Read the Gospels in 40 Days
1 Ken miak kiejekujtiwit kiektaliat ne taneshtilis ipanpa muchi tay yekajtuk tutzalan 2 ijkiunisan ken techmakaket ne kitaket kwak pejki, wan ne muchijtiwit tekitinimet ipal ne palabraj, 3 naja nusan ninatuk ka niaw nikpepeta muchi ken ijtuk wan niaw nikijkwilua nejnejmach mupal, nuiknew Teopilos, 4 pal tikmati ka tejkia ne pajpalabraj ne metzmachtijtiwit.
Ne tanawatiani Gabriel ina ka yawi nesi Yojan
5 Tik ne tujtunal kwak Herodes katka tatuktiani ipal Yudaya, nemik se palej itukay Zakarya ipal ne tepewa ipal Abiya, wan ne isiwaw se ipal ne ikal Aaron wan yaja itukay Elisheba. 6 Ne ujume kichiwat katka tay yek wan nejnemit ken ne Teut kielewia wan techtuktia, wan te kichijtiwit tatka tay inteyek. 7 Yejemet te kipiatuyat kukunet, ika Elisheba te welituya kipia wan ashan lamajtzin, wan Zakarya chuleta.
8 Se tunal kwak Zakarya kichiwa nemi itekiw inwan ne palejmet tik ne tepewa, 9 ken ne palejmet pal ikman kichiwat katka, kiski ka yaja ne nemi pal kalaki pal tapupuchwia ijtik ne teupantzin; 10 wan nemituyat tatenpan muchi ne chinamit kinujnutzat ne Teut tik ne horaj ipal ne tapupuch. 11 Wan walnesik se tanawatiani ipal Tutajwan ejkatuk ka iyekkan ne tikashit kan tapupuchwiat, 12 wan mukakasuj wan mumutij Zakarya kwak kitak. 13 Ne tanawatiani kilwij:
—Maka shimajmawi, Zakarya, ika mukakik ne mumutajtawelilis. Musiwaw Elisheba yawi kipia se iukichkunew wan tiaw tiktukaytia Yojan, 14 wan tiaw tiyulpaki sujsul wan miak yawit pakit ika nestuk, 15 ika yawi muchiwa wey tik itachialis Tutajwan; atata wan kushushaj inte yawi kiuni, wan tik iijti ne inan yawia pewa mutema iwan ne Ijiutzin, 16 wan yaja yawi kinhishkwepa miak pal Israel itech ne Teut, 17 wan yasneki ka iishpan iwan ne iijiu wan ne itajpal Eliya pal kishkwepa inyujyulu tetekuwan intech tepilawan wan ne tzujtzuntet tik ne tamatilis pal ne yejyek, pal kiajshitia se techan muekchijtuk ipal ne Teut.
18 Wan Zakarya kilwij ne tanawatiani:
—Ken weli nikmati ini asu naja nichuleta wan lamaj ne nusiwaw?
19 Wan ne tanawatiani kilwij:
—Naja ni Gabriel; naja ne ishpanujtuk tik itachialis ne Teut wan nechtuktij nimetznutza wan nimetzmaka ini yeknawatilis; 20 ashan tinemis tzitzikatuk wan te tiaw tiweli titaketza hasta kwak muchiwa uni, ika inte tikyulmatki nupalabraj, wan tik ne tunal pal muchiwa, yawi yekawi.
21 Ne chinamit nemituya kichia Zakarya pejket mutajtaniliat taika walishtuna kalijtik. 22 Wan kwak kiski, inte welituya ina tatka wan kimatket ka yaja kitztuya se tachialis ijtik ne teupantzin. Yaja nakak kinhishnutza wan te welik taketza. 23 Kwak tamiket ne tujtunal ipal itekiw tik ne teupan, mukwepki ka ichan.
24 Kwak panutiwita uni tujtunal weykiski Elisheba ne isiwaw Zakarya wan mukawki kalijtik makwil metzti, ika ina:
25 —Ijkini nechchiwilijtuk Nuteku tik ne tujtunal kwak kiwelitak ma intea nishpinawa ishpan takamet.
Gabriel ina ka yawi nesi Yeshu
26 Kwak panuket chikwasen metzti, ne Teut kituktij ne tanawatiani Gabriel ma yawi tik se techan pal Galilaya itukay Nazaret 27 ichan se siwapil ne nemituya pal munamiktia iwan se takat itukay Yosep, se ipal ne ikal Dawid, wan uni siwapil itukay Maryam. 28 Wan kwak ajsik ichan, kilwij:
—Teutasujtatuk, oj! Ne Tajtzin muwan nemi!
29 Yaja mukakasuj ipanpa tay inak ne tanawatiani wan mutajtanilij tay kineki ina uni tajpalulis, 30 wan ne tanawatiani kilwij:
—Maka shimajmawi Maryam, ka ne Teut metzita yek, 31 wan ashan tiaw tiijtiweykisa wan tiaw tikpia se mukunew, wan tiaw tiktukaytia Yeshu. 32 Yajuni muchiwas wey wan munutzas Itelpuch ne Wejkapan, wan ne Tajtzin Teut kimakas ne ikuijpal Dawid, ká ne iteku, 33 wan kitekimakas ne ikal Yakob pal senpa wan ne itatuktilis inte keman yawi tami!
34 Maryam kilwij ne tanawatiani:
—Ken weli uni asu inte ninentuk iwan se takat?
35 Wan ne tanawatiani kilwij:
—Yawi witz mujpak ne Ijiutzin, wan metzkimilus ne itajpal ne Wejkapan. Neka ne mupunia yawi munutza Itelpuch ne Teut. 36 Né nemi ne muwes, Elisheba: weykiski iwan se itelpuch wan lamajtzin; kipiaya chikwasen metzti yajane ká inat katka ka inte welituya; 37 ika inte nemi tatka uij ipal ne Teut!
38 Maryam inak:
—Naja niitekitini Tutajwan; ma muchiwa nuwan ken tina.
Wan ne tanawatiani yajki.
Maryam ajsi ichan Elisheba
39 Tik uni tujtunal Maryam ajkewki wan ijisiwki yajki ne tepetal pal Yudaya, tik se techan tik uni tal, 40 wan ajsik ichan Zakarya wan kitajpaluj Elisheba. 41 Wan kwak Elisheba kikakik Maryam kitajpalua witz, tzikwinik ne shulut tik iijti wan ne Elisheba temik iwan Ijiutzin 42 wan tzajtzik wey:
—Titeutasujtatuk itzalan siwatket wan teutasujtatuk ne itakil muijti! 43 Ken ka walejku nutech ne inan ne Nutajtzin? 44 Ika ashan kwak nimetzkakik titajpalua, tzikwinik iwan pakilis ne shulut tik nuijti! 45 Wan suertej kipia ká kimati ka tay Tutajwan kilwijtuk yawi yekawi!
Ne itakwikalis Maryam ("Nualmaj ina ka wey Nuteku")
46 Wan Maryam inak:
47 —Nualmaj ina ka wey Nuteku:
niyulpakik iwan nutamakishtiani
48 ika kitak ken kanawak n' itekitini;
ashan muchi kishmatisket nusuertej
49 ika tetekia nechchiwilij ne Weli Wey;
wan wey itukay
50 wan senpa kinpalewia ne kitakamatit.
51 N' itajpal imajkul kilwitij,
ne kimatit ka wey inpatiw kinsentaluj;
52 kintajkal tatuktianimet
wan kinhajkukij ne kajkanawak;
53 kintepewilij yejyek ne mayanat,
wan te kinmakak ne kipiat wey;
54 kipalewij Israel, itekitini,
pal kielnamiki itetasujtalis,
55 ken kinhilwij ne tunoywan
Abraham wan ishinach,
pal senpa.
56 Maryam nakak iwan Elisheba achka yey metzti, wan mukwepki ka ichan.
Nesik Yojan
57 Yekawket ipal Elisheba ne tujtunal pal puni wan kipishki se ukich. 58 Wan takakket ne ichantakawan wan ne imiakwan ka ne Teut kipalewijtuk sea wan pakit iwan. 59 Kwak panuket chikwey tunal walajket kiyawaltekit ne kunetzin, wan kinekituyat kitukaytiat Zakarya ken ne itukay iteku, 60 wan inak ne inan:
—Inte, yaja yawi munutza Yojan!
61 Kilwijket ka nian se pal ne imiakwan itukay kiane. 62 Kishnutzket ne iteku ken yaja kinekituya ma itukay, 63 wan kitajtan se amatzin wan kijkwiluj: "Yaja itukay Yojan", wan muchi ishpuyajket. 64 Ijkiuni mutenpeluja ne chulet wan welik taketza wan pejki ina ka wey ne Teut. 65 Wan muchi ne techanchanejket mumutijket, wan nujme ne tepetal pal Yudaya pejket tajtaketzat, 66 wan yultaketzket muchi ne takakket wan muilwijket:
—Tay yawi muchiwa ini kunetzin?
Ika nusan ne imey Tutajwan nemituya iwan.
Ne itakwikalis Zakarya ("Tutajwan yektenejtuk, Teut pal Israel")
67 Wan Zakarya, ne iteku, temik wan ne Ijiutzin wan taketzki pal Teut, inak:
68 —Tutajwan yektenejtuk, Teut pal Israel
ká tachishki wan kichulultij itechan;
69 kiskalij se pal techmakishtia
tik n' ikal Dawid, itekitini,
70 kenha ken taketzki itech inten
itajtaketzani pal ikman;
71 techmakishtij itech ne techishijiat
wan ne kinekit techijtakuat;
72 yaja kintasujtas tunoywan
wan kielnamikis n' isentaketzat,
73 ne juramentoj ne ikman kimakak
Abraham tutatanoy wey
74 pal techishtia itech imey ne techijiat
ma inte timajmawikan, ika tejemet tiitejtekitini
75 pal tikchiwat muchi ne tujtunal
tay yek tik itachialis.
76 Wan taja, nukunetzin, timunutzas
itaketzani ne Wejkapan;
tinejnemis iishpan Tutajwan
tikekchiwilia ne ujti,
77 ma kishmati itechan tamakishtilis
tik tetapupulwilis ipal tay titateyekchijtiwit,
78 ka ne Teut techtasujta wan kikukua iyulu
wan tachias ka ikajku taneskan
79 kintawilua ne muejmuetztuk tik iekawyu mikilis
pal titaksat tik ne yek ujti ipal nejmachnemilis.
80 Weyki ne kunetzin, wan chikawayak ne iyulu. Wan nemik tik ne kojtan hasta kwak walmuneshtij iishpan Israel.
Nesik Yeshu
2 Tik uni tujtunal, kiski itech Augustus ne taltikpaktuktiani ipal Roma se tatuktilis ma muijkwilukan ne intujtukay muchi tik se amat. 2 Uni achtu tapualis muchijki kwak Kwirinius tatuktia katka tik Siria. 3 Wan muchi yajket yajket mupuat sejse tik itechan. 4 Yosep nusan kiski ne techan pal Nazaret tik Galilaya wan tejkuk Yudaya wan ajsik ne techan kan pejtuk ne ikal Dawid, ne itukay Bet-Lejem, ika walajkewtiwit ne itatanoywan ka né, 5 pal mupua iwan Maryam ne iwan yawi munamiktia, kwak weyijti.
6 Kwak nemituyat ikuni, ajsik ne tunal pal puni 7 wan kipishki ne iukich achtupunijtuk, wan kikimiluj wan kitekak tik se kan mupiat takwalmet ika inte kanaj kan nemiskiat tik ne kal kan kuchit ne ejkunimet.
Ne ichkatajpianimet
8 Inte wejka tik ne kojtan nemituyat sejse tajpiat ichkamet wan kishpelwiat ne tayua, 9 wan inhishpan kiski se tanawatiani ipal Tutajwan, wan tzitzinakak innawak iwan ne itawilyu Tutajwan wan majmawket tetekia sea, 10 wan ne tanawatiani kinhilwij:
—Maka shimajmawikan, ika ashan nimetzinyeknawatia wey pakilis: 11 nesik tik ini tunal anmutamakishtiani ne Tajtzin Mawaltijtuk, tik ne itechan Dawid, 12 wan pal muishmati anyawit kiajsit se shulut kimilujtuk, tekatuk tik se kan mupiat takwalmet.
13 Wan nemanha inawak ne tanawatiani nemituyat sujsul miak ipal ne ilwikak tanutzat ka yek ne Teut, inat:
14 —Tzitzinaka tik wejwejkapan ipal Teut;
ma wiki pak ne tal nejmachnemilis
ijtik takamet yek muitztiwit.
15 Kwak ne tanawatianimet mukweptiwita ka ilwikak, ne ichkatajpianimet muilwiat:
—Yek, tiawit hasta Bet-Lejem pal tikitat tay panuk tay techneshtilij Tutajwan.
16 Wan ijisiwket yawit wan kinhajsiket Maryam wan Yosep wan ne shulut tekatuk tik ne kan mupiat takwalmet. 17 Kwak kitaket, kinneshtilijket tay kinhilwijtiwit ipanpa uni kunetzin 18 wan muchi ne takakket ishpuyajket ipanpa tay ne kinhilwijket ne ichkatajpianimet. 19 Ne Maryam kikejketzki muchi uni wan yujyulmakak. 20 Wan ne takamet mukwepket wan inaket nujme ka yek ne Teut ipanpa muchi tay takaktiwit wan kitztiwit kenha ken kinhilwijket.
21 Wan kwak yekawket ne chikwey tunal pal kiyawaltekit, kitukaytijket Yeshu ken kinutzki ne tanawatiani kwak inteuk takatki tik iijti ne inan.
Shimon wan Hana kitat ne shulut
22 Wan kwak yekawket ne tujtunal pal mupupuat ken ina ne tajtuli ipal Moshe, kiwikaket ka Yerushalem pal kishpanuat ipal Tutajwan 23 ken nemi ijkwilujtuk tik ne tajtuli ipal Tutajwan ina: "ne ukich shinachpelua munutzas ipal Tutajwan", 24 wan pal kitakuliat ken ina ne tajtuli ume kukulutzin ush ume wilutzin.
25 Wan né nemituya se chulet tik Yerushalem itukay Shimon, wan ini takat kichiwa katka sema tay yek wan kitakamati katka tay nemi tuktijtuk wan tejchia ma munutza Israel, wan ne Ijiutzin nemituya ijpak. 26 Wan ne Ijiutzin kineshtilijtuya ka inte yawi miki asu achtu inte kitztuk ne Mawaltijtuk ipal Tutajwan. 27 Wan ajsik ka teupan itech ne Ijiutzin, wan kwak ne tetekuwan kikalaktijket ne kunetzin Yeshu ma kichiwilikan tay ina ne tajtuli, 28 yaja kiululuj tik imajmajkul wan inak ka wey ne Teut, wan inak:
29 —Nutekuyu, tikchulultiaya mutekitini
ma nejmachnemi ken tinatuk
30 ika kitztiwita nujnuish mutamakishtilis
31 ne tikajshitij pal muchi tukniwan:
32 se tawil taneshtiani pal tejtechan
wan pal tzitzinaka mutechan Israel.
33 Wan ishpuyawit ne teteku wan ne tenan kwak kikakket. 34 Wan Shimon kinteuchijki wan kilwij Maryam ne inan:
—Shikita yajini, kitalijtiwit pal miak tik Israel wetzit wan muketzat, wan ken se pal muishmati wan pal muishtenewat sejse wan sejse; 35 taja nusan tiaw timumati ken kalakiskia se espadaj tik muyulu; ini pal muneshtia tay inat tik inyujyulu miak.
36 Wan nemituya se lamajtzin, se siwataketzani itukay Hana, ikunew Panuel pal ne tribuj pal Asher; yaja munamiktij kwak siwapil wan sennemik iwan ne ishulejyu chikume shiwit. 37 Mikik ne ishulejyu wan ashan kipiatuya nawpual-nawi shiwit. Yaja inte kiajkawa katka ne teupan; senpa panu katka kisejselia mayan wan mutajtawelia ka tayua wan ka tunal. 38 Wan tik uni horaj ajsik kiyektenewa ne Teut, wan pejki kinnutza muchi ne tejchiat ma mumakishti Yerushalem.
39 Wan kwak kichijtiwit muchi tay techtuktia ne tajtuli ipal Tutajwan, muishkwepket ka Galilaya wan yajket intechan, itukay Nazaret. 40 Weyki ne kunetzin wan chikawayak wan temik iwan tamatilis, wan ne itetasujtalis ne Teut nemik ijpak.
Ne piltzin Yeshu mumachtia iten ne teupan
41 Muchi ne shijshiwit ne itejteku yawit katka Yerushalem tik ne ilwit ipal ne Paskwaj, 42 wan kwak ne piltzin kipiatuya majtakti-ume shiwit wan tejkuket ipal ne ilwit ken senpa, 43 kwak tamiket ne tujtunal wan yawit mukwepat, walmukawki ne piltzin Yeshu tik Yerushalem wan ne itejteku inte kimatket. 44 Yejemet kikejketzket ka yaja nejnemi intzalan ne senpashaluanimet wan yajket yajket se tunal kitejtemuat nujme itzalan ne inmiakwan wan muchi ká kishmatit, 45 wan kwak inte kiajsiket, mukwepket Yerushalem kitejtemuat.
46 Wan kwak panuket yey tunal kiajsiket muetztuk iten ne teupan tatajku ne tamachtianimet takaki wan tajtani. 47 Muchi ne kikakit ishpuyawit katka ipanpa ne itamatilis wan ne inajnankilis. 48 Kwak kitaket, ne inan kiajwak, kilwij:
—Pipil! Ken ka titechchiwilij ijkini? Iwan muteku techkukuj timetztejtemuat!
49 Wan yaja kinhilwij:
—Ken ka annentiwit nechtejtemuat wan te ankimatit ka ninemi kan nemi tay ipal ne Nuteku?
50 Wan yejemet inte kimatket tay kinekituya ina. 51 Wan yaja temuk inwan ka Nazaret wan kintakamatki, wan ne inan kikejketzki muchi tik iyulu. 52 Wan Yeshu yawi katka iishpan tik tamatilis, wan tik iweyka, wan tik itetasujtalis ne Teut wan ne takamet.
Yojan tanutza wan kinmaka ulyuj miak
3 Kwak ne taltikpaktuktiani Tiberius kipiatuya kashtul shiwit ka tatuktia, kwak ne Pontius Pilatus tatuktia katka tik Yudaya, ne Herodes takutuntuktiani ipal Galilaya, ne Pilipo, ne iikaw, takutuntuktiani tik ne talmet ipal Ituraya wan Trakona wan ne Lisanias takutuntuktiani ipal Abilene, 2 wan kwak Hanan wan Kayapa ne weypalej, ajsik ne ipalabraj ne Teut itech Yojan ikunew Zakarya tik ne kojtan, 3 wan kiski pashalua tik ne tajtal inawak ne apan Yarden kinajnawatia teulyujmakalis ipal yulpatalis ma mutapupulwi tay titateyekchijtiwit, 4 ken muijkwilujtuk tik ne iamaw ne taketzani Ishaya kwak ina:
Se tzajtzi tik ne kojtan:
"Shiujpetawakan ipal Tutajwan,
shikmelawakan kan taksa witz!
5 Muchi ne ujustut mutemasket
wan ne tejtepet mutemultisket,
tay malintuk mukwepas melawak
wan ne tetal muchiwas petztik,
6 wan muchi ká kipiat iweyka
yawit kitat itamakishtilis ne Teut!"
7 Kinhilwij ne takamet wan siwatket kistiwit pal kinmaka ulyuj:
—Kuatal! Ká metzinhilwitilij ma shichulukan iishpan ne kwalan witz? 8 Shumet shitamakakan anmutakil yek ipal yulpatalis. Wan maka shipewakan muilwiat: "Su tejemet tiipilawan Abraham!" ika naja nimetzinhilwia ka ne Teut weli kiskalia tepilawan ipal Abraham hasta tik uni tejtet! 9 Nusan nemia ne tepusti itech inelwayu ne kwajkwawit, wan muchi ne kwajkwawit inte tamakat yejyek itakil mutzinewat wan mutamutiliat ne tit!
10 Wan kitajtaniliat katka:
—Su ijkiuni, tay welit tikchiwat?
11 Yaja kinhilwia:
—Ká kipia ume wipil ma kimaka sé ká ne inte kipia, wan ká kipia takwal, kenhaya.
12 Nusan ajsiket sejse tumintepewani mumakat ulyuj, wan kilwijket:
—Tamachtiani, tay welit tikchiwat?
13 Yaja kinhilwij:
—Shitajtanikan semaya keski metzinhilwijtiwit ma shikanakan, inte mas.
14 Nusan sejse tasumani kitajtanilijket:
—Wan tejemet tay welit tikchiwat?
Wan kinhilwij:
—Maka shikchiwilikan aka tay inte yek pal ankishtiliat tumin, wan shimutekipanukan iwan ne anmupatiw.
15 Muchi mutajtaniliat katka tik inyujyulu asu ne Yojan anka ne Mawaltijtuk, 16 wan Yojan nankilij:
—Naja sema nimetzinmaka ulyuj iwan at; witz seuk mas tajpaltik que naja, wan naja inte nitatka nian pal niksutuma ne iishmekayu ne ikak! Yajane metzinmakas ulyuj tik ne Ijiutzin wan tik tit! 17 San tatzejtzelus wan kipupus muchi ne tawial; ne yek kitepewas ijtik ishajkal wan ne tajsul kitatis tik tit inte keman sewi.
18 Yaja kinyeknawatia katka wan ina katka miak kiane.
19 Wan kwak yaja kiajwak ne takutuntuktiani Herodes ipanpa Herodia ne isiwaw ne iikaw wan ipanpa muchi tay ne Herodes kichijtuya tay teyek, 20 Herodes kichijki nusan seuk tay teyek wan kiwikak ne Yojan tzaktuk.
21 Kwak muchi ne techan mumakak ulyuj, nusan ne Yeshu mumakak wan kwak nemituya kinutza ne Teut, tapuik ne ilwikak 22 wan waltemuk ne Ijiutzin ijpak iwan ne iweyka se wilut, wan mukakik ka ikajku:
—Taja tinutelpuch yektasujtatuk, taja nimetzita yek.
Ne inoywan Yeshu
23 Ne Yeshu, kwak pejki, kipiatuya achka senpual-majtakti shiwit, wan mumati ka yaja ikunew Yosep, ikunew Eli
24 ikunew Matat ikunew Lewi ikunew Malki ikunew Yanay ikunew Yosep
25 ikunew Matitia ikunew Amotz ikunew Najum ikunew Hesli ikunew Nagai
26 ikunew Majat ikunew Matitia ikunew Shimi ikunew Yosep ikunew Yoda
27 ikunew Yojanan ikunew Resa ikunew Zerubabel ikunew Shaltiel ikunew Neri
28 ikunew Malki ikunew Adi ikunew Kosam ikunew Almadam ikunew Er
29 ikunew Yose ikunew Eliezer ikunew Yorim ikunew Matat ikunew Lewi
30 ikunew Shimon ikunew Yuda ikunew Yosep ikunew Yonam ikunew Elyakim
31 ikunew Melea ikunew Mena ikunew Matata ikunew Natan ikunew Dawid
32 ikunew Yeshay ikunew Obed ikunew Boaz ikunew Salmon ikunew Najshon
33 ikunew Aminadab ikunew Aram ikunew Hetzron ikunew Peretz ikunew Yuda
34 ikunew Yakob ikunew Itzak ikunew Abraham ikunew Tera ikunew Najor
35 ikunew Serug ikunew Ru ikunew Peleg ikunew Eber ikunew Shela
36 ikunew Kaynan ikunew Arpakshad ikunew Shem ikunew Noa ikunew Lamek
37 ikunew Metushela ikunew Hanok ikunew Yered ikunew Mehalalel ikunew Kaynan
38 ikunew Enosh ikunew Shet ikunew Adam ikunew ne Teut.
Ne Bibliaj Tik Nawat · © 2008, 2012 Jan Morrow