M’Cheyne Bible Reading Plan
Bautiźaj Juanta huañuchishcata parlashcami
14 Chai punllacunami, Galilea llajtata mandaj Herodesca, Jesús imallata rurashcata uyarca. 2 Chaimantami Herodesca, paipaj servijcunataca cashna nirca:
–Chai runaca, Bautiźaj Juanmari canga. Paimari huañushcacunapaj chaupimanta causarimushpa, milagrocunata ruracunga– nircami.
3 Juantaca, Herodías huarmi nishcata uyashpami, Herodesca cadenahuan huatashpa carcelpi churachishca carca. Chai Herodiasca, Herodespaj huauqui Felipepaj huarmimi carca. 4 Juanca, Herodesta:
–Chai huarmihuan pushanacushpa causanaca, mandashcapi ricujpica mana allichu– nishcamantami, carcelpi carca.
5 Herodesca Juantaca huañuchisha yuyarcami. Shina cashpapish, tucuicunami Juantaca, ‘Dios ima nishcata huillajmi’ nijcuna carca. Chaimanta paicunata manchashpa mana huañuchirca. 6 Herodesca, pai huacharishca punlla pajtajpimi fiestata ruracurca. Chaipi cajcunapaj ñaupajpimi, Herodiaspaj ushushica bailarca. Pai bailacujtaca, Herodesca achcatami ricunachirca. 7 Chaimantami Herodesca, chai solterataca:
–Canmanca imata mañajpipish cushallami, mana llullanichu, cushatajmi– nirca.
8 Shina nijpi chai solteraca, mama yachachishcamantami Herodestaca:
–Bautiźaj Juanpaj umata platopi cuhuai– nirca.
9 Jatun mandaj Herodes chaita uyashpaca, anchatami llaquirirca. Llaquiricushpapish, chaipi cajcunapaj ñaupajpi: “Mana llullanichu, imata mañajpipish cushatajmi” nishcamantami, pai nishcata ama p'aquingapaj, chaita cuchun mandarca. 10 Chaimantami Juanpaj umataca, carcelpi p'itimuchun cacharca. 11 Juanpaj umata p'itishpa platopi apamushpaca, chai solteramanmi curca. Chaitaca, paipaj mamamanmi curca.
12 Chashna huañuchijpimi Juanpaj yachacujcuna shamushpaca, paipaj cuerpota apashpa pambagrircacuna. Chaimantaca, imalla tucushcatami Jesusman huillagrircacuna.
Jesusca pichca huaranga runacunamanmi carashca
13 Juanta huañuchishcata yachashpami Jesusca, pi mana causan shitashcaman Pailla shuj barcopi rirca. Chaita yachashpaca gentecunaca, cutintajmi achcacuna pueblocunamanta llujshishpa, chaquillahuan Jesuspajman rircacuna. 14 Jesusca barcomanta llujshicushpa, chai tucui gentecunata ricushpa llaquishpami, mashnalla ungushcacunataca alliyachirca. 15 Ña tutayamugrijpimi, Jesuspaj yachacujcuna shamushpaca:
–Cai shitashcapi canchijca, ñamari tutayamunpish, tucuicuna micunata randigrichun pueblocunaman cachaiari– nircacuna.
16 Shina nijpi Jesusca:
–¿Imapajtaj ringari? Cancunallataj caraichijlla– nircami.
17 Shina nijpimi yachacujcunaca:
–Cai pichca tanda, ishqui chalhuallatamari charinchij– nircacuna.
18 Chashna nijpi Jesusca:
–Shinashpaca chaita apamuichij– nirca.
19 Gentecunataca tucuicunatami, q'uihua pambapi tiyarichun mandarca. Chai q'uipaca chai pichca tandata, ishqui chalhuata japishpami, jahua pachata huichilla ricushpa, Diosta pagui nirca. Chai huashaca chai tandata chaupishpa chaupishpami, yachacujcunaman curca. Paicunami tucui chaipi cajcunaman cararcacuna. 20 Chai tucui gentecunami mana nijta micurcacuna. Puchushcataca, chunga ishqui canasta jundatami yachacujcunaca tandarca. 21 Micujcunaca c'aricunallami pichca huaranga carca. Huarmicunata, huambracunataca mana yuparcacunachu.
Yacu jahuatami Jesusca purishca
22 Chaicunaman carashca q'uipami Jesusca, paipaj yachacujcunataca ‘Barcopi cucha ch'imbanijman ñaupacuichij’ nishpa cacharca. Jesusca, chai tucui gentecunata ‘Cayacamachij’ ningapajmi saquirirca. 23 Paicunata ‘Cayacama’ nishpa urcuman huichiyashpaca, tutacamami pailla chaipi Diosta mañarca. 24 Yachacujcunaca, ñami chaupi cuchata barcopi ricurca. Ñaupajmanta achca huaira shamushpami, yacuta caiman chaiman cuyuchijpi, yacuca barcopi huajtaricurca. 25 Ñapish pacarimuitaca, Jesusca yacu jahuata purishpami, paicunapajman c'uchuyarca. 26 Yacu jahuata shamucujta ricushpaca, yachacujcunaca achcata chujchushpa mancharishpami:
–¡Ayamari shamucun!– nishpa caparircacuna.
27 Paicuna chashna caparicujpimi, Jesusca:
–Upalla caichij, ñucamari cani. ¡Ama mancharichijchu!– nirca.
28 Chashna nijpi Pedroca:
–Apunchij Jesús canllataj cashpaca, yacu jahuata cambajman shamuchun ñucata cayai– nircami.
29 Shina nijpi Jesusca:
–Shamui– nijpi Pedroca, barcomanta llujshishpa, yacu jahuata Jesuspajman puri callarirca.
30 Shina cashpapish achca huaira shamujpimi, Pedroca mancharca. Chaimantaca, yacupi huashicui callarishpami:
–¡Apunchij Jesús, quishpichihuaiari!– nishpa caparirca.
31 Shina caparijpi Jesusca, Pedrota utca maquimanta japishpami:
–¿Ima nishpataj manchangui? ¡Ñucata tucui shunguhuan cringuimanca!– nirca.
32 Paicuna ña barcoman yaicujpica, huairaca casijlla tucurcallami. 33 Chaimantami barcopi cajcunaca, Jesuspajman c'uchuyashpa:
–Canca, Diospaj Churitajmari cashcangui– nishpa adorarcacuna.
34 Ña cuchata ch'imbashpaca, Genesaret llajtamanmi chayarcacuna. 35 Chaipi causajcuna Jesusta rijsishpaca, tucui chai muyundij llajtapimi huashan huashan huillanacurcacuna. Chaimantami, tucui ungushcacunata Jesuspajman apamurcacuna. 36 Tucui ungushcacunami Jesustaca: “Cambaj churana filollapipish tuparipachun saquihuai” nircacuna. Pipish Jesuspaj churanata tuparijca, alliyarcallami.
Iconio pueblopipish achcacunami crishca
14 Iconiopipish Pabloca, Bernabendijmi judiocuna tandanacuna huasiman yaicushpa, Diospaj Shimita alli huillarcacuna. Chaimantami judiocunapish, griegocunapish achcacuna Jesusta crircacuna. 2 Ashtahuanpish mana crisha nij judiocunaca, mana israelcunatami crijcunata p'iñachun yachachircacuna. 3 Chashna cajpipish, Pablohuan, Bernabehuanca unaitami chaipi causarcacuna. Paicunaca Mandaj Diospi shunguta churashpami, mana c'uyaipaj c'uyaj Diosmantaca mana manchashpa huillashpa, catircacuna. Diospish, Pai quiquintaj huillanaman cachashcata ricuchishpami, ima señalcunatapish, mancharinacunatapish Paillataj rurachirca. 4 Chaicunata ricushpami, chaipi causajcunaca shujcunaca judiocunaman tucurca, cutin shujcunaca huillagrichun mingashcacunaman tucurca. 5 Chashna cashpapish mana crijcunaca, judiocunapish, mana judiocunapish shujlla yuyaimanmi chayarcacuna. Chaimantaca mandajcunandij tucushpami, paicunataca c'amishpa rumihuan shitai callarircacuna. 6 Chashna rurajpimi Pablohuan, Bernabehuanca miticushpa, Licaonia llajtapi caj Listra shuti, Derbe shuti pueblocunaman, chai muyundij llajtacunamanpish rircacuna. 7 Chai llajtacunapimi, alli huillaita huillarcacuna.
Listrapica mana puri tucuj runatami alliyachishcacuna
8 Listrapica, huacharimantapacha mana purij shuj runami tiyacurca. Shuj cutillapish manataj purishcachu carca. 9 Paimi, Pablo tucui imalla huillashcataca, alli uyacurca. Pai huillashcata uyashpa, alliyanata crishcata ricushpami, Pabloca:
10 –¡Jatarishpa alli shayari!– nishpa, sinchita rimarca.
Shina nijpica chai runaca, callpashpa jatarishpami purirca. 11 Tucui chaipi cajcuna Pablo chashna rurajta ricushpaca, Licaonia rimaipimi: “Dioscunamari runacuna shina tucushpa, ñucanchijpajman uriyamushca” nishpa caparircacuna.
12 Chashna nishpaca Bernabetaca, Zeus nircacunami. Cutin Pablotaca huillaj cajpimi, Hermes nircacuna. 13 Chai pueblo ch'imbapurapica, Zeusta adorana huasimi tiyarca. Chai huasipica Zeuspaj curami tiyarca. Paimi, tucui chaipi cajcunahuan tucushpa, huagracunata, sisacunata punguman aparca. Chaicunatami Pabloman, Bernabemanca diosman shina cushpa, huañuchishun nircacuna. 14 Chashna rurashun nicujta ricushpaca, huillagrichun mingashca Pablohuan Bernabehuanca, quiquin churanacunata lliquirircacuna. Chashna rurashpaca caparirishpami gentecunapaj chaupita yaicurircacuna. 15 Chai gentecunataca cashnami nircacuna:
–¡Riquichij yayacuna! ¿Maitataj cashnaca ruranguichigari? Ñucanchijpish cancuna shinallataj runacunallamari canchij. Cashna llaqui causaita saquishpa, causaj Diospajman cutirichuntajmari huillanaman shamurcanchij. Paimari jahua pachata, cai pachata, mama cuchata, chaicunapi tucui ima tiyajtapish rurarca. 16 Diosca ñaupacunaca, tucuicuna paicuna munashca shina causachun saquircallami. 17 Shina cashpapish Diosca, tamyachishpa, granocunata p'ucuchishpami, ñucanchijmanca mana nijta carahuan. Chashnami, Pai alli cashcataca ricuchishpa, ñucanchij shunguta cushichin– nircami.
18 Chashna rimacushpallami, huagrata huañuchishpa paicunata adorashun nicujcunataca jarcarcacuna.
19 Chaita rimanacucujpimi Antioquiamanta, Iconiomanta huaquin judiocuna chayamurca. Paicuna gentecunata jatarichijpimi, Pablotaca rumicunahuan shitarcacuna. Chaimantaca, ‘Ñami huañun’ yuyashpami, sirijta aisashpa pueblomanta llujshichishpa shitarcacuna.
20 Ashtahuanpish crijcuna tandanacushpa, paipaj muyujta shayarijpica, Pabloca jatarircallami. Chai q'uipami cutin chai puebloman yaicurca. Cayandij punllaca Bernabendijmi, Derbeman rirca.
Pablohuan Bernabehuanca Antioquiamanmi tigrashcacuna
21 Derbepipish alli huillaita huillajpica, achcacunami crirca. Chai q'uipami cutinllataj Listraman, Iconioman, Antioquiaman tigrarcacuna. 22 Chai pueblocunapi causacuj crijcunataca: «Achca llaquicunata apashpami, Taita Dios mandacunpica yaicuna canchij» nircacunami. Chashna nishpami Jesusta crishcataca, alli catichun cunarcacuna.
23 Shinallataj crijcuna tandanacushca tiyanpica, tucuipimi cunaj yuyajcunata agllashpa churarcacuna. Paicunataca, ayunashpa Diosta mañashpami, paicuna crishca Mandaj Diospaj maquipi mingarcacuna. 24 Chaimantaca, Pisidia llajtata rishpami, Panfiliaman chayarcacuna. 25 Perge pueblopi Diospaj Shimita huillashpaca, Atalía pueblomanmi rircacuna.
26 Ataliamantaca barcopimi Antioquiaman rircacuna. Chai pueblomantami paicunataca, alli huillaita huillagrichun, mana c'uyaipajta c'uyaj Diospaj maquipi mingashpa cacharcacuna. Paicunaman mingashcata huillashpami, ña tigrarcacuna. 27 Ña chayamushpami, crijcunata tandachircacuna. Chaimantaca, Taita Dios paicunata jatun allicunata rurachishcatapish, mana israelcunaman paicuna huillagrijpi uyana yuyaita Dios cushcatapishmi parlarcacuna. 28 Chai q'uipaca unaitami, chaipi crijcunahuan causarcacuna.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.