanto yet islahobal, chicolchahi.

¹⁴ Tzˈibn̈ebilcano yu huneˈ ischejab Comam Dios chiyij Daniel, tato yilal yul naj chietanto yatut Comam Dios yu istxˈojal chiswatxˈe. Haˈ mac chiilni huneˈ tiˈ txumchahojabilo yu. Yin̈ huneˈ tzˈayic tuˈ, mac hex ayex bey Judea tiˈ, chexelcan̈ cat heto iswiˈla witz. ¹⁵ Mac ayahto yiban̈ yatut xin matxahojab chiayti yikˈalti hunu tzet ye tuˈ. ¹⁶ Wal mac ayto xol ismunil, matxahojab chimeltzo yikˈalti xil iskˈap yul yatut. ¹⁷ ¡Caw cˈanchˈan ebix ix ayxa tzet yehi, yeb ebix chito txutxwi niẍte yunin yin̈ huneˈ tiempohal tuˈ! ¹⁸ Kˈanwe tet Comam Dios haxinwal maẍtaj yin̈ n̈abil chihul huneˈ tuˈ. ¹⁹ Yuto caw chiecˈyaˈ yanma anma yin̈ huneˈ tiempohal tuˈ. Huntekˈan isyaˈtajil tuˈ maẍto hunelo chuhi yichitax iswatxˈen Comam Dios huneˈ yul sat yiban̈kˈinal tiˈ, matxa xin bakˈinal chuhi yet chilahwi yunicanoj. ²⁰ Ta mach chiscˈotzba Comam Dios Jahawil yoj huneˈ tiempohal tuˈ, machi hunu mac chicolchahi, wal xin chiscˈotzba Comam yuto xahan ay yuninal Comam yu, huntekˈan sicˈbilxaloj.

²¹ Yuxin ta ay mac chihalni teyet: “Haˈ bey tiˈ ay naj Cristo lah,” maca ta “Haˈ bey tuˈ ay naj lah,” ta ẍi, mach cheyayto yul heyanma. ²² Yuto caw txˈiˈal ebnaj lekˈtiˈwom chisbalico isba Cristohal. Aypaxo ebnaj chisbalico isba ischejabo Comam Dios cat isyeni ebnaj cˈaybalcˈule yeb yechel yip naj matzwalil yun̈e issubcha anma yu ebnaj. Etza xin chisubchapaxo ebnaj sicˈbilxa yu Comam Dios yu ebnaj. ²³ ¡Caw cheyil heba xin! Yalan̈to chiwalnicanojan huntekˈan tiˈ teyet, ẍi Comam.

Yin̈ tzet chu yul Comam Jesucristo yin̈ iscayelal

²⁴ Hayet chilahwi yecˈcano huntekˈan isyaˈtajil tuˈ, chikˈejholilo yoj tzˈayic, matxa chimujlipaxo ixahaw, ²⁵ cat istitcˈay ej txˈumel ay satcan̈, cat xin isbilipaxo sunil tzet ay yip ay yul satcan̈. ²⁶ Lahwi tuˈ cat yillax wulan xol moyan, Hanin Akˈbilintijan texol yu Comam Dios. Chinhulan yeb sunil iskˈakˈal wipan, ²⁷ cat inchejni wángelan iscutxbanoco sunil mac sicˈbilxalo wuhan yul sat yiban̈kˈinal tiˈ, sunil baytajtuˈwal ay anma bay chiecˈ ebnaj.

²⁸ Txumwecˈanab yin̈ teˈ higuera: Yet chielilo ischon iskˈab teˈ cat yul xaj teˈ, cheyohtan̈eloj ta toxa chioc haˈ n̈ab. ²⁹ Hac tuˈ ye huntekˈan chiwaltiˈan. Hayet cheyilni yijni isba huntekˈan tuˈ, yilal heyohtan̈eni tato cawilxa yeti bay chinhulan. ³⁰ Yin̈ caw yeli chiwalan teyet; sunil huntekˈan tiˈ chiyu yalan̈to maẍto chicam huntekˈan anma tiˈ. ³¹ Haˈ satcan̈ yeb txˈo txˈotxˈ tiˈ chitan̈iloj, wal Intzotiˈan xin mach chiecˈto yet yijni isba tzet chala.

³² Yajaˈ wal yin̈ tzet tzˈayical yeb tzet orahil chinhulan machi hunu mac ohtan̈e nitam ebnaj ángel ay yul satcan̈. Mach wohtapaxojan, Hanin Iscˈahol Comam Dios intiˈan; wal xin han̈cˈan̈e Inmaman ohtan̈e.

³³ Yuxin caw nann̈e heyu, majwan̈wej yuto mach heyohtajo tzet orahil chinhulan. ³⁴ Lahan hacaˈ yet chito hunu naj yahaw n̈a yin̈ hunu isbel caw nahat. Yalan̈to maẍto chito naj chalnicano naj tzettaj munilal chu hunun ischejab, cat yalnicano naj tet naj tan̈em pulta tato caw chil naj istiˈ pulta tuˈ. ³⁵ Ebnaj chejab tuˈ, mach yohtajo ebnaj bakˈin chimeltzo naj yahaw n̈a, mach yohtajo ebnaj tato hayet yahbal akˈbal chul naj, maca yin̈ chuman akˈbal, maca yet chiokˈ noˈ chiyo, maca yet sahab sacˈayal. Haquexpax tuˈ mach heyohtajo bakˈin chinhulan, yuxin majwahan̈wej, ³⁶ tajca tona nahul ayex cat wul lemnahan. ³⁷ Huntekˈan tiˈ, maẍn̈etaj teyet chiwalan, to chiwalpaxojan tet sunil anma. ¡Caw majwahan̈wej! ẍi Comam.

13  Yijemojab cheyute heba yin̈ tzet chal ebnaj alcal, yuto machmi ebnaj alcal tato maẍtaj Comam Dios an̈eco ebnaj yin̈ huneˈ munil tuˈ, wal xin haˈ Comam an̈eco ebnaj yin̈ ismunil. ² Yuxin haˈ mac chiman̈cˈon yin̈ tzet chal ebnaj, chisman̈cˈo yin̈ tzet akˈbilcano yu Comam Dios. Haˈ mac man̈cˈom tuˈ xin chialaxayo isyaˈtajil yiban̈. ³ Ebnaj alcal tuˈ, mach ayoco ebnaj yin̈ ismunil yu yakˈni xiwo ebnaj anma chiwatxˈen iscˈulal, walxinto yu yanayo ebnaj isyaˈtajil yiban̈ mac txˈoj chiswatxˈe. Yuxin ta mach cheyoche chexakˈlax xiwoj, watxˈewe istoholal, hac tuˈ xin chitzala ebnaj teyin̈. ⁴ Yuto ebnaj alcal ayco ebnaj isyijen huneˈ munil akˈbil yu Comam tuˈ yu iscˈulalo teyin̈, yajaˈ ta istxˈojal chewatxˈe xin yilalticˈa hexiwi, yuto akˈbil ismunil ebnaj yanayo isyaˈtajil yiban̈ anma txˈoj chiswatxˈe. Yu yanayo ebnaj isyaˈtajil yiban̈ anma man̈cˈom, yuxin ayco ebnaj yin̈ ismunil yu Comam. ⁵ Yuxin yilal heyijen yin̈ tzet chal ebnaj, maẍn̈etaj yu chexxiw yay isyaˈtajil teyiban̈, walxinto yu hac tuˈ choche Comam tato chicoyije. ⁶ Yuxin yilal heyakˈni hetohlabal yuto haˈ Comam Dios akˈn̈e huneˈ munil tuˈ tet ebnaj, haˈ xin lan̈an isyijen ebnaj.

⁷ Hayet chikˈanlax chˈen tohlabal, yilal heyakˈni chˈen, yeb xin chetohlawe heyornato maca hunu licencia hacaˈ yalni ley. Haˈ mac ay yet isyijelax tzet chala, yilal heyijen tet; haxa mac ay yelapnoj, ayojab yelapno yul hesat. Haˈ mac yilal yalaxico ismay, yilal heyanico ismay.

⁸ Machojab hecˈas tet hunu maca, wal xin haˈojab hexahann̈en heba han̈eˈojab chioc hecˈasoj, yuto haˈ mac chixahann̈e yet anmahil lan̈an isyijen ischejbanil Comam. ⁹ Yuto chal ischejbanil Comam Dios: “Mach chaẍixli mach chaẍwinajli, mach chaẍpotxˈwahi, mach chaẍelkˈawi, mach chahobcan̈ lekˈtiˈal yin̈ hawet anmahil,” ẍi. Huntekˈan chejbanil tiˈ yeb huntekˈanxa, huneˈxan̈e chielicoj chalni hacaˈ tiˈ: “Xahan chawil hawet anmahil hacaˈ hayaˈiln̈en haba,” ẍi. ¹⁰ Haˈ mac xahan ay yet anmahil yu, mach istxˈojal chiswatxˈe yin̈ yet anmahil tuˈ, yuto hayet chisxahann̈e yet anmahil, tzˈajan lahan chisyije ischejbanil Comam.

¹¹ Yuxin caw txumwe yin̈ huneˈ tiempo bay ayon̈ tiˈ, istiempohalxa jinilo cowayan̈, yuto tinan̈ cawilxa yeti cocolbanil sata yet janayto yul janma yin̈ Comam. ¹² Tinan̈ xin cawilxa yeti tiempo, lahan hacaˈ yet xaecˈto akˈbal, lan̈anxa issajbiloj. Yuxin cobejaˈwecano sunil istxˈojal yet kˈejholo, cat cowatxˈen coba jecˈ yin̈ issajilkˈinal yet Comam, hacaˈ chu iswatxˈen isba naj soldado, yet chanicˈo naj huntekˈan xilkˈape yet howal. ¹³ Cowatxˈewe istoholal hacaˈ tzet chiwatxˈelax yet tzˈayical. Machojab chon̈ecˈ yin̈ ucˈu teˈ, machojab chon̈ecˈpaxo yin̈ pekˈal maca yin̈ ixloj. Machojab chicokˈaytzeco istxˈojal jin̈, machojab chijakˈle howal coxol maca ischiwa cocˈul jin̈ hununon̈. ¹⁴ Hacaˈojab hunu naj soldado chiswatxˈe isba chanicˈo huntekˈan xilkˈape yet howal yin̈, hacojab tuˈ cowatxˈen coba yin̈ yet Comam Jesucristo, machojab chijakˈ yub istxˈojal tzet choche conimanil.